ꓥ-ꓟ-ꓢꓶꓽ (ꓬ-ꓟ-ꓕꓴꓽ) ꓙꓲꓻ ꓖꓴ ꓙꓳˍ ꓟ ꓚꓱꓹ

ꓥ ꓢꓶꓽ ꓠꓬ ꓬꓲ ꓙꓰꓽ ꓕꓲ ꓙꓰꓽ ꓐꓰ ꓕꓲ ꓙꓰꓽ ꓟꓽ ꓫꓱꓸ ꓡꓯ ꓘꓳ ꓥˍ ꓟꓲ꓾ ꓥ ꓢꓶꓽ ꓗꓪ ꓙꓳˍ ꓟ ꓢꓯꓼ ꓐꓴ ꓠꓬ ꓞꓳ ꓤ ꓐꓴ ꓐꓱ ꓶ ꓮ ꓟꓬꓹ ꓙꓲꓻ ꓖꓴ ꓙꓳˍ ꓟ ꓥ ꓡꓳ= ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓦꓰꓼ ꓟ ꓙꓲꓺ ꓢˍ ꓡꓳ= ꓮꓠꓔꓲꓳꓫꓲꓓꓮꓠꓔ ꓢꓯꓼ ꓥˍ ꓟꓲ ꓓꓵˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓙꓳ ꓡ ꓝꓲ ꓢꓲ ꓠꓻ ꓐꓴ ꓔꓯ ꓗꓽ ꓕꓸ ꓙ ꓐ ꓡˍ ꓡꓳ= ꓑꓳꓔꓮꓢꓢꓲꓴꓟ꓾ ꓦꓲꓔꓮꓟꓲꓠ ꓐ6꓾ ꓦꓲꓔꓮꓟꓲꓠ ꓚ꓾ ꓟꓮꓖꓠꓰꓢꓢꓲꓴꓟ꓾ ꓗ-ꓢꓲ ꓢꓯꓼ꓾ ꓑꓣꓳꓔꓰꓲꓠ ꓢꓯꓼ ꓐꓰ ꓬꓲ ꓞꓶꓻ ꓢꓯꓼ ꓮ ꓔꓲꓸ ꓤ ꓡꓰꓽ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓔꓯ ꓔꓬꓹ ꓢ ꓡꓰ ꓝꓲ ꓢꓲ ꓕꓲ ꓠꓬꓲ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓐꓴ ꓔꓯ ꓡꓴꓽ ꓖꓶ ꓐ ꓡˍ ꓡꓳ=

ꓥ ꓢꓶꓽ ꓜꓽˍ ꓟ ꓗꓪ ꓐꓰ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲ ꓟꓴꓸ ꓗꓷ ꓡꓰ ꓝꓲˍ ꓡꓳ=

ꓥ ꓢꓶꓽ ꓗꓪ ꓙꓳˍ ꓟ ꓑꓰꓚꓔꓲꓠ ꓐꓯ ꓟ ꓝꓲꓐꓰꓣ ꓢꓯꓼ ꓐꓴ ꓠꓬ ꓜꓽ ꓔ ꓟ ꓔꓯ ꓞꓼ ꓞꓼ ꓙꓲꓺ ꓐ ꓡ ꓠꓹ ꓟ ꓬꓰ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲꓺ ꓟꓴꓸ ꓗꓷ ꓡꓰ ꓝꓲ ꓐ ꓡˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓜꓽ ꓗꓷˍ ꓕꓯ ꓦꓰꓽ ꓛꓲ ꓐꓲ ꓡꓰ ꓝꓲˍ ꓟ ꓑꓶꓸ ꓓꓴ ꓟꓽ ꓠꓽ ꓠꓽ ꓜꓽ ꓠꓲꓹ ꓫꓵˍ ꓟ ꓠꓲꓹ ꓟ ꓟꓽ ꓒꓬꓱꓼ ꓡ ꓝꓲ ꓠꓬꓲ ꓘꓪꓽ ꓠꓬ ꓙꓲꓺ (ꓒꓸ ꓢ ꓡꓰ) ꓟ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓖꓶˍ ꓡꓳ= ꓖꓳ ꓡꓱ ꓥ ꓟꓲ ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ ꓐꓴ ꓠꓬ ꓮ ꓟꓬꓹ ꓟꓽ ꓜꓽ ꓠꓬ ꓪ ꓙꓲ ꓙꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓜꓽ ꓓꓴ ꓙꓲꓺˍ ꓟ ꓔꓯ ꓢꓯꓼ ꓖꓶˍ ꓡꓳ= ꓥ ꓢꓶꓽ ꓗꓪ ꓙꓳˍ ꓟ ꓝꓲꓐꓰꓣ ꓢꓯꓼ ꓐꓰ ꓗ-ꓢꓲ ꓢꓯꓼ ꓠꓬ ꓬꓲ ꓪꓴꓻ ꓓꓽ ꓟ ꓘꓴꓽ ꓗꓪ ꓛꓲꓺ ꓬꓰˍ ꓕꓯ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓐꓶꓽ ꓓꓲꓻ ꓐꓴ ꓐꓱ ꓶ ꓜꓽ ꓓꓴ ꓒꓬꓱꓼ ꓡꓰˍ ꓡꓳ= ꓐꓶꓽ ꓓꓲꓻ ꓐꓮꓚꓔꓰꓣꓲꓮ ꓕꓱ ꓟ ꓠꓬ ꓮ ꓟꓬꓹ ꓟꓬꓽ ꓡ ꓕꓯ ꓧꓪꓽ ꓖꓳ ꓓꓱꓽ ꓠꓯꓸꓼ ꓗꓪ ꓟ ꓢꓯꓼ ꓙꓳ ꓡ ꓠꓹ ꓟ ꓐꓰ ꓜꓽ ꓓꓴ ꓙꓲꓺ ꓐ ꓡ ꓠꓹ ꓟ ꓬꓰ ꓙ ꓖꓶˍ ꓡꓳ= ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ ꓠꓻ ꓔꓯ ꓥˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓮ ꓘꓶꓸ ꓒꓸ ꓟ ꓗꓪ ꓐꓰ ꓝꓱ ꓡꓰ ꓠ ꓬꓰ ꓠꓲꓹ ꓫꓵ ꓢꓴ ꓐꓱ ꓶˍ ꓟꓲ ꓥ ꓢꓶꓽ ꓠꓬ ꓜꓽ ꓠꓯꓹ ꓟ ꓜꓽ ꓓꓴ ꓕꓲ ꓫꓵꓽ ꓥ ꓡꓳ= ꓥ ꓢꓶꓽ ꓗꓪ ꓚꓮꓡꓳꓣꓲꓰ ꓢꓯꓼ ꓠꓲꓸ ꓢꓲ ꓑꓣꓳꓔꓰꓠꓰ ꓢꓯꓼ ꓐꓰ ꓠꓱꓸ ꓐꓯꓼ ꓙꓲꓻ ꓖꓴ ꓖꓶˍ ꓟ ꓢꓯꓼ ꓐꓴ ꓥ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ= ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓖꓳ ꓓꓱꓽ ꓔꓯ ꓝꓱ ꓡꓰ ꓝꓲ ꓢꓲ꓾ ꓕꓲ ꓑꓹ ꓕꓲ ꓑꓹ ꓜꓽ ꓠꓲꓹ ꓫꓵˍ ꓟ ꓠꓲꓹ ꓟ ꓔꓯ ꓙꓵꓽ ꓐ ꓡˍ ꓠꓬꓲ ꓮ ꓘꓶꓸ ꓟꓽ ꓒꓸ ꓡ ꓠ ꓬꓰ ꓙ ꓖꓶ ꓐ ꓡˍ ꓟ ꓥ ꓡꓳ=

ꓠꓲꓹ ꓟ ꓐꓰ ꓪꓴꓽ ꓓꓲꓻ ꓔꓯ ꓔꓬꓹ ꓢ ꓡꓰ ꓝꓲˍ ꓡꓳ=  ꓥ ꓢꓶꓽ ꓗꓪ ꓠꓲꓹ ꓟ ꓐꓰ ꓪꓴꓽ ꓓꓲꓻ ꓐꓱ ꓶ ꓟꓽ ꓙꓳ ꓟꓽ ꓓ ꓟ ꓢꓯꓼ ꓑꓳꓔꓮꓢꓢꓲꓴꓟ ꓢꓯꓼ ꓮ ꓟꓬꓹ ꓙꓳˍ ꓡꓳ= ꓝꓮꓲ ꓑꓳꓔꓮꓢꓢꓲꓴꓟ ꓢꓯꓼ ꓠꓬ ꓫꓵꓻ ꓓꓯˍ ꓟ ꓔꓯ ꓬꓯꓼ ꓡꓰ ꓝꓲˍ ꓟ ꓑꓶꓸ ꓓꓴ ꓠꓲꓹ ꓟ ꓐꓰ ꓗꓴꓸ ꓙꓲ ꓙꓳˍ ꓟ ꓠꓻ ꓟꓽ ꓒꓬꓱꓼ ꓡ ꓠꓹ ꓟˍ ꓟꓲ ꓗꓽ ꓕꓸ ꓙ ꓖꓶˍ ꓡꓳ=

ꓥ ꓢꓶꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ= ꓪꓳꓽ ꓒꓬꓽ ꓪꓳꓽ ꓟꓲ ꓐꓰ ꓢꓲꓹ ꓢꓶꓽ ꓐꓴ ꓗꓪ ꓞꓳ ꓤ ꓧꓪꓽ ꓖꓳ ꓓꓱꓽ ꓗꓪ ꓙꓲꓻ ꓓꓴ ꓖꓶˍ ꓟ ꓮꓠꓔꓲꓳꓫꓲꓓꓮꓠꓔ ꓮ ꓟꓬꓹ ꓙꓳˍ ꓟ ꓥ ꓡꓳ= ꓕꓱ ꓮꓠꓔꓲꓳꓫꓲꓓꓮꓠꓔ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓠꓻ ꓟꓽ ꓓꓵ ꓡ ꓠ ꓗꓽ ꓕꓸ ꓐ ꓡˍ ꓟ ꓢꓯꓼ ꓔꓯ ꓟꓴ ꓡ ꓝꓲ ꓢꓲ ꓠꓻ ꓤ ꓒꓬꓽ ꓤ ꓐꓴ ꓔꓯ ꓗꓽ ꓕꓸ ꓙ ꓐ ꓡˍ ꓡꓳ= ꓬꓲ ꓞꓲꓼ ꓟꓽ ꓟꓳꓽ ꓡꓰ ꓕꓯ ꓡꓰ ꓒꓬꓱꓽ ꓟꓳꓽ ꓡꓰˍ ꓟ ꓔꓯ ꓥˍ ꓟꓲ ꓗꓽ ꓕꓸ ꓙ ꓢꓲ꓾ ꓠꓲꓹ ꓟ ꓠꓻ꓾ ꓫꓵꓽ ꓓꓯ ꓠꓻ ꓒꓬꓱꓼ ꓡˍ ꓟ ꓚꓱꓹ ꓔꓯˍ ꓟꓲ ꓠꓲꓸ ꓡꓰ ꓝꓲˍ ꓡꓳ=

ꓢꓯꓼ ꓧꓪꓸ ꓗꓽ ꓠꓬꓹ ꓢꓴ ꓐꓴ ꓐꓱ ꓶˍ ꓟꓲ ꓙꓲꓻ ꓓꓴ ꓙꓳˍ ꓟ ꓥ ꓡꓳ= ꓥ ꓢꓶꓽ ꓗꓪ ꓕꓲ ꓠꓬꓲ ꓘꓴꓽ ꓗꓪ ꓖꓴ ꓡꓰ ꓟ ꓢꓯꓼ ꓐꓴ ꓔꓯ ꓡꓴꓽ ꓖꓶ ꓐ ꓡ ꓟ ꓑꓶꓸ ꓓꓴ ꓢꓯꓼ ꓧꓪꓸ ꓗꓽ ꓠꓬꓹ ꓢꓴ ꓐꓴ ꓐꓱ ꓶ ꓡꓰꓽ ꓟꓽ ꓞꓲꓺ ꓧꓪꓽ ꓖꓳ ꓓꓱꓽ ꓔꓬ ꓢ ꓠꓹ ꓟ ꓐꓱ ꓶ ꓚꓵꓸ ꓬꓲ ꓓꓳ ꓗꓪ ꓛꓲ ꓛꓲ ꓡꓵ ꓡꓯꓼ ꓡꓵ ꓢꓴ ꓐꓴ ꓐꓱ ꓶˍ ꓟꓲ ꓮ ꓘꓶꓸ ꓙꓲˍ ꓟ ꓥ ꓡꓳ= ꓪꓴꓽ ꓧꓶˍ ꓟ ꓔꓯ ꓪ ꓙꓲꓺ ꓜꓲꓽ ꓐ ꓡˍ ꓟ ꓑꓶꓸ ꓓꓴ ꓮ ꓘꓶꓸ ꓡꓲꓽˍ ꓟ ꓕꓯꓽ ꓢꓴ ꓐꓱ ꓶˍ ꓟꓲ ꓙꓲˍ ꓟ ꓥ ꓡꓳ=

ꓕꓱ ꓟꓬ ꓙꓲꓻ ꓖꓴ ꓙꓳˍ ꓟ ꓥ ꓢꓶꓽ ꓔꓯ ꓕꓲ ꓠꓬꓲ ꓗꓪ ꓮ ꓟꓬꓹ ꓢꓶꓽ ꓜꓽ ꓠꓯꓹ ꓡ?

ꓪꓧꓳ ꓜꓴꓻ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓗꓪ ꓠꓬ ꓕꓲ ꓠꓬꓲ ꓗꓪ ꓢꓲꓹ ꓢꓶꓽ 5 ꓢꓶꓽ ꓛꓲꓺ ꓜꓽ ꓠꓯꓹ ꓡꓳ꓾ ꓐꓰ ꓐꓯ ꓔ ꓢꓲ ꓥ ꓢꓶꓽ ꓠꓬꓲ ꓕꓲ ꓠꓬꓲ 2 ꓢꓶꓽ ꓛꓲꓺ ꓜꓽ ꓠꓯꓹ ꓡꓳ꓾ ꓐꓯ ꓔ ꓡꓳ=