ꓟ, ꓟ ꓟ‐ꓡꓲ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓲꓽ ꓔꓯ, ꓙꓰˍ ꓟ (The Assumption of Mary)

#The Assumption of Mary #creditphoto

Sunday, August 20, 2023

ꓟꓹ ꓟ ꓟ˗ꓡꓲ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓲꓽ ꓔꓯꓹ ꓙꓰˍ ꓟ (The assumpton of Mary)

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓶ ꓘꓳꓼ ꓠꓯ ꓗꓪ ꓐꓰ (20) ꓫꓵꓽ ꓠꓽ ꓟ ꓢꓲꓽ ꓒ ꓦꓬꓼ ꓠꓬꓲ. ꓥ ꓢꓲ ꓠꓬꓲ ꓠꓬꓲ. ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓟ, ꓟ ꓟ‐ꓡꓲ ꓔꓯ ꓟꓴ ꓗꓪ ꓓꓯ ꓢꓲ ꓗꓪ ꓛꓲ ꓓꓯꓻ ꓙꓰ ꓟ ꓑꓮꓲꓽ ꓦꓬꓼ ꓠꓬꓲ ꓟꓲ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 1ꓽ39‐56 ꓝꓲ. ꓗꓪ ꓥ ꓢꓲ ꓠꓬꓲ ꓟ‐ꓡꓲ ꓠꓬ ꓬꓲ‐ꓡꓲ‐ꓫ‐ꓑꓷ ꓔꓬ ꓗꓪ ꓙꓰˍ ꓢꓲ ꓠꓬꓲ ꓟꓬꓱꓽ ꓬꓰ ꓙ ꓗꓷ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ ꓣꓳ ꓠꓬꓲ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓬꓲ ꓟ, ꓟ ꓟ‐ꓡꓲ ꓤꓶꓻ ꓔꓯ ꓓꓵ ꓙ ꓢꓲ ꓠꓬꓲ ꓦꓻ ꓕꓲ ꓒꓳ ꓗꓪ ꓢꓯꓼ ꓪ ꓣꓴ ꓠ, ꓟ ꓥ ꓡꓳ꓿

ꓟ, ꓟ ꓟ‐ꓡꓲ ꓠꓬ ꓧꓪꓽ ꓖꓳ ꓓꓱ ꓐꓰ ꓦꓻ ꓔꓯ ꓟꓴ ꓗꓪ ꓗꓪ ꓛꓲ ꓓꓯꓻ ꓙꓰ ꓟꓶ ꓡꓰ ꓢꓴ ꓥ ꓡꓳ꓿ ꓬꓲ. ꓠꓬꓲ ꓝꓴꓲ ꓟꓽ ꓙꓳˍ ꓢꓴ ꓥ ꓡꓳ꓿ ꓐ, ꓐ ꓪꓴ‐ꓢ ꓡꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓦꓵꓻ ꓠ, ꓟ ꓢꓲ. ꓔ ꓢꓴ ꓥ ꓟ ꓠꓱ. ꓟ ꓤꓻ ꓗꓪ ꓙꓳˍ ꓡꓰ ꓟꓶ ꓠꓷ ꓝ. ꓒꓽ ꓐꓴ ꓡꓰ ꓝ. ꓔ ꓟ ꓗꓪ ꓐꓰ ꓣꓳ ꓢꓷ. ꓪ ꓡꓳ꓿ ꓟ, ꓟ ꓟ‐ꓡꓲ ꓔꓯ ꓝꓴꓲ ꓙꓳˍ ꓟ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓠ, ꓟ ꓟꓬꓱꓽ ꓬꓰ ꓟ ꓗꓪ ꓣꓱ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟ, ꓟ ꓟ‐ꓡꓲ ꓠꓬ ꓮ ꓠꓱ ꓮ‐ꓓꓯ ꓐꓰ ꓯ‐ꓪ ꓡꓰ ꓬꓰ ꓔ ꓟ ꓝꓴꓲ. ꓔꓯ ꓟꓽ ꓶꓻ ꓞ ꓢꓴ ꓥ ꓡꓳ꓿

ꓪꓴ‐ꓢ ꓠꓬ ꓟ, ꓟ ꓟ‐ꓡꓲ ꓔꓯ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓟ ꓙꓽ ꓖꓴ ꓗꓪ ꓣꓱ ꓠ, ꓟ ꓙꓽ ꓖꓶ ꓔ ꓟ ꓡꓰ ꓐꓰ ꓟ, ꓟ ꓟ‐ꓡꓲ ꓟꓲ ꓠꓯ ꓗꓪ ꓦꓬꓼ ꓠꓬꓲ ꓖꓴ ꓡꓰ ꓥ ꓟꓲ ꓟꓴ ꓗꓪ ꓗꓪ ꓮ ꓘꓶ. ꓛꓲ ꓒꓴ ꓟ ꓡꓯ ꓫꓴ ꓔꓯ ꓪꓴ‐ꓢ ꓡꓰ ꓙꓽ ꓖꓴ ꓔ ꓟ ꓔꓯ ꓣꓳ ꓢꓷ. ꓪ ꓓ ꓡꓳ꓿ ꓪꓴ‐ꓢ ꓡꓰ ꓟ, ꓟ ꓟ‐ꓡꓲ ꓦꓻ ꓐꓰ ꓧꓪꓽ ꓖꓳ ꓓꓱ ꓔꓯ ꓟꓴ ꓗꓪ ꓗꓪ ꓛꓲ ꓓꓯꓻ ꓙꓰ ꓟ ꓡꓰ ꓐꓰ ꓣꓳ ꓔꓯ ꓥ ꓟꓲ ꓕꓲ ꓙꓵ, ꓙꓵ, ꓟꓴ ꓗꓪ ꓗꓪ ꓛꓲ ꓓꓯꓻ ꓙꓰ ꓠ, ꓟ ꓣꓱ ꓛꓰ ꓡꓯꓽ ꓫꓴ ꓔꓯ ꓪꓴ‐ꓢ ꓡꓰ ꓠꓴ ꓥꓪ ꓔꓯ ꓖꓶ ꓔ ꓟ ꓔꓯ ꓓꓵꓽ ꓙ ꓠ, ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓪꓴ‐ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓡꓯ ꓫꓴꓻ ꓘꓳ, ꓣꓴ ꓟꓶ ꓠ, ꓟ ꓣꓳ ꓢꓯ. ꓔꓬ ꓟ ꓙꓵ, ꓕꓯ ꓟ, ꓟ ꓟ‐ꓡꓲ ꓡꓰ ꓐꓰ ꓣꓳ ꓢꓯꓼ ꓕꓵꓼ ꓠ, ꓔ ꓡꓳ꓿ꓟ, ꓟ ꓟ‐ꓡꓲ ꓔꓯ ꓓꓯꓻ ꓢꓳꓻ ꓓꓴ ꓬꓰ ꓡꓯ꓿ ꓢꓲꓽ ꓫꓬ ꓕꓳ ꓶ ꓗꓪ ꓟ꓿ꓡꓲ ꓠꓬ ꓬꓲ ꓫꓵꓽ ꓪꓳꓽ ꓤ ꓥ ꓟ ꓬꓲ‐ꓡꓲ‐ꓫ‐ꓑꓷ ꓔꓶ. ꓗꓪ ꓛꓲ ꓡꓰ ꓕꓯ ꓬꓲ‐ꓡꓲ‐ꓫ‐ꓑꓷ ꓦꓰꓼ ꓟ ꓗꓪ ꓖꓳ ꓓꓱ ꓔꓲ. ꓒ ꓬꓳ‐ꓦ ꓠꓬ ꓗ, ꓛꓲ ꓔꓬ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓟ‐ꓡꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓬꓲ ꓤꓶꓻ ꓠꓯ ꓗꓪ ꓘꓳ ꓣꓴ ꓢꓲ ꓠꓬꓲ ꓠꓱ. ꓐꓯꓼ ꓢꓴ ꓐꓱ ꓶ ꓥ ꓟꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓟ. ꓖꓶ ꓓꓯꓻ ꓖꓶ ꓢꓴ ꓥ ꓡꓳ꓿

ꓣꓳ ꓥ ꓟꓲ ꓟ, ꓟ ꓟ‐ꓡꓲ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓠꓱ. ꓐꓯꓼ ꓢꓴ ꓐꓱ ꓶ ꓚꓬꓴ ꓢꓲꓺ ꓒ ꓔꓯ ꓢꓷ. ꓡꓲ ꓠ, ꓟ ꓟꓳ. ꓪ ꓠ, ꓟ ꓓꓯꓻ ꓖꓶ ꓢꓴ ꓟ. ꓖꓶ ꓢꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓠꓱ. ꓐꓯꓼ ꓢꓴ ꓔꓯ ꓗ, ꓛꓲ ꓟ ꓓꓳꓽ ꓐꓯ ꓟ. ꓖꓶ ꓢꓴ ꓒꓬꓱꓼ ꓡ ꓠ, ꓟ ꓢꓯꓼ ꓔꓵꓼ ꓓꓴ ꓬꓰ ꓡꓯ꓿ ꓚꓬꓴ ꓢꓲꓺ ꓒ ꓬꓰ ꓟ. ꓖꓶ ꓟ ꓐꓰ ꓟꓳ. ꓪ ꓠ, ꓟ ꓢꓷ. ꓪ ꓠ, ꓟ ꓟ. ꓖꓶ ꓟ ꓚꓱ, ꓮ ꓟꓬ, ꓙꓳ ꓟ ꓥ ꓡꓳ꓿ ꓕꓱ ꓗꓪ ꓐꓰ ꓮ ꓘꓶ. ꓢ ꓟ ꓐꓰ ꓣꓳ ꓚꓵ. ꓕꓲ ꓫꓵꓽ ꓠꓬ ꓟ, ꓟ ꓟ‐ꓡꓲ ꓡꓰ ꓐꓰ ꓙꓽ ꓣꓳ ꓟ ꓠꓲ, ꓟ ꓗꓪ ꓐꓰ ꓪꓴ‐ꓢ ꓠꓲ, ꓡꓶꓽ ꓔꓯ ꓒꓵꓽ ꓛꓳꓽ ꓓꓴ ꓬꓰ ꓡꓯ꓿ ꓮ ꓟꓶ ꓟ ꓤꓶꓻ ꓗꓪ ꓟꓲ ꓠꓯ ꓗ, ꓛꓲ ꓓꓴ ꓮ ꓟꓬ, ꓙꓳˍ ꓥ ꓟꓲ ꓕꓱ ꓟ ꓮ ꓙꓵꓽ ꓠꓬ ꓕꓲ ꓑ ꓤ ꓐꓱ ꓶ ꓡꓰ ꓥ ꓡꓳ꓿ ꓟꓽ ꓤꓲ ꓞ ꓟ ꓗ, ꓛꓲ ꓓꓴ ꓥ ꓡꓳ꓿ ꓟ, ꓟ ꓟ‐ꓡꓲ ꓡꓰ ꓐꓰ ꓙꓽ ꓣꓳ ꓟ ꓠꓲ, ꓟ ꓗꓪ ꓐꓰ ꓪꓴ‐ꓢ ꓔꓯ ꓒꓵꓽ ꓛꓳꓽ ꓗꓴ ꓢꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓟ, ꓟ ꓟ‐ꓡꓲ ꓥꓪ ꓐꓱ ꓶ ꓚꓬꓴ ꓢꓲꓺ ꓒ ꓠꓯ, ꓗꓪ ꓶꓻ ꓓꓲ ꓙ ꓡꓯ꓿ ꓣꓳ ꓗꓴꓷꓼ ꓢꓲ ꓡꓲ ꓟꓶ ꓠ, ꓟ ꓟ, ꓟ ꓟ‐ꓡꓲꓽꓳ ꓢꓲꓺ ꓒ ꓬꓰ‐ꓢꓴ ꓠꓯ ꓗꓪ ꓶꓻ ꓓꓲ ꓙꓽ ꓡꓯ꓿