ꓤ ꓟꓶ ꓡꓯ. ꓞꓲ ꓣꓳ ꓔꓯ ꓥꓳꓽ (The Parable of the Ten Virgins)

#creditphoto #the parable of ten Virgins

Monday, November 13, 2023

ꓤ ꓟꓶ ꓡꓯ. ꓞꓲ ꓣꓳ ꓔꓯ ꓥꓳꓽ (The Parable of the Ten Virgins)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (32) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ (25ꓽ1‐13) ꓝꓲ. ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓤ ꓟ ꓡꓯ. ꓞꓲ ꓣꓳ ꓔꓯ ꓥꓳꓽ ꓔꓯ ꓐꓯ ꓟ ꓖꓶ ꓟ ꓟ. ꓟꓲ ꓥ ꓡꓳ꓿ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓖꓴ ꓡꓰ ꓬꓲ ꓙꓵ, ꓛꓲ ꓡꓰ ꓟ ꓙꓵ, ꓟꓲ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓕꓲ ꓘꓳꓼ ꓡꓰ ꓣꓳ ꓮ ꓡꓰ ꓐꓰ ꓢꓯ. ꓔꓬ ꓗꓷ ꓟ ꓐꓰ ꓮ ꓡꓳ ꓐꓰ ꓞꓳ ꓙꓳ ꓗꓷ ꓡ ꓐꓰ ꓣꓳ ꓔꓯ ꓓꓵꓼ ꓙ ꓠ, ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓟꓴ ꓗꓴꓷꓼ ꓗꓪ ꓠꓬ ꓟꓬ ꓡꓴꓻ ꓔꓯ, ꓔ ꓢꓲ ꓟꓯ. ꓡꓯ. ꓒ ꓔ ꓔꓯ ꓞꓵꓻ ꓙꓰ ꓟ ꓤ ꓟꓶ ꓡꓯ. ꓞꓲ ꓣꓳ ꓡꓰ ꓐꓰ ꓗ, ꓡꓳ ꓐꓰ ꓐꓯ ꓔ ꓡꓳ꓿ ꓤ ꓟꓶ ꓡꓯ. ꓥꓪ ꓣꓳ ꓟ ꓠꓬ ꓞꓳ ꓙꓲꓽ ꓥ ꓢꓲ ꓠꓬꓲ ꓟꓬ ꓡꓴ ꓡꓰ ꓔꓯ, ꓔ ꓟ ꓥ ꓡꓳ ꓐꓰ ꓖꓳ ꓡꓱ ꓥ ꓟꓲ ꓞꓳ ꓕꓰꓻ ꓥꓪ ꓣꓳ ꓠꓬ ꓟꓬ ꓡꓴ ꓐꓰ ꓟꓬ ꓞꓶꓻ ꓔꓯ, ꓔ ꓟ ꓥ ꓡꓳ꓿ ꓟꓯ. ꓡꓯ. ꓒ ꓡ ꓟ ꓙꓵ, ꓗꓪ ꓟꓬ ꓞꓶꓻ ꓔꓯ ꓔ ꓟ ꓥꓪ ꓣꓳ ꓡꓰ ꓟꓯ. ꓡꓯ. ꓒ ꓔꓯ ꓘꓳ, ꓣꓴ ꓪ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟꓽ ꓕꓰꓻ ꓟ ꓤ ꓟꓶ ꓡꓯ. ꓥꓪ ꓣꓳ ꓠꓬ ꓙꓵ ꓔꓲ ꓗꓪ ꓟꓯ. ꓡꓯ. ꓒ ꓔꓯ ꓧꓪ, ꓥ ꓟꓲ ꓟꓯ. ꓡꓯ. ꓒ ꓔꓯ ꓧꓪ, ꓟꓽ ꓟꓳ꓿ ꓟꓯ. ꓒꓯ. ꓒ ꓡꓰ ꓖ ꓘꓶꓼ ꓑꓲ ꓗꓷ ꓟ ꓙꓵ, ꓔꓯ ꓬꓲ ꓪ ꓥꓪ ꓣꓳ ꓠꓬ ꓬꓲ ꓐ ꓢꓲ ꓗꓪ ꓔꓬ ꓟꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓟꓽ ꓕꓲ ꓟ ꓤ ꓟꓶ ꓡꓯ. ꓥꓪ ꓣꓳ ꓡꓰ ꓐꓰ ꓟꓽ ꓗꓷ ꓡꓰ ꓠ, ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ꓓꓽ ꓪꓴ. ꓕꓲ ꓫꓵ ꓣꓳ ꓮ ꓡꓰ ꓐꓰ ꓬꓰ ꓠ, ꓟ ꓥ ꓐꓯ ꓠꓬ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓔꓯ ꓪꓴ‐ꓢ ꓡꓰ ꓮ ꓕꓯ ꓥ ꓟꓲ ꓟꓽ ꓓꓽ ꓟꓽ ꓢ ꓬꓰ ꓐꓰ ꓝꓮꓲ ꓬꓲ ꓔꓯ ꓦꓻ ꓡꓰ ꓐꓰ ꓟꓽ ꓐꓯ ꓣꓳ ꓔꓯ ꓚꓲ. ꓛꓬ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓚꓲ. ꓛꓬ ꓢꓲ. ꓠ, ꓟ ꓣꓳ ꓔꓯ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿

ꓠꓬꓲ ꓫꓵꓽ ꓕꓲ ꓫꓵꓽ ꓠꓬ ꓪꓴ‐ꓢ ꓠꓬ ꓮ ꓕꓯ ꓥ ꓟꓲ ꓣꓳ ꓐꓰ ꓕꓲ ꓪ ꓔꓬ ꓡꓳ ꓐꓰ ꓣꓳ ꓢꓷ. ꓠ, ꓟ ꓥ ꓡꓳ꓿ꓣꓳ ꓡꓱ ꓥ ꓟ ꓪꓴ. ꓠꓬ ꓪꓴ‐ꓢ ꓔꓯ ꓣꓳ ꓠꓲ, ꓟ ꓗꓼ ꓘꓶꓼ ꓒꓴ ꓖꓶ ꓢꓲ ꓠꓬꓲ ꓣꓳ ꓠꓲ, ꓟ ꓗꓪ ꓓꓵ ꓡ ꓠ, ꓟ ꓬꓰ ꓠ, ꓟ ꓥ ꓡꓳ꓿

ꓢꓽ ꓫꓵꓽ ꓕꓲ ꓫꓵꓽ ꓠꓬ ꓪꓴ‐ꓢ ꓠꓬ ꓣꓳ ꓚꓬꓴ ꓢꓲꓺ ꓒ ꓥ ꓡꓳ ꓐꓰ ꓣꓳ ꓙꓵ ꓢꓲ ꓠꓬꓲ ꓪꓴ‐ꓢ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓒꓵꓽ ꓛꓳꓽ ꓠ, ꓟ ꓐꓰ ꓬꓲ ꓐꓯ ꓘꓶꓽ ꓔꓯ ꓠꓱ. ꓐꓯꓼ ꓢꓴ ꓔꓯ ꓐꓯ ꓟ. ꓖꓶ ꓠ, ꓟ ꓣꓳ ꓬꓰ ꓠ, ꓟ ꓥ ꓡꓳ꓿

ꓣꓳ ꓠꓯ, ꓗꓪ ꓙꓳ ꓟ ꓟꓽ ꓙꓲˍ ꓟ ꓠꓲ, ꓟ ꓓꓵꓽ ꓙ ꓚꓱ, ꓮ ꓙꓵꓽ ꓔꓯ ꓡꓳꓻ ꓗꓷ ꓢꓲ ꓠꓬꓲ ꓪꓴ‐ꓢ ꓔꓯ ꓧꓪ, ꓠ, ꓟ ꓣꓳ. ꓚꓵ. ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿ ꓮ ꓫꓵꓽ ꓠꓬ ꓣꓳ ꓤꓶꓻ ꓔꓯ ꓐꓬ ꓡꓰ ꓝꓲ ꓡ? ꓝꓮꓲ ꓮ ꓫꓵꓽ ꓠꓬ ꓣꓳ ꓤꓶꓻ ꓔꓯ ꓪꓴꓽ ꓟꓴ ꓡ ꓝꓲ ꓡ ꓐꓰ ꓣꓳ ꓢꓷ. ꓠ, ꓟ ꓬꓰ ꓠ, ꓟ ꓥ ꓡꓳ꓿ ꓣꓳ ꓠꓯ, ꓗꓪ ꓮ ꓫꓵꓽ ꓠꓬ ꓪꓴꓽ ꓟꓴ ꓡ ꓚꓱ, ꓔꓯ ꓗꓽ ꓕꓽ ꓔꓬ ꓡ ꓝꓮꓲ ꓮ ꓫꓵꓽ ꓠꓬ ꓣꓳ ꓙꓲ ꓟ ꓕꓲ ꓒꓳ ꓗꓪ ꓙꓰ ꓠ, ꓟ ꓙꓻ ꓫꓱ, ꓠ, ꓟ ꓫ. ꓝꓲ ꓡꓰ ꓐꓰ ꓣꓳ ꓢꓷ. ꓠ, ꓟ ꓥ ꓡꓳ꓿

ꓪꓴ‐ꓢ ꓗꓪ ꓣꓳ ꓘꓳ, ꓣꓴ ꓟꓶ ꓟ ꓡꓯꓽ ꓫꓴ ꓔꓯ x. ꓟꓳ ꓐꓯ ꓠ, ꓟ ꓥ ꓡꓳ꓿ꓖꓳ ꓡꓱ ꓥ ꓟꓲ ꓪꓴ. ꓠꓬꓲ ꓣꓳ ꓔꓯ ꓪꓴ‐ꓢ ꓡꓰ ꓖꓶ ꓔ ꓟ ꓢꓷ. ꓠꓲ, ꓣꓱ ꓫꓵꓽ ꓣꓱ ꓙꓵꓽ ꓝꓮꓲ ꓒꓴ ꓫꓵ. ꓔꓯ ꓣꓳ ꓬꓲ ꓤ ꓠꓬꓲ ꓤ ꓐꓴ ꓣꓱ ꓞ ꓔꓬ ꓢꓴ ꓔꓯ ꓬꓰ ꓙ ꓠ, ꓟ ꓪꓴ‐ꓢ ꓠꓲ, ꓒꓴ ꓟ ꓥ ꓡꓳ꓿

ꓖꓳ ꓕꓲ ꓣꓳ ꓔꓵꓼ ꓔꓬ ꓢꓲ ꓠꓬꓲ ꓢꓲ ꓡꓲ ꓔ ꓟ ꓔꓲ ꓗꓪ ꓪꓴ‐ꓢ ꓔꓯ ꓫ. ꓕꓱ ꓓꓴ ꓬꓰ ꓡꓯ꓿ ꓪꓴ‐ꓢ ꓔꓯ ꓣꓳ ꓠꓲ, ꓟ ꓗꓪ ꓘꓴ ꓓꓴ ꓬꓰ ꓡꓯ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓞꓳ ꓕꓰ ꓡꓰ ꓐꓰ ꓔꓬ ꓢꓲ ꓠꓬꓲ ꓪꓴ‐ꓢ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓒꓴ ꓛꓳꓽ ꓢꓲ ꓠꓬꓲ ꓢꓯ. ꓔꓬ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿

ꓖꓴꓽ ꓙꓴꓽ ꓡꓯꓼ ꓙꓱ ꓟ ꓔꓯ ꓥꓳꓽ