ꓛꓬ ꓢꓴ ꓔꓯ ꓖꓽ ꓖꓶ ꓠꓯꓹ ꓟ

ꓢꓲꓽ ꓫꓬ ꓕꓳꓽ ꓶ ꓘꓴꓽ ꓗꓪ ꓒꓲ-ꓕꓱ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓟꓸ ꓒꓽꓳ꓾ ꓥꓪ ꓠꓬ ꓥꓪ ꓔꓯ ꓛꓬꓻ ꓡ ꓢꓴ ꓔꓯ ꓮ ꓟꓬ ꓧꓪꓹ ꓖꓼ ꓖꓶ ꓠꓯꓹ ꓡ? ꓫꓵꓽ ꓧꓪꓹ ꓥ ꓡ? ꓐꓰ ꓠꓺ ꓠꓬꓲˍ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓫꓵꓽ ꓧꓪꓹˍ ꓡꓰ ꓥꓪ ꓟꓽ ꓐꓯ꓾ ꓫꓵꓽ ꓞꓲꓺ ꓫꓵꓽ ꓧꓪꓹ ꓖꓽ ꓖꓶ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓡꓳ= ꓬꓲ ꓡꓰ ꓐꓯ ꓠꓲꓹ ꓫꓵˍ ꓟ ꓠꓬ ꓬꓲ ꓑꓶꓸ ꓟꓽ ꓞꓷꓹ ꓞꓷꓹ ꓖꓽ ꓖꓶ ꓠꓹ ꓟ꓾ ꓮ ꓕꓯ ꓟꓲ ꓖꓽ ꓖꓶ ꓠꓹ ꓟ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓕꓵꓼ ꓪ ꓖꓶ ꓔ ꓟ ꓥ ꓡꓳ=

ꓢꓴ ꓔꓯ ꓖꓽ ꓖꓶˍ ꓟ ꓠꓬ ꓮ ꓘꓶꓸ ꓬꓰ ꓫꓸˍ ꓟ ꓕꓲ ꓚꓱꓹ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓮ ꓙꓵꓽ ꓠꓯꓸꓼ ꓗꓪ ꓫꓸ ꓓꓰ ꓡꓰ ꓟ ꓕꓵꓼ ꓪ ꓕꓲ ꓟ ꓥ ꓡꓳ= ꓣꓳ ꓔꓯ ꓢꓴ ꓡꓰ ꓛꓬꓻ ꓡ ꓕꓯ꓾ ꓢꓴ ꓡꓰ ꓣꓳ ꓔꓯ ꓠꓻ ꓡꓰ ꓠ ꓬꓰ ꓖꓶ ꓡ ꓕꓯ꓾ ꓢꓷꓸ ꓢꓴ ꓗꓪ ꓐꓰˍ ꓟꓲ ꓟꓽ ꓢꓷꓸ ꓢꓴ ꓗꓪ ꓐꓰˍ ꓟꓲ ꓣꓳ ꓔꓯ ꓛꓬꓻ ꓡ ꓕꓯ ꓣꓳ ꓠꓬ ꓬꓲ ꓪ ꓔꓯ ꓝꓮꓲ ꓚꓱꓹ ꓖꓶ ꓠꓲꓹ ꓫꓵˍ ꓡꓳ= ꓣꓳ ꓔꓯ ꓕꓲ ꓘꓶꓽ ꓐꓯ ꓗꓸ ꓡ ꓕꓯ ꓣꓳ ꓠꓬ ꓬꓲ ꓔꓯ ꓠꓬꓲꓽ ꓘꓶꓽ ꓐꓯ ꓗꓸ ꓠꓲꓹ ꓫꓵˍ ꓡꓳ= ꓕꓱ ꓟ ꓠꓬ ꓞꓳ ꓤ ꓐꓴ ꓡꓲꓽ ꓞꓳ ꓤ ꓐꓴ ꓠꓲꓹ ꓡꓶꓽ ꓥ ꓡꓳ=

ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓛꓳ ꓢꓴ ꓠꓬ ꓟꓲ ꓠꓯ ꓞꓳ ꓤ ꓐꓴ ꓬꓲ ꓫꓱꓹ ꓕꓯꓽ ꓢꓲ ꓗꓪ ꓘꓳꓻ ꓙꓻ ꓙꓰ ꓝꓲ ꓠ ꓔ ꓡꓳ ꓐꓰ ꓐꓯ ꓖꓶ ꓡ ꓔꓬ ꓡꓳ= ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ ꓔꓯ ꓘꓴˍ ꓕꓯ “ꓥꓪ ꓔꓯ ꓛꓬꓻ ꓡ ꓢꓴ ꓝꓴꓲꓸ ꓔꓯ ꓥꓪ ꓖꓽ ꓖꓶˍ ꓟ ꓡꓰ ꓐꓰ ꓥꓪ ꓠꓴꓽ ꓛꓬꓻ ꓗꓷ ꓟ ꓝꓴꓲꓸ ꓔꓯˍ ꓟꓲ ꓖꓽ ꓖꓶ ꓡꓯ” ꓐꓰ ꓪꓽ ꓘꓴˍ ꓡꓳ= ꓣꓳ ꓔꓯ ꓛꓬꓻ ꓡ ꓢꓴ ꓔꓯ ꓣꓳ ꓖꓽ ꓖꓶ ꓗꓷ ꓟˍ ꓡꓰ ꓐꓰ ꓣꓳ ꓛꓬꓻ ꓗꓷ ꓟ ꓝꓴꓲꓸ ꓔꓯ ꓪꓴ-ꓢ ꓡꓰ ꓖꓽ ꓖꓶ ꓡꓯ ꓐꓰ ꓪꓽ ꓘꓴˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓢꓴ ꓔꓯ ꓧꓶꓸ ꓕꓯ ꓖꓽ ꓖꓶ ꓗꓷ ꓕꓯˍ ꓡꓰꓽ ꓣꓳ ꓠꓬ ꓖꓼ ꓖꓶˍ ꓟ ꓟꓶˍ ꓡꓳ= ꓖꓽ ꓖꓶ ꓠꓲꓹ ꓐꓯ ꓟ ꓕꓱ ꓡꓱ ꓥ ꓡꓳ=

ꓖꓽ ꓖꓶ ꓠꓲꓹ ꓐꓰ ꓐꓯ ꓕꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵˍ ꓟ ꓦꓶ ꓠꓲꓹ ꓙꓳꓺ ꓠꓲꓹ ꓮ ꓙꓵꓽ ꓔꓯ ꓡꓳ ꓩꓴ ꓗꓷˍ ꓟ ꓥ ꓡꓳ= ꓣꓳ ꓖꓽ ꓖꓶ ꓗꓷ ꓕꓯ ꓖꓽ ꓖꓶˍ ꓟ ꓖꓳ ꓟ ꓗꓪ ꓐꓰ ꓣꓱꓽ ꓛꓰꓽ ꓗꓹ ꓛꓲꓽˍ ꓟ ꓢꓲ ꓡꓲ ꓟ ꓔꓯ ꓧꓶꓸ ꓕꓯ ꓟꓶ ꓢꓴ ꓠꓬ ꓣꓳ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓢꓴ ꓔꓯ ꓖꓽ ꓖꓶ ꓟꓽ ꓐ ꓡ ꓟ ꓡ ꓞꓳ ꓕꓲ ꓣꓳ ꓠꓬ ꓐꓬ ꓔꓬ ꓟ ꓮꓸ ꓔꓳꓸ ꓔꓯ ꓕꓯꓽ ꓔ ꓟ ꓔꓯ ꓫꓱꓸˍ ꓡꓳ= ꓬꓲ ꓠꓬ ꓖꓳ ꓟ ꓔꓯ ꓪꓳ ꓫꓳꓸ ꓔ ꓕꓯ ꓠꓱꓸ ꓐꓯ ꓢꓴ ꓔꓯ ꓟꓽ ꓐꓬ ꓡꓰ ꓧꓶꓸ ꓕꓯ ꓡꓰ ꓬꓲ ꓔꓯ ꓧꓶꓸ ꓕꓯ ꓐꓬ ꓡꓰˍ ꓥꓳ=

ꓖꓳ ꓡꓱ ꓠꓬꓲ ꓣꓳ ꓖꓽ ꓖꓶˍ ꓐꓯ ꓕꓯ ꓣꓳ ꓮ ꓔꓳꓸ ꓖꓳ ꓟ ꓔꓯ ꓡꓳ ꓩꓴ ꓗꓷˍ ꓟ ꓮ ꓙꓵꓽ ꓔꓯ ꓒꓶ ꓩꓴ ꓗꓷˍ ꓟ ꓬꓲ ꓬꓲꓺ ꓢꓲꓺ ꓥ ꓡꓳ꓾ ꓬꓲ ꓟꓸ ꓟꓲꓽ ꓥ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓠꓴ ꓔꓯ ꓛꓬ ꓗꓷ ꓢꓴ ꓔꓯ ꓖꓽ ꓖꓶ ꓐꓰ ꓐꓯ ꓟ ꓠꓬ ꓣꓳ ꓔꓯ ꓗꓹ ꓛꓲꓽ ꓡꓰ ꓝꓲ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓥ ꓡꓳ= ꓝꓮꓲ ꓣꓳ ꓡꓰ ꓢꓴ ꓔꓯ ꓧꓶꓸ ꓔꓯ ꓖꓽ ꓖꓶˍ ꓕꓯ ꓡꓰꓽ ꓪꓴ-ꓢ ꓠꓬ ꓣꓳ ꓝꓴꓲꓸ ꓔꓯ ꓖꓽ ꓖꓶ ꓡˍ ꓟ ꓥ ꓡꓳ꓾ ꓐꓰ ꓐꓯ ꓡꓳ=

ꓮ ꓡꓲꓳ ꓐꓯ ꓠꓬ ꓖꓽ ꓖꓶ ꓠꓲꓹ ꓐꓯ ꓟ ꓠꓬ ꓠꓵꓻ ꓠꓲꓹ ꓥ ꓡꓳ= ꓠꓵꓻ ꓠꓲꓹ ꓙ ꓖꓴ ꓗꓪ ꓐꓰ ꓡꓰꓽ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰˍ ꓡꓳ=

ꓣꓳ ꓠꓬ ꓪꓴ-ꓢ ꓔꓯ ꓮ ꓘꓶꓸ ꓙꓵꓻˍ ꓡꓳ ꓐꓯ ꓔꓬ ꓥ ꓟꓲ ꓣꓳ ꓠꓯꓸꓼ ꓗꓪ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓟꓽ ꓓꓻ= ꓣꓳ ꓠꓬ ꓙꓵꓻˍ ꓐꓰ ꓐꓯ ꓠꓬ ꓚꓲꓸ ꓛꓬ ꓙꓵꓻ ꓔ ꓟ ꓡꓰ ꓛꓳꓻ ꓫꓱꓽˍ ꓥꓳ= ꓣꓳ ꓠꓵꓻ ꓠꓲꓹ ꓔꓯ ꓗꓽ ꓔ ꓟ꓾ ꓠꓵꓻ ꓠꓲꓹ ꓔꓯ ꓐꓬ ꓡꓰ ꓝꓲˍ ꓟ꓾ ꓠꓲꓹ ꓠꓵꓻ ꓟꓽ ꓐ ꓡ ꓗꓪ ꓛꓲꓺ ꓒꓬꓱꓼ ꓡ ꓝꓲˍ ꓟ ꓠꓬ ꓢꓴ ꓔꓯ ꓖꓽ ꓖꓶ ꓟꓽ ꓐ ꓡ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓵꓻ ꓠꓲꓹ ꓐꓰ ꓟꓽ ꓫꓱꓸ ꓟ ꓠꓬ ꓢꓴ ꓔꓯ ꓖꓽ ꓖꓶ ꓟꓽ ꓐ ꓡ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓙꓲ-ꓢꓴ ꓢꓲ ꓤ ꓥ ꓟ ꓣꓳ ꓐꓴ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓖꓽ ꓖꓶ ꓠꓲꓹ ꓔꓯ ꓧꓶꓸ ꓕꓯ ꓦꓵꓻ ꓡꓯ= ꓣꓳ ꓔꓯ ꓖꓽ ꓖꓶ ꓠꓲꓹ ꓒ ꓐꓲꓺ ꓙꓳˍ ꓕꓯ ꓣꓳ ꓠꓲꓹ ꓟ ꓥˍ ꓟꓲ ꓢꓲ ꓡꓲ ꓡꓲ ꓐꓰ ꓠꓲꓹ ꓪꓴꓽ ꓪꓴꓽ ꓡꓰꓽ ꓞꓳ ꓙꓳ ꓐ ꓡˍ ꓥꓳ= ꓣꓳ ꓤꓶꓻ ꓗꓪˍ ꓟꓲ ꓗꓹ ꓛꓲꓽ ꓡ ꓢꓲ ꓕꓲ ꓠꓬꓲ ꓙꓳˍ ꓠꓬ ꓪꓴ-ꓢ ꓡꓰ ꓣꓳ ꓐꓱ ꓶ ꓙꓽ ꓖꓶ ꓔ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰˍ ꓥꓳ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓕꓵꓼ ꓪ ꓖꓶ ꓔꓬ ꓡꓳ=