ꓖꓳ ꓓꓱˍ ꓟꓲ ꓶ ꓟꓬˍ ꓟꓲ ꓛꓬꓼ ꓟꓵꓼ ꓗꓪ ꓟꓶꓽ ꓬꓰ ꓝꓲ ꓐ ꓡ ꓢꓴ ꓪꓴ‐ꓢ ꓢ ꓔꓯ ꓠꓽ ꓙꓳꓺ ꓠ ꓗ, ꓟ(Sunday reflection

ꓖꓳ ꓓꓱˍ ꓟꓲ ꓶ ꓟꓬˍ ꓟꓲ ꓛꓬꓼ ꓟꓵꓼ ꓗꓪ ꓟꓶꓽ ꓬꓰ ꓝꓲ ꓐ ꓡ ꓢꓴ ꓪꓴ‐ꓢ ꓢ ꓔꓯ ꓠꓽ ꓙꓳꓺ ꓠ ꓗ, ꓟ

ꓠꓬꓲ. ꓠꓬꓲ ꓢꓲꓽ ꓒ ꓦꓬꓼ ꓠꓬ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳꓽ ꓶ 10ꓽ26‐33 ꓝꓲ ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓖꓳ ꓓꓱ ꓔꓯ ꓢꓰꓼ ꓐ ꓡˍ ꓟꓲ ꓦꓻ ꓔꓯ ꓢꓰꓼ ꓟꓽ ꓐ ꓡ ꓢꓴ ꓔꓯ ꓕꓽ ꓙꓳꓺ ꓠ, ꓟ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓠꓬꓲ ꓝꓲ. ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿ 1 ꓝꓲ. ꓗꓪ ꓠꓬ ꓣꓳ ꓠꓲ, ꓟ ꓗꓪ ꓐꓰ ꓒꓬꓱꓼ ꓡ ꓟ ꓙꓳꓺ ꓟ ꓠꓲ, ꓟ ꓟꓽ ꓙꓳˍ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓟꓽ ꓙꓳꓺ ꓠ, ꓟ ꓐꓯ ꓔ ꓡꓳ꓿ ꓣꓳ ꓖꓳ ꓓꓱ ꓐꓰ ꓦꓻ ꓔꓯ ꓢꓰꓼ ꓢꓲ ꓠꓬꓲ ꓛꓬꓽ ꓟꓵꓽ ꓗꓪ ꓟꓶꓽ ꓬꓰ ꓝꓲ ꓐ ꓡ ꓢꓴ ꓔꓯ ꓡꓰ ꓙꓳꓺ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓟ. ꓖꓶ ꓔ ꓡꓳ꓿

ꓖꓳ ꓡꓱ ꓟꓽ ꓞꓲ ꓟꓲ ꓠꓯ ꓕꓯ ꓢꓲ ꓗꓪ ꓪꓴ‐ꓢ ꓟꓽ ꓠꓲ, ꓒꓴ ꓟ ꓮ ꓫꓵꓽ ꓔꓯ ꓟꓲ ꓐꓬ ꓡꓰ ꓝꓲ ꓟꓽ ꓓ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ ꓠꓬꓲ ꓣꓳ ꓢꓯ. ꓔꓬ ꓟ ꓤꓶꓻ ꓗꓪ ꓪꓴ‐ꓢ ꓔꓯ ꓣꓳ ꓦꓻ ꓡꓱ ꓟ ꓥ ꓡꓳ꓿ ꓪꓴ‐ꓢ ꓔꓯ ꓣꓳ ꓦꓻ ꓡꓱ ꓣꓳ ꓙꓵꓽ ꓠꓬ ꓮ ꓫꓵꓽ ꓔꓯ ꓟꓲ ꓙꓳꓺ ꓟꓽ ꓛꓲ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓢꓯꓼ ꓪ ꓖꓶ ꓔ ꓟ ꓥ ꓡꓳ꓿ ꓟꓴ ꓖꓪ ꓕꓳꓽ ꓶ 28ꓽ 7 ꓝꓲ ꓗꓪ ꓐ, ꓐꓼ ꓪꓴ‐ꓢ ꓠꓬ ꓥꓪ ꓢꓯꓼ ꓪꓽ ꓐꓰ ꓥꓪ ꓚꓬ ꓠꓲ ꓥ ꓡꓳ ꓥꓪ ꓠꓬ ꓬꓲ ꓔꓯ ꓦꓻ ꓡꓰ ꓐꓳ ꓔꓬ ꓠꓬꓲ ꓬꓰ ꓙˍ ꓟ ꓟꓶ ꓡꓰꓳ꓿ ꓖꓳ ꓡꓱ ꓠꓬꓲ ꓥꓪ ꓠꓲ, ꓟ ꓔꓷ, ꓠꓬꓲ ꓮ ꓘꓶ. ꓗ, ꓛꓲ ꓢꓲ꓾ ꓥꓪ ꓫꓬ ꓟ ꓔ ꓟ ꓟꓴꓽ ꓖꓪ ꓡꓰ ꓬꓲ ꓔꓯ ꓫꓱ. ꓖꓶˍ ꓥꓳ꓿

2 ꓕꓱ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓦꓻ ꓡꓱ ꓢꓲ ꓠꓬꓲ ꓢꓲꓺ ꓒ ꓠꓲ, ꓒꓴ ꓟ ꓙ  ꓖꓴ ꓗꓪ ꓛꓳ ꓫꓱ, ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓡ ꓞꓳ ꓟꓲ ꓕꓯ ꓗꓪ ꓣꓳ ꓫ. ꓕꓱˍ ꓟ ꓐꓰ ꓣꓳ ꓬꓰ ꓗꓷ ꓟ ꓚꓱ, ꓮ ꓙꓵꓽ ꓠꓬ ꓢꓲꓺ ꓒ ꓟꓬꓱꓺ ꓓꓳꓽ ꓓꓳˍ ꓡ ꓠ, ꓟ ꓥ ꓡꓳ ꓐꓰ ꓣꓳ ꓓꓵꓽ ꓙ ꓠ, ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓞꓳ ꓫꓱ, ꓟ ꓔꓯ ꓡꓳ. ꓟꓳ ꓢꓴ ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓣꓳ ꓗꓪ ꓐꓰ ꓕꓲ ꓞ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓠ, ꓟ ꓬꓰ ꓠ, ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓗꓪ ꓛꓳ ꓠ, ꓟ ꓫ. ꓔ ꓥ ꓟꓲ꓾ ꓣꓳ ꓔꓯ ꓪꓴ‐ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓡꓯ ꓫꓴ ꓗꓪ ꓐꓰ ꓣꓳ ꓬꓰ ꓐ ꓡ ꓡꓳ꓿

ꓡꓴ‐ꓘ ꓕꓳ ꓶ 24ꓽ48 ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓠꓬ ꓕꓱ ꓟꓬ ꓫꓵꓽ ꓐꓱ ꓶ ꓢꓷ. ꓙ ꓟꓳ ꓙ ꓢꓴ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓘꓳ, ꓣꓴ ꓢꓲ ꓠꓬꓲ ꓠꓲ, ꓡꓶ ꓔꓯ ꓞꓳ ꓫꓱ, ꓗꓴ ꓢꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓪꓴ‐ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓡꓯ ꓫꓴ ꓔꓯ ꓙꓲꓻ ꓟ ꓕꓲ ꓒꓳ, ꓗꓪ ꓣꓱ ꓢꓲ ꓠꓬꓲ ꓙꓲꓻ ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓪꓴ‐ꓢ ꓡꓰ ꓮ ꓙꓵꓽ ꓢꓴ ꓕꓯ ꓢꓲ ꓢꓲ ꓡꓲ ꓟ ꓣꓱ ꓛꓰ ꓡꓵ ꓖꓶ ꓝꓲ ꓫ. ꓟꓳ꓿