ꓚꓬꓻ (ꓥ ꓠꓬ) ꓛꓳꓽ-ꓒꓲ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓚꓬ ꓐꓯˍ ꓟ ꓠꓬ ꓪꓳꓽ ꓒꓬꓽ ꓐꓴ ꓬꓲ ꓐꓵꓽ ꓫꓬꓺ ꓠꓹ ꓟ ꓐꓰ ꓜꓽ ꓙꓲꓻ ꓠꓹ ꓟ ꓐꓱ ꓶ ꓣꓱꓽ ꓔꓬ ꓟˍ ꓡꓰ ꓐꓰ ꓚꓬ ꓔꓯ ꓧꓪꓽ ꓜꓲꓽ ꓐꓵꓽ ꓛꓱꓽ ꓠꓱˍ ꓟ ꓔꓯ ꓒꓲꓼ ꓡꓰ ꓠꓹ ꓟˍ ꓟꓲ ꓣꓱꓽˍ ꓡꓳ= ꓛꓲꓽ ꓧꓶꓽ ꓚꓲꓸˍ ꓟ꓾ ꓢꓯꓼ ꓛꓵꓽˍ ꓟ ꓔꓯ ꓓꓻ ꓡꓰ ꓠꓹ ꓟ ꓐꓰ ꓤ ꓟꓶ ꓤ ꓐꓴ ꓦ ꓐ ꓡˍ ꓕꓯ ꓢꓻ ꓡꓰ ꓓꓴ ꓐꓱ ꓶ ꓣꓱꓽ ꓔꓬ ꓟ ꓥ ꓡꓳ= ꓕꓱ ꓕꓲ ꓧꓪꓹ ꓗꓪ ꓠꓬ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓚꓬ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓡꓲ ꓕꓲ ꓒꓳꓹ ꓗꓪ ꓙꓲꓻ ꓖꓴ ꓖꓶꓽ ꓔꓬ ꓡ ꓐꓯ ꓟ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

ꓚꓬ ꓙꓲꓻ ꓖꓴ ꓙꓳˍ ꓟ ꓚꓱꓹ ꓐꓴ ꓠꓬ꓾

1ꓸ ꓔꓳꓔꓰ-ꓗꓪꓰ ꓠꓻ ꓔꓯ ꓗꓽ ꓕꓸ ꓙ ꓖꓶˍ ꓡꓳ

ꓟꓵꓽ ꓘꓳꓼ ꓕꓲ ꓟ ꓖꓴ ꓡꓰ ꓢꓲ ꓝꓮꓲ ꓕꓲ ꓟ ꓝꓸ ꓙꓰˍ ꓟ ꓗꓪ ꓞꓳ ꓤ ꓮ ꓟꓬꓹ ꓠꓬ ꓔꓳꓔꓰ-ꓗꓪꓰ ꓠꓻ ꓠꓻ ꓡˍ ꓗꓴꓸˍ ꓡꓳ= ꓔꓳꓔꓰ-ꓗꓪꓰ ꓒꓬꓱꓼ ꓡˍ ꓕꓯ ꓮ ꓫꓵꓽ ꓔꓯˍ ꓟꓲ ꓬꓰ ꓟꓽ ꓐ ꓡ ꓗꓷ ꓡꓰˍ ꓗꓪ ꓛꓲ ꓮ ꓘꓶꓸ ꓔꓬꓹ ꓫꓸ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓚꓬꓸ ꓔ ꓟ ꓚꓬ ꓬꓲꓻ ꓔꓯ ꓓꓳꓻ ꓖꓶˍ ꓠꓬ ꓔꓳꓔꓰ-ꓗꓪꓰ ꓠꓻ ꓔꓯ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

2ꓸ ꓞꓴ ꓢꓯꓼ ꓠꓲꓸ ꓡꓰ ꓝꓲˍ ꓡꓳ=

ꓧꓪꓽ ꓖꓳ ꓓꓱꓽ ꓗꓪ ꓞꓴ ꓢꓯꓼ ꓟꓬꓽ ꓡˍ ꓕꓯ ꓠꓻ ꓡˍ ꓟ   ꓾ ꓖꓳ ꓓꓱꓽ ꓔꓬꓹ ꓟꓽ ꓢꓻ ꓟ ꓒꓬꓱꓼ ꓡ ꓗꓴꓸˍ ꓡꓳ= ꓚꓬ ꓔꓯ ꓬꓲꓻ ꓞꓻ ꓗꓪ ꓔꓲꓹ ꓢꓲ ꓓꓳꓻ ꓖꓶˍ ꓕꓯ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓟ ꓞꓴ ꓢꓯꓼ ꓐꓴ ꓔꓯ ꓠꓲꓸ ꓡꓰ ꓝꓲ ꓢꓲ ꓚꓵꓸ ꓬꓲꓻ ꓓꓳ ꓡ ꓝꓲ ꓢꓲ ꓠꓬꓲ ꓔꓬꓹ ꓟꓽ ꓢꓻ ꓟ ꓔꓯ ꓔꓬꓹ ꓢꓻ ꓡꓰ ꓝꓲˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓖꓳ ꓓꓱꓽ ꓘꓴꓽ ꓗꓪ ꓓꓹ ꓟ ꓟꓽ ꓫꓬꓻ ꓟ ꓚꓵꓸ ꓬꓲꓻ ꓐꓴ ꓔꓯ ꓓꓳ ꓡ ꓝꓲˍ ꓟ ꓑꓶꓸ ꓓꓴ ꓧꓪꓽ ꓗꓴꓹ ꓙꓲ ꓔꓯ ꓥ ꓟꓲ ꓫꓬꓽ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

3ꓸ ꓫꓵꓽ ꓟꓬꓱꓽ ꓬꓰˍ ꓟ ꓔꓯ ꓙꓲꓻ ꓡꓰ ꓝꓲˍ ꓡꓳ=

ꓚꓬ ꓔꓯ ꓐꓬꓽ-ꓢꓶꓽ ꓐꓰ ꓚꓬꓸ ꓗꓷ ꓢꓲ ꓓꓳ ꓖꓶˍ ꓕꓯ ꓠꓬ ꓖꓳ ꓓꓱꓽ ꓗꓪ ꓫꓵꓽ ꓟꓬꓱꓽ ꓬꓰˍ ꓟ ꓗꓪ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓐꓬꓽ-ꓢꓶꓽ ꓐꓰ ꓚꓬꓸ ꓔ ꓟ ꓚꓬ ꓬꓲꓻ ꓠꓬ ꓛꓵꓻ ꓢꓯꓼ ꓙꓳˍ ꓟ ꓑꓶꓸ ꓓꓴ ꓓꓳˍ ꓟꓲ ꓓꓳ ꓟꓽ ꓫꓸ= ꓟꓬꓽ ꓠꓬ ꓚꓬ ꓬꓲꓻ ꓕꓱ ꓟ ꓔꓯ ꓤ ꓟꓶ ꓤ ꓮ ꓟꓬꓹ ꓓꓳ ꓔꓬ ꓟ ꓥ ꓡꓳ= ꓚꓬ ꓬꓲꓻ ꓕꓱ ꓟ ꓠꓬ ꓫꓵꓽ ꓢꓯꓼ ꓙꓳ ꓡ ꓝꓲˍ ꓟ ꓡꓰꓽ ꓟꓽ ꓞꓲꓻ ꓤ ꓟꓶ ꓤ ꓐꓴ ꓦ ꓐ ꓡˍ ꓟ ꓔꓯ ꓥ ꓟꓲ ꓬꓲ ꓙꓵꓹ ꓙꓳ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

4ꓸ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓙꓳ ꓡ ꓝꓲˍ ꓡꓳ=

ꓢꓯꓼ ꓠꓲꓸ ꓢꓲ ꓟꓽ ꓠꓽ ꓟꓽ ꓠꓽ ꓔꓬꓹ ꓟꓽ ꓢꓻ ꓒꓬꓱꓼ ꓗꓴꓸˍ ꓥꓳ ꓐꓯ ꓠꓬ ꓚꓬꓸ ꓔ ꓟ ꓚꓬ ꓬꓲꓻ ꓓꓳ ꓖꓶˍ ꓕꓯ ꓧꓪꓽ ꓖꓳ ꓓꓱꓽ ꓗꓪ ꓢꓯꓼ ꓐꓲ ꓡ ꓝꓲ ꓢꓲ ꓢꓻ ꓢꓻ ꓡꓰꓽ ꓟꓽ ꓠꓻ ꓡ ꓐꓰ ꓢꓷꓸ ꓪ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓟꓷꓽ ꓠꓷꓹ ꓔꓯ ꓥˍ ꓟꓲ ꓫꓬꓻ ꓡꓰ ꓝꓲ ꓢꓲ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓠꓲꓹ ꓟ ꓒꓬꓱꓼ ꓡ ꓝꓲˍ ꓡꓳ=

ꓚꓬ ꓔꓯ ꓜꓽ ꓖꓶ ꓓꓳ ꓖꓶˍ ꓟ ꓠꓬ ꓞꓳ ꓤ ꓮ ꓟꓬꓹ ꓐꓱ ꓶ ꓙꓲꓻ ꓖꓴ ꓙꓳˍ ꓐꓯ ꓥ ꓟꓲ ꓕꓲ ꓖ ꓕꓲ ꓧꓪꓹ ꓗꓪ ꓠꓬ ꓳ’ ꓟꓶꓽ ꓬꓲ ꓘꓴꓽ ꓗꓪ ꓞꓴ ꓞꓻˍ ꓟ꓾ ꓦꓰꓽ ꓛꓲꓽ ꓧꓳꓹˍ ꓟ꓾ ꓦꓰꓽ ꓛꓲꓼ ꓟꓽ ꓧꓺ ꓟ ꓒꓬꓱꓼ ꓡ ꓗꓴꓸˍ ꓡꓳ=

ꓤ ꓟꓶ ꓤ ꓕꓲ ꓐꓱ ꓗꓪ ꓠꓬ ꓦ ꓐ ꓡˍ ꓕꓯ ꓫꓵꓽ ꓮ ꓟꓬꓹ ꓬꓲꓻˍ ꓟ ꓒꓬꓱꓼ ꓡ ꓗꓴꓸˍ ꓡꓳ= ꓖꓳ ꓓꓱꓽ ꓡꓲꓽ(ꓤ ꓠꓱ ꓶꓻ) ꓔꓬ ꓢꓴ ꓐꓴ ꓗꓪ ꓚꓬ ꓠꓬ ꓙꓲꓻ ꓟꓽ ꓙꓲꓻ ꓟ ꓔꓯ ꓢꓷꓸ ꓠꓹ ꓟ ꓐꓱ ꓶ ꓠꓯꓻ ꓞꓲꓼ ꓟꓸ ꓒ ꓔꓯ ꓠꓺ ꓠꓬꓲ ꓠ ꓗˍ ꓡꓳ= ꓚꓬ ꓠꓬ ꓫꓵꓽ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓙꓳ ꓢꓴ ꓐꓴ ꓗꓪ ꓫꓵꓽ ꓮ ꓟꓬꓹ ꓓꓳ ꓡ ꓝꓲ ꓢꓲ ꓠꓲꓹ ꓟ ꓠꓻ ꓐꓱ ꓶˍ ꓟꓲ ꓟꓽ ꓙꓲꓻ ꓐꓰ ꓢꓷꓸ ꓪ ꓡꓳ=

ꓚꓲꓸ ꓛꓬ ꓖꓳ ꓓꓱꓽ ꓗꓪ ꓢꓰꓹ-ꓛꓬꓳ ꓠꓻ ꓙꓳˍ ꓕꓯ ꓚꓬ ꓠꓬ ꓲꓠ-ꓢꓴ-ꓡꓲꓠ ꓐꓰ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓑꓶꓸ ꓓꓴ ꓚꓬ ꓜꓽ ꓠꓲꓹ ꓫꓵˍ ꓕꓯ ꓠꓯꓻ ꓞꓲꓼ ꓟꓸ ꓒ ꓐꓴ ꓐꓰ ꓖꓪ ꓙꓱꓻ ꓠ ꓗˍ ꓡꓳ꓾ ꓐꓰ ꓢꓷꓸ ꓪ ꓡꓳ=