ꓛꓬ ꓡꓰ ꓢꓴ ꓔꓯ ꓖꓽ ꓖꓶ ꓠꓯ, ꓟ (Sunday Reflection)

#rvalisu #John #Forgiven to his Son

Sunday, September 17, 2023

ꓛꓬ ꓡꓰ ꓢꓴ ꓔꓯ ꓖꓽ ꓖꓶ ꓠꓯ, ꓟ (Sunday Reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (24) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ.ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳꓽ ꓶ (18ꓽ21‐35) ꓝꓲ ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓛꓬ ꓡꓰ ꓢꓴ ꓔꓯ ꓖꓽ ꓖꓶ ꓠꓯ, ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓝꓲ ꓓꓴ ꓒꓲ‐ꓕꓱ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓡ ꓢꓲ ꓠꓬꓲ ꓢꓲ ꓒꓽꓳ ꓥꓪ ꓬꓲꓼ ꓥꓪ ꓠꓬꓲ ꓡꓰ ꓥꓪ ꓔꓯ ꓛꓬ ꓡ ꓠꓬ ꓥꓪ ꓬꓲ ꓔꓯ ꓮ ꓟꓬ ꓧꓪ, ꓖꓽ ꓖꓶ ꓠꓯ, ꓡ ꓐꓰ ꓠꓽ ꓠꓬꓲˍ ꓕꓯ ꓢꓲꓺ ꓒ ꓬꓰ‐ꓢꓴ ꓠꓴ ꓔꓯ ꓥꓪ ꓫꓵꓽ ꓧꓪ, ꓡꓰ ꓟꓽ ꓐꓯ ꓫꓵꓽ ꓧꓪ, ꓟ ꓫꓵꓽ ꓞꓲ ꓧꓪ, ꓟꓲ ꓖꓽ ꓖꓶ ꓐꓰ ꓐꓯ ꓖꓶ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓠꓲ, ꓫꓵˍ ꓟ ꓠꓬ ꓮ ꓟꓬ, ꓧꓪ ꓖꓽ ꓖꓶ ꓠ, ꓟ ꓚꓱ, ꓔꓯ ꓣꓳ ꓔꓯ ꓐꓯ ꓟ. ꓖꓶ ꓡ ꓟ ꓥ ꓡꓳ꓿

ꓝꓮꓲ ꓢꓲꓽ ꓫꓬ ꓕꓳ ꓶ ꓗꓪ ꓪ ꓔꓲ ꓕꓲ ꓣꓳ ꓗꓪ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓔꓬ ꓡꓳ ꓬꓲ ꓠꓬ ꓪ ꓔꓲ ꓔꓯ ꓒꓴ ꓖꓶ ꓠ, ꓟ ꓮ ꓟꓬ, ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪ ꓔꓲ ꓠꓯ, ꓗꓪ ꓡ ꓢꓲ ꓠꓬꓲ ꓪ ꓔꓲ ꓖꓽ ꓖꓶ ꓖꓶ ꓠ, ꓟ ꓓꓰꓽ ꓟ ꓙꓵ, ꓔꓯ ꓪ ꓔꓲ ꓡꓰ ꓖꓽ ꓖꓶ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓕꓲ ꓣꓳ ꓠꓬ ꓬꓲ ꓠꓯ, ꓗꓪ ꓟꓬꓱꓽ ꓬꓰ ꓢꓴ ꓔꓯ ꓠꓬ ꓒꓴ ꓟꓽ ꓖꓶ ꓡ ꓟꓽ ꓢ ꓓꓰꓽ ꓢꓲ ꓠꓬꓲ ꓐꓱ ꓓꓵ ꓗꓪ ꓐꓱ ꓗꓷ ꓟ ꓔꓯ ꓪ ꓔꓲ ꓢꓷ. ꓡꓰ ꓠꓬꓲ ꓪ ꓔꓲ ꓡꓰ ꓠꓲ, ꓟ ꓟꓽ ꓙꓲ ꓢꓴ ꓠꓴ ꓔꓯ ꓠꓴ ꓖꓽ ꓖꓶ ꓖꓶ ꓟ ꓡꓰ ꓐꓰ ꓠꓴ ꓪꓽ ꓜ ꓔꓯ ꓟꓽ ꓬꓰ ꓐꓰ ꓐꓯ ꓢꓲ ꓠꓬꓲ ꓐꓱ ꓓꓴ ꓐꓱ ꓗꓷ ꓟ ꓚꓱ, ꓔꓯ ꓣꓳ ꓡꓳ. ꓟꓳ ꓪ ꓡꓳ꓿

ꓪ ꓔꓲ ꓠꓯ, ꓗꓪ ꓟꓬꓱꓽ ꓬꓰ ꓢꓴ ꓠꓬ ꓒꓴ ꓮ ꓟꓬ, ꓖꓶ ꓠ, ꓟ ꓙꓳ ꓟ ꓪꓴ. ꓠꓬꓲ ꓟꓬꓱꓽ ꓬꓰ ꓢꓲ ꓠꓬꓲ ꓖꓶ ꓠ, ꓟ ꓮ ꓘꓶ. ꓫ. ꓟ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓕꓱ ꓕꓯ ꓥꓳꓽ ꓗꓪ ꓐꓰ ꓪꓴ‐ꓢ ꓡꓰ ꓣꓳ ꓔꓯ ꓝꓴꓲ ꓖꓽ ꓖꓶ ꓖꓶ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓥ ꓟꓲ ꓪꓴ‐ꓢ ꓠꓴ ꓠꓲ, ꓠꓯ, ꓗꓪ ꓐꓰ ꓕꓲ ꓣꓳ ꓛꓳꓽ ꓕꓲ ꓣꓳ ꓥꓳꓽ ꓡꓰ ꓟ ꓝꓴꓲ ꓔꓯ ꓖꓽ ꓖꓶ ꓡꓯ ꓘꓳ, ꓠ, ꓟ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓔꓯ ꓛꓬ ꓡ ꓢꓴ ꓥꓳꓽ ꓡ ꓢꓴ ꓔꓯ ꓮ ꓟꓬ, ꓧꓪ, ꓖꓽ ꓖꓶ ꓖꓶ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓔꓬ ꓟ ꓢꓲꓺ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ ꓠꓯ, ꓗꓪ ꓢꓴ ꓡꓰ ꓥꓪ ꓠꓴ ꓔꓯ ꓛꓬ ꓡ ꓕꓯ ꓥꓪ ꓠꓴ ꓖꓽ ꓖꓶ ꓟ. ꓡꓰ ꓐꓰ ꓥꓪ ꓠꓴ ꓝꓴꓲ ꓔꓯ ꓟꓲ ꓖꓽ ꓖꓶ ꓡꓯ ꓐꓰ ꓣꓳ ꓪꓽ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓔꓯ ꓢꓴ ꓡꓰ ꓛꓬ ꓡ ꓟ ꓥꓳꓽ ꓡꓰ ꓟ ꓔꓯ ꓖꓽ ꓖꓶ ꓗꓷ ꓟ ꓬꓲ. ꓒꓴ ꓠꓬ ꓖꓽ ꓖꓶ ꓖꓶ ꓢꓴ ꓡꓰ ꓢꓷ. ꓟ ꓥ ꓡꓳ꓿ꓖꓳ ꓟ ꓡꓰ ꓐꓰ ꓖꓽ ꓖꓶ ꓟꓶ ꓢꓴ ꓐꓴ ꓥ ꓟꓲ ꓝꓴꓲ ꓖꓽ ꓖꓶ ꓟꓶ ꓟ ꓬꓲ. ꓒꓴ ꓔꓯ ꓢꓷ. ꓢꓴ ꓐꓴ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓔꓯ ꓛꓬ ꓡꓰ ꓢꓴ ꓔꓯ ꓖꓽ ꓖꓶ ꓗꓷ ꓟ ꓙꓵ, ꓕꓯ ꓪꓴ‐ꓢ ꓡꓰ ꓣꓳ ꓝꓴꓲ ꓔꓯ ꓖꓽ ꓖꓶ ꓖꓶ ꓟ ꓚꓱ, ꓔꓯ ꓣꓳ ꓢꓷ. ꓡ ꓓꓴ ꓥ ꓡꓳ꓿

ꓣꓳ ꓔꓯ ꓛꓬ ꓡ ꓢꓴ ꓔꓯ ꓝꓴꓲ ꓖꓽ ꓖꓶ ꓖꓶ ꓠ, ꓟ ꓢꓯꓼ ꓕꓵꓼ ꓡꓯ꓿ ꓢꓴ ꓔꓯ ꓖꓽ ꓖꓶ ꓖꓶ ꓟ ꓠꓬ ꓮ ꓘꓶ. ꓫ. ꓟ ꓟꓲ ꓟꓬꓱꓽ ꓕꓲ ꓫꓵꓽ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓵꓻꓠꓲ, ꓗꓪ ꓣꓳ ꓔꓯ ꓛꓬ ꓡꓰ ꓢꓴ ꓔꓯ ꓖꓽ ꓖꓶ ꓖꓶ ꓠ, ꓟ ꓢꓯꓼ ꓕꓵꓼ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓐꓯ ꓘꓶ. ꓔꓯ ꓣꓳ ꓒꓴ ꓛꓳꓽ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿