ꓙꓲꓻ ꓫꓬ ꓢꓴ ꓬꓳ‐ꓢꓷ ꓑꓮꓲꓽ(St.Joseph)

ꓙꓲꓻ ꓫꓬ ꓢꓴ ꓬꓳ‐ꓢꓷ ꓑꓮꓲꓽ

ꓙꓲꓻ ꓫꓬ ꓢꓴ ꓬꓳ‐ꓢꓷ ꓠꓬ ꓟꓬꓱꓽ ꓬꓰ ꓢꓴ ꓐꓴ ꓐꓰ ꓘꓴ ꓜꓲꓼ ꓞꓳ ꓮ ꓙꓵꓽ ꓔꓯ ꓬꓰ ꓙ ꓢꓴ ꓢꓲꓽ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ ꓢꓲꓽ ꓫꓬ ꓢꓴ ꓬꓳ‐ꓢꓷ ꓠꓬ ꓑꓴ ꓙꓵ ꓒꓽ ꓐꓰ ꓡ‐ꓢꓲ‐ꓟ ꓟꓬꓱꓽ ꓬꓰ ꓢꓴ ꓥ ꓡꓳ꓿

ꓢꓲꓽ ꓫꓬ ꓢꓴ ꓬꓳ‐ꓢꓷ ꓠꓬ ꓟ‐ꓡꓲ ꓐꓰ ꓢꓲꓺ ꓒ ꓬꓰ‐ꓢꓴ ꓐꓰ ꓕꓲ ꓪ ꓠ‐ꓢ‐ꓡꓱ ꓡꓳ ꓒꓱ ꓗꓪ ꓢꓯ. ꓔꓬ ꓗꓷ ꓢꓴ ꓥ ꓡꓳ꓿ ꓢꓲꓽ ꓫꓬ ꓢꓴ ꓬꓳ‐ꓢꓷ ꓠꓬ ꓑꓴ ꓙꓵ (ꓡ‐ꓢꓲ‐ꓟ ) ꓟꓬꓱꓽ ꓔꓯ ꓬꓰ ꓢꓲ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓟ, ꓟ ꓟ‐ꓡꓲ ꓔꓯ ꓬꓰ ꓔ ꓠꓬꓲ ꓙ ꓗꓷ ꓟ ꓥ ꓡꓳ꓿ ꓢꓲꓽ ꓫꓬ ꓢꓴ ꓬꓳ‐ꓢꓷ ꓡꓰ ꓟ. ꓖꓶ ꓡ ꓟ ꓠꓬ ꓢꓲꓽ ꓫꓬ ꓟ ꓐꓰ ꓔꓱ ꓚꓵ, ꓟ ꓟꓬꓱꓽ ꓮ ꓙꓵꓽ ꓠꓬ ꓒꓵꓽ ꓟ ꓟꓬꓱꓽ ꓥ ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓟꓬꓱꓽ ꓟ ꓬꓰ ꓬꓰ ꓔꓬ ꓢꓲ ꓠꓬꓲ ꓐꓴ ꓐꓴ ꓡꓰ ꓔꓬ ꓠꓬ ꓝꓴꓲ ꓗꓪ ꓓꓵꓽ ꓡꓰ  ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓐꓴ ꓐꓴ ꓡꓰ ꓟꓬꓱꓽ ꓟꓽ ꓬꓰ ꓔꓬ ꓟ ꓠꓬ ꓟꓽ ꓙꓲꓻ ꓟ ꓥ ꓡꓳ ꓐꓰ ꓢꓲꓽ ꓫꓬ ꓢꓴ ꓬꓳ‐ꓢꓷ. ꓡꓰ ꓟ. ꓖꓶ ꓡ ꓟ ꓥ ꓡ ꓳ꓿

May Day ꓐꓯ ꓟ ꓕꓲ ꓟꓲ ꓠꓯ ꓡꓱ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓦꓬꓼ ꓠꓬꓲ ꓐꓯ ꓟ ꓔꓯ 1955 ꓘꓳꓼ ꓕꓯ ꓔꓲꓺ ꓒ ꓪ ꓔꓲ (Pius) 12 ꓠꓬ Italy ꓗꓴꓷꓼ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓦꓬꓼ ꓠꓬꓲ ꓥ ꓡꓳ ꓐꓰ 5 ꓦ ꓟ ꓕꓲ ꓠꓬꓲ ꓔꓯ ꓟꓬꓱꓺ ꓖꓶ ꓗꓷ ꓟ ꓥ ꓡꓳ꓿ 5 ꓦ ꓟ ꓕꓲ ꓠꓬꓲ ꓠꓬ ꓢꓲꓽ ꓫꓬ ꓢꓴ ꓬꓳ‐ꓢꓷ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓢꓲꓽ ꓫꓬ ꓢꓴ ꓬꓳ‐ꓢꓷ ꓠꓬ ꓠ‐ꓢ‐ꓡꓱ ꓗꓪ ꓔꓬ ꓢꓲ ꓠꓬꓲ ꓮ ꓘꓶ. ꓔꓱ ꓚꓵ ꓢꓴ ꓡ ꓞꓳ ꓥ ꓢꓲ ꓬꓲ. ꓠꓬ ꓟꓬꓱꓽ ꓮ ꓘꓶ. ꓢꓯꓼ ꓕꓵꓼ ꓢꓴ ꓥ ꓡꓳ꓿ ꓢꓲꓽ ꓫꓬ ꓢꓴ ꓬꓳ‐ꓢꓷ ꓠꓬ ꓟꓲ ꓠꓯ ꓕꓯ ꓢꓲ ꓢꓯ. ꓔꓬ ꓢꓴ ꓡ ꓞꓳ ꓮ ꓟꓬ, ꓟꓬꓱꓽ ꓬꓰ ꓔꓬ ꓢꓴ ꓐꓴ ꓔꓯ ꓬꓰ ꓙ ꓢꓴ ꓥ ꓡꓳ꓿ ꓝꓮꓲ 5 ꓦ ꓟ 1 ꓠꓬꓲ ꓠꓬ ꓢꓲꓽ ꓫꓬ ꓢꓴ ꓬꓳ‐ꓢꓷ ꓔꓯ ꓟꓬꓱꓺ ꓓꓳꓽ ꓟ ꓦꓬꓼ ꓠꓬꓲ ꓟꓬꓱꓽ ꓬꓰ ꓜ ꓢꓴ ꓮ ꓟꓬ, ꓐꓴ ꓑꓮꓲꓽ ꓦꓬꓼ ꓠꓬꓲ ꓟꓲ ꓥ ꓡꓳ꓿

ꓝꓮꓲ 1889 ꓘꓳꓼ ꓕꓯ ꓕꓲ ꓟꓲ ꓠꓯ ꓡꓱ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓑꓮꓲꓽ ꓦꓬꓼ ꓠꓬꓲ ꓐꓰ ꓟꓬꓱꓽ ꓗꓷ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓣꓳ ꓔꓯ ꓢꓲꓽ ꓫꓬ ꓟꓬꓱꓽ ꓮ ꓙꓵꓽ ꓠꓬ ꓟꓬꓱꓽ ꓓꓳꓽ ꓙꓳˍ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ 2 ꓕꓰ‐ꓢ‐ꓡꓳ‐ꓠꓲ‐ꓬ 3ꓽ‐10 ꓗꓪ ꓧꓶ. ꓕꓯ ꓠꓴ ꓪˍ ꓐꓰ ꓥꓪ ꓠꓴꓽ ꓔꓬ ꓔꓯ꓾ ꓟꓬꓱꓽ ꓬꓰ ꓟꓽ ꓫꓳ ꓢꓴ ꓙꓳˍ ꓠꓬꓲ ꓬꓲ ꓔꓯ ꓜ ꓕꓽ ꓜꓽ ꓝꓲꓲ ꓐꓰ ꓠꓴ ꓪ ꓔꓯ ꓕꓵꓼ ꓪ ꓖꓶ ꓗꓷꓳ ꓐꓰ ꓡꓳ. ꓟꓳ ꓪ ꓡꓳ꓿

ꓟꓲ ꓠꓯ ꓡ ꓞꓳ ꓐꓴ ꓚꓲ ꓛꓬ ꓐꓱ ꓶ ꓝꓮꓲ ꓕꓲ ꓦꓲꓻ ꓐꓱ ꓶ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓥ ꓡꓳ꓿ ꓢꓲꓽ ꓫꓬ ꓟ ꓟꓬꓱꓽ ꓬꓰ ꓟ ꓠꓬ ꓪꓴ‐ꓢ ꓡꓰ ꓬꓰ ꓥꓳꓽ ꓙꓱ ꓖꓶ ꓡ ꓟ ꓥ ꓡꓳ꓿ ꓣꓳ ꓬꓰ ꓔꓬ ꓟ ꓟꓬꓱꓽ ꓠꓬ ꓢꓲꓽ ꓫꓬ ꓠ, ꓟ ꓣꓳꓺ ꓚꓵ. ꓟ ꓥ ꓡꓳ꓿ ꓖꓳ ꓔ ꓢꓲ ꓪꓴ‐ꓢ ꓡꓰ ꓶꓽ ꓥꓳꓽ ꓙꓱ ꓖꓶ ꓡ ꓓꓴ ꓥꓳ꓿ ꓪꓴꓽ ꓟꓴ ꓡ ꓠ, ꓟ ꓟꓬꓱꓽ ꓬꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ ꓫ. ꓟꓳ ꓪ꓿