ꓫꓪˍ ꓐꓰ ꓫꓱꓸ ꓢꓶꓽ ꓔꓯ ꓥꓳꓽ ꓒꓶ ꓟꓸ ꓖꓶˍ ꓟ

ꓢꓲ ꓒ ꓬꓰ-ꓢꓴ ꓠꓬ ꓜꓻ ꓫꓵꓸ ꓫꓵˍ ꓟ ꓔꓯꓺ ꓥꓳꓽ ꓔꓯ ꓡꓯꓼ ꓫꓵ ꓐꓯ ꓖꓶ ꓡ ꓔꓬ ꓡꓳ= ꓔꓯꓺ ꓥꓳꓽ ꓔꓯ ꓣꓱꓽ ꓢꓲ ꓟꓴꓽ ꓗꓪ ꓗꓴꓷꓼ ꓚꓱꓹ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 13ꓽ36-43 ꓗꓪ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓙꓲˍ ꓟ ꓜꓻ ꓫꓵꓸ ꓫꓵꓸ ꓢꓴ ꓥ ꓡꓳ= ꓠꓲꓽ ꓢ-ꓓꓯ ꓠꓬ ꓟꓽ ꓙꓲꓻ ꓟ ꓜꓻ ꓫꓵꓸ ꓫꓵꓸ ꓢꓴ ꓥ ꓡꓳ꓾ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓟꓷꓽ ꓠꓷꓹ ꓘꓶꓽ ꓗꓪ ꓐꓰ꓾ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓙꓲˍ ꓟ ꓧꓸˍ ꓟ ꓡꓰꓽ ꓓꓳ ꓡˍ ꓡꓳ= ꓬꓲ ꓡꓰ ꓫꓵꓸ ꓔ ꓟ ꓜꓻ ꓫꓵꓸ ꓠꓬ ꓙꓲˍ ꓡꓳ= ꓠꓲꓽ ꓢ-ꓓꓯ ꓥˍ ꓟꓲ ꓬꓲ ꓗꓴꓷꓼ ꓪꓴꓽ ꓡ ꓠꓹ ꓟ ꓐꓱ ꓶ ꓜꓻ ꓫꓵꓸ ꓫꓵꓸ ꓠꓹ ꓟ ꓢꓯꓼ ꓕꓵꓼ ꓔꓬ ꓡꓳ=

ꓖꓳ ꓡꓱ ꓠꓬꓲ ꓬꓲ ꓫꓵꓸ ꓐꓰ ꓐꓯ ꓕꓯ ꓣꓱꓻ ꓡ ꓗꓴꓸˍ ꓡꓳ= ꓬꓲ ꓫꓵꓸ ꓟꓺˍ ꓟ ꓔꓯ ꓫꓵꓸ ꓔ ꓟ ꓑꓶꓸ ꓓꓴ ꓬꓲ ꓫꓵꓸ ꓖꓳ ꓟ ꓠꓬ ꓬꓲ ꓜꓲ ꓣꓱꓻ ꓓꓳ ꓡˍ ꓡꓳ= ꓬꓲ ꓫꓵꓸ ꓖꓳ ꓟ ꓠꓬ ꓟꓲ ꓠꓯ ꓧꓪꓽ ꓐꓰ ꓑꓳꓸ ꓙꓰ ꓕꓯ꓾ ꓠꓱꓸ ꓦꓱꓽ ꓐꓰ ꓑꓳꓸ ꓡꓰ ꓕꓯ ꓬꓲ ꓜꓲ ꓣꓱꓻ ꓡˍ ꓡꓳ= ꓣꓳ ꓠꓲꓹ ꓟ ꓠꓬ ꓟꓲ ꓠꓯ ꓥ ꓡꓳ꓾ ꓠꓱꓸ ꓦꓱꓽ ꓥ ꓡꓳ= ꓠꓱꓸ ꓜꓲꓽ ꓥ ꓡꓳ= ꓬꓲ ꓫꓵꓸ ꓫꓵꓸ ꓖꓴ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓲꓹ ꓟ ꓗꓪ ꓪꓴ-ꓢ ꓐꓯ ꓘꓶꓽ ꓫꓵꓸ ꓔ ꓠꓬ ꓪꓴ-ꓢ ꓐꓯ ꓘꓶꓽ ꓣꓱꓻ ꓡˍ ꓥꓳ= ꓠꓲꓽ ꓢ-ꓓꓯ ꓐꓯ ꓘꓶꓽ ꓫꓵꓸ ꓔ ꓠꓬ ꓠꓲꓽ ꓢ-ꓓꓯ ꓬꓲ ꓜꓲ ꓣꓱꓻ ꓡˍ ꓥꓳ=

ꓣꓳ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ-ꓢ ꓐꓯ ꓘꓶꓽ ꓠ ꓠꓹ ꓕꓯ꓾ ꓪꓴ-ꓢ ꓐꓯ ꓘꓶꓽ ꓔꓯ ꓓꓵꓽ ꓙˍ ꓕꓯ ꓣꓳ ꓠꓲꓹ ꓟ ꓠꓯꓹꓼ ꓗꓪ ꓪꓴ-ꓢ ꓬꓲ ꓟꓴꓽ ꓗꓪ ꓗꓴꓷꓼ ꓣꓱꓻ ꓡˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓠꓲꓽ ꓢ-ꓓꓯ ꓥ ꓟꓲ ꓢꓯꓼ ꓕꓵꓼ ꓔꓬ ꓡꓳ= ꓟꓬꓽ ꓠꓬꓲ ꓠꓬ ꓮ ꓟꓶ ꓢꓳꓚꓲꓮꓡ ꓟꓰꓓꓲꓮ ꓦꓬꓼ ꓠꓬꓲ ꓗꓪ ꓢ-ꓓꓯ ꓠꓬ ꓟꓽ ꓙꓲꓻ ꓟ ꓚꓱꓹ꓾ ꓟꓽ ꓙꓲꓻ ꓟ ꓐꓬꓱꓽ꓾ ꓟꓽ ꓙꓲꓻ ꓟ ꓬꓲ ꓫꓵꓽ ꓬꓲ ꓙꓰꓽ ꓖꓶ ꓢꓲ ꓠꓬꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓙꓲꓻ ꓟ ꓬꓲ ꓫꓵꓸ ꓫꓵꓸ ꓠꓹ ꓟ ꓢꓯꓼ ꓕꓵꓼ ꓔꓬ ꓡꓳ= ꓖꓳ ꓟ ꓑꓶꓸ ꓓꓴ ꓮ ꓟꓶ ꓦꓬꓼ ꓠꓬꓲ ꓗꓪ ꓟ ꓞꓳ ꓤ ꓮꓽ ꓟꓬꓹ ꓠꓬ ꓐꓬ ꓡꓰ ꓔꓬ ꓡꓳ=

ꓢꓳꓚꓲꓮꓡ ꓟꓰꓓꓲꓮ ꓔꓯ ꓬꓲ ꓙꓲꓻ ꓟꓽ ꓣꓱꓽ꓾ ꓜꓳꓽ ꓜꓳꓽ ꓟꓽ ꓣꓱꓽ ꓣꓱꓽ ꓠꓲꓽ ꓢ-ꓓꓯ ꓡꓰ ꓟꓳꓸ ꓖꓶ ꓡˍ ꓟ ꓙ ꓖꓴ ꓔꓯ ꓚ ꓢꓲ ꓠꓬꓲ ꓣꓱꓽˍ ꓟ ꓑꓶꓸ ꓓꓴ ꓚꓲꓸ ꓛꓬ ꓤꓶꓻ ꓠꓬ ꓐꓬ ꓡꓰ ꓔꓬ ꓟ ꓮ ꓟꓬꓹ ꓙꓳˍ ꓡꓳ= ꓠꓲꓽ ꓢ-ꓓꓯ ꓬꓲ ꓫꓵꓸ ꓫꓵꓸ ꓓꓴ ꓐꓱ ꓶ ꓮ ꓘꓶꓸ ꓙꓲˍ ꓟ ꓥ ꓟ ꓑꓧꓳꓠꓰ ꓗꓪ ꓐꓰ ꓬꓲ ꓪ ꓠꓬ ꓠꓲꓽ ꓢ-ꓓꓯ ꓡꓰ ꓬꓲ ꓫꓵꓸ ꓫꓵꓸ ꓖꓶ ꓡˍ ꓟ ꓟꓶ ꓡꓰ ꓔꓬ ꓡꓳ= ꓙꓲˍ ꓟ ꓢꓶꓸ ꓟꓽ ꓞꓲꓺ ꓟꓽ ꓙꓲꓻ ꓟ ꓐꓯ ꓘꓶꓽ꓾ ꓠꓱꓸ ꓐꓯ ꓢꓴ ꓡꓰ ꓟꓸ ꓖꓶ ꓔ ꓟ ꓟꓽ ꓙꓲꓻ ꓟ ꓬꓲ ꓫꓵꓽ ꓬꓲ ꓙꓰꓽ ꓮ ꓙꓵꓽ ꓡꓳꓸ ꓢꓲ ꓠꓬꓲ ꓖꓳ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓚꓲꓸ ꓛꓬ ꓠꓲꓹ ꓟ ꓔꓯ ꓐꓬ ꓡꓰ ꓝꓲ ꓔꓬ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓣꓳ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓮ ꓕꓯ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓓꓵꓽ ꓙ ꓠꓹ ꓟ ꓬꓳꓸ ꓚꓵˍ ꓡꓳ= ꓖꓳ ꓡꓱ ꓟꓽ ꓥ ꓕꓯ ꓠꓽ ꓣꓳ ꓠꓲꓹ ꓟ ꓠꓬ ꓠꓲꓽ ꓢ-ꓓꓯ ꓡꓰ ꓬꓲ ꓫꓵꓸ ꓫꓵꓸ ꓔꓯꓹ ꓙꓰˍ ꓥꓳ=

ꓢꓲ ꓒ ꓬꓰ-ꓢꓴ ꓠꓬ ꓙꓲˍ ꓟ ꓬꓲ ꓫꓵꓸ ꓢꓶꓽ ꓫꓵꓸ ꓖꓶ ꓢꓴ ꓥ ꓟ ꓑꓶꓸ ꓓꓴ ꓮ ꓕꓯ ꓟꓲ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓛꓳ ꓫꓱꓽ ꓙꓰ ꓡꓯ= ꓖꓳ ꓡꓱ ꓬꓰˍ ꓠꓬ ꓣꓳ ꓠꓲꓹ ꓟ ꓠꓬ ꓗꓹ ꓛꓲꓽˍ ꓟ ꓢꓲ ꓡꓲ ꓟ ꓟꓶ ꓢꓲ ꓠꓬꓲ꓾ ꓣꓳ ꓫꓸ ꓕꓱˍ ꓟ ꓣꓳ ꓓꓵꓽ ꓙꓽˍ ꓟ ꓮ ꓙꓵꓽ ꓠꓬ ꓪꓴ-ꓢ ꓐꓯ ꓘꓶꓽ ꓐꓰ ꓠꓶꓽ ꓡꓯ ꓘꓳꓹˍ ꓟ꓾ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓫꓸ ꓕꓱ ꓗꓴꓸˍ ꓟ ꓞꓳ ꓤ ꓒꓬꓱꓼ ꓡˍ ꓥꓳ= ꓖꓳ ꓡꓱ ꓠꓬ ꓣꓳ ꓣꓱꓽ ꓛꓰꓽ ꓮ ꓟꓬꓹ ꓑꓯꓹ ꓟꓶˍ ꓥꓳ=