ꓬꓰ-ꓢꓴ ꓑꓶꓸ ꓓꓴ ꓬꓲ ꓗꓪꓺ ꓗꓪ ꓡꓰ ꓟ (ꓡꓴ-ꓘ 12ꓽ49-53)

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓔꓯ ꓮ ꓔꓳꓸ ꓔꓯꓹ ꓧꓳꓽ ꓢꓲ ꓕꓲ ꓦꓲ ꓢꓴ ꓬꓲ ꓗꓪꓺ ꓗꓪ ꓡꓰˍ ꓟ ꓟꓸ ꓟꓲꓽ ꓔꓯ ꓐꓯ ꓔ ꓡꓳ= ꓖꓳ ꓡꓱ ꓢꓲ ꓣꓳ ꓠꓲꓹ ꓠꓵˍ ꓟ ꓢꓲ ꓡꓲ ꓟ ꓢꓲ ꓒ ꓬꓰ-ꓢꓴ ꓠꓬ ꓮ ꓡꓲ ꓥ ꓡ? ꓮ ꓡꓲ ꓗꓹ ꓠꓬꓲ ꓕꓱ ꓡꓱ ꓐꓯ ꓡ ꓐꓯ ꓟ ꓔꓯ ꓣꓳꓽ ꓓꓵꓽ ꓙ ꓟꓶ ꓡˍ ꓥꓳ=

ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓠꓲꓹ ꓫꓵˍ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓛꓳ ꓫꓱꓽˍ ꓟ ꓗꓪ ꓐꓰ ꓕꓲ ꓖ ꓕꓲ ꓧꓪꓹ ꓕꓲ ꓦꓲ ꓘꓴꓽ ꓠꓯꓸꓼ ꓗꓪ ꓐꓱ ꓡꓯ ꓘꓳꓹˍ ꓟ ꓐꓰ ꓟꓽ ꓪ ꓡꓯꓽ ꓘꓳ ꓟꓽ ꓕꓽ ꓡꓯ ꓘꓳ ꓟ ꓔꓯ ꓒꓬꓱꓼ ꓡ ꓝꓲ ꓐ ꓡˍ ꓟ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ= ꓔꓯ ꓥꓳꓽ꓾ ꓦꓲ ꓘꓴꓽ ꓠꓯꓸꓼ ꓗꓪ ꓟꓹ ꓟ ꓣꓱꓽ ꓢꓴ ꓠꓬ ꓙꓵꓻ ꓠꓲꓹ ꓕꓶ ꓢꓲ ꓬꓲ ꓕꓲ ꓦꓲ ꓢꓴ ꓔꓯ ꓪꓽ ꓘꓴ ꓝꓲ ꓠꓲꓹ ꓫꓵ꓾ ꓦꓲ ꓘꓴꓽ ꓠꓯꓸꓼ ꓗꓪ ꓝꓮꓲ ꓕꓲ ꓣꓳ ꓠꓬ ꓪꓽ ꓘꓴ ꓠꓲꓹ ꓟꓽ ꓫꓵ꓾ ꓖꓳ ꓡꓱ ꓠꓬꓲ ꓕꓱ ꓟ ꓗꓪ ꓐꓰ ꓐꓯ ꓡꓯꓽ ꓘꓳ ꓓꓴ ꓙꓳ ꓡ꓾ ꓦꓶ ꓡꓯ ꓘꓳ ꓓꓴ ꓙꓳ ꓡ꓾ ꓕꓱ ꓡꓱ ꓗꓷ ꓡˍ ꓟ ꓔꓯ ꓐꓯ ꓟ ꓥ ꓡꓳ= ꓪꓽ ꓘꓴˍ ꓟ ꓗꓪ ꓡꓰꓽ ꓟꓽ ꓞꓲꓺ ꓠꓱꓸ ꓐꓯ ꓙꓲˍ ꓟ ꓟꓬꓱꓽ ꓬꓰˍ ꓟ ꓗꓪ ꓐꓰˍ ꓟꓲ ꓟꓽ ꓪꓽ ꓡꓯ ꓘꓳ꓾ ꓠꓲꓹ ꓟ ꓟꓽ ꓫꓱꓸ ꓡꓯ ꓘꓳ ꓗꓷ ꓡꓰˍ ꓟ ꓔꓯ ꓐꓯ ꓡꓳ= ꓖꓳ ꓡꓱ ꓠꓬꓲ ꓣꓳ ꓙꓵꓻ ꓠꓲꓹ ꓪꓴꓸ ꓠꓬꓲ꓾ ꓣꓳ ꓔꓯ ꓙꓳˍ ꓟ ꓙꓲꓻˍ ꓟ ꓬꓲ ꓫꓱꓹ ꓪꓴꓸ ꓠꓬꓲ ꓔꓱꓹ ꓚꓵˍ ꓟ ꓔꓯ ꓬꓰˍ ꓟ ꓠꓬ ꓡ ꓞꓳ ꓮ ꓙꓵꓽ ꓔꓯ ꓮ ꓕꓯ ꓟꓲ ꓗꓹ ꓛꓲꓽ ꓝꓲˍ ꓟ ꓟꓽ ꓥ ꓐꓯˍ ꓟ ꓔꓯ ꓬꓲꓼ ꓠꓬꓲꓸ ꓖꓶ ꓔꓬ ꓟ ꓥ ꓡꓳ=

ꓢꓲ ꓒ ꓬꓰ-ꓢꓴ ꓡꓰ ꓐꓯˍ ꓟ ꓥꓪ ꓠꓬ ꓟꓲ ꓠꓯ ꓗꓪ ꓮ ꓔꓳꓸ ꓔꓯꓹ ꓧꓳꓽˍ ꓐꓰ ꓡˍ ꓟ ꓥ ꓡꓳ꓾ ꓐꓯ ꓟ ꓠꓬ ꓚꓵ ꓚꓵ ꓟꓲ ꓠꓯ ꓔꓯ ꓮ ꓔꓳꓸ ꓐꓬ ꓝꓲˍ ꓟ ꓔꓯ ꓐꓯˍ ꓟ ꓟꓽ ꓥ= ꓟꓲ ꓠꓯ ꓗꓪ ꓟꓽ ꓙꓲꓻ ꓟ ꓥꓶˍ ꓟ ꓔꓯ ꓛꓴ ꓦ ꓗꓷˍ ꓟ ꓔꓯ ꓐꓯ ꓟ ꓥ ꓡꓳ=

ꓙꓵꓻ ꓠꓲꓹ ꓚꓱꓹ ꓟꓽ ꓫꓱꓸ ꓡꓯ ꓘꓳ ꓟ ꓑꓶꓸ ꓓꓴ ꓦꓲꓻ ꓘꓴꓽ ꓗꓪ ꓟꓽ ꓪꓽ ꓡꓯ ꓘꓳ ꓓꓴ꓾ ꓟꓽ ꓧꓳꓹ ꓡꓯ ꓘꓳ ꓓꓴ ꓮ ꓔꓲꓸ ꓤ ꓠꓬ ꓙꓳ ꓡˍ ꓥꓳ= ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓚꓱꓹ꓾ ꓚꓲꓸ ꓛꓬ ꓬꓲ ꓫꓱꓹ ꓐꓰ ꓞꓳ ꓤ ꓐꓴ ꓗꓳ ꓡꓳ ꓗꓪ ꓙ ꓡꓯ ꓘꓳˍ ꓟ꓾ ꓕꓱ ꓟ ꓑꓶꓸ ꓓꓴ ꓕꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓐꓱ ꓡꓯꓽ ꓘꓳ ꓓꓴ ꓙꓳ ꓡ ꓗꓴꓸˍ ꓡꓳ=

ꓧꓷꓹ ꓚ ꓢꓲ ꓐꓯ ꓠꓬ ꓣꓳ ꓙꓵꓻ ꓠꓲꓹ ꓔꓯ ꓕꓶꓻ ꓕꓶꓻ ꓡꓰꓽ ꓔꓵꓹ ꓔ ꓟ ꓠꓬ ꓕꓲ ꓖ ꓕꓲ ꓧꓪꓹ ꓐꓱ ꓡꓯ ꓘꓳ ꓓꓴ꓾ ꓟꓽ ꓪ ꓡꓯꓽ ꓘꓳ ꓟꓽ ꓕꓽ ꓡꓯ ꓘꓳ ꓓꓴ ꓒꓬꓱꓼ ꓡ ꓝꓲˍ ꓥ ꓟꓲ꓾ ꓣꓳ ꓙꓵꓻˍ ꓟ ꓠꓯꓸꓼ ꓗꓪ ꓔꓱꓹ ꓔꓱꓹ ꓚꓵ ꓚꓵˍ ꓡꓰꓽ ꓞꓳ ꓙꓳ ꓙꓰ ꓓꓴ ꓐꓱ ꓶ ꓙꓵꓻ ꓠꓲꓹ ꓕꓱ ꓟ ꓔꓯ ꓕꓶꓻ ꓕꓶꓻ ꓡꓰꓽ ꓔꓵꓹ ꓔ ꓠ ꓗꓹ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳꓽ ꓐꓴ ꓔꓯ ꓐꓯ ꓖꓶ ꓡ ꓔꓬ ꓡꓳ=