ꓫꓪˍ ꓐꓰ ꓫꓱ. ꓢꓶꓽ ꓔꓯ ꓥꓳꓽ (Sunday reflection)

ꓫꓪˍ ꓐꓰ ꓫꓱ. ꓢꓶꓽ ꓔꓯ ꓥꓳꓽ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 13ꓽ24‐30 ꓝꓲ. ꓗꓪ ꓐꓰ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓫꓪˍ ꓐꓰ ꓫꓱ. ꓢꓶꓽ ꓔꓯ ꓥꓳꓽ ꓟ. ꓟꓲꓽ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓙꓲꓻ ꓟ ꓐꓰ ꓟꓽ ꓙꓲꓻ ꓟ ꓕꓲ ꓡꓰ ꓕꓲ ꓪ ꓙꓳˍ ꓟ ꓔꓬ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓪꓴ‐ꓢ ꓔꓯ ꓦꓻ ꓡꓱ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓟꓽ ꓦꓻ ꓡꓱ ꓢꓴ ꓐꓴ ꓕꓲ ꓡꓰ ꓔꓬ ꓟ ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿ ꓪꓴ‐ꓢ ꓡꓰ ꓬꓲ. ꓟꓶ ꓕꓲ ꓠꓬꓲꓽ ꓕꓯ ꓐꓯ ꓟꓳ ꓘꓶꓽ ꓙꓵ, ꓕꓯ ꓙꓲꓻ ꓢꓴ ꓐꓴ ꓐꓰ ꓟꓽ ꓙꓲꓻ ꓢꓴ ꓐꓴ ꓔꓯ ꓢꓲˍ ꓠ, ꓟ ꓙꓳˍ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓟꓲ ꓠꓯ ꓢꓯ. ꓔꓬ ꓟ ꓙꓵ, ꓕꓯ ꓟꓲ ꓠꓯ ꓤ ꓠꓬꓲˍ ꓫꓵꓽ ꓠꓬꓲ ꓓꓴ ꓔꓳ, ꓜꓳ ꓡ ꓟ ꓚꓱ, ꓔꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ ꓔ ꓡꓳ꓿

ꓦꓻ ꓕꓲ ꓒꓳ, ꓗꓪ ꓢꓰꓼ ꓡꓯꓽ ꓘꓳ, ꓟ ꓚꓱ, ꓠꓬ ꓟꓽ ꓙꓲˍ ꓟ ꓤ ꓫꓵ. ꓠꓬ ꓪꓴ‐ꓢ ꓦꓻ ꓡꓱ ꓢꓴ ꓐꓴ ꓪꓴ‐ꓢ ꓔꓯ ꓙꓵꓻ ꓢꓴ ꓐꓴ ꓔꓯ ꓫꓵꓽ ꓪꓴꓽ ꓖꓶ ꓠ, ꓟ ꓬꓰ ꓥ ꓟꓲ ꓧꓪ, ꓡꓰ ꓟꓽ ꓘꓴ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓦꓻ ꓥ ꓟꓲ ꓙꓲꓻ ꓟ ꓐꓰ ꓟꓽ ꓙꓲꓻ ꓟ ꓙꓳˍ ꓟ ꓔꓯ ꓦꓻ ꓕꓲ ꓒꓳ, ꓗꓪ ꓢꓰꓼ ꓡꓯ ꓘꓳ, ꓟ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓝꓮꓲ ꓪꓴ‐ꓢ ꓠꓬ ꓣꓳ ꓔꓯ ꓠꓲ, ꓟ ꓫꓵˍ ꓟ ꓐꓰ ꓐꓯ ꓟꓴ ꓟꓽ  ꓘꓶꓽ ꓟ ꓚꓱ, ꓔꓯ ꓥ ꓟꓲ ꓟ. ꓖꓶ ꓡ ꓟ ꓥ ꓡꓳ꓿

ꓕꓱ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓪꓴ‐ꓢ ꓠꓬ ꓬꓲ ꓒꓳ, ꓖꓶ ꓢꓲ ꓟꓽ ꓥ ꓫꓱ. ꓢꓶ ꓔꓯ ꓚꓵ, ꓗꓷ ꓠꓬ ꓫꓪ ꓟꓲ ꓚꓵ, ꓑꓶ ꓡˍ ꓥꓳ ꓠꓬꓲꓽ ꓫꓵꓽ ꓡꓱ ꓔꓯ ꓶꓼ ꓝꓲ. ꓗꓪ ꓛꓲ ꓕꓲ ꓡꓰ, ˍ ꓪꓴꓽ ꓡ ꓝꓲ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓡꓳ. ꓟꓳ ꓪ ꓓ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓐꓰ ꓟꓽ ꓙꓵꓻ ꓢꓴ ꓐꓴ ꓔꓯ ꓬꓲ. ꓟꓶ ꓡꓳ. ꓬꓰ ꓟ ꓦꓬꓼ ꓠꓬꓲ ꓗꓪ ꓛꓲ ꓕꓲ ꓡꓰ ꓐꓰ ꓔꓬ ꓢꓲ ꓠꓬꓲ ꓐꓯ ꓟꓴ ꓘꓶꓽꓠ, ꓟ ꓙꓳˍ ꓟ ꓔꓯ ꓐꓯ ꓔ ꓡꓳ꓿ꓪꓴ‐ꓢ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓔꓯ ꓠꓲ, ꓟ ꓫꓵˍ ꓫꓵˍ ꓡꓰ ꓓꓴ ꓙ ꓒꓳ, ꓡꓶꓽ ꓠ, ꓟ ꓬꓲ. ꓙꓵ, ꓖꓶ ꓔ ꓟ ꓔꓯ ꓡꓳ. ꓟꓳ ꓪ ꓡꓳ꓿

ꓪꓴꓽ ꓟꓴ ꓡ ꓟ ꓬꓲ ꓢꓶꓽ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓫꓪ ꓢꓶꓽ ꓐꓰ ꓔꓯꓺ ꓔ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓙꓲꓻ ꓟ ꓫꓪ ꓢꓶ ꓠꓬ ꓬꓲ. ꓢꓶꓽ ꓓꓱ ꓠꓯ, ꓟ ꓐꓰ ꓢꓲꓺ ꓒ ꓬꓰ‐ꓢꓴ ꓠꓲ, ꓒꓴ ꓟ ꓚꓱ, ꓗꓪ ꓛꓳ ꓫꓱ, ꓟ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓝꓲ ꓓꓴ ꓐꓴ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓤ ꓫꓵ. ꓫꓵ.ˍꓢꓴ ꓡꓰ ꓐꓰ ꓫꓱ, ꓡꓯ ꓘꓳ, ꓟ ꓔꓯ ꓟꓽ ꓓꓵ ꓙ ꓔ ꓟ ꓥ ꓡꓳ꓿ ꓣꓳ ꓢꓲꓺ ꓒ ꓠꓯ ꓗꓪ ꓛꓳ ꓢꓴ ꓐꓴ ꓠꓬ ꓫ. ꓢꓴ ꓟꓷꓼ ꓢꓴ ꓙꓳˍ ꓟ ꓡ ꓓꓳ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓥ ꓡꓳ꓿ ꓮ ꓡꓱ ꓫꓵꓽ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓐꓰ ꓔꓲ ꓪ ꓙ ꓫꓱ, ꓢꓲ ꓠꓬꓲ ꓣꓳ ꓠꓯ, ꓗꓪ ꓬꓲ ꓢꓶꓽ ꓓꓱ ꓟ ꓕꓲ ꓦꓬꓼ ꓩꓴ. ꓛꓳ ꓞꓲ ꓩꓴ. ꓢꓽ ꓞꓲ ꓩꓴ. ꓐꓰ ꓓꓱ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿

ꓢꓲꓺ ꓒ ꓡꓰ ꓖꓶ  ꓡ ꓟ ꓙꓲꓻ ꓟ ꓜ ꓫꓵ. ꓔꓯ ꓣꓳ ꓠꓲ, ꓟ ꓠꓯ ꓗꓪ ꓣꓳ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓣꓳ ꓠꓲ, ꓟ ꓗ, ꓘꓶꓽ ꓒꓴ ꓖꓶ ꓢꓲ ꓠꓬꓲ ꓘꓳ, ꓣꓴ ꓓꓴ ꓬꓰ      ꓡꓯ꓿ ꓫ. ꓟꓳ ꓪ꓿