ꓠꓻ ꓫꓵꓽ ꓠꓻ ꓙꓰꓽ ꓫꓬ, ꓓꓻ ꓡꓰ_ ꓟ

ꓪꓴ‐ꓢ ꓡꓰ ꓖꓶ ꓡ_ ꓟ ꓢꓯꓼ ꓪ꓾ ꓪꓴ‐ꓢ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓖꓶ ꓡ ꓟ ꓢꓯꓼ ꓪ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓫꓱ, ꓡꓯꓼ ꓘꓳ꓾ ꓕꓲ ꓐꓱ ꓠꓬ ꓠꓻ ꓓꓴ ꓔꓯ ꓫꓬ, ꓐ ꓡ ꓫꓵ꓾ ꓕꓲ ꓐꓱ ꓠꓬ ꓫ. ꓪ ꓮ ꓘꓶ. ꓕꓱ ꓗꓴ. ꓢꓲ ꓠꓬꓲ ꓪꓴ‐ꓢ ꓟ. ꓟꓲꓽ ꓚꓺ ꓟ ꓗꓪ ꓮ ꓘꓶ. ꓓ ꓫꓵ ꓕꓱ ꓡꓱ ꓣꓱꓽ ꓛꓰ ꓟꓶ. ꓫꓵ ꓟꓲ ꓙꓳ_ ꓡꓳ꓿ ꓕꓲ ꓐꓱ ꓠꓬ ꓕꓳ ꓶ ꓮ ꓘꓶ. ꓐꓳ ꓗꓴ. ꓫꓵ ꓣꓱ ꓛꓰ ꓟꓶ. ꓫꓵ ꓟꓲ ꓙꓳ_ ꓡꓳ꓾ ꓕꓲ ꓐꓱ ꓠꓬ ꓟꓬꓱꓽ ꓬꓰ_ ꓟ ꓗꓪ ꓮ ꓘꓶ. ꓓ ꓫꓵ ꓟꓲ ꓙꓳ_ ꓡꓳ꓾ ꓖꓳ ꓡꓱ ꓠꓬꓲ ꓕꓲ ꓣꓳ ꓛꓳ ꓕꓲ ꓣꓳ ꓣꓱꓽ ꓛꓰ ꓟꓶ ꓡꓯꓼ ꓘꓳ_ ꓟ ꓟꓽ ꓫꓱ. ꓡꓯꓼ ꓘꓳ꓾

ꓠꓬꓲ. ꓠꓬꓲ ꓣꓳ ꓵꓻ ꓠ ꓔ ꓟ ꓢꓲ ꓫꓬ ꓕꓳ ꓶ ꓠꓬ ꓡꓴ‐ꓘ 4ꓽ38‐44 ꓗꓪ ꓛꓴ ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓠꓬ ꓪꓴ‐ꓢ ꓥ ꓟ ꓑꓶ ꓓꓴ ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓥꓳ꓾ ꓖꓳ ꓡꓱ ꓠꓬꓲ ꓠꓲꓽ ꓢ ꓓꓯ ꓔꓯ ꓖꓼ ꓓꓳ ꓖꓶ_ ꓟ ꓐꓰ ꓝꓮꓲ ꓞꓳ ꓠꓻ ꓔꓯ ꓫꓬ, ꓖꓶ_ ꓟ ꓟ. ꓟꓲꓽ ꓐ ꓙ ꓡꓳ꓿ ꓬꓲ ꓠꓬ ꓠꓻ ꓫꓵ ꓒꓬ ꓫꓵ ꓕꓱ ꓡꓱ ꓐꓰ ꓫꓬ, ꓖꓶ ꓢꓲ ꓠꓬꓲ ꓚꓳ ꓬꓰ_ ꓡꓳ꓿ ꓒꓲ‐ꓕꓱ ꓬꓲ ꓟ, ꓟ ꓔꓬ ꓗꓪ ꓛꓲ ꓬꓰ ꓢꓲ ꓠꓬꓲ ꓬꓲ ꓔꓯ ꓥ ꓟꓲ ꓠꓻ ꓫꓬ, ꓖꓶ_ ꓡꓳ꓾ ꓒꓲ‐ꓕꓱ ꓬꓲ ꓮ ꓟ ꓠꓬ ꓞꓼ ꓐꓰ ꓔꓴ ꓢꓲ ꓠꓬꓲ ꓬꓲ ꓪ ꓔꓯ ꓬꓰ ꓙ ꓖꓶ_ ꓡꓳ꓾ ꓔꓳ, ꓙ ꓖꓶ_ ꓡꓳ꓿ ꓜ ꓫꓬ, ꓖꓶ ꓜꓽ_ ꓡꓳ꓾ ꓕꓱ ꓟ ꓡꓰ ꓐꓰ ꓟꓶ ꓘꓶꓼ ꓙꓵ, ꓛꓲ ꓡ ꓕꓯ ꓠꓻ ꓫꓵꓽ ꓠꓻ ꓙꓰ ꓠ ꓢꓴ ꓮ ꓟꓬ, ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓛꓲ ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓮ ꓙꓵ ꓠꓻ ꓫꓬ, ꓖꓶ꓾ ꓠꓲꓽ ꓖꓼ ꓖꓶ꓾ ꓕꓱ ꓡꓱ ꓬꓰ ꓖꓶ_ ꓡꓳ꓾ ꓡ ꓞꓳ ꓮ ꓟꓬ, ꓠꓬ ꓪꓴ‐ꓢ ꓔꓯ ꓙꓵꓻ ꓡꓰ ꓢꓲ ꓠꓬꓲ ꓪꓴ‐ꓢ ꓔꓯ ꓪꓴ. ꓓꓵ ꓕꓵꓼ_ ꓡꓳ꓾ ꓪꓴ‐ꓢ ꓔꓯ ꓓꓳ ꓟꓳ_ ꓡꓳ꓿

ꓖꓳ ꓡꓱ ꓠꓬꓲ ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓢꓷ. ꓓꓴ ꓠꓬ ꓬꓲ ꓪꓴ. ꓕꓲ ꓫꓵ ꓟ ꓠꓬ ꓣꓳ ꓪ ꓠꓬꓲ_ ꓟ ꓗꓪ ꓐꓰ ꓟꓽ ꓥ ꓥ꓾ ꓟ. ꓒꓽ ꓟ. ꓟ ꓕꓲ ꓐꓱ ꓟ ꓠꓬ ꓬꓲ ꓪ ꓙꓳ_ ꓟ ꓪꓴ‐ꓢ ꓡꓰ ꓖꓶ ꓡ ꓟ ꓢꓷ. ꓠꓲ, ꓪꓴ‐ꓢ ꓖꓶ ꓡ ꓟ ꓢꓯꓼ ꓪ ꓗꓪ ꓐꓰ ꓡ ꓞꓳ ꓔꓯ ꓡꓯꓽ ꓒꓯ, ꓚꓰ, ꓢꓲ ꓠꓬꓲ ꓓ ꓡꓰ ꓝꓲ ꓘꓴ_ ꓫꓵ ꓣꓱ ꓛꓰ ꓙꓳ_ ꓡꓳ꓿ꓔꓲꓺ ꓒ ꓕꓲ ꓐꓱ ꓟ. ꓒꓽ ꓕꓲ ꓐꓱ ꓠꓬ ꓕꓱ ꓡꓱ ꓫꓵ ꓪꓴ‐ꓢ ꓖꓶ ꓡ ꓟ ꓡꓯꓼ ꓫꓴꓻ ꓙꓳ_ ꓡꓳ꓾ ꓕꓱ ꓡꓱ ꓐꓰ ꓙꓳ ꓕꓯ ꓖꓳ ꓟ ꓠꓬ ꓬꓲ ꓪ ꓫꓬ, ꓓ ꓡꓰ_ ꓟ ꓞꓳ ꓠꓻ ꓖꓳ ꓟ ꓠꓬ ꓪꓴ‐ꓢ ꓔꓯ ꓪꓴ. ꓓꓵ ꓕꓵꓼ ꓡ? ꓪꓴ‐ꓢ ꓔꓯ ꓫ ꓟꓳ ꓡ? ꓐꓯ ꓟ ꓣꓳ ꓡꓳ. ꓠꓬꓲ ꓠ ꓗ, ꓡꓳ꓾ꓔꓯ ꓥꓳꓽ ꓟ. ꓒꓽ ꓟ. ꓟ ꓕꓲ ꓐꓱ ꓟ ꓠꓬ ꓬꓲ ꓚꓲ ꓛꓬ ꓢꓯꓼ ꓪ ꓗꓪ ꓐꓰ ꓬꓲ ꓢꓯꓼ ꓕꓵꓼ ꓡ ꓟ ꓡꓰ ꓐꓰ ꓬꓲ ꓪꓽ ꓛꓴꓽ ꓪꓽ ꓪꓴ ꓘꓳ, ꓔꓬ ꓥꓳ ꓐꓯ ꓠꓬ ꓕꓱ ꓟ ꓠꓬ ꓟꓽ ꓜꓳ꓾ ꓚꓲ ꓛꓬ ꓠꓻ ꓫꓬ, ꓖꓶ ꓗꓷ ꓟ꓾ ꓚꓲ ꓛꓬ ꓶ ꓓꓰ_ ꓟ ꓗꓪ ꓐꓰ ꓓ ꓡꓰ ꓟ ꓞꓳ ꓠꓻ ꓖꓳ ꓟ ꓠꓬ ꓪꓴ‐ꓢ ꓔꓯ ꓪ ꓙꓲ ꓠꓲ, ꓠꓵ ꓡꓰ ꓢꓲ꓾ ꓪꓴ‐ꓢ ꓔꓯ ꓪ ꓙꓲ ꓫꓱ. ꓖꓶ_ ꓥꓳ꓾ꓐꓯ ꓠꓬ ꓕꓱ ꓟ ꓪꓴ‐ꓢ ꓬꓲ ꓛꓳ ꓑ. ꓬꓰ ꓡꓳ꓾ ꓟꓽ ꓥ ꓥ ꓐꓰ ꓞꓳ ꓤ ꓮ ꓙꓵ ꓪꓴ‐ꓢ ꓔꓯ ꓙꓵꓻ ꓠ, ꓟ ꓟꓽ ꓢꓯꓼ ꓕꓵꓼ ꓕꓵꓼ ꓐꓰ ꓞꓳ ꓤ ꓮ ꓙꓵ ꓔꓯ ꓚꓲ ꓛꓬ ꓕꓱ ꓗꓪ ꓡ ꓠ, ꓟ꓾ ꓠꓱ. ꓐꓯꓼ ꓟ. ꓒꓽ ꓢꓷ. ꓟꓽ ꓞꓲ꓾ ꓠꓱ. ꓐꓯꓼ ꓟ. ꓟ ꓢꓷ. ꓟꓽ ꓞꓲ ꓚꓲ ꓛꓬ ꓔꓬ ꓗꓪ ꓡ ꓝꓲ ꓐꓯ ꓢꓲ ꓢꓯꓼ ꓕꓵꓼ ꓟ ꓕꓱ ꓡꓱ ꓫꓵ ꓠꓲ, ꓟ ꓙꓳ ꓠꓬ ꓣꓳ ꓠꓬ ꓟ. ꓒꓽ ꓟ. ꓟ ꓬꓰ ꓢꓴ ꓥ ꓟꓲ ꓕꓱ ꓟ ꓠꓬ ꓕꓲ ꓠꓬꓲ ꓙꓳ ꓠꓬ ꓫ ꓙꓵ ꓡ ꓥꓳ꓾ꓠꓬꓲ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ‐ꓢꓴ ꓫꓬ, ꓖꓶ ꓗꓷ ꓟꓡ ꓞꓳ ꓮ ꓙꓵ ꓠꓬ ꓪꓴ‐ꓢ ꓔꓯ ꓫꓱ. ꓖꓶ ꓟ ꓐꓰ ꓠꓶꓽ ꓛꓳ ꓕꓲ ꓛꓳ ꓔꓯ ꓬꓰ ꓙ ꓖꓶ ꓟ꓾ ꓣꓳ ꓟꓳ_ ꓡꓳ꓿

ꓝꓮꓲ ꓕꓲ ꓫꓵ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓢꓲ ꓡꓲ, ꓡꓲ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓡꓳ ꓐꓰ ꓡꓳ. ꓟꓳ ꓪ ꓡꓳ꓾ ꓣꓳ ꓟꓬ ꓠꓬꓲ ꓔꓲꓺ ꓒ ꓣꓱ ꓢꓴ꓾ ꓟ. ꓒꓽ ꓟ. ꓟ ꓣꓱ ꓢꓴ ꓮ ꓙꓵ ꓠꓬ ꓞꓳ ꓤ ꓐꓰ ꓪꓴ‐ꓢ ꓠꓬꓲ ꓗꓳ. ꓛ ꓗꓪ ꓜꓲ ꓟꓳ ꓬꓰ ꓢꓴ ꓥ ꓟ ꓑꓶ ꓓꓴ ꓕꓱ ꓡꓱ ꓪꓴ‐ꓢ ꓐꓰ ꓬꓲ ꓙꓵ, ꓖꓶ ꓠ, ꓟ ꓟꓲ ꓣꓳ. ꓚꓵ ꓡꓳ꓾ꓕꓱ ꓡꓱ ꓟꓽ ꓥ ꓥ ꓐꓰ ꓪꓴ‐ꓢ ꓐꓰ ꓞꓳ ꓤ ꓠꓬꓲ ꓗꓳ. ꓚ ꓗꓪ ꓓꓽ ꓖꓴ ꓖꓳ ꓙꓱꓻ ꓫꓬ, ꓖꓶ ꓢꓴ ꓟ ꓠꓬ ꓪꓴ‐ꓢ ꓔꓯ ꓟꓽ ꓫꓬ, ꓫꓬ, ꓐꓰ ꓚꓲ ꓛꓬ ꓐꓰ ꓞꓳ ꓤ ꓠꓬꓲ ꓗꓳ. ꓚ ꓗꓪ ꓫꓬ, ꓔ ꓢꓲ ꓠꓬꓲ ꓞꓳ ꓤ ꓮ ꓙꓵ ꓔꓯ ꓚꓲ ꓛꓬ ꓔꓬ ꓗꓪ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓥꓳ ꓐꓯ ꓠꓬ ꓕꓱ ꓟ ꓠꓬ ꓟꓽ ꓜꓳ꓾ꓖꓳ ꓡꓱ ꓠꓬꓲ ꓠꓬꓲ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓮ ꓙꓵ ꓠꓬ ꓪꓴ‐ꓢ ꓔꓯ ꓫꓱ. ꓖꓶ ꓠ, ꓟ ꓢꓯꓼ ꓕꓵꓼ ꓟ ꓡꓰ ꓐꓰ ꓣꓳ ꓥ ꓟꓲ ꓪꓴ‐ꓢ ꓐꓰ ꓕꓲ ꓡꓲ, ꓔꓬ ꓢꓲ꓾ ꓞꓳ ꓤ ꓔꓯ ꓪꓴ‐ꓢ ꓓꓳꓽ ꓪꓴ‐ꓢ ꓙꓲ_ ꓟ ꓖꓶ ꓐ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓮ ꓙꓵ ꓔꓯ ꓬꓲꓼ ꓠꓬꓲ. ꓖꓶ ꓠꓲ, ꓫꓵ ꓡꓳ꓾