ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓙꓵꓽ ꓪ ꓖꓶ_ ꓟ

ꓟ-ꓕꓲ 10ꓽ1-7 ꓟꓸ ꓟꓲ ꓖꓳ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ 12 ꓣꓳ ꓔꓯ ꓘꓴ ꓢꓲ꓾ ꓠꓲꓽ ꓢ-ꓓꓯ ꓔꓯ ꓗꓼ ꓓꓳ ꓘꓴ_ ꓟ ꓣꓱ ꓛꓰ꓾ ꓠ ꓫꓵ ꓠꓻ ꓙꓰ ꓔꓯ ꓫꓬꓹ ꓓ ꓡꓰ_ ꓟ ꓙꓵꓽ ꓪ꓾ ꓕꓱ ꓡꓱ ꓐꓰ ꓖꓶ ꓟ ꓟꓸ ꓟꓲ ꓠ ꓠꓹ ꓪ_ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓟꓽ ꓐꓲ ꓜꓲꓼ_ ꓟ ꓬꓲ ꓝꓲ ꓓꓴ ꓐꓴ ꓔꓯ ꓖꓶ_ ꓡꓳ= ꓬꓲ ꓝꓲ ꓓꓴ ꓐꓴ ꓠꓬ ꓟꓽ ꓐꓲ ꓜꓲꓼ ꓢꓴ ꓥ ꓡꓳ= ꓬꓲ ꓪ ꓘꓹ ꓗꓪ ꓮ ꓫꓵ ꓢꓷꓸ ꓠꓲꓹ ꓡꓲ ꓟꓽ ꓙꓳ ꓫꓵ ꓥ ꓡꓳ= ꓖꓳ ꓡꓱ ꓥ ꓟꓲ ꓟꓽ ꓐꓲ ꓜꓲꓼ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓘꓴ ꓢꓲ ꓠꓬꓲ ꓐꓲ ꓜꓲꓼ ꓟ ꓬꓲꓼ ꓠꓬꓲꓸ ꓖꓶ_ ꓡꓳ= ꓬꓲ ꓝꓲ ꓓꓴ ꓐꓴ ꓮ ꓙꓵ ꓠꓬ ꓮ ꓫꓵ ꓬꓰ ꓟꓽ ꓗꓴꓸ ꓫꓵ ꓮ ꓫꓵ ꓟꓽ ꓢꓷꓸ ꓫꓵ ꓡꓰ ꓥ ꓡꓳ= ꓖꓳ ꓡꓰ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓐꓲ ꓜꓲꓼ ꓡꓰ ꓝꓲ ꓠꓹ ꓟ ꓘꓴ ꓢꓲ꓾ ꓬꓲ ꓪ ꓔꓯ ꓣꓱ_ ꓡꓳ= ꓟꓬ ꓠꓬꓲ ꓐꓷ ꓠꓬꓲ ꓠꓬꓲꓸ ꓠꓬꓲ ꓣꓳ ꓠ ꓠꓹ ꓪ ꓟ ꓢꓲ ꓫꓬ ꓕꓳ ꓶ ꓗꓪ ꓬꓲ ꓪ ꓔꓯ ꓠꓲꓽ ꓢ-ꓓꓯ ꓔꓯ ꓗꓼ ꓓꓳ ꓠꓹ ꓟ꓾ ꓠꓲꓽ ꓔꓯ ꓗꓼ ꓓꓳ ꓘꓴ_ ꓟ ꓙꓵ ꓪ꓾ ꓠꓻ ꓫꓵ ꓒꓬ ꓫꓵ ꓔꓯ ꓓ ꓡꓰ ꓝꓲ ꓘꓴ_ ꓟ ꓙꓵ ꓪ ꓖꓶ_ ꓡꓳ=

ꓣꓳ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓙꓵ ꓢꓴ ꓢꓲ ꓒ ꓬꓰ-ꓢꓴ ꓗꓸ ꓠꓯꓸ ꓗꓼ ꓢꓴ ꓮ ꓙꓵ ꓠꓬ ꓢꓲ ꓒ ꓬꓰ-ꓢꓴ ꓖꓶ_ ꓟ ꓙꓵꓽ ꓪ ꓔꓯ ꓣꓳ ꓟꓶ ꓡꓰꓳ= ꓐꓹ ꓐ ꓤ ꓔꓲ ꓢꓲ-ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓖꓳ ꓓꓱ ꓔꓲꓹ ꓟꓶ ꓢꓴ ꓮ ꓙꓵ ꓠꓬ ꓪꓴ-ꓢ ꓣꓰ ꓛꓰ ꓙꓵ ꓪ ꓟꓶ ꓡꓰ ꓟ ꓥꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ 12 ꓣꓳ ꓔꓯ ꓙꓵꓽ ꓪ ꓖꓶ_ ꓟ ꓡꓰ ꓐꓰ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓥ ꓟꓲ ꓖꓶ ꓔ ꓡꓳ= ꓠꓲꓽ ꓢ-ꓓꓯ ꓐꓯ ꓟ ꓠꓬ ꓬꓲꓸ ꓪꓴꓸ ꓛꓵ 7 ꓗꓸ ꓙꓳ ꓢꓲ꓾ ꓙꓳꓺ ꓓꓴ ꓧꓹ ꓟ꓾ ꓙꓳꓺ ꓙꓳꓺ ꓡꓰ ꓐꓰ ꓣꓳ ꓠꓯꓸꓼ ꓗꓪ ꓓꓵ ꓡꓰ ꓫꓵ ꓟꓽ ꓥ꓾ ꓣꓳ ꓟꓽ ꓧꓹ ꓟ ꓬꓲ ꓫꓱꓸ ꓟꓽ ꓙꓲ ꓟ ꓬꓲ ꓫꓱꓸ ꓔꓯ ꓕꓱ ꓡꓱ ꓐꓰ ꓥꓳꓽ ꓡꓰ ꓬꓰ ꓔ ꓠꓬ ꓕꓱ ꓟ ꓠꓬ ꓠꓲꓽ ꓢ-ꓓꓯ ꓚꓵ ꓚꓵ ꓥ ꓡꓳ= ꓖꓳ ꓡꓱ ꓠꓬ ꓕꓱ ꓟ ꓔꓯ ꓣꓳ ꓧꓪꓸ ꓘꓴ_ ꓟ ꓪꓴ-ꓢ ꓡꓰ ꓙꓵꓽ ꓪ ꓣꓳ ꓔꓯ ꓖꓶ ꓔ ꓡꓳ= ꓬꓯ ꓓꓳ_ ꓟ꓾ ꓬꓯ ꓑꓲꓸ ꓬꓯ ꓛꓵꓼ ꓟ ꓕꓱ ꓫꓵ ꓮ ꓙꓵ ꓠꓬ ꓕꓲ ꓚꓱꓹ ꓐꓯ ꓠꓬ ꓠꓲꓽ ꓢ-ꓓꓯ ꓬꓲꓸ ꓙ ꓖꓴ ꓕꓲ ꓟ ꓥ ꓡꓳ= ꓕꓱ ꓟ ꓔꓯ ꓧꓪꓸ ꓡꓰ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓠꓬ ꓬꓲꓸ ꓢꓲ ꓧꓳꓸ ꓖꓶ ꓢꓲ ꓠꓬꓲ ꓢꓯꓼ ꓟꓬ ꓖꓶ ꓔ ꓟ ꓥ ꓡꓳ= ꓖꓳ ꓡꓱ ꓠꓬ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓗꓹ ꓛꓲ ꓛꓲ ꓡꓰ ꓐꓰ ꓣꓳ ꓔꓯ ꓙꓳ_ ꓟ ꓣꓳ ꓔꓯ ꓠꓶꓼ ꓡ ꓟ ꓠꓲꓽ ꓢ-ꓓꓯ ꓔꓯ ꓥ ꓟꓲ ꓧꓪꓸ ꓡꓰ ꓗꓴꓸ_ ꓟ ꓪꓴ-ꓢ ꓙꓵꓽ ꓪ ꓖꓶ ꓔ ꓟ ꓡꓰ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓠꓶꓼ ꓡ ꓟ ꓕꓲ ꓚꓱꓹ ꓐꓯ ꓠꓬ ꓪꓴ-ꓢ ꓠꓲꓹ ꓡꓶꓽ ꓟꓽ ꓥ ꓟ ꓮ ꓙꓵ ꓔꓯ ꓣꓳ ꓥ ꓟꓲ ꓙ ꓖꓴ ꓟꓳꓸ ꓖꓶ ꓐ ꓡ ꓡꓳ ꓐꓰ ꓐꓯ ꓟꓳꓸ ꓖꓶ ꓔ ꓟ ꓥ ꓡꓳ= ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓝꓲ ꓓꓴ ꓐꓴ ꓔꓯ ꓙꓵ ꓪ ꓖꓶ_ ꓟ ꓡꓰ ꓐꓰ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓕꓯ ꓢꓲ ꓔꓯ ꓥ ꓟꓲ ꓖꓶ ꓔ ꓡꓳ ꓐꓰ ꓢꓷꓸ ꓔ ꓢꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓙꓳ_ ꓟ ꓟꓽ ꓙꓲ ꓟ ꓮ ꓙꓵ ꓔꓯ ꓗꓼ ꓓꓳ ꓗꓷ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓓꓴ ꓬꓰ ꓡꓯ=