ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓐꓱ ꓶ ꓬꓰ-ꓢꓴ ꓥꓴˍ ꓟ

ꓡꓴ-ꓘ 19ꓽ41-44

ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓡꓺˍ ꓐꓰ ꓬꓰˍ ꓕꓯ꓾ ꓡꓳ ꓒꓱ ꓔꓯ ꓟꓳꓻ ꓗꓷ ꓠꓬ꓾ ꓡꓳ ꓒꓱ ꓐꓱ ꓶ ꓥꓴ ꓢꓲ꓾ ꓠꓬꓲꓸ ꓠꓬꓲ ꓠꓴ ꓔꓯ ꓢꓲ ꓡꓲ ꓟ ꓔꓯꓹ ꓖꓶ ꓡ ꓢꓴ ꓔꓯ ꓠꓴ ꓢꓷꓸˍ ꓕꓯ ꓠꓽ ꓙꓲˍ ꓡꓳ ꓫꓵꓽ ꓥ ꓡꓳ꓿ ꓮ ꓟꓶ ꓠꓽ ꓠꓴ ꓟꓬ ꓢꓶꓽ ꓔꓯˍ ꓐꓰ ꓚꓵꓺ ꓔ ꓡꓳ=  ꓡꓻ ꓠꓹ ꓟ ꓦꓬꓼ ꓠꓬꓲ ꓗꓪ ꓠꓽ ꓠꓴ ꓔꓯ ꓛꓴꓽ ꓙꓳ ꓢꓴ ꓐꓴ ꓡꓰ ꓠꓴ ꓚꓳ ꓡꓳ ꓗꓪ ꓧꓪꓸ ꓒꓱꓻ ꓜꓶꓻ ꓢꓲ ꓠꓬꓲ꓾ ꓡꓲ ꓛꓱꓽ ꓚꓳ ꓡꓳ ꓗꓪ ꓠꓴ ꓔꓯ ꓗꓽ ꓚꓳꓸ ꓔ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ ꓪꓴ-ꓢ ꓡꓰ ꓠꓴ ꓔꓯ ꓔꓱꓹ ꓠꓬꓲ ꓡ ꓟ ꓦꓬꓼ ꓠꓬꓲ ꓔꓯ ꓠꓴ ꓟꓽ ꓡꓳꓸ ꓓꓳ ꓡ ꓠꓬꓲ꓾ ꓠꓴˍ ꓐꓰ ꓠꓴ ꓚꓬꓹ ꓠꓯꓸꓼ ꓗꓪ ꓟ ꓤ ꓠꓱ ꓐꓴ ꓔꓯ ꓠꓬ ꓟꓲ ꓠꓯ ꓗꓪ ꓙꓱꓼ ꓗꓷˍ ꓥꓳ꓿ ꓠꓴ ꓔꓯ ꓜꓶꓻ ꓔ ꓟ Bꓸ ꓒꓬꓸˍ ꓟꓲ ꓟꓽ ꓥꓸ ꓦ ꓗꓷ ꓟ ꓕꓲ ꓒꓬꓸˍ ꓟꓲ ꓟꓽ ꓙꓳ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 

ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓠꓬ ꓚꓲꓸ ꓛꓬ ꓤ ꓠꓱ ꓐꓴ ꓔꓯ ꓔꓱꓹ ꓔꓱꓹ ꓚꓵ ꓚꓵˍ ꓡꓰꓽ ꓪꓴꓽ ꓟꓴ ꓡ ꓝꓲ ꓠꓲꓹ ꓫꓵˍ ꓡꓳ= ꓬꓲ ꓚꓱꓹ ꓮ ꓟꓬꓹ ꓗꓪ ꓙꓲꓻ ꓔꓱꓹ ꓢꓴ ꓒꓬꓱꓼ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓐ ꓡ ꓗꓪ ꓛꓲ ꓟꓸ ꓖꓶ ꓑꓱ ꓖꓶˍ ꓡꓳ= ꓙꓻ ꓖꓴ ꓟꓸ ꓖꓶˍ ꓡꓳ= ꓟꓽ ꓙꓲꓻ ꓟꓽ ꓔꓱꓹ ꓟ ꓗꓪ ꓕꓼ ꓖꓶˍ ꓡꓳ= ꓙꓲꓻ ꓔꓱꓹˍ ꓟ ꓗꓪ ꓡꓰꓽ ꓬꓲ ꓚꓱꓹ ꓟꓳꓸ ꓖꓶˍ ꓡꓳ=

ꓖꓳ ꓡꓱ ꓥ ꓟꓲ ꓤ ꓠꓱ ꓤ ꓐꓴ ꓠꓬ ꓮꓽ ꓐ ꓮ ꓟ ꓟꓸ ꓖꓶˍ ꓟ꓾ ꓬꓲ ꓚꓱꓹ ꓟꓳꓸ ꓖꓶˍ ꓟ ꓔꓯ ꓟꓽ ꓠ ꓡꓳꓸ꓾ ꓟꓽ ꓛꓳ ꓫꓱꓽ ꓕꓯ꓾ ꓤ ꓠꓱ ꓤ ꓐꓴ ꓙ ꓖꓴ ꓥꓳꓽ ꓡꓰˍ ꓟ꓾ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓡˍ ꓟ ꓔꓯ ꓮꓽ ꓐ ꓮ ꓟ ꓐꓴ ꓟꓽ ꓛꓲ ꓟꓽ ꓡꓯ ꓡꓰ ꓡꓳꓸ ꓟꓳ ꓢꓲ ꓤ ꓠꓱ ꓤ ꓐꓴ ꓐꓱ ꓶ ꓙꓽ ꓫꓸ ꓢꓲ ꓠꓬꓲ ꓟꓬ ꓐꓰ ꓞꓰ ꓔꓬ ꓪˍ ꓡꓳ= ꓠꓲꓹ ꓟ ꓫꓸ ꓔꓬ ꓪˍ ꓡꓳ=

ꓖꓳ ꓟˍ ꓡꓰ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪˍ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓚꓲꓸ ꓛꓬ ꓬꓯꓼ ꓡ ꓢꓲ ꓶꓼ ꓓꓳꓽ ꓫꓱꓹ ꓓꓳꓽ ꓟꓸ ꓟꓲꓽ꓾ ꓚꓬꓴꓸ ꓙˍ ꓟ ꓟꓸ ꓟꓲꓽ ꓐꓴ ꓔꓯ ꓟꓸ ꓖꓶ ꓔꓬ ꓥ ꓟꓲ ꓬꓲ ꓔꓯ ꓟꓽ ꓘꓳ ꓣꓴ ꓟ꓾ ꓬꓲ ꓔꓯ ꓟꓽ ꓠ ꓠꓹ ꓟ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓟꓳꓻ ꓡꓰ ꓕꓯ꓾ ꓡꓳ ꓒꓱ ꓕꓱ ꓟ ꓠꓯꓸꓼ ꓗꓪ ꓒꓬꓱꓼ ꓡˍ ꓟ ꓐꓬ ꓡꓰ ꓓꓴ ꓚꓱꓹ ꓔꓯ ꓡꓳꓸ ꓟꓳꓻ ꓢꓲ ꓟꓬ ꓐꓰ ꓞꓰˍ ꓡꓳ= ꓥꓴꓻˍ ꓡꓳ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ=

ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓥˍ ꓟꓲ ꓪꓴ-ꓢ ꓙꓵꓽ ꓗ꓾ ꓪꓴ-ꓢ ꓕꓵꓼ ꓪ꓾ ꓔꓱꓹ ꓟ ꓚꓱꓹ ꓗꓪ ꓐꓰ ꓙ ꓖꓴ ꓥꓳꓽ ꓡꓰ ꓢꓲ꓾ ꓦ ꓚꓬꓴꓸ ꓟꓶˍ ꓟ ꓔꓯ ꓡꓲꓹ ꓗꓷˍ ꓗꓪ ꓛꓲ ꓪꓴ-ꓢ ꓔꓯ ꓡꓳ ꓒꓰꓹ ꓗꓷ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓔꓯ ꓟꓬ ꓐꓰ ꓞꓰ ꓡꓰ ꓝꓲ ꓢꓴ ꓒꓬꓱꓼ ꓡꓰ ꓔꓬ ꓡ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓗꓪ ꓣꓳꓽ ꓓꓵꓽ ꓙ ꓠꓬꓲ ꓡꓯ=