ꓔꓲꓺ ꓒ ꓪ ꓔꓲ Francis ꓡꓰ ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓔꓯ ꓠꓽ ꓡꓰ ꓠ, ꓟ ꓐꓰ ꓝꓴꓲ ꓟꓽ ꓙꓳ ꓢꓴ ꓑ ꓫꓬ ꓐꓴ ꓔꓯ ꓡꓲ ꓖꓶ ꓠ, ꓟ ꓓꓰꓽ ꓔ ꓟ ꓓꓳꓽ

Monday, November 06, 2023

ꓔꓲꓺ ꓒ ꓪ ꓔꓲ Francis ꓡꓰ ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓔꓯ ꓠꓽ ꓡꓰ ꓠ, ꓟ ꓐꓰ ꓝꓴꓲ ꓟꓽ ꓙꓳ ꓢꓴ ꓑ ꓫꓬ ꓐꓴ ꓔꓯ ꓡꓲ ꓖꓶ ꓠ, ꓟ ꓓꓰꓽ ꓔ ꓟ ꓓꓳꓽ

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ 11 ꓦ ꓟ 5 ꓠꓬꓲ 2023 ꓟꓳꓼ ꓡꓳ ꓪꓽ ꓘꓴ ꓙꓵ, ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓔꓯ ꓞꓼ ꓞꓼ ꓠꓽ ꓡꓰ ꓠ, ꓟ ꓐꓰ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓧꓳꓽ ꓔꓯꓺ ꓙꓰ ꓟ ꓔꓯ ꓡꓲ ꓖꓶ ꓠ, ꓟ ꓓꓰꓽ ꓔ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓠꓬ ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓪꓴ. ꓠꓬꓲ ꓝꓴꓲ ꓟꓽ ꓙꓳ ꓟ ꓤ ꓠꓱ ꓤ ꓐꓴ ꓤꓶꓻ ꓔꓯ ꓢꓰꓼ ꓔꓬ ꓟ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓢꓲꓺ ꓒ ꓬꓰ‐ꓢꓴ ꓟꓬꓱꓺ ꓗꓪ ꓐꓰ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓓꓰꓽ ꓥꓳ ꓐꓰ ꓝꓮꓲ ꓫ. ꓕꓱ ꓔ ꓟ ꓥ ꓡꓳ꓿

ꓬꓲ‐ꓢꓷ‐ꓡꓰ ꓟꓯꓼ ꓐꓴ ꓐꓰ ꓧꓮꓟꓮꓢ ꓟꓯꓼ ꓜꓴꓻ ꓐꓴ ꓢꓰꓼ ꓡꓯꓽ ꓘꓳ, ꓔꓬ ꓟ ꓪꓴ. ꓠꓬꓲ ꓜ ꓓꓴ ꓓꓳꓻ ꓓꓴ ꓫ. ꓔꓬ ꓟ ꓖ‐ꓜ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓜ ꓓꓴ ꓓꓳꓻ ꓓꓴ ꓬꓰ ꓙ ꓔꓳ ꓙ ꓠ, ꓟ ꓓꓰꓽ ꓔ ꓟ ꓥ ꓡꓳ꓿ꓝꓮꓲ ꓔꓲꓺ ꓒ ꓪ ꓔꓲ ꓡꓰ 10 ꓦ ꓟ 7 ꓠꓬꓲ ꓕꓯ ꓧꓮꓟꓮꓢ ꓟꓯꓼ ꓜꓴꓻ ꓡꓰ ꓝꓴꓲ ꓟꓽ ꓙꓳ ꓟ ꓬꓲ‐ꓢꓷ‐ꓡꓰ ꓑ ꓫꓬ ꓐꓴ (200) ꓣꓳ ꓔꓯ ꓧꓳꓽ ꓙꓰ ꓟ ꓔꓯ ꓞꓼ ꓞꓼ ꓡꓲ ꓖꓶ ꓠ, ꓟ ꓓꓰꓽ ꓔ ꓟ ꓥ ꓡꓳ꓿

ꓝꓮꓲ ꓟꓽ ꓙꓲ ꓢꓴ ꓜꓴꓻ ꓡꓰ ꓧꓳꓽ ꓙꓰ ꓟ ꓗꓪ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓐꓰ ꓤ ꓠꓱ ꓤ ꓐꓴ ꓮ ꓟꓬ, ꓐ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓝꓴꓲ ꓟꓽ ꓙꓳ ꓟ ꓑ ꓫꓬ ꓮ ꓙꓵꓽ ꓔꓯ ꓡꓲ ꓖꓶ ꓠ, ꓟ ꓟꓬꓱꓽ ꓬꓰ ꓠ, ꓟ ꓞꓳ ꓜꓴꓻ ꓗꓴꓷꓼ ꓔꓯ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓔ ꓟ ꓥ ꓡꓳ꓿

ꓧꓮꓟꓮꓢ ꓟꓯꓼ ꓜꓴꓻ ꓡꓰ ꓑ ꓫꓬ (1400) ꓣꓳ ꓔꓯ ꓢꓰꓼ ꓗꓷ ꓟ ꓡꓰ ꓟꓽ ꓞꓲꓼ ꓑ ꓫꓬ (200) ꓣꓳ ꓔꓯ ꓥ ꓟꓲ ꓧꓳꓽ ꓔꓯ ꓙꓰ ꓟ ꓥ ꓡꓳ꓿ ꓝꓮꓲ ꓬꓲ‐ꓢꓷ‐ꓡꓰ ꓟꓯꓼ ꓜꓴꓻ ꓡꓰ ꓥ ꓟꓲ ꓐꓳ ꓑꓶ ꓩꓴ ꓡ ꓟ ꓪꓴ. ꓠꓬꓲ ꓖ‐ꓜ ꓗꓪ ꓑ ꓫꓬ ꓮ ꓟꓬ, ꓫꓵꓻ ꓡꓰ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓯꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓡ ꓞꓳ ꓢꓰꓼ ꓟ ꓟꓽ ꓙꓲ ꓟꓬꓱꓽ ꓔꓯ ꓠꓽ ꓗꓷ ꓠ, ꓟ ꓟꓴ ꓗꓴ ꓓꓵ ꓓꓵ ꓗꓪ ꓔꓬ ꓟ ꓗꓴꓷꓼ ꓮ ꓙꓵꓽ ꓔꓯ ꓓꓰꓼ ꓔ ꓟ ꓥ ꓡꓳ ꓐꓰ (Vatican news) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿