ꓗꓽ ꓡꓼ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓚꓱ ꓢꓯꓼ ꓙꓳˍ ꓟ ꓗꓽ ꓡꓼ ꓢꓶꓽ ꓗꓪ ꓠꓬ ꓦꓲꓔꓮꓟꓲꓠ ꓚ ꓟꓬꓽ ꓠꓬꓲ ꓙꓳˍ ꓟ ꓥ ꓢꓲ ꓚꓮꓡꓚꓲꓴꓟ꓾ ꓑꓧꓳꓢꓑꓧꓳꓣꓳꓴꓢ꓾ ꓲꓣꓳꓠ꓾ ꓑꓳꓔꓮꓢꓢꓲꓴꓟ꓾ ꓟꓮꓖꓠꓰꓢꓲꓴꓟ꓾ ꓗꓧꓣꓳꓟꓲꓴꓟ꓾ ꓦꓲꓔꓮꓟꓲꓠ ꓮ ꓐꓰ ꓦꓲꓔꓮꓟꓲꓠ ꓐ-ꓚꓳꓟꓑꓡꓰꓫ ꓐꓴ ꓙꓳˍ ꓟ ꓥ ꓡꓳ= ꓗꓽ ꓡꓼ ꓢꓶꓽ ꓗꓪ ꓬꓲꓻ ꓙꓬ 80% ꓙꓳ ꓢꓲ ꓚꓮꓡꓳꓣꓲꓰꓢ ꓢꓯꓼ ꓠꓬ ꓠꓲꓸˍ ꓡꓳ=

ꓗꓽ ꓡꓼ ꓢꓶꓽ ꓔꓯ ꓠꓬ ꓬꓲ ꓢꓶꓽ꓾ ꓬꓲ ꓢꓶꓽ ꓬꓲꓻ꓾ ꓬꓲ ꓙꓴꓺ꓾ ꓥ ꓠꓬ ꓞꓼ ꓐꓳ ꓬꓲꓻ ꓗꓪ ꓔꓲꓹ ꓗꓷ ꓢꓲ ꓜꓽ ꓐ ꓡˍ ꓟ ꓥ ꓢꓲ꓾ ꓞꓳ ꓤ ꓧꓪꓽ ꓖꓳ ꓓꓱꓽ ꓔꓬ ꓢꓻ ꓓꓴ ꓐꓱ ꓶ ꓮ ꓟꓬꓹ ꓔꓳꓹ ꓙ ꓖꓶ ꓐ ꓡˍ ꓟ ꓑꓶꓸ ꓓꓴ ꓗꓽ ꓡꓼ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=

ꓟꓬ ꓢꓶꓽ ꓢꓯꓼ ꓙꓳ ꓡ ꓝꓲˍ ꓡꓳ=

ꓗꓽ ꓡꓼ ꓢꓶꓽ ꓜꓽ ꓖꓶˍ ꓕꓯ ꓠꓬ ꓟꓬ ꓢꓶꓽ ꓐꓱ ꓶ ꓮ ꓘꓶꓸ ꓙꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓞꓲꓼ ꓟꓳꓽ ꓡ ꓕꓯ ꓔꓳꓹ ꓜꓳꓽ ꓪˍ ꓟ ꓟꓬ ꓢꓶꓽ ꓶ ꓡꓰˍ ꓟ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶˍ ꓡꓳ꓾ ꓐꓰ ꓠꓯꓻ ꓞꓲꓼ ꓚꓱꓹ ꓕꓳꓽ ꓶ ꓗꓪ ꓐꓯ ꓔ ꓡꓳ= ꓗꓽ ꓡꓼ ꓢꓶꓽ ꓗꓪ Antioxidant ꓢꓯꓼ ꓐꓴ ꓠꓬ ꓟꓬ ꓢꓶꓽ ꓔꓯ oxidativestress ꓑꓶꓸ ꓓꓴ ꓐꓬ ꓡꓰˍ ꓟ ꓗꓪ ꓐꓰ ꓗꓽ ꓕꓸ ꓖꓶ ꓢꓲ ꓟꓬ ꓢꓶꓽ ꓒꓴ ꓛ ꓛ ꓗꓷ ꓡꓰˍ ꓟ ꓔꓯˍ ꓟꓲ ꓠꓲꓸ ꓡꓰ ꓝꓲˍ ꓡꓳ=

ꓗꓽ ꓡꓼ ꓢꓶꓽ ꓬꓲꓻ ꓔꓯ ꓬꓲꓻ ꓙꓬ ꓐꓰ ꓑꓯꓸ ꓗꓷ ꓢꓲ ꓐꓬꓽ ꓬꓲꓻ ꓧꓳꓽ ꓢꓲ ꓠꓯꓼ ꓠꓯꓼ ꓕꓯ ꓓꓳꓻ ꓖꓶˍ ꓠꓬ ꓟꓬꓽ ꓢꓶꓽ ꓢꓯꓼ ꓙꓳ ꓡˍ ꓡꓳ=

ꓠꓲꓹ ꓟ ꓘꓶ ꓡꓶꓽˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ=

ꓗꓽ ꓡꓼ ꓢꓶꓽ ꓠꓬ ꓠꓲꓹ ꓟ ꓘꓶ ꓡꓶꓽ꓾ ꓠꓲꓹ ꓟ ꓟꓽ ꓢꓲ ꓡꓲ ꓟ ꓔꓯ ꓠꓲꓸ ꓡꓰ ꓝꓲ ꓢꓲ ꓬꓲꓼ ꓟꓶ ꓢ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓪꓴꓸ ꓓꓵ ꓗꓴꓹ ꓙꓲ ꓗꓪ ꓗꓽ ꓡꓼ ꓢꓶꓽ ꓬꓲ ꓞꓶꓻ ꓟꓰꓻ ꓖꓶˍ ꓠꓬ ꓬꓲꓼ ꓟꓶ ꓢ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓪꓴꓸ ꓓꓵ ꓠꓻˍ ꓟ ꓔꓯˍ ꓟꓲ ꓓ ꓡꓰ ꓝꓲˍ ꓡꓳ=

ꓠꓱ ꓫꓳꓸ ꓟꓸ ꓗꓪ ꓐꓰ ꓓꓵꓽ ꓡˍ ꓟ ꓠꓻ ꓐꓴ ꓔꓯ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓗꓽ ꓡꓼ ꓢꓶꓽ ꓜꓽ ꓖꓶˍ ꓕꓯ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓙꓳ ꓡꓰ ꓝꓲ ꓢꓲ ꓖꓳ ꓓꓱꓽ ꓘꓴꓽ ꓗꓪ ꓟ ꓓꓳꓼ ꓐꓴ ꓔꓯ ꓣꓴ ꓦ ꓖꓶˍ ꓡꓳ=

ꓠꓲꓹ ꓟ ꓔꓯ ꓔꓬ ꓢ ꓡꓰ ꓝꓲˍ ꓡꓳ=

ꓗ: ꓡꓼ ꓢꓶꓽ ꓠꓬ ꓠꓲꓹ ꓟ ꓫꓵꓽ ꓙꓴꓽ ꓔꓯ ꓙꓲꓻ ꓡꓰ ꓝꓲ ꓐ ꓡˍ ꓡꓳ= ꓗ: ꓡꓼ ꓢꓶꓽ ꓗꓪ ꓠꓬ ꓠꓲꓹ ꓟ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓠꓲꓹ ꓟ ꓫꓵꓽ ꓙꓴꓽ ꓛꓵꓽ ꓡꓰˍ ꓟ ꓟꓽ ꓒꓬꓱꓼ ꓡꓰ ꓠ ꓗꓽ ꓕꓸ ꓖꓶˍ ꓟ ꓡꓰꓽ ꓟꓽ ꓞꓲꓺ ꓫꓵꓽ ꓘꓴꓽ ꓗꓪ ꓟ ꓖꓳ ꓓꓱꓽ ꓐꓱ ꓶ ꓣꓱꓽ ꓬꓯꓼ ꓖꓴ ꓟꓽ ꓙꓳ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓐꓴ ꓔꓯˍ ꓟꓲ ꓠꓲꓸ ꓡꓰ ꓝꓲˍ ꓡꓳ= ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓬꓯꓼ ꓖꓴ ꓙꓳˍ ꓟ ꓗꓳ-ꓡꓯ-ꓢ-ꓕ-ꓣꓮ ꓔꓯˍ ꓟꓲ ꓟꓬꓽ ꓡ ꓠ ꓬꓰ ꓙ ꓖꓶˍ ꓡꓳ= ꓠꓲꓹ ꓟ ꓫꓵꓽ ꓙꓴꓽ ꓘꓴꓽ ꓗꓪ ꓬꓲ ꓞꓶꓻ ꓮ ꓟꓬꓹ ꓡꓳꓽ ꓢꓲ ꓛꓵꓽˍ ꓟ ꓟꓽ ꓒꓬꓱꓼ ꓡꓰ ꓠˍ ꓟꓲ ꓗꓽ ꓕꓸ ꓖꓶˍ ꓡꓳ=

ꓦꓰꓼ ꓟ ꓙꓲꓺ ꓢꓻ ꓡꓰ ꓝꓲ ꓐ ꓡˍ ꓡꓳ=

ꓗꓽ ꓡꓼ ꓢꓶꓽ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓬꓲ ꓪꓴꓻ ꓓꓽ ꓟ ꓐꓰ ꓜꓽ ꓓꓴ ꓙꓲꓺ ꓖꓶˍ ꓟ ꓬꓲ ꓪꓴꓻ ꓚꓱꓹ ꓔꓯ ꓫꓬ ꓡꓰ ꓠ ꓬꓰ ꓖꓶˍ ꓡꓳ= ꓜꓽ ꓓꓴ ꓙꓲꓺˍ ꓟ ꓟꓬꓱꓽ ꓔꓯ ꓢꓯꓼ ꓡꓴꓽ ꓖꓶ ꓢꓲ ꓧꓪꓽ ꓖꓳ ꓓꓱꓽ ꓗꓪ ꓢꓯꓼ ꓛꓵꓼ ꓣꓴˍ ꓟ ꓔꓯˍ ꓟꓲ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓗꓽ ꓡꓼ ꓢꓶꓽ ꓗꓪ ꓟ ꓚꓱˍ ꓟ ꓢꓯꓼ ꓠꓬ ꓜꓽ ꓓꓴ ꓙꓲꓺˍ ꓟ ꓰꓠꓜꓬꓟꓰ ꓓꓳ ꓡ ꓠ ꓡꓵꓹ ꓫꓴ ꓖꓶˍ ꓡꓳ= ꓖꓳ ꓡꓱ ꓠꓬ ꓬꓲ ꓪꓴ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓓꓻ ꓡꓰ ꓝꓲˍ ꓟ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓡꓳ=

ꓧꓪꓽ ꓗꓴꓹ ꓙꓲ ꓐꓱ ꓶ ꓙꓲˍ ꓡꓳ=

ꓗꓼ ꓡꓼ ꓢꓶꓽ ꓗꓪ ꓙꓳˍ ꓟ ꓮꓠꓔꓲꓳꓫꓲꓓꓮꓠꓔꓢ ꓐꓴ ꓠꓬ ꓧꓪꓽ ꓗꓴꓹ ꓙꓲ ꓔꓯ ꓫꓬꓽ ꓡꓰ ꓝꓲ ꓢꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶˍ ꓡꓳ= ꓒꓬꓱꓽ ꓟꓬ ꓗꓪ ꓬꓲ ꓢꓶꓽ ꓓꓲˍ ꓟ ꓔꓯ ꓓꓻ ꓡꓰ ꓝꓲ ꓢꓲ ꓚꓵꓸ ꓬꓲꓻ ꓘꓴ ꓔꓯ ꓥˍ ꓟꓲ ꓣꓳ ꓡꓰ ꓝꓲ ꓢꓲ ꓠꓬꓲ ꓧꓪꓽ ꓗꓴꓹ ꓙꓲ ꓗꓪ ꓒꓬꓱꓼˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶ ꓐ ꓡˍ ꓡꓳ= ꓝꓣꓰꓰ ꓣꓮꓓꓲꓚꓮꓡ ꓑꓶꓸ ꓓꓴ ꓧꓪꓽ ꓗꓴꓹ ꓙꓲ ꓐꓬ ꓡꓰˍ ꓟ ꓔꓯˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ=

ꓪꓳꓽ ꓔꓳ ꓐꓴ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ=

ꓗ: ꓡꓼ ꓢꓶꓽ ꓬꓲ ꓞꓶꓻ ꓠꓬ ꓪꓳꓽ ꓔꓳ ꓐꓬ ꓡꓰ ꓝꓲˍ ꓟ ꓚꓰꓡꓡ ꓐꓴ ꓥ ꓟ ꓳꓢꓔꓰꓳꓚꓡꓮꓢꓔꓰ ꓚꓰꓡꓡ ꓐꓴ ꓟꓬꓱꓽ ꓬꓰˍ ꓟ ꓔꓯ ꓠꓲꓸ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓗ: ꓡꓼ ꓢꓶꓽ ꓗꓪ ꓳˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓢꓯꓼ ꓙꓳˍ ꓟ ꓑꓶꓸ ꓓꓴ ꓡꓰꓹ-ꓒꓯꓸ-ꓠ ꓠꓻ ꓙꓳ ꓢꓴ ꓐꓴ ꓗꓪ ꓪꓳꓽ ꓔꓳ ꓬꓲ ꓝꓲꓸ ꓳ ꓠꓻˍ ꓟ ꓔꓮ ꓓꓻ ꓡꓰ ꓝꓲˍ ꓡꓳ=

ꓪꓴꓽ ꓓꓲꓻ ꓗꓪ ꓡꓳ ꓓꓲ ꓒꓬꓱꓼ ꓡˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ

ꓗ: ꓡꓼ ꓢꓶꓽ ꓬꓲ ꓧꓶꓽ ꓔꓯ ꓪꓳꓽ ꓙꓲꓽ ꓛꓵ ꓐꓰ ꓜꓽ ꓖꓶˍ ꓕꓯ ꓪꓴꓽ ꓓꓲꓻ ꓗꓪ ꓡꓳ ꓓꓲ ꓒꓬꓱꓼ ꓡˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ=