ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ

ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ

1997 ꓘꓳꓼ ꓕꓯ ꓟꓲ ꓠꓯ ꓕꓱ ꓟ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓻ ꓡ ꓟ ꓚꓱꓹ ꓔꓯ ꓟꓳꓸ ꓖꓪ ꓙꓱꓻ ꓠꓹ ꓟ ꓐꓱ ꓶ ꓙꓮꓑꓮꓠ ꓗꓴꓷꓼ ꓔꓳꓗꓬꓳ ꓗꓪ ꓖꓪ ꓙꓱꓻ ꓜꓲꓼ ꓓꓴ ꓓꓽ ꓟ ꓬꓰ ꓗꓷꓳ= ꓖꓳ ꓕꓲ ꓙꓵꓹ ꓮꓟꓰꓣꓲꓚꓮ ꓗꓴꓷꓼ ꓠꓬ ꓙꓼ ꓶꓻ ꓤ ꓐꓰ ꓢꓯ ꓟꓴ_ ꓟ ꓬꓲꓸ ꓜꓴ ꓬꓲꓸ ꓟꓯꓼ ꓚꓮꓐꓳꓠ ꓚꓡꓴꓐ ꓐꓯ ꓢꓲ ꓬꓲꓸ ꓜꓴ ꓔꓶꓻ ꓔ ꓟ ꓥꓳ= ꓖꓳ ꓕꓲ ꓜꓴ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ꓾ ꓕꓱ ꓡꓱ ꓫꓵ ꓔꓯ ꓞꓳ ꓤ ꓮ ꓙꓵ ꓠꓬ ꓟꓶꓽ ꓡꓰ ꓠ ꓟꓽ ꓙꓳ ꓡꓰ ꓠ ꓢꓯꓼ ꓕꓵꓼ ꓟ ꓔꓯ ꓬꓲ ꓪ ꓠꓬ ꓟꓽ ꓠꓲꓹ ꓫꓵ꓾ ꓮ ꓡꓰꓳ ꓐꓯ ꓠꓬ ꓬꓲꓸ ꓪ ꓠꓬ ꓙꓼ ꓶ ꓤ ꓮ ꓟꓬꓹ ꓣꓱꓽ ꓔꓬ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓟ ꓑꓶ ꓓꓴ ꓙꓼ ꓶ ꓤ ꓣꓱꓽ ꓢꓲ ꓟꓴ ꓘꓴ ꓮ ꓟꓬꓹ ꓓꓳꓺ ꓡ ꓢꓲ꓾ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓕꓱ ꓡꓱ ꓫꓵ ꓬꓰ_ ꓟ ꓔꓯ ꓠꓽ ꓡꓰ ꓠ ꓬꓰ_ ꓟ ꓕꓱ ꓟ ꓖꓪ ꓙꓱꓻ ꓞꓷꓹ ꓔ ꓟ ꓟꓽ ꓓꓳꓺ ꓡ ꓠꓹ ꓟ ꓐꓱ ꓶ ꓮ ꓘꓶꓸ ꓢꓯꓼ ꓕꓵꓼ ꓗꓷꓳ= ꓬꓲ ꓪ ꓠꓬ ꓞꓳ ꓤ ꓮ ꓟꓬꓹ ꓢꓷꓸ ꓡꓰ ꓠ ꓒꓴ ꓮ ꓟꓬꓹ ꓣꓱꓽ ꓢꓲ ꓠꓬꓲ ꓕꓱ ꓟ ꓙꓼ ꓶ ꓤ ꓣꓱꓽ ꓢꓲ ꓟꓲꓽ ꓦꓲꓻ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓕꓱ ꓟ ꓔꓯ ꓦ ꓡꓰ ꓝꓲ ꓠꓬ ꓞꓳ ꓤ ꓮ ꓟꓬꓹ ꓠꓬ ꓫꓸ ꓓꓴ ꓔꓳꓹ ꓜꓳ ꓡ ꓥꓳ꓾ ꓐꓰ ꓕꓱ ꓡꓱ ꓐꓯ_ ꓡꓳ=

ꓕꓱ ꓡꓱ ꓐꓯ ꓢꓴ ꓐꓴ ꓠꓬ ꓮꓟꓰꓣꓲꓚꓮ ꓗꓪ ꓐꓰ ꓰꓢꓢꓳ ꓐꓯ ꓟ ꓟꓳ-ꓓꓳ ꓫꓬꓹ ꓔ ꓟ ꓚꓳꓟꓑꓮꓠꓬ ꓐꓴ ꓡꓰ ꓟꓽ ꓞꓲ ꓢ-ꓔꓲ꓾ ꓮ-ꓡꓴ-ꓟꓲ-ꓠꓲ-ꓬ꓾ ꓡꓯꓹ꓾ ꓖꓳ ꓟ ꓡꓰ ꓟꓽ ꓞꓲ ꓮ ꓔꓳꓸ ꓪ ꓠꓹ ꓟ ꓐꓱ ꓶ ꓬꓰ_ ꓟ ꓥ ꓔ ꓑꓳꓸ ꓚꓳꓟꓑꓮꓠꓬ ꓮ ꓟꓬꓹ ꓐ_ ꓟ ꓔꓯ ꓡꓳꓸ ꓟꓳ ꓪ ꓡꓳ= ꓬꓲ ꓪ ꓠꓬ ꓓꓳꓡꓡꓮꓣ 100 ꓫꓬꓹ ꓖꓴ ꓠ ꓬꓰ ꓢꓲ ꓠꓬꓲ ꓔꓦ ꓗꓪ ꓐꓰ ꓞꓳ ꓤ ꓮ ꓟꓬꓹ ꓢꓷꓸ ꓡꓰ ꓠ ꓬꓰ ꓢꓲ꓾ ꓕꓱ ꓡꓱ ꓟꓴ ꓘꓴ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓙꓼ ꓔꓯ ꓠꓽ ꓩꓴ ꓠꓬ ꓫꓸ ꓡ ꓟ ꓚꓱꓹ ꓔꓯ ꓔꓦ ꓗꓪ ꓐꓰ ꓐꓯ ꓑꓶ ꓩꓴ ꓡ ꓟ ꓔꓯ ꓡꓳꓸ ꓟꓳ ꓪ ꓡꓳ= ꓖꓳ ꓟ ꓠꓬ ꓔꓳꓗꓬꓳ ꓗꓪ ꓐꓰ ꓖꓪ ꓙꓱ ꓜꓲꓼ ꓓꓴ ꓔꓯ ꓟꓽ ꓪ ꓐꓯ_ ꓟ ꓬꓲꓸ ꓟꓸ ꓟꓲꓽ ꓓꓳꓺ ꓡ ꓟ ꓥ ꓡꓳ= ꓟꓲꓽ ꓦꓲ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓚꓮꓣꓐꓳꓠ ꓓꓳꓺ ꓡ ꓝꓲ_ ꓟ ꓕꓱ ꓡꓱ ꓫꓵ ꓔꓯ ꓠꓽ ꓩꓴ ꓠꓬ ꓞꓳ ꓤ ꓮ ꓟꓬꓹ ꓠꓬ ꓟꓬꓱꓽ ꓟꓽ ꓙꓳ ꓗꓷ ꓡꓰ ꓢꓲ꓾ ꓝꓲꓸ ꓗꓼ_ ꓟ ꓮ ꓟꓬꓹ ꓒꓬꓱꓼ ꓡ ꓓꓴ ꓥꓳ ꓐꓰ ꓕꓱ ꓡꓱ ꓐꓯ_ ꓡꓳ=

1997 ꓘꓳꓼ 10 ꓦ ꓟ 29 ꓠꓬꓲ ꓕꓯ ꓐꓳ ꓛꓱ ꓩꓴ ꓡ_ ꓟ ꓖ-ꓓꓲ-ꓬ ꓐꓯ_ ꓟ ꓕꓳ ꓶ ꓗꓪ ꓠꓬ ꓐꓳ-ꓐꓣꓳꓪꓟ ꓐꓯ ꓢꓴ ꓟ ꓡꓰ ꓕꓱ ꓡꓱ ꓔꓳꓗꓬꓳ ꓖꓪ ꓙꓱ ꓜꓲꓼ ꓓꓴ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓔꓯ ꓠꓽ ꓩꓴ ꓓꓴ ꓕꓱ ꓟ ꓔꓯ ꓟꓽ ꓪ ꓐꓯ ꓟ ꓢꓷꓸ ꓡꓰ ꓝꓲ_ ꓟ ꓠꓬ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓥ ꓟꓲ ꓕꓱ ꓟ ꓔꓯ ꓕꓽ ꓐ ꓐꓰ ꓐꓯ ꓟ ꓬꓲꓸ ꓟꓸ ꓟꓲꓽ ꓓꓳꓺ ꓡꓰ ꓝꓲ_ ꓟ ꓥ ꓡꓳ ꓐꓰ ꓕꓱ ꓡꓱ ꓐꓯ_ ꓡꓳ= ꓚꓮꓣꓐꓳꓠ ꓚꓡꓴꓐ ꓐꓯ ꓟ ꓕꓱ ꓟ ꓔꓳꓗꓬꓳ ꓖꓪ ꓙꓱ ꓜꓲꓼ ꓓꓴ ꓔꓯ ꓟꓽ ꓪ ꓐꓯ ꓢꓴ ꓕꓱ ꓕꓲ ꓜꓴ ꓠꓬ ꓞꓳ ꓤ ꓬꓲ ꓜꓴ ꓬꓲ ꓟꓯꓼ ꓔꓯ ꓥ ꓟꓲ ꓠꓲꓹ ꓟ ꓐꓬ ꓡꓰ ꓠ ꓬꓰ ꓢꓲ ꓓꓳꓽ ꓐꓳ ꓑꓶ ꓡ ꓟ ꓟꓰꓓꓲꓮ ꓔꓯ ꓥ ꓟꓲ ꓗꓪ ꓐꓰ ꓕꓱ ꓟ ꓔꓯ ꓟꓽ ꓪ ꓐꓯ_ ꓟ ꓔꓯ ꓕꓱ ꓡꓱ ꓬꓰ ꓡꓳ= ꓖꓳ ꓡꓱ ꓬꓰ ꓕꓯ ꓬꓲ ꓪ ꓠꓬ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓔꓯ ꓒꓴ ꓮ ꓟꓬꓹ ꓖꓶ ꓢꓲ꓾ ꓟꓴ ꓘꓴꓽ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓚꓮꓣꓐꓳꓠ ꓖꓣꓰꓰꓠ ꓧꓳꓴꓢꓰ ꓖꓮꓢ ꓐꓯ ꓟ ꓕꓱ ꓟ ꓔꓯ ꓠꓽ ꓗꓷ ꓠꓬ ꓞꓳ ꓤ ꓮ ꓟꓬꓹ ꓫꓸ ꓡ ꓟ ꓚꓱꓹ ꓔꓯ ꓟꓬ ꓠꓬꓲ ꓐꓯ ꓑꓶ ꓠꓹ ꓟ ꓢꓯꓼ ꓕꓵꓼ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓗꓴꓷꓼ ꓙꓵꓽ ꓢꓴ ꓢꓲ ꓒꓽ ꓐꓴ ꓟꓬ ꓠꓬꓲ ꓐꓶ ꓠꓬꓲ ꓮꓽ ꓠꓱ ꓟ ꓗꓴꓷꓼ ꓙꓵꓽ ꓚꓱꓹ ꓔꓯ ꓟꓬ ꓠꓬꓲ ꓠꓲꓹ ꓫꓵ ꓢꓴ ꓕꓱ ꓡꓱ ꓫꓵ ꓔꓯ ꓛꓲ ꓔꓴ ꓢꓲ ꓟꓽ ꓪ ꓐꓯ ꓟ ꓔꓯ ꓒꓬꓱꓼ ꓡ ꓠ ꓢꓯꓼ ꓕꓵꓼ ꓟ ꓥ ꓡꓳ= ꓡꓳꓹ ꓬꓰ ꓟ ꓞꓲ ꓥꓪꓽ ꓘꓳꓼ ꓕꓯ ꓧꓶꓽ ꓟꓵꓽ ꓗꓪ ꓚꓮꓣꓐꓳꓠ ꓓꓲꓳꓫꓲꓓꓰ ꓐꓯ ꓟ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓠꓬ ꓮ ꓘꓶꓸ ꓟꓬ_ ꓟ ꓟ ꓥ ꓡꓳ=

ꓔꓯ ꓥꓳꓽ ꓐꓯ ꓠꓬ ꓮꓟꓰꓣꓲꓚꓮ ꓗꓴꓷꓼ ꓠꓬ ꓫꓸ ꓢꓴ ꓟꓷꓼ ꓢꓴ ꓐꓴ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓚꓮꓣꓐꓳꓠ ꓔꓯ ꓗꓽ ꓕ ꓟ ꓠꓯꓼ ꓗꓪ ꓮ ꓘꓶꓸ ꓗꓸ ꓠꓯꓸ ꓢꓲ ꓗꓪ ꓞꓰ ꓡꓰ ꓟ ꓥ ꓡꓳ= ꓮ ꓡꓰꓳ ꓐꓯ ꓠꓬ ꓮꓟꓰꓣꓲꓚꓮ ꓗꓴꓷꓼ ꓗꓪ ꓞꓳ ꓤ ꓕꓲ ꓣꓳ ꓠꓬ ꓕꓲꓽ ꓘꓳꓼ ꓬꓲꓸ ꓘꓴꓽ ꓗꓪ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲ_ ꓟ ꓚꓮꓣꓐꓳꓠ ꓔꓯ 5 ꓔꓮꓠ ꓛꓲ ꓣꓱꓽ ꓟ ꓥ ꓢꓲ꓾ ꓲ-ꓓꓲ-ꓬ ꓗꓪ ꓠꓬ 1 ꓔꓮꓠ ꓡꓲ ꓟꓽ ꓐꓲ ꓟ ꓔꓯ ꓡꓳꓸ ꓟꓳ ꓪ ꓓ_ ꓡꓳ=ꓖꓳ ꓟ ꓑꓶ ꓓꓴ ꓮꓟꓰꓣꓲꓚꓮ ꓗꓪ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓡꓰ ꓝꓲ_ ꓟ꓾ ꓟꓵꓽ ꓘꓴꓽ ꓔꓯ ꓓꓳꓺ ꓡꓰ ꓝꓲ_ ꓟ ꓠꓬ ꓮ ꓘꓶꓸ ꓟꓬ_ ꓟ ꓔꓯ ꓡꓳꓸ ꓟꓳ ꓪ ꓡꓳ=