ꓬꓯꓹ-ꓬꓳ ꓙꓲꓻ ꓖꓴ ꓙꓳˍ ꓟ

ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓚꓱꓹ ꓗꓪ ꓐꓰ ꓮ ꓙꓵꓽ ꓔꓯ ꓘꓳꓹ ꓣꓴˍ ꓥꓳ=

ꓠꓬꓲꓸ ꓠꓬꓲ ꓗꓪ ꓠꓬ Noni ꓐꓰ ꓐꓯ ꓟ ꓬꓯꓹ-ꓬꓳ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

ꓜꓽ ꓓꓴ ꓜꓽ ꓙꓰꓽ ꓮ ꓙꓵꓽ ꓠꓬ ꓧꓪꓽ ꓖꓳ ꓓꓱꓽ ꓢꓯꓼ ꓕꓲ ꓙꓰꓽˍ ꓡꓰꓽ ꓖꓶˍ ꓟ ꓟꓽ ꓥ= ꓖꓳ ꓓꓱꓽ ꓐꓱ ꓶ ꓖꓳ ꓓꓱ ꓔꓬ ꓢ ꓓꓴ ꓐꓱ ꓶ ꓙꓲꓻ ꓖꓴ ꓥˍ ꓟꓲ ꓮ ꓟꓬꓹ ꓟꓶ ꓡꓰ ꓝꓲˍ ꓟ ꓥ ꓡꓳ=

ꓮ ꓟꓶ ꓐꓯ ꓟꓳꓸ ꓖꓶ ꓠꓹ ꓟ ꓬꓯꓹ-ꓬꓳ ꓠꓬ ꓮ ꓡꓲ ꓫꓵꓽ ꓙꓲꓻ ꓖꓶˍ ꓡ ꓐꓯ ꓕꓯ꓾ ꓬꓯꓹ-ꓬꓳ ꓬꓲ ꓢꓶꓽ ꓐꓰ ꓬꓲ ꓒꓬꓽ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓥ ꓡꓳ= ꓞꓲꓼ ꓙꓳ ꓢꓴ ꓞꓲꓼ ꓪꓴꓽ ꓢꓴ ꓐꓴ ꓐꓱ ꓶ ꓟꓽ ꓓ ꓙꓲꓻˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ꓾ ꓐꓰ ꓠꓯꓻ ꓞꓲꓼ ꓔꓯ ꓟꓳꓸ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓡꓰ ꓐꓯ ꓔ ꓟ ꓙꓳˍ ꓡꓳ= ꓬꓯꓹ-ꓬꓳ ꓜꓲ ꓠꓬ ꓠꓯꓻ ꓞꓲꓼ ꓬꓲ ꓜꓲ ꓕꓲ ꓙꓰꓽ ꓥ ꓢꓲ ꓠꓬꓲ

Pacific ꓬꓲ ꓗꓳ ꓡꓳ ꓟꓵꓽ꓾ ꓐꓶ ꓓꓳ ꓖꓴ ꓟꓶꓸ Asia꓾ Australia ꓐꓰ ꓲ-ꓓꓲ-ꓬ ꓗꓴꓷꓼ ꓐꓴ ꓗꓪ ꓬꓲ ꓜꓲ ꓣꓱꓻˍ ꓟ ꓥ ꓡꓳ= ꓮ ꓠꓱ ꓟ ꓦꓬꓼ ꓠꓬꓲ ꓕꓯ ꓡꓰ ꓧꓪꓽ ꓗꓴꓹ ꓙꓲ ꓐꓱ ꓶ ꓠꓯꓻ ꓞꓲꓼ ꓬꓰ ꓩꓴ ꓡ ꓗꓷ ꓟ ꓥ ꓢꓲ ꓬꓲ ꓢꓶꓽ ꓬꓲ ꓒꓬꓽ ꓡꓰꓽ ꓟꓽ ꓞꓲꓺ꓾ ꓬꓲ ꓪꓰꓻ꓾ ꓬꓲ ꓜꓲ ꓗꓴꓹ ꓙꓲꓻ ꓐꓰ ꓬꓲ ꓜꓲ ꓬꓲ ꓚꓰ ꓐꓴ ꓥˍ ꓟꓲ ꓠꓯꓻ ꓞꓲꓼ ꓒꓬꓱꓼˍ ꓡꓳ ꓐꓰ ꓢꓷꓸ ꓪ ꓡꓳ=

ꓬꓯꓹ-ꓬꓳ ꓒꓬꓽ꓾ ꓬꓯꓹ-ꓬꓳ ꓢꓶꓽ ꓐꓴ ꓗꓪ Protein꓾ Fiber꓾ ꓬꓲ ꓞꓶꓻ ꓢꓯꓼ꓾ Vitamin A꓾ Vitamin C꓾ ꓫꓵꓽ ꓓꓯꓻˍ ꓟ ꓔꓯ ꓞꓰ ꓡꓰ ꓝꓲˍ ꓟ Potassium꓾ ꓝꓮꓲ Cancer ꓐꓰ ꓠꓲꓹ ꓟ ꓠꓻ ꓐꓴ ꓔꓯ ꓗꓽ ꓕꓸ ꓙ ꓖꓶˍ ꓟ flavonoid antioxidants ꓐꓴˍ ꓟꓲ ꓙꓳˍ ꓟ ꓥ ꓡꓳ= ꓜꓽ ꓓꓴˍ ꓟꓲ ꓠꓯꓻ ꓞꓲꓼ꓾ ꓠꓯꓻ ꓞꓲꓼˍ ꓟꓲ ꓜꓽ ꓓꓴ ꓐꓯ ꓠ ꓗꓪ ꓛꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓔꓳꓹ ꓙ ꓖꓶˍ ꓟ ꓬꓲ ꓢꓯꓼ ꓮ ꓟꓬꓹ ꓓꓵˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ=

ꓬꓯꓹ-ꓬꓳ ꓠꓬ ꓕꓱ ꓡꓱ ꓫꓵꓽ ꓗꓪ ꓣꓱꓽ ꓬꓯꓼˍ ꓟ ꓥ ꓡꓳ=

1. ꓘꓳꓼ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ=

ꓬꓯꓹ-ꓬꓳ ꓜꓲ ꓔꓯ ꓪꓴꓸ ꓓꓵ ꓠꓻ ꓓꓻ ꓡꓰ ꓝꓲˍ ꓟ ꓬꓲ ꓜꓲ꓾ ꓘꓳꓼ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓬꓲ ꓜꓲ ꓐꓯ ꓢꓲ ꓘꓴ ꓔꓬ ꓢꓴˍ ꓟꓲ ꓙꓳˍ ꓡꓳ= ꓠꓯꓻ ꓞꓲꓼ ꓔꓯ ꓟꓳꓸ ꓧꓪ ꓟꓰꓹ ꓠꓬꓲ ꓚꓬꓹ ꓠꓬꓲ ꓔ ꓟ ꓗꓪ ꓬꓯꓹ-ꓬꓳ ꓜꓲ ꓠꓬ ꓖꓳ ꓓꓱꓽ ꓖꓳ ꓟꓲ ꓘꓳꓼ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓐ ꓡ ꓢꓲ꓾ ꓡꓰꓹ-ꓒꓯꓸꓼ-ꓠꓻ ꓐꓰ ꓠꓱꓸ ꓐꓯꓼ ꓬꓲ ꓝꓲꓸ ꓬꓲ ꓟꓲ ꓠꓻˍ ꓟ ꓐꓴ ꓔꓯˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓐꓯ ꓔ ꓡꓳ=

1. ꓧꓪꓽ ꓖꓳ ꓓꓱꓽ ꓢꓯꓼ ꓐꓲ ꓡꓰ ꓝꓲˍ ꓡꓳ=

ꓧꓪꓽ ꓖꓳ ꓓꓱꓽ ꓢꓯꓼ ꓐꓲ ꓡ ꓝꓲ ꓠꓹ ꓟ ꓐꓱ ꓶ ꓬꓰ ꓙ ꓖꓶˍ ꓡꓳ= Bacteria ꓐꓶꓽ ꓓꓲꓻ ꓐꓴ ꓗꓪ ꓐꓰ ꓗꓽ ꓕꓸ ꓙ ꓖꓶˍ ꓟˍ ꓡꓰ ꓐꓰ ꓬꓲ ꓙꓲ ꓠꓻ (ꓔꓳꓔꓰ ꓗꓪꓰꓹ) ꓡꓰ ꓐꓰ ꓠꓻ ꓝꓲꓸ ꓗꓴꓸˍ ꓟ ꓠꓻ ꓐꓴ ꓟꓽ ꓒꓬꓱꓼ ꓡ ꓠꓹ ꓟˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

1. ꓬꓲꓼ ꓟꓶ ꓢꓻ ꓝꓲˍ ꓡꓳ=

ꓬꓯꓹ-ꓬꓳ ꓢꓶꓽ ꓐꓰ ꓬꓲ ꓒꓬꓽ ꓠꓬ Serotonin hormone ꓐꓰ Melatonin hormone ꓐꓴ ꓔꓯ ꓡꓵꓹ ꓫꓴ ꓖꓶˍ ꓡꓳ= ꓠꓲꓹ ꓟ ꓔꓯˍ ꓟꓲ ꓢꓲ ꓡꓲ ꓡꓰ ꓝꓲ ꓢꓲ꓾ ꓠꓲꓹ ꓟ ꓟꓽ ꓙꓬ ꓡꓰ ꓠꓹ ꓟ ꓐꓰ ꓬꓲꓼ ꓟꓶ ꓢꓻ ꓡꓰ ꓝꓲ ꓠꓹ ꓟ ꓐꓱ ꓶ ꓬꓳꓸ ꓚꓵˍ ꓟ ꓧꓳꓣꓟꓳꓠꓰ ꓐꓴ ꓔꓯ ꓡꓵꓹ ꓫꓴ ꓖꓶˍ ꓟ ꓑꓶꓸ ꓓꓴ ꓬꓲꓼ ꓟꓶ ꓢꓻ ꓡꓰ ꓝꓲˍ ꓡꓳ=

1. ꓧꓪꓽ ꓗꓴꓹ ꓙꓲꓻ ꓐꓰ ꓪꓴꓸ ꓞꓱ ꓐꓱ ꓶ ꓙꓲꓻˍ ꓡꓳ=

ꓬꓯꓹ-ꓬꓳ ꓬꓲ ꓒꓬꓽ ꓐꓰ ꓬꓲ ꓢꓶꓽ ꓗꓪ ꓓꓵˍ ꓟ ꓢꓯꓼ ꓐꓴ ꓠꓬ ꓧꓪꓽ ꓗꓴꓹ ꓙꓲꓻ ꓔꓯ ꓡꓯꓸ ꓡꓰ ꓝꓲ ꓢꓲ ꓪꓴꓸ ꓞꓱ ꓔꓯ ꓢꓯꓼ ꓧꓳꓽ ꓖꓶˍ ꓟ ꓡꓰꓽ ꓟꓽ ꓞꓲꓺ ꓛꓲ ꓫꓱꓽ ꓡꓯ ꓫꓱꓽ ꓔꓯ ꓥˍ ꓟꓲ ꓢꓯꓼ ꓡꓴꓽ ꓖꓶˍ ꓡꓳ=

1. ꓚꓮꓠꓚꓰꓣ ꓠꓻ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓬꓯꓹ-ꓬꓳ ꓒꓬꓽ ꓐꓰ ꓬꓲ ꓢꓶꓽ ꓐꓴ ꓗꓪ Nitric oxide ꓓꓳꓻ ꓡ ꓠ ꓡꓵꓹ ꓫꓴ ꓖꓶ ꓐ ꓡˍ ꓡꓳ= ꓧꓪꓽ ꓖꓳ ꓓꓱꓽ ꓠꓬ Cancer Cells ꓐꓴ ꓔꓯ ꓖꓼ ꓓꓳ ꓐ ꓡ ꓠꓹ ꓟ ꓬꓰ ꓙ ꓖꓶˍ ꓟˍ ꓡꓰ ꓐꓰ Cancer ꓬꓲ ꓐꓴ ꓟꓽ ꓪꓴꓽ ꓡ ꓠꓹ ꓟˍ ꓟꓲ ꓗꓽ ꓙ ꓖꓶ ꓐ ꓡˍ ꓡꓳ=

1. ꓫꓵꓽ ꓓꓯꓻ ꓠꓻ ꓔꓯ ꓬꓯꓼ ꓡꓰ ꓝꓲ ꓐ ꓡˍ ꓡꓳ=

ꓬꓯꓹ-ꓬꓳ ꓒꓬꓽ ꓬꓯꓹ-ꓬꓳ ꓢꓶꓽ ꓗꓪ phytonutrients ꓢꓯꓼ ꓙꓳ ꓢꓲ꓾ Vitamin C ꓐꓰ Selenium ꓐꓴ ꓙꓳˍ ꓟ ꓑꓶꓸ ꓓꓴ ꓫꓵꓽ ꓙꓴꓽ ꓗꓪ Free Radical ꓐꓴ ꓪꓴꓸ ꓠꓬꓲ ꓐꓬ ꓡꓰˍ ꓟ ꓗꓪ ꓗꓽ ꓕꓸ ꓙ ꓖꓶˍ ꓡꓳ= Potassium ꓥˍ ꓟꓲ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓫꓵꓽ ꓓꓯꓻˍ ꓟ ꓗꓪ ꓐꓰ ꓞꓰ ꓡꓰ ꓝꓲ꓾ ꓬꓯꓼ ꓡꓰ ꓝꓲ ꓐ ꓡˍ ꓡꓳ=

1. ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ=

ꓫꓵꓽ ꓘꓴꓽ ꓗꓪ ꓙꓲꓻ ꓖꓴ ꓟꓽ ꓙꓳ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓐꓴ ꓔꓯ ꓠꓲꓸ ꓡꓰ ꓝꓲ ꓢꓲ ꓫꓵꓽ ꓙꓴꓽ ꓘꓴꓽ ꓗꓪ ꓬꓲ ꓞꓶꓻ ꓟꓽ ꓐꓱ ꓠꓹ ꓟˍ ꓟꓲ ꓬꓰ ꓙ ꓖꓶˍ ꓡꓳ= ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓐꓴ ꓠꓲꓸ ꓡꓰ ꓕꓯ ꓠꓽ ꓪꓴꓸ ꓠꓶꓸ ꓗꓪ ꓫꓵꓽ ꓙꓰ ꓐ ꓡ ꓢꓲ ꓪꓴꓸ ꓠꓶꓸ ꓔꓯˍ ꓟꓲ ꓔꓬꓹ ꓢꓻ ꓝꓲˍ ꓟ ꓑꓶꓸ ꓓꓴ ꓚꓲꓸ ꓟꓶ ꓓꓴ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ=

1. ꓦꓰꓼ ꓟ ꓙꓲꓺ ꓢꓻ ꓡꓰ ꓝꓲˍ ꓡꓳ=

ꓬꓯꓹ-ꓬꓳ ꓒꓬꓽ ꓬꓯꓹ-ꓬꓳ ꓢꓶꓽ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓬꓲ ꓪꓴꓻ ꓘꓴꓽ ꓗꓪ ꓟ ꓜꓽ ꓓꓴ ꓜꓽ ꓙꓰꓽ ꓔꓯ ꓙꓲꓺ ꓐ ꓡ ꓝꓲˍ ꓡꓳ= ꓬꓲ ꓪꓴꓻ ꓚꓱꓹ ꓔꓬꓹ ꓢꓻ ꓓꓴ ꓐꓱ ꓶ ꓣꓱꓽ ꓞꓹ ꓟ ꓦꓲꓔꓮꓟꓲꓠ ꓐꓰ ꓟꓲꓠꓰꓣꓮꓡ ꓢꓯꓼ ꓔꓯ ꓥˍ ꓟꓲ ꓔꓳꓹ ꓙ ꓖꓶ ꓐ ꓡˍ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓬꓯꓹ-ꓬꓳ ꓬꓲ ꓜꓲ ꓗꓪ ꓙꓳˍ ꓟ ꓬꓲ ꓢꓯꓼ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓢꓻ ꓓꓴ ꓔꓯ ꓮ ꓟꓬꓹ ꓔꓳꓹ ꓙ ꓖꓶˍ ꓟ ꓥ ꓡꓳ= ꓟꓲꓽ ꓦꓲ ꓠꓻˍ ꓟ꓾ ꓬꓲ ꓙꓴꓽ ꓚꓵꓹ ꓠꓻˍ ꓟ ꓐꓴ ꓔꓯ ꓓꓻ ꓡꓰ ꓝꓲ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓞꓶꓽ ꓚꓵꓸˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓜꓽ ꓓꓴ ꓜꓽ ꓙꓰꓽ ꓔꓯ ꓟꓳꓸ ꓙꓲꓻ ꓖꓴ ꓙꓳˍ ꓟ ꓔꓯ ꓧꓪ ꓟꓰꓹ ꓠꓬꓲ ꓔ ꓢꓴ꓾ ꓠꓯꓻ ꓞꓲꓼ ꓔꓯ ꓟꓳꓸ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓡꓰ ꓐꓯ ꓔ ꓟ ꓗꓪ ꓐꓰ ꓢꓷꓸ ꓪ ꓡꓳ=