ꓞꓳ ꓜꓴ ꓞꓳ ꓟꓯ ꓔꓯ ꓠꓻ ꓫꓬ, ꓖꓶˍ ꓟ (Sunday reflection)

ꓞꓳ ꓜꓴ ꓞꓳ ꓟꓯ ꓔꓯ ꓠꓻ ꓫꓬ, ꓖꓶˍ ꓟ   (Sunday reflection)

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ ꓗꓪ ꓐꓰ 5 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓺ ꓒ ꓕꓳ ꓶ ꓠꓬ (1ꓽ‐29‐39) ꓝꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲ‐ꓟꓴ ꓬꓲ ꓮ‐ꓠꓬꓲ ꓠꓻ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓻ ꓫꓬ, ꓖꓶ ꓟ ꓐꓰ ꓜꓲꓼ ꓦꓲꓻ ꓗꓪ ꓠꓲꓽ ꓜꓲꓼ ꓞ, ꓢꓴ ꓔꓯ ꓠꓲꓽ ꓖꓼ ꓓꓳ ꓗꓷ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓮ ꓫꓵꓽ ꓐꓯ ꓟ. ꓖꓶ ꓡ ꓥ ꓐꓯ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓓꓽ ꓪꓴ. ꓢꓲ‐ꓟꓴ ꓬꓲ ꓮ‐ꓠꓬꓲ ꓔꓯ ꓠꓻ ꓫꓬ, ꓖꓶ ꓟ ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿ ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓙꓵꓻ ꓠ, ꓟ ꓐꓰ ꓬꓲ ꓔꓯ ꓙꓵꓻ ꓢꓴ ꓔꓯ ꓠꓬ ꓮ ꓕꓯ ꓥ ꓟꓲ ꓟꓽ ꓡꓳ ꓔ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲ‐ꓟꓴ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓪꓴ. ꓠꓬꓲ ꓬꓲ ꓮ‐ꓠꓬꓲ ꓔꓯ ꓠꓻ ꓫꓬ, ꓖꓶ ꓗꓷ ꓟ ꓥ ꓡꓳ꓿

ꓕꓱ ꓟ ꓠꓬ ꓣꓳ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳ ꓢꓴ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓡꓳ ꓙ ꓔ ꓙ ꓢꓲ ꓠꓬꓲ ꓬꓲ ꓔꓯ ꓙꓵꓻ ꓢꓴ ꓐꓴ ꓔꓯ ꓮ ꓡꓰ ꓫꓵꓽ ꓫ. ꓓꓴ ꓔꓳ ꓜꓳ ꓥ ꓟꓲ ꓦꓻ ꓕꓲ ꓒꓳ,ꓗꓪ ꓫ ꓓꓴ ꓔꓳ ꓜꓳ ꓥ ꓟꓲ ꓬꓲ ꓡꓰ ꓬꓰ ꓙ ꓔ ꓙ ꓔꓬ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓠꓬ ꓪꓴ‐ꓢ ꓣꓱ ꓛꓰ ꓔꓯ ꓮ ꓕꓯ ꓥ ꓟꓲ ꓕꓽ ꓟꓲ ꓡꓰ ꓝꓲ ꓡꓯ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓠꓻ ꓢꓴ ꓒꓬ ꓢꓴ ꓔꓯ ꓠꓻ ꓫꓬ ꓖꓶ ꓢꓲ ꓠꓬꓲ ꓠꓲꓽ ꓜꓲꓼ ꓞ, ꓢꓴ ꓔꓯ ꓖ ꓓꓳ ꓖꓶ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓔꓬ ꓟ ꓒ ꓕꓲ ꓗꓪ ꓥ ꓟꓲ ꓮ ꓟꓶ ꓟ ꓙꓵ,  ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓠꓲꓽ ꓡꓰ ꓤ ꓠꓬꓲ ꓫꓵꓽ ꓠꓬꓲ ꓓꓴ ꓟꓲ ꓠꓯ ꓗ, ꓛꓲ ꓓꓴ ꓮ ꓟꓬ, ꓫꓵꓽ ꓗꓪ ꓐꓰ ꓣꓳ ꓔꓯ ꓤ ꓠꓬꓲ ꓔꓬ ꓟ ꓔꓯ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴꓡꓰ ꓟ. ꓖꓶ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓲꓽ ꓢ‐ꓓꓯ ꓡꓰ ꓤ ꓠꓬꓲ ꓫꓵꓽ ꓠꓬꓲ ꓟ

ꓗꓪ ꓣꓳ ꓔꓯ ꓟꓽ ꓛꓳ ꓫꓱ, ꓠ, ꓟ ꓤ ꓟꓳ ꓠ, ꓟ ꓟ. ꓖꓶ ꓔꓬ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓝꓴꓲ ꓙꓳ ꓢꓴ ꓔꓯ ꓫꓱ, ꓤ ꓟ ꓪꓴ‐ꓢ ꓥ ꓟ ꓪꓴ. ꓠꓬꓲ ꓣꓳ ꓫꓬ, ꓡꓰ ꓟ ꓥꓳꓽ ꓡꓰ ꓟ ꓔꓯ ꓝꓴꓲ ꓔꓯ ꓓꓵ ꓙ ꓒꓳ, ꓡꓶ ꓢꓲ ꓠꓬꓲ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓠ, ꓪꓴ‐ꓢ ꓠꓯ, ꓗꓪ ꓪꓽ ꓘꓴ ꓓꓴ ꓬꓰ ꓡꓯ꓿ ꓝꓴꓲ ꓕꓯ ꓡꓳ ꓗꓷ ꓢꓲ ꓠꓬꓲ ꓢꓲꓺ ꓒ ꓠꓲ, ꓒꓴ ꓟ ꓤ ꓠꓱ ꓐꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿

ꓢꓲ‐ꓟꓴ ꓐꓰ ꓬꓲ ꓛꓳ ꓒꓯ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓪ ꓔꓬ ꓟ ꓪꓴ. ꓠꓬꓲ ꓬꓲ ꓔꓯ ꓧꓪ, ꓔꓬ ꓟ ꓥ ꓡ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓙꓵ, ꓗꓪ ꓢꓲꓺ ꓒ ꓔꓯ ꓣꓱ ꓬꓯꓼ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓧꓪꓽ ꓖꓳ ꓓꓱ ꓕꓲ ꓒꓳ, ꓗꓪ ꓥ ꓟꓲ ꓦꓻ ꓕꓲ ꓒꓳ, ꓐꓱ ꓶ ꓥ ꓟꓲ ꓣꓱ ꓬꓯꓼ ꓔꓬ ꓟ ꓥ ꓡꓳ꓿

ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓬ ꓣꓳ ꓬꓰ ꓔꓬ ꓟ ꓟꓬꓱꓽ ꓮ ꓟꓬ, ꓙꓳ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓪꓽ ꓘꓴ ꓠ, ꓟ ꓬꓲ ꓙꓵ, ꓟꓽ ꓖꓶ ꓟ ꓠꓬ ꓥꓳꓽ ꓡꓰ ꓟ ꓥ ꓡꓳ꓿ ꓢꓲꓺ ꓒ ꓢꓲꓺ ꓒ ꓬꓰ‐ꓢꓴ ꓟꓬꓱꓽ ꓮ ꓟꓬ, ꓙꓳ ꓥ ꓟ ꓢꓲ ꓡꓲ ꓔ ꓟ ꓔꓶ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓟ ꓥ ꓡꓳ꓿ ꓣꓳ ꓥ ꓟꓲ ꓮ ꓕꓯ ꓥ ꓟꓲ ꓪꓽ ꓘꓴ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓽ ꓫꓬ ꓕꓳ ꓶ ꓵꓻ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓣꓳ ꓧꓪ ꓖꓳꓽ ꓓꓱ ꓐꓱ ꓶ ꓟꓬꓱꓽ ꓮ ꓟꓬ, ꓬꓰ ꓔꓬ ꓥ ꓟꓲ ꓪꓽ ꓘꓴ ꓠ, ꓟ ꓬꓰ ꓙꓵ, ꓖꓶ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓲ, ꓒꓴ ꓟ ꓚꓱ, ꓗꓪ ꓛꓳ ꓫꓱ, ꓓꓴ ꓬꓰ ꓡꓯ꓿