Synod ꓖꓪ ꓙꓱ ꓜꓲꓼ ꓓꓴ ꓬꓲ ꓔꓲ ꓟꓳꓻ ꓠꓬ ꓕꓲ ꓠꓬꓲ ꓕꓲ ꓪ ꓙꓻ ꓫꓱ, ꓢꓲ ꓠꓬꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓟ. ꓖꓶ ꓡ ꓟ ꓔꓯ ꓠꓻ ꓡꓳ ꓠ, ꓟ

#creditphoto #syond #Cardinal Hollerich, left, and Cardinal Grech with Pope Francis (Vatican Media)

Thursday, October 05, 2023

Synod ꓖꓪ ꓙꓱ ꓜꓲꓼ ꓓꓴ ꓬꓲ ꓔꓲ ꓟꓳꓻ ꓠꓬ ꓕꓲ ꓠꓬꓲ ꓕꓲ ꓪ ꓙꓻ ꓫꓱ, ꓢꓲ ꓠꓬꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓟ. ꓖꓶ ꓡ ꓟ ꓔꓯ ꓠꓻ ꓡꓳ ꓠ, ꓟ

10 ꓦ ꓟ 5 ꓠꓬꓲ 2023 ꓘꓳꓼ ꓕꓯ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓗꓪ ꓪꓴꓽ ꓓꓲ ꓡꓰ ꓟ ꓖꓪ ꓙꓱ ꓜꓲꓼ ꓓꓴ (Synod) ꓖꓪ ꓙꓱ ꓜꓲꓼ ꓓꓴ ꓔꓯ Vatican ꓡꓳ ꓒꓱ ꓗꓪ ꓬꓰ ꓔꓬ ꓟ ꓥ ꓡꓳ꓿ ꓖꓪ ꓙꓱ ꓜꓲꓼ ꓓꓴ ꓬꓲ. ꓪꓴ. ꓓꓴ ꓟ ꓕꓯ Cardinal Grech ꓡꓰ ꓘꓳ, ꓣꓴ ꓘꓶꓽ ꓫ. ꓕꓱ ꓢꓲ ꓠꓬꓲ ꓖꓪ ꓙꓱ ꓜꓲꓼ ꓓꓴ ꓔꓯ ꓪꓴ‐ꓢ ꓣꓳ ꓐꓰ ꓕꓲ ꓪ ꓐꓼ ꓠ, ꓟ ꓣꓳ ꓚꓵ. ꓟ ꓚꓱ, ꓔꓯ ꓫ. ꓕꓱ ꓔ ꓟ ꓥ ꓡꓳ꓿ ꓖꓪ ꓙꓱ ꓜꓲꓼ ꓗꓪ ꓕꓲ ꓠꓲ, ꓕꓲ ꓪ ꓙꓻ ꓫꓱ, ꓢꓲ ꓠꓬꓲ ꓘꓴ ꓜꓲꓼ ꓞꓳ ꓔꓯ ꓪꓴꓽ ꓟꓴ ꓡ ꓠ, ꓟ ꓟꓬꓱꓽ ꓬꓰ ꓠ, ꓟ ꓪꓴ‐ꓢ ꓡꓰ ꓚꓰꓼ ꓔ ꓟ ꓤ ꓑ ꓤ ꓐꓰ ꓤ ꓟꓶ ꓤ ꓐꓴ ꓔꓯ ꓒꓵꓽ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓖꓪ ꓙꓱ ꓜꓲꓼ ꓓꓴ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓪꓽ ꓡꓯꓽ ꓘꓳ, ꓟ ꓧꓳ ꓡꓯꓽ ꓘꓳ, ꓟ ꓔꓯ ꓟꓳ ꓢꓷ. ꓡꓲ ꓠ, ꓟ ꓬꓰ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓘꓴ ꓜꓲꓼ ꓞꓳ ꓠꓯ, ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓠ, ꓡꓳ ꓠ, ꓟ ꓣꓳ ꓚꓵ. ꓟ ꓚꓱ, ꓐꓰ ꓪꓴ‐ꓢ ꓟꓬꓱꓽ ꓬꓰ ꓔꓬ ꓟ ꓜꓴꓻ ꓮ ꓟꓬ, ꓥ ꓟꓲ ꓪꓽ ꓡꓯꓽ ꓘꓳ, ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓔꓯ ꓕꓲ ꓠꓲ, ꓕꓲ ꓪ ꓬꓰ ꓐ ꓡ ꓠ, ꓟ ꓥ ꓡꓳ꓿

ꓔꓲꓺ ꓒ ꓓꓽ Cardinal ꓡꓰ ꓝꓮꓲ Synod ꓐꓰ ꓘꓴ ꓜꓲꓼ ꓞꓳ ꓠꓬ ꓪꓽ ꓡꓯꓽ ꓘꓳ, ꓙꓳˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓐꓰ ꓕꓲ ꓠꓲ, ꓕꓲ ꓪ ꓪꓽ ꓡꓯꓽ ꓘꓳ, ꓢꓲ ꓟꓬꓱꓽ ꓬꓰ ꓠ, ꓟ ꓣꓳ ꓚꓵ. ꓟ ꓚꓱ, ꓔꓯ ꓐꓯ ꓔ ꓡꓳ꓿ ꓝꓮꓲ ꓔꓲꓺ ꓒ ꓓꓽ ꓡꓰ ꓘꓴ ꓜꓲꓼ ꓞꓳ ꓠꓬ ꓪꓴ‐ꓢ ꓗꓪ ꓡ ꓟ ꓥꓳꓽ ꓡꓳ ꓓꓴ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓖꓶ ꓠ, ꓟ ꓐꓰ ꓕꓲ ꓠꓲ, ꓕꓲ ꓪ ꓙꓻ ꓫꓱ, ꓠ, ꓟ ꓣꓳ ꓚꓵ. ꓟ ꓡꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓪꓴ‐ꓢ ꓟꓬꓱꓽ ꓬꓰ ꓟ ꓙꓵ, ꓕꓯ ꓫ. ꓓꓴ ꓟꓷꓼ ꓢꓴ ꓔꓳ, ꓜꓳ ꓡ ꓥ ꓟꓲ ꓪꓴ‐ꓢ ꓟꓬꓱꓽ ꓔꓯ ꓢꓯꓼ ꓕꓵꓼ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓟꓲ ꓠꓯ ꓡ ꓞꓳ ꓔꓯ ꓮ ꓟꓬ, ꓛꓲ ꓠꓲ, ꓠꓵ ꓟ ꓚꓱ, ꓔꓯ ꓓꓴ ꓙ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓚꓲ. ꓛꓬ ꓮ ꓡꓰ ꓓꓴ ꓙ ꓟ ꓔꓯ ꓐꓯ ꓟ. ꓖꓶ ꓔ ꓟ ꓐꓰ ꓮ ꓡꓰ ꓐꓰ ꓪꓴꓽ ꓟꓴ ꓡ ꓠ, ꓟ ꓚꓱ, ꓗꓪ ꓬꓰ ꓠ, ꓟ ꓔꓯ ꓥ ꓟꓲ ꓖꓪ ꓙꓱ ꓓ ꓟ ꓔꓯ ꓐꓯ ꓔ ꓡꓳ꓿ ꓖꓪ ꓙꓱ ꓜꓲꓼ ꓓꓴ ꓗꓪ ꓡ ꓢꓴ ꓐꓴ ꓮ ꓙꓵꓽ ꓠꓬ ꓕꓲ ꓣꓳ ꓫ. ꓕꓱ ꓘꓶꓽ ꓔꓯ ꓕꓲ ꓣꓳ ꓠ ꓠ, ꓢꓲ ꓠꓬꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓫ. ꓕꓱ ꓘꓶꓽ ꓔꓯ ꓥ ꓟꓲ ꓠ ꓠ, ꓟ ꓣꓳꓺ ꓚꓵ. ꓟ ꓚꓱ, ꓔꓯ ꓐꓯ ꓔ ꓡꓳ ꓐꓰ (Vatican) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿