ꓛꓬ ꓡꓰ ꓢꓴ ꓔꓯ ꓮ‐ꓬꓲ ꓠꓬꓲ‐ꓤ ꓠꓵꓻ ꓠꓲ, ꓡꓰ ꓫꓬ, ꓔꓱ, ꓠ, ꓟ (Sunday reflection)

ꓛꓬ ꓡꓰ ꓢꓴ ꓔꓯ ꓮ‐ꓬꓲ ꓠꓬꓲ‐ꓤ ꓠꓵꓻ ꓠꓲ, ꓡꓰ ꓫꓬ, ꓔꓱ, ꓠ, ꓟ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ  ꓞꓳ ꓟꓵꓽ ꓘꓳꓼ ꓗꓪ ꓐꓰ (23) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓔꓲ ꓕꓳ ꓶ (18ꓽ15‐20) ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓛꓬ ꓡꓰ ꓢꓴ ꓔꓯ ꓮ‐ꓬꓲ ꓠꓬꓲ‐ꓤ ꓠꓵꓻ ꓠꓲ, ꓡꓰ ꓫꓬ, ꓔꓱ, ꓖꓶ ꓠ, ꓟ ꓬꓰ ꓠꓯ, ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟꓲ ꓠꓯ ꓗꓪ ꓞꓳꓼ ꓔ ꓟ ꓐꓰ ꓩꓴ ꓗꓷ ꓟ ꓙꓵꓽ ꓪ ꓔꓯ ꓢꓲꓺ ꓒ ꓬꓰ‐ꓢꓴ ꓚꓲ. ꓛꓬ ꓖꓶ ꓔ ꓡꓳ ꓟ. ꓔꓯ ꓕꓱ ꓢꓲꓽ ꓫꓬ ꓕꓳ ꓶ ꓝꓲ. ꓗꓪ ꓐꓰ ꓡꓳ. ꓟꓳ ꓪ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ  ꓠꓴ ꓬꓲ ꓠꓴ ꓠꓬꓲ ꓕꓲ ꓣꓳ ꓝꓴꓲ ꓬꓰˍꓠꓬ ꓙꓰ ꓢꓲ ꓠꓴ ꓪ ꓠꓬꓲꓽꓽ ꓣꓳ ꓔꓵꓼ ꓔꓬ ꓗꓪ ꓬꓲ ꓝꓴꓲ ꓖꓴ ꓟꓳ. ꓖꓶ꓿

ꓬꓲ ꓠꓴ ꓪ ꓔꓯ ꓠ ꓠ, ꓕꓯ ꓠꓽ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓠꓴ ꓘꓶ. ꓟꓶˍ ꓟ ꓥ ꓡꓳ꓿ ꓬꓲ ꓠ ꓠ, ꓟꓽ ꓫꓳ ꓕꓯ ꓠꓽ ꓢꓷ. ꓙ ꓟꓳꓻ ꓙ ꓢꓴ ꓠꓬꓲꓽ ꓢ ꓣꓳ ꓐꓯ ꓘꓶ ꓗꓪ ꓐꓰ ꓮ ꓡꓰ ꓕꓲ ꓘꓶ ꓟꓲ ꓕꓶ ꓡꓰ ꓝꓲ ꓠ, ꓟ ꓠ. ꓐꓯ ꓕꓲ ꓠꓬꓲꓽ ꓣꓳ ꓧꓳꓽ ꓙꓰ꓿ ꓬꓲ ꓪ ꓘꓶ. ꓘꓶꓽ ꓔꓯ ꓟꓲ ꓟꓽ ꓘꓳ ꓣꓴ ꓠꓬ ꓘꓴ ꓜꓲꓼ ꓞꓳ ꓔꓯ ꓦꓯ ꓖꓶ꓿ ꓘꓴ ꓜꓲꓼ ꓝꓳ ꓐꓯ ꓘꓶ ꓔꓯ ꓟꓲ ꓟꓽ ꓘꓳ ꓣꓴ ꓠꓬ  ꓬꓲ ꓔꓯ ꓐꓶꓽ ꓞꓳ ꓐꓰ ꓝꓲ. ꓫ  ꓢꓴ ꓚꓬ, ꓗꓷ꓿ (ꓟꓔ18ꓽ 15‐17) ꓕꓱ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔꓯ ꓟ. ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔꓬ ꓟ ꓙꓵ, ꓕꓯ ꓬꓲ. ꓝꓲ ꓓꓴ ꓐꓴ ꓔꓬ ꓟ ꓙꓵ, ꓟꓲ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓕꓲ ꓣꓳ ꓠꓬꓲꓽ ꓣꓳ ꓝꓮꓲ ꓘꓴ ꓜꓲꓼ ꓞꓳ ꓐꓯ ꓔ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓝꓲ. ꓓꓴ ꓐꓴ ꓐꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓔꓯ ꓐꓯ ꓔ ꓟ ꓥ ꓡꓳ꓿ ꓕꓱ ꓢꓷ. ꓡꓲ ꓓꓴ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓔꓶ ꓔ ꓟ ꓝꓮꓲ ꓬꓲ. ꓝꓲ ꓓꓴ ꓐꓴ ꓕꓲ ꓝ. ꓡꓰ ꓕꓲ ꓝ. ꓗꓪ ꓐꓰ ꓡ ꓟ ꓘꓴ ꓜꓲꓼ ꓞꓳ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓖꓶ ꓔ ꓟ ꓟꓲ ꓠꓯ ꓗꓪ ꓞꓳ ꓔ ꓟ ꓐꓰ ꓩꓴ ꓖꓶ ꓟ ꓙꓵ, ꓔꓯ ꓔꓯ ꓒ ꓐꓲ ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓬꓰ‐ꓢꓴ ꓠꓬ ꓕꓱ ꓟ. ꓖꓶ ꓚꓺ ꓟ ꓙꓵ, ꓔꓯ ꓡ ꓞꓳ ꓮ ꓟꓬ, ꓔꓬ ꓟ ꓔꓶ. ꓗꓪ ꓟ. ꓟꓲ ꓚꓺ ꓗꓷ ꓟ ꓟꓽ ꓥ꓿

(ꓟꓔ 18ꓽ18) ꓠꓴ ꓪ ꓔꓯ ꓥꓪ ꓐꓯ ꓖꓶ ꓠꓬꓲ ꓟꓲ ꓠꓯ ꓗꓪ ꓠꓴ ꓪ ꓡꓰ ꓞꓳ, ꓔ ꓟ ꓔꓯ ꓠꓬ ꓟꓴ ꓗꓪ ꓗꓪ ꓟꓲ ꓞꓳ, ꓔ ꓥꓳ꓿ ꓟꓲ ꓠꓯ ꓗꓪ ꓠꓴ ꓪ ꓡꓰ ꓩꓴ ꓗꓷ ꓟ ꓔꓯ ꓠꓬ ꓟꓴ ꓗꓪ ꓗꓪ  ꓟꓲ ꓩꓴ ꓗꓷ ꓥꓳ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿ ꓕꓱ ꓢꓲꓽ ꓫꓬ ꓕꓳ ꓶ ꓝꓲ. ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓝꓲ ꓓꓴ ꓐꓴ ꓔꓯ ꓟꓲ ꓠꓯ ꓞꓳ, ꓔ ꓟ ꓠ, ꓟ ꓐꓰ ꓩꓴ ꓗꓷ ꓠ, ꓟ ꓙꓵꓽ ꓪ ꓒ ꓐꓲ ꓖꓶ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓝꓴꓲ ꓬꓰ ꓗꓷ ꓟ ꓥꓳꓽ ꓡꓰ ꓟ ꓙꓵ, ꓕꓯ ꓬꓲ. ꓠꓯ, ꓝꓮꓲ ꓓꓴ ꓙ ꓒꓳ, ꓡꓶꓽ ꓢꓲ ꓠꓬꓲ ꓡ ꓠ, ꓟ ꓣꓳ ꓔꓯ ꓘꓴꓽ ꓔꓬ ꓟ ꓥ ꓡ ꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥꓳꓽ ꓡꓰ ꓛꓬ ꓡꓰ ꓟ ꓙꓵ, ꓔꓯ ꓣꓳ ꓛꓬ, ꓡꓰ ꓝꓴꓲ ꓔꓯ ꓓꓴ ꓙ ꓢꓲ ꓠꓬꓲ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓝꓴꓲ ꓖꓽ ꓖꓶ ꓡꓯ ꓘꓳ, ꓠ, ꓟ ꓣꓳ ꓚꓵ. ꓟ ꓚꓱ, ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓙꓵꓽ ꓪ ꓖꓶ ꓔ ꓟ ꓬꓲ. ꓝꓲ ꓓꓴ ꓐꓴ ꓗꓪ ꓐꓰ ꓡ ꓟ ꓘꓴ ꓜꓲꓼ ꓞꓳ ꓠꓯ, ꓗꓪ ꓣꓳ ꓔꓯ ꓔꓬ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓔꓶ. ꓔ ꓟ ꓘꓴ ꓜꓲꓼ  ꓞꓳ ꓝꓮꓲ ꓬꓲ. ꓝꓲ ꓓꓴ ꓐꓴ ꓕꓲ ꓝ. ꓡꓰ ꓕꓲ ꓝ. ꓗꓪ ꓐꓰ ꓡ ꓟ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓤ ꓠꓬꓲ ꓓꓴ ꓮ ꓟꓬ, ꓔꓳ, ꓜꓳꓻ  ꓥ ꓟꓲ ꓐꓬ ꓡꓰ ꓟꓽ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓓꓴ ꓙ ꓠ, ꓟ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓛꓳꓽ ꓡꓰ ꓟ ꓛꓬ ꓡꓰ ꓙꓵ, ꓕꓯ ꓝꓴꓲ ꓔꓯ ꓖꓽ ꓖꓶ ꓗꓷ ꓡ? ꓝꓮꓲ ꓣꓳ ꓮ ꓬꓲ ꓠꓬꓲꓽ ꓤ ꓐꓴ ꓛꓬ, ꓡꓰ ꓙꓵ, ꓕꓯ ꓣꓳ ꓮ ꓡꓰ ꓐꓰ ꓬꓰ ꓗꓷ ꓡ ? ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓐꓯ ꓘꓶꓽ ꓐꓰ ꓪ ꓡꓯ ꓘꓳ ꓫꓱ ꓡꓯ ꓘꓳ ꓡ ꓐꓰ ꓣꓳ ꓓꓴ ꓙ ꓢꓲ ꓠꓬꓲ ꓣꓳ ꓢꓲꓺ ꓒ ꓐꓯ ꓘꓶꓽ ꓔꓯ ꓒꓴ ꓛꓳꓽ ꓓꓴ ꓬꓰ ꓡꓯ꓿ ꓫ. ꓟꓳ ꓪ ꓡꓳ꓿