ꓠꓴ ꓠꓬ ꓬꓰ-ꓢꓴ ꓔꓯ ꓢꓷꓸˍ ꓡ? ꓣꓳ ꓐꓱ ꓶ ꓙꓲ-ꓢꓴ ꓠꓬ ꓮꓽ ꓟ ꓥ ꓡ?

ꓠꓴ ꓠꓬ ꓬꓰ-ꓢꓴ ꓔꓯ ꓢꓷꓸˍ ꓡ? ꓥ ꓡꓳ꓾ ꓠꓴ ꓐꓰ ꓥꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓢꓷꓸˍ ꓥ ꓟꓲ꓾ ꓠꓴ ꓐꓰ ꓥꓪ ꓤꓶꓻ ꓠꓯꓸꓼ ꓗꓪ ꓢꓲ ꓒ ꓙꓳ ꓔꓬ ꓟ ꓔꓯ ꓚꓵ ꓚꓵ ꓚꓬꓹ ꓪˍ ꓡ? ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓔꓯ ꓢꓷꓸˍ ꓟ ꓐꓰ ꓢꓲ ꓒ ꓬꓰ-ꓢꓴ ꓣꓳ ꓐꓰ ꓕꓲ ꓪꓽ ꓔꓬ ꓟ ꓔꓯ ꓚꓬꓹ ꓪˍ ꓟ꓾ ꓕꓱ ꓠꓬꓲꓽ ꓫꓵꓽ ꓠꓬ ꓟꓽ ꓫꓱꓸ ꓡꓯ ꓘꓳ꓾ ꓟꓽ ꓪꓽ ꓡꓯ ꓘꓳ=

ꓙꓲ-ꓢꓴ ꓢꓲ ꓤ ꓮ ꓟꓬꓹ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓮꓽ ꓟ ꓥ ꓡ? ꓐꓯˍ ꓟ ꓔꓯ ꓢꓷꓸ ꓔꓬ ꓥ ꓟꓲ꓾ ꓢꓲ ꓒ ꓬꓰ-ꓢꓴ ꓬꓲ ꓪꓽ ꓠꓬꓲˍ ꓟ꓾ ꓬꓲ ꓠꓬ ꓬꓲ ꓑ ꓫꓬ ꓐꓴ ꓐꓰ ꓕꓲ ꓪꓽ ꓔꓬ ꓡꓳ꓾ ꓐꓯ ꓟ ꓔꓯ ꓠꓬ ꓟꓽ ꓚꓬꓹ ꓪ ꓔꓬ ꓢꓴ ꓮꓽ ꓟꓬꓹ ꓙꓳˍ ꓡꓳ= ꓚꓵ ꓚꓵ ꓣꓳ ꓐꓴ ꓠꓬ ꓢꓲ ꓒ ꓐꓱ ꓶ ꓬꓲ ꓙꓵꓹ ꓟꓽ ꓙꓳ ꓟ ꓑꓶꓸ ꓓꓴ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲ ꓒ ꓔꓬ ꓟ ꓔꓯ ꓟꓽ ꓚꓬꓹ ꓪ꓾ ꓟꓽ ꓓꓵꓽ ꓙ ꓟꓶ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓮꓽ ꓟ ꓥ ꓟ ꓔꓯ ꓒꓳꓹ ꓖꓶ ꓢꓴ ꓢꓲ-ꓟꓴ ꓒꓲ-ꓕꓱ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓢꓷꓸˍ ꓟ ꓡꓰꓽ ꓟꓽ ꓞꓲ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓤꓶꓻ ꓠꓯꓸꓼ ꓗꓪ ꓙꓳ ꓔꓬ ꓡꓳ꓾ ꓬꓲ ꓐꓰ ꓕꓲ ꓪ ꓔꓬ ꓡꓳ ꓐꓯ ꓟ ꓔꓯ ꓬꓲ ꓚꓬꓹ ꓪˍ ꓡꓳ= ꓝꓲ ꓓꓴ ꓐꓴ ꓘꓴꓽ ꓗꓪ ꓢꓲ ꓒ ꓬꓰ-ꓢꓴ ꓐꓰ ꓮ ꓕꓯ ꓟꓲ ꓕꓲ ꓪ ꓔꓬ ꓢꓴ ꓠꓬ ꓒꓲ-ꓕꓱ ꓥ ꓡꓳ= ꓢꓲ ꓒ ꓬꓰ-ꓢꓴ ꓐꓱ ꓶ ꓬꓲ ꓙꓵꓹ ꓮ ꓟꓬꓹ ꓖꓶ ꓢꓴ ꓥˍ ꓟꓲ ꓒꓲ-ꓕꓱ ꓡꓰꓽ ꓥ ꓡꓳ=

ꓢꓲ ꓒ ꓬꓰ-ꓢꓴ ꓐꓰ ꓕꓲ ꓪ ꓒꓲ-ꓕꓱ ꓠꓬ ꓬꓰ-ꓢꓴ ꓬꓲ ꓒꓬꓱꓽ ꓑꓶꓸ ꓡꓰ ꓖꓴ ꓪ ꓚꓲ ꓗꓪ ꓓꓯꓻ ꓙꓰ ꓗꓷꓳ= ꓢꓲ ꓒ ꓬꓰ-ꓢꓴ ꓬꓲꓻ ꓙꓬ ꓕꓯꓽ ꓢꓲ ꓙ ꓖꓴ ꓫꓱꓽˍ ꓕꓯ ꓟꓲ ꓒꓲ-ꓕꓱˍ ꓟꓲ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ ꓢꓲ ꓬꓰ-ꓢꓴ ꓔꓬ ꓗꓪ ꓡ ꓠꓹ ꓟ ꓓꓰꓽ ꓗꓷꓳ= ꓒꓲ-ꓕꓱ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓛꓳˍ ꓙꓰ ꓗꓷ ꓔꓬ ꓗꓷ ꓟ ꓠꓱꓸ ꓐꓯ ꓮ ꓟꓬꓹ ꓚꓱꓹ ꓥˍ ꓟꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓮ ꓟꓬꓹ ꓖ ꓙꓳˍ ꓢꓰꓽ ꓡꓳ=

ꓣꓳ ꓐꓴ ꓥ ꓟꓲ ꓢꓲ-ꓟꓴ ꓒꓲ-ꓕꓱ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓣꓳ ꓤꓶꓻ ꓗꓪ ꓔꓬ ꓟ ꓔꓯ ꓟꓬꓽ ꓠꓬꓲ ꓚꓬꓹ ꓪ ꓠꓲꓹ ꓫꓵˍ ꓕꓯ꓾ ꓬꓲ ꓮꓽ ꓟ ꓥ ꓟ ꓔꓯ ꓟꓬꓽ ꓠꓬꓲ ꓢꓷꓸ ꓠꓲꓹ ꓫꓵˍ ꓕꓯ ꓣꓳ ꓬꓰ ꓠ ꓔ ꓟ ꓠꓬ ꓕꓲ ꓚꓱꓹˍ ꓡꓰꓽ ꓙꓳˍ ꓡꓳ= ꓖꓳ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓱ ꓶ ꓬꓲ ꓙꓵꓹ ꓮ ꓟꓬꓹ ꓖꓶ ꓠꓹ ꓟ ꓥ ꓡꓳ= ꓟꓲ-ꓢ ꓪꓽ ꓘꓴˍ ꓟ ꓗꓪ ꓐꓰ ꓢꓲ ꓒ ꓐꓰ ꓕꓲ ꓪ ꓔꓬ ꓢꓲ꓾ ꓢꓲꓽ ꓫꓬ ꓕꓳꓽ ꓶ ꓵˍ ꓟ ꓗꓪ ꓐꓰ ꓢꓲ ꓒ ꓐꓯ ꓘꓶꓽ ꓠ ꓠꓹ ꓠꓹ ꓟ ꓥ ꓡꓳ= ꓠꓯꓼ ꓠꓯꓼ ꓙꓵꓹ ꓟꓶꓽ ꓘꓶꓼ ꓙꓵꓹ ꓗꓪ ꓪꓽ ꓘꓴˍ ꓟ ꓗꓪ ꓐꓰ ꓣꓳ ꓤꓶꓻ ꓠꓯꓸꓼ ꓗꓪ ꓢꓲ ꓒ ꓬꓰ-ꓢꓴ ꓔꓬ ꓡꓳ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓕꓲ ꓪ ꓔꓬ ꓡꓳ ꓐꓯ ꓟ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯ ꓟꓲ ꓓꓵꓽ ꓙ ꓔ ꓢꓲ꓾ ꓢꓲ ꓒ ꓔꓯ ꓟꓬꓽ ꓠꓬꓲ ꓬꓲ ꓙꓵꓹ ꓖꓶ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=