ꓠꓲꓹ ꓟ ꓦꓶ ꓡꓯ ꓘꓳ ꓟꓽ ꓓ ꓟ

ꓠꓲꓹ ꓟ ꓦꓶ ꓡꓯ ꓘꓳ ꓟꓽ ꓓ ꓟ [ꓟ-ꓘꓳ = 5ꓽ20-26]

ꓬꓰ-ꓢꓴ ꓡꓰ ꓘꓶꓽ ꓒꓴ ꓢꓲ ꓬꓲ ꓪ ꓔꓯ ꓕꓱ ꓡꓱ ꓟꓸ ꓖꓶˍ ꓡꓳ= ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪ ꓠꓬ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓙꓲ ꓫꓬˍ ꓟ ꓕꓯꓽ ꓢꓲ ꓟꓽ ꓙꓲ ꓫꓬ ꓕꓯ ꓠꓽ ꓮ ꓡꓲ ꓥˍ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓟꓽ ꓓ=

ꓮꓽ ꓠꓱ ꓟ ꓡ ꓞꓳ ꓔꓯ꓾ ꓞꓳ ꓤ ꓢꓰꓼ ꓟꓽ ꓓ꓾ ꓐꓯˍ ꓟˍ ꓐꓰ꓾ ꓞꓳ ꓤ ꓢꓰꓼ ꓢꓴ ꓮꓽ ꓟ ꓥˍ ꓟꓲ ꓐꓯ ꓟꓴ ꓗꓪ ꓐꓰ ꓟꓽ ꓡꓲꓹ ꓗꓷ꓾ ꓐꓯˍ ꓟ ꓠꓴ ꓪ ꓑ ꓙꓽ ꓠꓬꓲꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥˍ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓕꓲ ꓣꓳ ꓔꓯ ꓠꓲꓹ ꓟ ꓦꓶ ꓢꓴ ꓠꓬ ꓐꓯ ꓟꓴ ꓗꓪ ꓐꓰ ꓟꓽ ꓡꓲꓹ ꓗꓷ= ꓮꓽ ꓟ ꓥˍ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓕꓲ ꓣꓳ ꓔꓯ ꓟꓳꓻ ꓟꓽ ꓟꓵ ꓢꓲ꓾ ꓠꓴ ꓠꓬ ꓢꓯꓸ ꓔꓬˍ ꓟꓲ ꓣꓱꓽ ꓬꓯꓼ ꓖꓴ ꓟꓽ ꓙꓳ꓾ ꓐꓯ ꓢꓴˍ ꓟꓲ ꓐꓯ ꓟꓴ ꓜꓲꓼ ꓓꓴ ꓓꓽ ꓟ ꓗꓪ ꓐꓰ ꓡꓲꓹ ꓗꓷ ꓟꓽ ꓓ= ꓮꓽ ꓟ ꓥˍ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓕꓲ ꓣꓳ ꓔꓯ ꓑꓱꓹ ꓢꓲ꓾ ꓞꓳ ꓟꓶꓻ ꓠꓴ꓾ ꓐꓯ ꓢꓴˍ ꓟꓲ ꓛꓬꓼ ꓟꓵꓽ ꓮ ꓔꓳꓸ ꓗꓪ ꓐꓰ ꓡꓲꓹ ꓗꓷ ꓟꓽ ꓓ=

ꓖꓳ ꓡꓱ ꓠꓬꓲ ꓔꓲ ꓖꓴ ꓗꓪ ꓠꓴ ꓔꓲ ꓓꓴ ꓔꓲˍ ꓐꓰ ꓬꓰ ꓔꓬ ꓕꓯ꓾ ꓠꓴ ꓬꓲꓼ ꓠꓴ ꓠꓬꓲ ꓕꓲ ꓣꓳ ꓠꓴ ꓔꓯ ꓠꓲꓹ ꓟ ꓫꓸ ꓓꓴ ꓙꓳˍ ꓟ ꓔꓯ ꓓꓵꓽ ꓙ ꓛꓲ ꓡ ꓠꓬ꓾ ꓠꓴ ꓔꓲ ꓓꓴ ꓠꓬ ꓔꓲ ꓖꓴ ꓛꓲ ꓔꓲ ꓗꓪ ꓗꓶ ꓔ ꓬꓰ ꓢꓲ ꓬꓲ ꓔꓯ ꓧꓶꓸ ꓕꓯ ꓙꓰ ꓢꓲ ꓠꓬꓲ ꓬꓲˍ ꓐꓰ ꓧꓳꓹ ꓡꓯꓽ ꓘꓳ ꓬꓰ= ꓖꓳ ꓗ ꓠꓯꓸ ꓢꓲˍ ꓡꓰꓽ ꓔꓲ ꓓꓴ ꓔꓲ ꓛꓵˍ ꓡꓳ= ꓠꓴ ꓠꓬ ꓠꓴ ꓔꓯ ꓗꓳꓹ ꓡꓯ ꓘꓳ ꓢꓴˍ ꓐꓰ ꓙ ꓖꓴ ꓗꓪ ꓫꓱꓽ ꓔꓬ ꓢꓰ ꓕꓯˍ ꓡꓰ꓾ ꓮꓸ ꓟꓲꓸ ꓬꓲˍ ꓐꓰ ꓧꓳꓹ ꓡꓯ ꓘꓳ= ꓟꓽ ꓥ ꓠꓬ ꓬꓲ ꓡꓰ ꓠꓴ ꓔꓯ ꓐꓯ ꓟꓴ ꓘꓶꓽ ꓢꓲꓽ ꓒ ꓔꓯ ꓡꓯꓼ ꓙꓱ ꓗꓷ ꓢꓲ꓾ ꓐꓯ ꓟꓴ ꓘꓶꓽ ꓢꓲꓽ ꓒ ꓡꓰ ꓬꓲ ꓟꓯꓼ ꓐꓴ ꓔꓯ ꓡꓯꓼ ꓙꓱ ꓗꓷ ꓠꓬ ꓠꓴ ꓔꓯ ꓐꓱꓻ ꓓꓴꓽ ꓗꓪ ꓐꓱꓻ ꓗꓷˍ ꓥꓳ=

ꓥꓪ ꓡꓰ ꓠꓴ ꓪ ꓔꓯ ꓔꓱꓹ ꓔꓱꓹˍ ꓐꓯ ꓖꓶˍ ꓠꓬꓲ꓾ ꓐꓶꓻ ꓟꓽ ꓖꓴ ꓟ ꓙꓲꓽ ꓒꓬꓸ ꓕꓲꓽ ꓒꓬꓸ ꓤꓽˍ ꓡꓰꓽ ꓛˍ ꓟꓲ ꓖꓳ ꓗꓪ ꓐꓰ ꓠꓴ ꓓꓳ ꓡ ꓪ ꓟꓽ ꓓ꓾ ꓐꓯ ꓡꓳ=

          ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓣꓳ ꓠꓬ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓣꓳ ꓮꓽ ꓬꓲꓼ ꓠꓬꓲ ꓤ ꓐꓴ ꓔꓯ ꓥˍ ꓟꓲ ꓠꓲꓹ ꓠꓵꓻ ꓠ ꓗꓹ ꓟ꓾ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓬꓰ ꓝꓳꓼ ꓬꓰ ꓞꓳꓸ ꓡꓰ ꓗꓴˍ ꓟ ꓞꓳ ꓤ꓾ ꓝꓴꓲꓸ ꓬꓰˍ ꓟ ꓞꓳ ꓤ ꓐꓴ ꓥ ꓟ ꓔꓯ ꓢꓷꓸ ꓔ  ꓠꓹ ꓟ ꓣꓳ ꓐꓴ ꓔꓯ ꓐꓯ ꓟꓸ ꓖꓶ ꓔꓬ ꓟ ꓥ ꓢꓲ꓾ ꓖꓳ ꓟ ꓪꓴꓸ ꓠꓬꓲ ꓣꓳ ꓐꓴ ꓠꓬ ꓛꓬ ꓗꓷ ꓟ ꓔꓯ ꓖꓼ ꓖꓶˍ ꓟ ꓐꓰ ꓠꓲꓹ ꓠꓵˍ ꓟ ꓔꓯ ꓟꓶ ꓒꓵꓽˍ ꓡꓳ꓾ ꓐꓯ ꓟ ꓔꓯ ꓐꓯ ꓖꓶ ꓡ ꓔꓬ ꓡꓳ=

          ꓝꓮꓲ ꓣꓳ ꓠꓬ ꓣꓳ ꓮ ꓬꓲꓼ ꓠꓬꓲ ꓤ ꓐꓴ ꓔꓯ ꓠꓲꓹ ꓜꓳˍ ꓟ꓾ ꓟꓬ ꓔꓳꓹ ꓟ ꓐꓰ ꓟꓬ ꓦꓯꓸˍ ꓟ ꓕꓱ ꓟꓬ ꓫꓵꓽ ꓔꓯ ꓡꓳ ꓗꓷ ꓢꓲ꓾ ꓖꓼ ꓖꓶ ꓠꓲꓹ꓾ ꓠꓵꓻ ꓠꓲꓹ ꓐꓰ ꓘꓳꓹ ꓣꓴ ꓠꓲꓹ ꓔꓯ ꓢꓳ ꓣꓴ ꓠ ꓔ ꓡꓳ꓾ ꓐꓰ ꓐꓯ ꓖꓶ ꓡ ꓔꓬ ꓟ ꓥ ꓡꓳ=

          ꓣꓳ ꓝꓴꓲꓸ ꓮ ꓡꓲ ꓟꓬ ꓛꓲ ꓪꓴꓽ ꓓꓰˍ ꓥ ꓟꓲ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓖꓼ ꓖꓶ ꓔꓬ ꓟ ꓑꓶꓸ ꓓꓴ꓾ ꓣꓳ ꓐꓴ ꓠꓬ ꓣꓳ ꓠꓶꓽ ꓛꓳꓽ ꓕꓲ ꓛꓳꓽ ꓐꓴ ꓔꓯ ꓥˍ ꓟꓲ ꓖꓳ ꓟ ꓡꓰ ꓐꓰ ꓬꓰ ꓠ ꓗꓹ ꓡꓳ= ꓢꓴ ꓔꓯ ꓖꓼ ꓖꓶˍ ꓟ ꓠꓬ ꓪꓴ-ꓢ ꓔꓯ ꓦ ꓡꓱ ꓐꓳˍ ꓟ ꓐꓰ ꓕꓲ ꓡꓰꓹ ꓥ ꓡꓳ= ꓣꓳ ꓢꓴ ꓔꓯ ꓬꓰ ꓗꓷ ꓟ ꓮ ꓙꓵꓽ ꓠꓬ ꓣꓳ ꓪꓴ-ꓢ ꓔꓯ ꓬꓰ ꓗꓷ ꓟˍ ꓡꓰ ꓐꓰ ꓥꓳ= ꓮ ꓡꓲ ꓕꓲ ꓙꓵꓹ ꓗꓪ ꓥˍ ꓟꓲ ꓮ ꓡꓲ ꓟ ꓔꓯˍ ꓟꓲ ꓐꓯ ꓟꓴ ꓕꓽ ꓞꓷꓹ= ꓮ ꓡꓲꓳ ꓐꓯ ꓠꓬ ꓢꓴ ꓔꓯ ꓐꓯ ꓟꓴ ꓞꓷꓹ ꓢꓴ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓐꓯ ꓟꓴ ꓫꓬꓹ ꓟ ꓟꓶˍ ꓥꓳ꓾ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=