ꓟꓴ ꓗꓪ ꓗꓪ ꓟ ꓠꓴ ꓪ ꓐꓹ ꓐ ꓠꓬ ꓫꓱꓸ ꓤ ꓠꓲꓹ ꓙꓳ_ ꓟ ꓡꓰ ꓐꓰ ꓠꓴ ꓪ ꓠꓬ ꓫꓱꓸ ꓤ ꓠꓲꓹ ꓙꓳ ꓝꓲ꓾

ꓟꓴ ꓗꓪ ꓗꓪ ꓟ ꓠꓴ ꓪ ꓐꓹ ꓐ ꓠꓬ ꓫꓱꓸ ꓤ ꓠꓲꓹ ꓙꓳ_ ꓟ ꓡꓰ ꓐꓰ ꓠꓴ ꓪ ꓠꓬ ꓫꓱꓸ ꓤ ꓠꓲꓹ ꓙꓳ ꓝꓲ꓾ ꓐꓰ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓙꓳ_ ꓡꓳ= ꓬꓲ ꓤ ꓠꓬꓲ ꓤ ꓐꓴꓳ꓾ ꓟꓵꓽ ꓘꓳꓼ ꓐꓰ ꓫꓸ ꓕꓱ ꓟ ꓕꓱ ꓟ ꓚꓱꓹ ꓗꓪ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓢꓲꓹ ꓜꓲ ꓢꓲꓹ ꓪꓰ ꓙꓱ ꓤ ꓔꓯ ꓢꓯꓸ ꓫꓵ ꓢꓯꓸ ꓙꓰ ꓡꓰ ꓐꓰ ꓠꓲꓹ ꓟ ꓗꓷ ꓠꓹ ꓟ ꓣꓳꓸ ꓚꓵ_ ꓡꓳ= ꓕꓱ ꓡꓰ ꓐꓰ ꓢꓲꓹ ꓜꓲ ꓢꓲꓹ ꓪꓰ ꓔꓯ ꓣꓳ ꓟꓳ_ ꓟ ꓚꓱꓹ ꓕꓱ ꓟ ꓔꓯ ꓡꓶꓸ ꓗꓷ ꓠꓬ ꓣꓳ ꓟꓬ ꓠꓬꓲ ꓠꓲꓹ ꓠꓵ ꓗꓴꓸ ꓡ ꓥꓳ꓾ ꓐꓰ ꓓꓵꓽ ꓙ ꓟꓶ_ ꓥꓳ= ꓕꓱ ꓟ ꓮ ꓫꓵ ꓥ ꓐꓯ ꓠꓬ꓾ ꓢꓲꓹ ꓜꓲ ꓢꓲꓹ ꓟꓰ ꓬꓲ ꓪ ꓥ ꓟꓲ ꓢꓯꓼ ꓟꓬ ꓙꓳ_ ꓡꓳ= ꓬꓲ ꓪ ꓥ ꓟꓲ ꓣꓳ ꓡꓰ ꓐꓰ ꓜ ꓜꓽ ꓗꓴꓸ_ ꓡꓳ= ꓣꓳ ꓡꓰ ꓐꓰ ꓬꓲꓻ ꓙꓬ ꓓꓳ_ ꓡꓳ꓾ ꓣꓳ ꓡꓰ ꓐꓰ ꓟꓲꓽ ꓦꓲ ꓔꓯ ꓣꓱꓽ ꓞꓹ ꓡꓳ= ꓕꓱ ꓡꓱ ꓢꓯꓸ ꓫꓵ ꓢꓯꓸ ꓙꓰ ꓕꓲ ꓟ ꓡꓰ ꓐꓰ ꓫꓸ ꓪ ꓟꓽ ꓕꓱ ꓟ ꓡꓰ ꓕꓲ ꓖꓼ ꓢꓯꓼ ꓟꓬ ꓮ ꓙꓵ ꓙꓳ_ ꓡꓳ= ꓕꓱ ꓡꓱ ꓣꓳ ꓡꓳꓸ ꓠꓬꓲ ꓕꓯ ꓬꓲ ꓠꓬ ꓢꓯꓸ ꓫꓵ ꓥꓳ꓾ ꓐꓰ ꓡꓳꓸ ꓟꓳ ꓡ ꓥꓳ=

ꓣꓳ ꓘ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓢꓲ ꓫꓬ ꓢꓴ ꓝꓣꓮꓠꓚꓲꓢ ꓮꓢꓢꓲꓢꓲ ꓐꓯ_ ꓟ ꓙꓳ_ ꓡꓳ꓾ ꓬꓲ ꓠꓬ ꓕꓱ ꓡꓱ ꓐꓰ ꓪꓴ-ꓢ ꓡꓰ ꓚꓰꓼ ꓔ ꓟ ꓟꓲ ꓠꓯ ꓔꓯ ꓢꓲꓹ ꓜꓲ ꓢꓲꓹ ꓪꓰ ꓙꓱ ꓤ ꓙꓱ ꓟꓲ ꓔꓯ ꓮ ꓘꓶꓸ ꓠꓲꓹ ꓠꓵ_ ꓟ ꓑꓶ ꓓꓴ ꓙꓱ ꓤ ꓙꓱ ꓟꓲ ꓔꓯ ꓥ ꓟꓲ ꓬꓲ ꓫꓸ ꓪ ꓙꓳ_ ꓡꓳ꓾ ꓝꓮꓲ ꓢꓲꓹ ꓜꓲ ꓢꓲꓹ ꓟꓰ ꓔꓯ ꓥ ꓟꓲ ꓬꓲ ꓫꓸ ꓪ ꓙꓳ_ ꓡꓳ= ꓕꓲ ꓚꓱꓹ ꓐꓯ ꓠꓬ ꓬꓲ ꓫꓱꓸ ꓤ ꓠꓲꓹ ꓠꓬ ꓞꓳ ꓤ ꓔꓯ ꓡꓰ ꓟꓽ ꓥ ꓥ꓾ꓢꓲꓹ ꓜꓲ ꓢꓲꓹ ꓟꓰ ꓔꓯ ꓥ ꓟꓲ ꓬꓲ ꓫꓱꓸ ꓤ ꓗꓴꓸ_ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓓꓵꓽ ꓙ ꓠꓬꓲ ꓡꓯ= ꓣꓳ ꓦꓲꓻ ꓗ ꓡꓯ ꓗ ꓙꓰ ꓗꓪ ꓔꓶꓻ ꓔ ꓟ ꓢꓲꓹ ꓜꓲ ꓗꓪ ꓐꓰ ꓶꓻ ꓤ ꓗꓪ ꓪꓰ ꓡ ꓟ ꓢꓲꓹ ꓜꓲ ꓔꓯ ꓡꓳꓸ ꓠꓬꓲ ꓓꓴ ꓬꓰ ꓡꓯ= ꓦꓶꓸ ꓕꓯ ꓣꓳ ꓡꓳꓸ ꓠꓬꓲ ꓟ ꓢꓲꓹ ꓜꓲ ꓕꓲ ꓟ ꓡꓰ ꓐꓰ ꓟꓽ ꓥ ꓥ ꓐꓰ ꓢꓲꓹ ꓜꓲ ꓖꓳ ꓟ ꓠꓬ ꓣꓳ ꓔꓯ ꓠꓲꓹ ꓠꓵ ꓔꓬ ꓫꓵ꓾ ꓣꓳ ꓔꓯ ꓬꓰ ꓙ ꓔꓬ ꓫꓵ꓾ ꓣꓳ ꓢꓯꓸ ꓔꓬ ꓟ ꓐꓱ ꓶ ꓢꓯꓼ ꓕꓵꓼ ꓔꓬ ꓫꓵ ꓚꓱꓹ ꓕꓱ ꓡꓱ ꓐꓰ ꓟꓳ ꓠꓬꓲ ꓡꓯ= ꓣꓳ ꓡ ꓞꓳ ꓕꓲ ꓐꓱ ꓠꓬ ꓙꓱ ꓤ ꓙꓱ ꓟꓲ ꓔꓯ ꓫꓱꓸ ꓤ ꓗꓴꓸ_ ꓡꓳ= ꓠꓲꓹ ꓠꓵ ꓗꓴꓸ_ ꓡꓳ= ꓜ ꓖꓶꓽ ꓜ ꓗꓴꓸ_ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓮ ꓘꓶꓸ ꓠꓵ_ ꓟ ꓙꓱ ꓤ ꓙꓱ ꓟꓲ ꓫꓵꓻ ꓕꓯ ꓣꓳ ꓠꓲꓹ ꓟ ꓢ ꓡꓰ ꓓꓴ ꓟꓽ ꓙꓳ= ꓣꓳ ꓔꓯ ꓞ ꓗꓳꓸ ꓖꓶ ꓔꓬ ꓟ ꓢꓲꓹ ꓜꓲ꓾ ꓣꓳ ꓔꓯ ꓢꓯꓼ ꓖꓶ ꓔꓬ ꓟ ꓢꓲꓹ ꓜꓲ꓾ ꓕꓲ ꓜꓲ ꓫꓵꓻ ꓠꓬ ꓠꓲꓹ ꓟ ꓠꓯꓼ ꓗꓪ ꓮ ꓡꓲ ꓡꓲ ꓟꓽ ꓗꓹ ꓛꓲ ꓮ ꓟꓬꓹ ꓙꓳ_ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓴ ꓗꓪ ꓗꓪ ꓟ ꓐꓹ ꓐ ꓫꓱꓹ ꓤ ꓠꓲꓹ ꓙꓳ_ ꓟ ꓡꓰ ꓐꓰ ꓠꓴ ꓪ ꓥ ꓟꓲ ꓫꓱꓸ ꓤ ꓠꓲꓹ ꓙꓳ꓾ ꓐꓰ ꓐꓯ ꓔ ꓟ ꓠꓬ ꓡ ꓞꓳ ꓕꓲ ꓣꓳ ꓛꓳ ꓕꓲ ꓣꓳ ꓡꓰ ꓟꓽ ꓞꓲ ꓢꓲꓹ ꓜꓲ ꓢꓲꓹ ꓟꓰ ꓔꓯ ꓥ ꓟꓲ ꓫꓱꓸ ꓤ ꓗꓴꓸ ꓠꓹ ꓟ ꓣꓳ ꓔꓯ ꓐꓯ ꓖꓶ ꓡ ꓥꓳ ꓐꓰ ꓣꓳ ꓢꓷꓸ ꓠ ꓗꓹ ꓡꓳ= ꓪꓴ-ꓢ ꓠꓬ ꓣꓳ ꓔꓯ ꓟꓲ ꓠꓯ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓣꓳ ꓔꓯ ꓖꓶ ꓔ ꓡꓳ= ꓕꓱ ꓡꓱ ꓛꓳ ꓫꓱꓽ_ ꓕꓯ ꓟꓽ ꓣꓱꓽ ꓟꓽ ꓓ ꓟ ꓣꓱꓽ ꓔꓬ ꓡꓳ= ꓥ ꓡꓳ꓾ ꓖꓳ ꓡꓱ ꓐꓯ ꓥ ꓟꓲ ꓟꓽ ꓣꓱꓽ ꓬꓯꓼ ꓗꓪ ꓮꓽ ꓔꓳ ꓔꓳ ꓢꓲꓹ ꓗꓷ ꓒꓬ ꓟ ꓣꓳ ꓤ ꓟꓳ ꓠ ꓗꓹ ꓡꓳ= ꓠꓲꓹ ꓟ ꓢꓷꓸ ꓠꓲꓹ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓮ ꓡꓰ ꓐꓯ ꓐꓯ ꓠꓬ ꓢꓲꓹ ꓪꓰ ꓜꓲ ꓠꓬꓲꓽ ꓜꓲ ꓔꓯ ꓠꓴ ꓕꓲ ꓠꓬꓲ ꓕꓲ ꓠꓬꓲ ꓡꓳꓸ ꓠꓬꓲ꓾ ꓢꓲꓹ ꓪꓰ ꓜꓲ ꓕꓲ ꓜꓲ ꓔꓯ ꓠꓬ ꓬꓲ ꓔꓯ ꓠꓲꓹ ꓠꓵ_ ꓡꓳ꓾ ꓠꓴ ꓔꓯ ꓥꓪ ꓠꓲꓹ ꓠꓵ_ ꓡꓳ ꓐꓯ ꓢꓲ ꓫꓸ ꓪ ꓕꓱ ꓢꓲ ꓬꓲ ꓔꓯ ꓡꓳꓸ ꓠꓬꓲ ꓖꓶ= ꓕꓱ ꓠꓬꓲꓽ ꓜꓲ ꓟ ꓔꓯ ꓔꓯꓺ ꓗꓷ ꓢꓲ ꓡꓳꓸ ꓠꓬꓲ ꓕꓯ ꓫꓸ ꓪ ꓟꓽ ꓕꓱ ꓖꓶ ꓟ ꓢꓲꓹ ꓜꓲ ꓖꓳ ꓕꓲ ꓜꓲ ꓠꓬ ꓪꓰ ꓟꓰ_ ꓡꓳ꓾ ꓐꓰ ꓐꓯ ꓫꓵ ꓙꓳ_ ꓡꓳ= ꓕꓲ ꓚꓱꓹ ꓐꓯ ꓠꓬ ꓢꓲꓹ ꓜꓲ ꓢꓲꓹ ꓪꓰ ꓡꓰ ꓣꓳ ꓠꓵ ꓠꓲꓹ ꓟꓳꓸ ꓖꓶ_ ꓕꓯ ꓬꓲ ꓪ ꓠꓬ ꓣꓳ ꓔꓯ ꓝꓮꓲ ꓕꓲ ꓧꓪꓹ ꓬꓲ ꓖꓳ ꓓꓱ ꓗꓪ ꓟꓳꓸ ꓖꓶ ꓡ ꓟ ꓣꓳ ꓟꓳ ꓪ ꓡꓳ= ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓙꓵ ꓢꓯꓸ ꓔꓬ ꓫꓵ ꓡꓰ ꓥꓳ= ꓐꓹ ꓐ ꓪꓴ-ꓢ ꓐꓯ ꓔ ꓟ ꓡꓰ ꓐꓰ  ꓫꓱꓸ ꓤ ꓠꓲꓹ ꓙꓳ ꓢꓲ꓾ ꓣꓳ ꓟꓳ_ ꓟ ꓬꓲꓸ ꓚꓱꓹ ꓔꓯ ꓡꓶꓸ ꓗꓷ ꓥꓳ ꓐꓯ ꓠꓬ ꓕꓲ ꓒꓳꓹ ꓕꓲ ꓡꓯꓼ ꓗꓪ ꓐꓰ ꓢꓲꓹ ꓜꓲ ꓢꓲꓹ ꓪꓰ ꓔꓯ ꓠꓲꓹ ꓠꓵ ꓗꓴꓸ ꓡ ꓥꓳ=