ꓙꓵꓻ ꓢꓴ ꓠꓬ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪ ꓥ ꓟ

“ꓪꓴ-ꓢ ꓐꓯ ꓘꓶꓽ ꓑ ꓙꓽ ꓢꓲ ꓛꓳ ꓬꓰ ꓢꓴ ꓠꓬ ꓥꓪ ꓟꓹ ꓟˍ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓥꓳ” ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓐꓰ ꓥꓪ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓮ ꓬꓲꓼ ꓠꓬꓲ ꓤ ꓒꓬꓱꓼ ꓐ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓮ ꓝꓲ ꓠꓬꓲ ꓟ ꓒꓬꓱꓼ ꓐ ꓡˍ ꓟ ꓥ ꓡꓳ= ꓪꓴ-ꓢ ꓠꓬ ꓬꓲ ꓣꓱꓽ ꓛꓰꓽ ꓡꓯꓼ ꓫꓴ ꓕꓱ ꓟ ꓣꓳꓽ ꓔꓯ ꓖꓶ ꓔ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓕꓲ ꓦꓲꓻ ꓢꓴ ꓒꓬꓱꓼ ꓪˍ ꓟ꓾ ꓢꓲ ꓒ ꓬꓰ-ꓢꓴ ꓐꓰ ꓮ ꓬꓲꓼ ꓠꓬꓲ ꓤ ꓜꓳꓽ ꓪˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓣꓳꓽ ꓔꓯ ꓪꓴ-ꓢ ꓡꓰ ꓖꓶꓽ ꓔ ꓟ ꓥ ꓡꓳ=

ꓣꓱꓽ ꓛꓰꓽ ꓡꓯꓼ ꓫꓴ ꓐꓯ ꓟ ꓐꓯ ꓘꓶꓽ ꓠꓬ ꓕꓲꓽ ꓘꓶꓽ ꓤ ꓡꓰꓽ ꓙꓳˍ ꓥ ꓟꓲ ꓬꓲꓸ ꓟꓸ ꓟꓲꓽ ꓠꓽ ꓠꓬꓲꓽ ꓚꓱꓹ ꓙꓳˍ ꓡꓳ= ꓣꓱꓽ ꓛꓰꓽ ꓐꓯ ꓟ ꓠꓬ ꓒꓵꓽˍ ꓟ ꓡꓯꓼ ꓫꓴ ꓕꓲ ꓟ ꓥ ꓟˍ ꓡꓰ ꓐꓰ꓾ ꓡꓯꓼ ꓫꓴ ꓖꓳ ꓟ ꓐꓱ ꓶ ꓫꓸ ꓟꓳ ꓠꓲꓹ ꓡꓰ ꓞꓳ ꓙꓳ ꓙꓰ ꓠꓹ ꓟ ꓥ ꓡꓳ=

ꓣꓳ ꓐꓴ ꓠꓬ ꓪꓴ-ꓢ ꓣꓱꓽ ꓛꓰꓽ ꓗꓪ ꓐꓰ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓗꓷ ꓢꓲ꓾ ꓣꓳꓽ ꓠꓬ ꓖꓳ ꓓꓱꓽ ꓔꓲꓹ ꓟꓶˍ ꓟ ꓗꓪ ꓐꓰ ꓬꓲ ꓪꓴꓸ ꓟ ꓙꓵꓻ ꓠꓲꓹ ꓠꓯꓸꓼ ꓗꓪ ꓙ ꓫꓱꓽ ꓗꓷꓳ= ꓖꓳ ꓗ ꓠꓯꓸ ꓡꓴ-ꓘ ꓕꓳꓽ ꓶ 8ꓽ21 ꓗꓪ ꓐꓯ ꓔ ꓟ ꓡꓰ ꓬꓰ-ꓢꓴ ꓗꓪ ꓐꓰ ꓪꓴ-ꓢ ꓡꓰ ꓟꓸ ꓖꓶꓽ ꓡˍ ꓟ ꓔꓯ ꓛꓳ ꓢꓲ꓾ ꓣꓳ ꓐꓴ ꓠꓬ ꓣꓳ ꓛꓳ ꓫꓱꓽˍ ꓟ ꓗꓪ ꓐꓰ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓟ ꓥ ꓡꓳ= ꓕꓱ ꓟ ꓠꓬ ꓣꓳꓽ ꓡꓰ ꓠ ꓡꓳꓸ ꓛꓳ ꓫꓱꓽˍ ꓟ ꓗꓪ ꓐꓰ ꓟꓽ ꓥ ꓥ ꓪꓴ-ꓢ ꓣꓱꓽ ꓛꓰꓽ ꓗꓪ ꓐꓰ ꓪꓴ-ꓢ ꓤ ꓠꓱ ꓒꓬꓱꓼ ꓡˍ ꓟ ꓥ ꓡꓳ= ꓣꓳ ꓐꓴ ꓠ ꓡꓳꓸˍ ꓟ ꓠꓬ ꓪꓴ-ꓢ ꓬꓲ ꓣꓱꓽ ꓛꓰꓽ ꓐꓱ ꓶ ꓫꓸ ꓟꓳ ꓠꓲꓹ ꓡꓰ ꓞꓳ ꓙꓳˍ ꓟ ꓥ ꓡꓳ=  ꓣꓳ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓡꓳꓸ ꓛꓳ ꓫꓱꓽˍ ꓟ ꓠꓬ ꓣꓳꓽ ꓠꓬ ꓪꓴ-ꓢ ꓤ ꓠꓱ ꓥ ꓟ ꓔꓯ ꓖꓴ ꓟꓸ ꓖꓶ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓤꓶꓻ ꓠꓬ ꓮ ꓫꓵꓽ ꓔꓯ ꓖꓴ ꓟꓸ ꓖꓶ ꓔꓬ ꓡ? ꓘꓳ ꓣꓴ ꓟꓶ ꓔ ꓟ ꓣꓱꓽ ꓛꓰꓽ ꓠꓯꓸꓼ ꓗꓪ ꓞꓳ ꓙꓳ ꓔꓬ ꓡ? ꓣꓳꓽ ꓣꓱꓽ ꓬꓰ ꓔꓬ ꓟ ꓗꓪ ꓐꓰ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓝꓲ ꓔꓬ ꓡ? ꓣꓳꓽ ꓠꓬ ꓮ ꓡꓲ ꓞꓳ ꓙꓳ ꓔꓬ ꓟ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓮ ꓝꓲ ꓠꓬꓲ ꓟ꓾ ꓮ ꓬꓲꓼ ꓠꓬꓲ ꓤ ꓥ ꓟ ꓔꓯ ꓟꓳꓸ ꓖꓶ ꓔꓬ ꓡ? ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓮ ꓡꓲꓳ ꓐꓯ ꓠꓬ “ ꓪꓴ-ꓢ ꓐꓯ ꓘꓶꓽ ꓑ ꓙꓽ ꓢꓲ ꓛꓳ ꓬꓰ ꓢꓴ ꓠꓬ ꓥꓪ ꓟꓹ ꓟˍ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓥꓳ”꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓥ ꓡꓳ=