ꓥꓪ ꓠꓬ ꓢꓰꓼ ꓔꓲ ꓓꓴ ꓔꓯ ꓟꓽ ꓠꓵ꓾ ꓫꓱꓸ ꓤˍ ꓟ ꓔꓯ ꓠꓵˍ ꓡꓳ=

ꓢꓲ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓔꓲꓺ ꓖꓶˍ ꓟ ꓔꓯ ꓥꓪ ꓟꓽ ꓠꓵ꓾ ꓫꓱꓸ ꓤˍ ꓟ ꓔꓯ ꓡꓰꓽ ꓠꓵˍ ꓡꓳ꓾ ꓐꓰ ꓐꓯ ꓔ ꓡꓳ=

ꓢꓲ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓔꓬ ꓕꓯ꓾ ꓮ ꓟꓶ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓟ ꓣꓳꓽ ꓡꓰ ꓐꓰ꓾ ꓕꓲ ꓐꓱ ꓠ: “ꓥꓪ ꓠꓴꓽ ꓠꓽ ꓬꓲ ꓪ ꓔꓯ ꓟꓽ ꓫꓱꓸ” ꓥ ꓠꓬ꓾ “ꓥꓪ ꓠꓴꓽ ꓠꓽ ꓬꓲ ꓪ ꓕꓯꓽ ꓢꓲ ꓢꓲꓽ ꓫꓬꓹ ꓡꓳ” ꓐꓰ ꓓꓵꓽ ꓙ ꓟꓶ ꓢꓲ ꓠꓬꓲ ꓞꓳ ꓙꓳ ꓔꓬ ꓡꓳ= ꓟꓬꓽ ꓠꓬꓲ ꓒ-ꓡꓲ-ꓢꓷ ꓐꓴ ꓠꓬ “ꓬꓲ ꓪ ꓠꓽ ꓢꓲꓽ ꓫꓬꓹ ꓡꓳ” ꓐꓰ ꓓꓵꓽ ꓙ ꓢꓲ ꓝꓲꓸ ꓫ ꓢꓴ ꓐꓴ ꓐꓰ ꓝꓴꓲꓸ ꓙꓳ ꓢꓴ ꓐꓴ ꓒ ꓕꓲ ꓔꓬ ꓟꓽ ꓐ ꓡ꓾ ꓝꓲꓸ ꓫ ꓢꓴ ꓝꓴꓲꓸ ꓙꓳ ꓢꓴ ꓐꓴ ꓠꓬ ꓬꓲ ꓪ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓡꓳ꓾ ꓐꓰ ꓘꓳꓹ ꓣꓴ ꓔ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ 12 ꓣꓳ ꓘꓴꓽ ꓗꓪ ꓕꓲ ꓣꓳ ꓥ ꓟ ꓙꓲꓻ ꓫꓬ ꓢꓴ ꓟ-ꓕꓲ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ= ꓬꓲ ꓠꓬ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓢꓴ ꓕꓲ ꓣꓳˍ ꓟꓲ ꓥ ꓡꓳ= ꓝꓲ ꓓꓴ ꓟ-ꓕꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓢꓷꓸ ꓡꓰ ꓧꓶꓸ ꓕꓯ ꓕꓯ ꓬꓲ ꓠꓬ ꓝꓲꓸ ꓫ ꓢꓴ ꓕꓲ ꓣꓳ ꓥ ꓡꓳ= ꓝꓲꓸ ꓫ ꓟꓬꓱꓽ ꓬꓰ ꓔꓬ ꓢꓴ ꓥ ꓢꓲ꓾ ꓟꓬꓱꓽ ꓕꓱ ꓟ ꓠꓬ ꓟꓽ ꓙꓲꓻ ꓐꓰ ꓦꓬꓼ ꓠꓬꓲ ꓖꓳ ꓟ ꓗꓪ ꓟ ꓞꓳ ꓤ ꓐꓴ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓥ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ-ꓕꓲ 9ꓽ9-13 ꓗꓪ ꓟ-ꓕꓲ ꓔꓯ ꓢꓲ ꓒ ꓬꓰ-ꓢꓴ ꓗ ꓠꓯꓸ ꓛꓳ ꓠꓹ ꓟ ꓘꓴˍ ꓟ ꓟꓸ ꓟꓲꓽ ꓔꓯ ꓣꓳ ꓑ ꓙꓽ ꓪˍ ꓡꓳ=

ꓢꓲ ꓒ ꓬꓰ-ꓢꓴ ꓬꓲ ꓟꓬꓱꓽ ꓠꓬ ꓞꓳ ꓤ ꓐꓴ ꓔꓯ ꓪꓴ-ꓢ ꓔꓬ ꓗꓪ ꓧꓳꓽ ꓙꓰ ꓠꓹ ꓟ ꓥ ꓡꓳ= ꓬꓲ ꓡꓰ ꓘꓴ ꓔ ꓢꓴ ꓢꓲ ꓔ ꓢꓴ ꓐꓴ ꓠꓬ ꓢꓷꓸ ꓠꓲꓹ ꓟꓽ ꓢꓷꓸ ꓢꓴ꓾ ꓒꓴ ꓫꓵꓺ ꓟꓽ ꓙꓳ ꓢꓴ꓾ ꓝꓴꓲꓸ ꓙꓳ ꓢꓴ꓾ ꓕꓱ ꓟꓬ ꓫꓵꓽ ꓗꓪ ꓐꓰ ꓢꓲ ꓣꓴ ꓔ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓫꓸ ꓢꓴ ꓐꓳ ꓢꓴ ꓟꓽ ꓘꓶꓽ꓾ ꓮꓽ ꓟ ꓔꓯ ꓥˍ ꓟꓲ ꓠꓲꓹ ꓠꓵꓻ ꓗꓴꓸ ꓠꓹ ꓟ ꓬꓲ ꓡꓰ ꓞꓳ ꓤ ꓐꓴ ꓔꓯ ꓟꓸ ꓖꓶˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓝꓲꓸ ꓫ ꓢꓴ ꓥ ꓟ ꓟ-ꓕꓲ ꓐꓰ ꓝꓴꓲꓸ ꓙꓳ ꓢꓴ ꓮ ꓟꓬꓹ ꓐꓰ ꓕꓲ ꓪꓺꓼ ꓜ ꓜꓽˍ ꓟ ꓠꓬ ꓬꓲ ꓡꓰ ꓐꓯ ꓔ ꓟ ꓐꓯ ꓘꓶꓽ ꓥ ꓟ “ꓠꓴ ꓪ ꓠꓶꓽ ꓛꓳꓽ   ꓔꓯ ꓠꓲꓹ ꓠꓵꓻ” ꓐꓯˍ ꓟ ꓐꓯ ꓘꓶꓽ ꓔꓯ ꓢꓲ ꓒ ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓛꓳ ꓫꓱꓽ ꓔꓬ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓟꓳꓸ ꓖꓶ ꓡ ꓔꓬ ꓡꓳ=

ꓒ-ꓡꓲ-ꓢꓷ ꓐꓴ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓟ ꓙꓵꓽ ꓗ ꓐꓴ ꓔꓯ ꓔꓶꓼ ꓖꓼ ꓛꓳ ꓢꓲ꓾ ꓟꓳ-ꓫꓲ ꓬꓲ ꓔꓲ ꓓꓴ ꓔꓲ ꓚꓱꓹ ꓔꓯ ꓥˍ ꓟꓲ ꓝꓸ ꓢꓲ ꓬꓰ ꓔꓬ ꓟ ꓠꓬ ꓚꓵ ꓚꓵ ꓥ ꓓꓴ ꓥꓳ= ꓖꓳ ꓡꓱ ꓥ ꓟꓲ ꓟꓷꓽ ꓠꓷꓹ ꓝꓸ ꓒ ꓧꓳ-ꓫꓲ-ꓬ ꓦꓬꓼ ꓠꓬꓲ ꓗꓪ ꓟ ꓡꓰ ꓐꓰ ꓚꓲꓸ ꓛꓬ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓠꓲꓹ ꓠꓵ ꓠꓹ ꓟ ꓔꓯ ꓠꓬ ꓛꓳ ꓫꓱꓽ ꓟꓽ ꓐ ꓡ ꓟ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ=

ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓪꓽ ꓘꓴ ꓜꓲꓼ ꓖꓴ ꓗꓪ꓾ ꓪꓽ ꓘꓴ ꓦꓲꓻ ꓗꓪ ꓙꓰ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓣꓳꓽ ꓠꓬ ꓠꓲꓹ ꓠꓵ ꓠꓹ ꓟ꓾ ꓢꓴ ꓔꓯ ꓠꓲꓹ ꓙꓽ ꓟꓬ ꓗꓳ ꓢꓴ ꓒꓬꓱꓼ ꓡ ꓠꓹ ꓟ꓾ ꓮꓽ ꓟ ꓔꓯ ꓥ ꓟꓲ ꓘꓳ ꓣꓴ ꓗꓴꓸ ꓠꓹ ꓟ꓾ ꓕꓱ ꓟ ꓔꓯ ꓣꓳ ꓟꓲ ꓡꓰꓹ ꓔꓬ ꓡꓳ= ꓖꓳ ꓟ ꓢꓶꓸ ꓟꓽ ꓞꓲꓺ ꓬꓳꓸ ꓚꓵˍ ꓟ ꓠꓬ ꓣꓳ ꓐꓴ ꓠꓬ ꓙꓽ ꓣꓳ ꓢꓲ꓾ ꓠꓱꓸ ꓐꓯ ꓢꓴ ꓔꓯ ꓖꓼ ꓖꓶ ꓠꓹ ꓟ ꓬꓳꓸ ꓚꓵˍ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓮ ꓙꓵꓽ ꓠꓬ ꓝꓴꓲꓸ ꓙꓳ ꓢꓴ ꓥ ꓟ ꓐꓰ ꓣꓳꓽ ꓠꓬ ꓪꓴ-ꓢ ꓡꓰ ꓠꓬꓲ ꓙˍ ꓟ ꓔꓯ ꓣꓱꓽ ꓞꓹ ꓔꓬ ꓡꓳ ꓐꓯ ꓟ ꓔꓯ ꓢꓷꓸ ꓔ ꓠ ꓗꓹ ꓡꓳ=

ꓪꓴ-ꓢ ꓠꓬ ꓣꓳꓽ ꓐꓴ ꓔꓯ ꓠꓲꓹ ꓠꓵꓻ ꓢꓲ꓾ ꓣꓳꓽ ꓠꓬ ꓮ ꓡꓲ ꓟꓬ ꓗꓪ ꓛꓲ ꓝꓴꓲꓸ ꓙꓳˍ ꓥ ꓟꓲ ꓬꓲ ꓠꓬ ꓣꓳꓽ ꓔꓯ ꓘꓳ ꓣꓴ ꓔꓬ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓝꓲꓸ ꓫ ꓢꓴ ꓟ-ꓕꓲ ꓔꓯ ꓬꓰ-ꓢꓴ ꓘꓴˍ ꓟ ꓡꓰ ꓐꓰ ꓣꓳꓽ ꓮ ꓙꓵꓽ ꓔꓯ ꓥˍ ꓟꓲ꓾ ꓢꓲ ꓒ ꓬꓰ-ꓢꓴ ꓔꓯ ꓛꓳꓻ ꓠꓹ ꓟ ꓘꓴ ꓔꓬ ꓡꓳ= ꓣꓳ ꓠꓬ ꓒꓴ ꓫꓵꓺ ꓙꓳˍ ꓥ ꓟꓲ ꓟꓽ ꓙꓳ ꓥ ꓟꓲ꓾ ꓢꓷꓸ ꓠꓲꓹ ꓢꓷꓸ ꓢꓴ ꓥˍ ꓟꓲ ꓟꓽ ꓢꓷꓸ ꓢꓴ ꓥ ꓟꓲ꓾ ꓒꓬꓱꓽ ꓐꓲ ꓖꓪꓽ ꓜꓳꓽ ꓢꓴ ꓥˍ ꓟꓲ ꓟꓽ ꓥ ꓟꓲ꓾ ꓕꓱ ꓟ ꓠꓽ ꓮ ꓫꓵꓽ ꓟꓽ ꓛ= ꓠꓱꓸ ꓐꓯ ꓢꓴ ꓣꓳꓽ ꓔꓯ ꓮ ꓡꓲ ꓟꓳꓻˍ ꓡ ꓐꓯˍ ꓟ ꓥ ꓟꓲ ꓟꓽ ꓬꓳꓸ ꓚꓰꓽ ꓟ ꓥ ꓡꓳ= ꓟꓬꓽ ꓠꓬꓲ ꓬꓳꓸ ꓚꓰꓽˍ ꓟ ꓠꓬ ꓢꓲ ꓒ ꓬꓲ ꓘꓴꓻ ꓢꓯꓼ ꓔꓯ ꓓꓽ ꓔꓳꓹ ꓠꓹ ꓟ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓓꓵꓽ ꓙꓽ ꓞꓷꓹ ꓔ ꓟ ꓐꓰ ꓡ ꓠꓹ ꓟ ꓤꓶꓻ ꓐꓱ ꓶ ꓣꓳ ꓡꓰ ꓔꓶ ꓙꓱꓼ ꓗꓶ ꓔ ꓟ ꓔꓯ ꓠꓬ ꓪꓴ-ꓢ ꓡꓰ ꓫꓱꓸ ꓤ ꓠꓲꓹ ꓗꓪ ꓐꓰ ꓡꓳꓸ ꓙ ꓖꓶˍ ꓡꓳ=

ꓪꓴ-ꓢ ꓬꓲ ꓠꓲꓹ ꓡꓶꓽ ꓠꓬ꓾ ꓬꓲ ꓣꓳꓽ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓣꓳꓽ ꓥ ꓟꓲ ꓬꓲ ꓔꓯ ꓠꓲꓹ ꓠꓵ ꓠꓹ ꓟ ꓡꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓗꓳ ꓡꓳ ꓗꓪ ꓔꓬ ꓢꓴ ꓐꓴ ꓔꓯ ꓣꓳꓽ ꓥ ꓟꓲ ꓠꓵꓻ ꓠꓲꓹ ꓟꓸ ꓖꓶ ꓢꓲ꓾ ꓠꓱꓸ ꓐꓯ ꓢꓴ ꓮꓽ ꓟ ꓔꓯ ꓥˍ ꓟꓲ ꓘꓳ ꓣꓴ ꓙꓰˍ ꓠꓬ꓾ ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ “ꓥꓪ ꓠꓬ ꓫꓱꓸ ꓤˍ ꓟ ꓔꓯ ꓠꓵˍ ꓡꓳ꓾ ꓢꓰꓼ ꓔꓲ ꓓꓴ ꓔꓯ ꓟꓽ ꓠꓵ” ꓐꓯˍ ꓟ ꓐꓯ ꓘꓶꓽ ꓐꓰ ꓕꓲ ꓡꓰꓹ ꓣꓳꓽ ꓞꓳ ꓙꓳ ꓔꓬ ꓟ ꓥ ꓡꓳ= ꓖꓳ ꓡꓱ ꓬꓰˍ ꓕꓯ ꓣꓳꓽ ꓠꓬ ꓮ ꓫꓵꓽ ꓬꓰˍ ꓥ ꓟꓲ ꓶꓼ ꓛꓳ ꓫꓱꓹ ꓛꓳ ꓢꓲ꓾ ꓪꓴ-ꓡꓰ ꓶꓼ ꓥꓳꓽ ꓙꓱꓽ ꓖꓶˍ ꓟ ꓟꓶˍ ꓥꓳ=