ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓡꓳ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓐꓰ ꓠꓲꓽ ꓢ-ꓓꓯ ꓠꓬ ꓚꓵ ꓚꓵ ꓚꓰꓼ ꓢꓴ ꓪꓴ-ꓢ ꓟꓽ ꓙꓳ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= "ꓪꓴ-ꓢ ꓠꓬ ꓟꓽ ꓙꓳ꓾ ꓝꓮꓲ ꓚꓰꓼ ꓢꓴ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓡꓳ ꓐꓯ ꓟ ꓙꓵꓻ ꓟꓽ ꓠ ꓐꓰ ꓣꓳ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓢꓳꓚꓲꓮꓡ ꓟꓰꓓꓲꓮ ꓗꓪ ꓥˍ ꓟꓲ꓾ ꓮ ꓡꓲ ꓫꓵꓽ ꓗꓪ ꓥˍ ꓟꓲ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓟ ꓣꓳ ꓟꓳꓻ ꓪ ꓡꓳ=

ꓬꓲ ꓪ ꓠꓬ ꓮ ꓫꓵꓽ ꓔꓯ ꓖꓴ ꓢꓲ ꓠꓬꓲ ꓪꓴ-ꓢ ꓟꓽ ꓙꓳ꓾ ꓐꓯ ꓖꓶ ꓡˍ? ꓐꓯ ꓠꓬ꓾ ꓪꓴ-ꓢ ꓙꓳˍ ꓠꓽ ꓮ ꓫꓵꓽ ꓑꓶꓸ ꓓꓴ ꓟꓲ ꓠꓯ ꓕꓱ ꓟ ꓗꓪ ꓝꓴꓲꓸ ꓟꓽ ꓙꓳ ꓢꓴ  ꓮ ꓟꓬꓹ ꓫꓵꓻ ꓔꓬ ꓡ? ꓟꓵꓽ ꓓꓵˍ ꓟ ꓗꓪ ꓐꓰ꓾ ꓟꓯꓼ ꓓꓶꓽ ꓡꓯ ꓘꓳꓹˍ ꓟ ꓗꓪ ꓐꓰ꓾ ꓝꓮꓲ ꓟꓶꓽ ꓦ ꓜꓯꓼˍ ꓟ ꓗꓪ ꓐꓰ꓾ ꓡꓳꓽ ꓓꓳ ꓧꓳꓹ ꓟ ꓗꓪ ꓐꓰ꓾ ꓕꓱ ꓡꓱ ꓫꓵꓽ ꓙꓲ ꓣꓴꓽ ꓟꓬ ꓑꓬ ꓓꓴ ꓮ ꓟꓬꓹ ꓫꓵꓽ ꓗꓪ ꓐꓰ ꓞꓳ ꓤ ꓠꓬ ꓫꓵꓻ ꓔꓬ ꓡꓳ꓾ ꓐꓰ ꓣꓳ ꓔꓯ ꓖꓴ ꓟꓳꓸ ꓖꓶ ꓡˍ ꓥꓳ=

ꓝꓴꓲꓸ ꓟꓽ ꓙꓳ ꓟ ꓤ ꓠꓱ ꓤ ꓐꓴ꓾ ꓤ ꓠꓱ ꓙꓳ ꓢꓴ ꓤ ꓶꓻ ꓔꓬ ꓟ ꓮ ꓟ ꓐꓴ ꓫꓵꓻ ꓙꓰ ꓔꓬ ꓟ꓾ ꓝꓮꓲ ꓫꓵꓽ ꓪꓴꓻ ꓬꓲ ꓫꓵꓽ ꓬꓲ ꓙꓰꓽ ꓮ ꓟꓬꓹ ꓔꓯ ꓣꓳ ꓔꓯ ꓖꓴ ꓟꓸ ꓖꓶ ꓢꓲ ꓠꓬꓲ ꓪꓴ-ꓢ ꓠꓬ ꓟꓽ ꓙꓳ= ꓪꓴ-ꓢ ꓙꓳˍ ꓥ ꓡꓲꓸ ꓠꓽ ꓪꓴ-ꓢ ꓠꓬ ꓠꓵꓻ ꓠꓲꓹ ꓥꓳ ꓐꓯ ꓟ ꓠꓬ ꓬꓲ ꓖꓳꓽ ꓥꓳ꓾ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=ꓪꓴ-ꓢ ꓬꓲ ꓙꓲꓻˍ ꓟ ꓮ ꓙꓵꓽ ꓔꓯ ꓟꓽ ꓙꓲꓻ ꓟ ꓗꓪ ꓐꓰ ꓑꓲꓸ ꓗꓷ ꓢꓲ ꓠꓬꓲ ꓠꓲꓽ ꓢ-ꓓꓯ ꓬꓲ ꓚꓱꓹ ꓗꓪ ꓐꓰ ꓣꓳ ꓔꓯ ꓪꓴ-ꓢ ꓔꓯ ꓟꓳꓻˍ ꓟ ꓒꓬꓱꓽ ꓔꓯ ꓬꓲ ꓪ ꓡꓰ ꓑꓲꓸ ꓦ ꓗꓷˍ ꓟ ꓣꓳ ꓢꓷꓸ ꓪˍ ꓡꓳ=

ꓠꓲꓹ ꓫꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓜꓻ ꓚꓲꓸ ꓚꓲꓸ ꓧꓪꓽ ꓚꓲꓸ ꓚꓲꓸ ꓦꓬꓼ ꓠꓬꓲ ꓠꓽ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓬꓳ-ꓦ 3ꓽ14-21 ꓥ ꓡꓳ= ꓡꓲ ꓛꓲ ꓟꓵꓽ ꓗꓪ ꓟꓳ-ꓫꓲ ꓠꓬ ꓩꓴꓻ ꓐꓬꓱꓽ ꓫꓬꓹ ꓢꓲ ꓠꓬꓲ ꓩꓴꓻ ꓓꓽ ꓥꓳꓽ ꓫꓬꓹ ꓢꓲ ꓠꓬꓲ ꓕꓯꓽ ꓗꓷˍ ꓟ ꓡꓰ ꓐꓰ꓾ ꓖꓳ ꓟ ꓔꓯ ꓡꓳꓸ ꓢꓴ ꓚꓬꓴꓸ ꓟꓶˍ ꓟ ꓡꓰ ꓐꓰ ꓡ-ꓞꓳ-ꓮ-ꓐꓲ ꓔꓯ ꓥˍ ꓟꓲ ꓮ ꓟꓴ ꓟꓴ ꓕꓯꓽˍ ꓟ ꓟꓶˍ ꓥꓳ= ꓡ-ꓞꓳ-ꓮ-ꓟꓲ ꓔꓯ ꓟꓳꓻ ꓢꓴ꓾ ꓡ-ꓞꓳ-ꓮ-ꓐꓲ ꓔꓯ ꓡꓳꓸ ꓢꓴ ꓠꓬ ꓚꓬꓴꓸ ꓟꓶˍ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓖꓶ ꓡˍ ꓡꓳ=

ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓲ ꓤ ꓔꓲꓸ ꓖꓶ ꓗꓷˍ ꓗꓪ ꓛꓲ ꓠꓲꓹ ꓠꓵˍ ꓡꓳ ꓐꓰ ꓐꓯ ꓖꓶ ꓡˍ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ ꓣꓳ ꓓꓵꓽ ꓙ ꓓꓴ ꓠꓬ꓾ ꓟꓲ ꓠꓯ ꓕꓱ ꓟ ꓡꓰ ꓟꓳꓸ ꓖꓶ ꓡˍ ꓟ꓾ ꓠꓲꓽ ꓢ-ꓓꓯ ꓡꓰ ꓟꓳꓸ ꓖꓶ ꓡˍ ꓟ ꓫꓵꓽ ꓪꓴ ꓕꓱ ꓟ ꓔꓯ ꓣꓳ ꓡꓳꓸ ꓠꓬꓲˍ ꓡ? ꓪꓴ-ꓢ ꓡꓰ ꓟꓳꓸ ꓖꓶ ꓡˍ ꓟ ꓔꓯ ꓡꓳꓸ ꓠꓬꓲˍ ꓡ? ꓕꓱ ꓟ ꓠꓬ ꓠꓴ ꓢꓲꓺ ꓠ ꓗꓹ ꓡꓳ= 

ꓮ ꓠꓱ ꓕꓯ ꓮ ꓭꓸ ꓡꓳꓸ ꓟꓬꓱꓽ ꓬꓰ ꓔꓬ ꓢꓴ ꓡ ꓞꓳ ꓕꓲ ꓣꓳ ꓙꓳˍ ꓡꓳ= ꓬꓲ ꓠꓬ ꓠꓱꓸ ꓐꓯ ꓢꓴ ꓮ ꓭꓸ ꓡꓳꓸ ꓢꓲ ꓠꓬꓲ ꓮ ꓭꓸ ꓩꓴ ꓖꓳꓻ꓾ ꓮ ꓭꓸ ꓜꓽ ꓖꓶ ꓜꓽ ꓬꓰ ꓔꓬ ꓡꓳ= ꓕꓲ ꓠꓬꓲ ꓙꓳˍ ꓕꓯ ꓬꓲ ꓠꓬ ꓮ ꓭꓸ ꓕꓲ ꓟ ꓔꓯ ꓘꓴꓽ ꓢꓰꓼ ꓜꓽ ꓗꓷꓳ= ꓖꓳ ꓡꓱ ꓘꓴꓽ ꓢꓰꓼ ꓜꓽ ꓗꓷ ꓟ ꓔꓯ ꓬꓲ ꓛꓳꓽ ꓒꓯꓹ ꓐꓴ ꓟꓳꓻ ꓡꓰ ꓕꓯ ꓢꓷꓸ ꓡꓰ ꓕꓯ ꓬꓲ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓝꓳꓹ ꓝꓲꓹ ꓢꓲ ꓠꓬꓲ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓔꓬ ꓗꓪ ꓚꓳꓸ ꓒꓴ ꓣꓴˍ ꓡꓳ= ꓠꓴ ꓥꓪ ꓔꓯ ꓕꓱ ꓟ ꓖꓶ ꓡꓯ= ꓕꓱ ꓟ ꓟꓽ ꓖꓶ ꓕꓯ ꓠꓽ ꓠꓴ ꓮ ꓭꓸ ꓘꓴꓽ ꓢꓰꓼ ꓜꓽ ꓗꓷ ꓟ ꓥꓪ ꓡꓰ ꓬꓲ ꓢꓲ ꓒ ꓔꓯ ꓐꓯ ꓖꓶˍ ꓥꓳ꓾ ꓐꓰ ꓐꓯ ꓢꓲ ꓬꓲ ꓪ ꓠꓵꓻˍ ꓟ ꓔꓯ ꓣꓴˍ ꓡꓳ= ꓮ ꓭꓸ ꓘꓴꓽ ꓢꓰꓼ ꓢꓴ ꓥˍ ꓟꓲ ꓬꓲ ꓢꓲ ꓒ ꓔꓯ ꓬꓲ ꓪ ꓐꓯ ꓖꓶˍ ꓟ ꓔꓯ ꓙꓳꓺˍ ꓟ ꓑꓶꓸ ꓓꓴ ꓬꓲ ꓪ ꓠꓵꓻˍ ꓟ ꓔꓯ ꓖꓶˍ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓕꓲ ꓠꓬꓲꓹˍ ꓡꓰ ꓖꓳ ꓡꓱ ꓬꓰˍ ꓕꓯ ꓬꓲ ꓠꓬ ꓘꓽ ꓟꓽ ꓐ ꓡꓺꓳ= 

ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓠꓲꓹ ꓟ ꓘꓴꓽ ꓗꓪ ꓐꓰ ꓕꓱ ꓡꓱ ꓓꓵꓽ ꓙˍ ꓡꓳ= ꓥꓪ ꓠꓬ ꓥꓪ ꓬꓲ ꓢꓲ ꓒ ꓔꓬ ꓗꓪ ꓙꓰ ꓢꓲ ꓠꓬꓲ ꓥꓪ ꓝꓴꓲꓸ ꓔꓯ ꓥꓪ ꓣꓷꓠꓸ ꓙꓰˍ ꓥꓳ= ꓖꓳ ꓡꓱ ꓟꓽ ꓥ ꓠꓬ ꓥꓪ ꓘꓽ ꓔ ꓟꓽ ꓘꓴꓻꓳ ꓐꓰ ꓓꓵꓽ ꓙ ꓢꓲ ꓠꓬꓲ ꓬꓲ ꓠꓬ ꓬꓲ ꓝꓴꓲꓸ ꓔꓯ ꓐꓱ ꓢꓲ ꓒ ꓮ ꓭꓸ ꓢꓲ ꓒ ꓔꓬ ꓗꓪ ꓣꓷꓠꓸ ꓗꓷꓳ= ꓖꓳ ꓡꓱ ꓠꓬ ꓮ ꓭꓸ ꓢꓲ ꓒ ꓠꓬ ꓬꓲ ꓝꓴꓲꓸ ꓔꓯ ꓖꓼ ꓖꓶ ꓗꓷꓳ= ꓝꓮꓲ ꓕꓲ ꓠꓬꓲ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓝꓳꓹ ꓝꓲꓹ ꓡˍ ꓕꓯ ꓬꓲ ꓠꓬ ꓠꓴ ꓪ ꓓꓰꓽˍ ꓟ ꓥꓪ ꓟꓽ ꓖꓶꓽꓳ= ꓠꓴ ꓪ ꓐꓱ ꓢꓲ ꓒ ꓔꓯ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓕꓯ ꓙꓰ ꓢꓲ ꓐꓯ ꓟꓳꓸ ꓖꓶ ꓙꓰ= ꓥꓪ ꓠꓽ ꓮ ꓡꓲ ꓟꓽ ꓗꓹꓳ꓾ ꓐꓰ ꓐꓯ ꓖꓶˍ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓡꓱ ꓥ ꓡꓳ= ꓣꓳ ꓠꓬ ꓝꓴꓲꓸ ꓬꓰ ꓗꓷ ꓕꓯ ꓣꓳ ꓝꓴꓲꓸ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓔꓯ ꓝꓳꓹ ꓝꓲꓹ ꓡˍ ꓡꓳ= ꓝꓴꓲꓸ ꓬꓰˍ ꓕꓲ ꓝꓲꓸ ꓗꓪ ꓣꓳ ꓠꓬ ꓝꓳꓹ ꓝꓲꓹˍ ꓟ ꓟꓽ ꓘꓳ ꓗꓳꓸ ꓪ ꓥ ꓟꓲ꓾ ꓣꓳ ꓝꓴꓲꓸ ꓬꓰ ꓗꓷ ꓗ ꓠꓯꓸ ꓝꓴꓲꓸ ꓖꓳ ꓟ ꓠꓬ ꓣꓳ ꓔꓯ ꓕꓲ ꓠꓬꓲ ꓕꓲ ꓠꓬꓲ "ꓠꓴ ꓠꓬ ꓝꓴꓲꓸ ꓬꓰ ꓗꓷꓳ= ꓠꓴ ꓠꓬ ꓫꓵꓻˍ ꓥꓳ= ꓠꓴ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓛꓬ ꓗꓷꓳ꓾" ꓐꓯ ꓢꓲ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓣꓳ ꓔꓯ ꓫꓸ ꓙꓵꓻ ꓝꓲˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓮ ꓫꓵꓽ ꓬꓰ ꓠ ꓔ ꓡ? ꓐꓯ ꓠꓬ꓾ ꓣꓳ ꓝꓴꓲꓸ ꓔꓯ ꓟꓽ ꓡꓳꓸ ꓠꓬꓲ ꓠꓬꓲ ꓐꓰ ꓪꓴ-ꓢ ꓠꓵꓻ ꓠꓲꓹ ꓔꓯ ꓡꓳꓸ ꓠꓬꓲ ꓢꓲ ꓠꓬꓲ ꓪꓴ-ꓢ ꓛꓲ ꓔꓲ ꓗꓪ ꓙꓰ ꓠꓹ ꓟ ꓟ ꓬꓳꓸ ꓚꓲ ꓓꓰ ꓡꓰ ꓟ ꓥ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓡꓲ ꓫꓵꓽ ꓔꓯ ꓡꓳꓸ ꓠꓯꓹ ꓡ ꓐꓯ ꓟ ꓔꓲꓸ ꓢꓲꓽ ꓢꓲꓽ ꓡꓰꓽ ꓢꓷꓸ ꓠꓹ ꓟ ꓬꓳꓸ ꓚꓲˍ ꓡꓳ= ꓟꓲ ꓠꓯ ꓕꓱ ꓟ ꓡꓰ ꓣꓳ ꓔꓯ ꓟꓳꓸ ꓖꓶ ꓡˍ ꓟ꓾ ꓪꓴ-ꓢ ꓟꓽ ꓙꓳ ꓐꓯ ꓟ ꓒꓬꓱꓽ꓾ ꓪꓴ-ꓢ ꓙꓳˍ ꓥ ꓡꓰꓸ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓡꓳ ꓐꓯ ꓟ ꓠꓬ ꓟꓽ ꓥ꓾ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓡꓳ ꓐꓯ ꓟ ꓠꓬ ꓬꓲ ꓖꓳꓽ ꓥꓳ ꓐꓰ꓾ ꓟꓲ ꓠꓯ ꓕꓱ ꓟ ꓡꓰ ꓟꓳꓸ ꓖꓶˍ ꓟ ꓔꓯ ꓣꓳ ꓡꓳꓸ ꓠꓬꓲˍ ꓡ? ꓕꓱ ꓟ ꓠꓬ ꓣꓳ ꓢꓷꓸ ꓓꓴ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓖꓶ ꓗꓷˍ ꓗꓪ ꓛꓲ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓡꓳ ꓐꓰ ꓐꓯ ꓔ ꓡꓳ= ꓪꓴ-ꓢ ꓠꓬ ꓚꓵ ꓚꓵ ꓠꓵꓻ ꓠꓲꓹ ꓥ ꓡꓳ= ꓬꓲ ꓔꓯ ꓣꓳꓽ ꓠꓲꓹ ꓠꓵꓻ ꓡꓯ= ꓬꓲ ꓡꓰ ꓟꓳꓸ ꓖꓶ ꓡˍ ꓟ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓬꓲ ꓠꓵꓻ ꓠꓲꓹ ꓔꓯ ꓡꓳꓸ ꓟꓶ ꓠ ꓛꓲ ꓡꓳꓸ ꓡꓯ= ꓟꓲ ꓠꓯ ꓡꓰ ꓟꓳꓸ ꓖꓶ ꓡˍ ꓟ ꓫꓸ ꓙꓵ ꓟꓶ ꓙꓵ ꓓꓴ꓾ ꓟꓬ ꓐꓲ ꓞꓰ ꓓꓴ ꓔꓯ ꓡꓳꓸ ꓠꓬꓲ ꓢꓲ ꓠꓬꓲ ꓠꓲꓹ ꓟ ꓙꓬˍ ꓟ ꓟꓽ ꓥ ꓥ ꓪꓴ-ꓢ ꓡꓰ ꓟꓳꓸ ꓖꓶ ꓡˍ ꓟ ꓠꓵꓻ ꓠꓲꓹ ꓚꓲꓸ ꓛꓬ ꓤꓶꓻ ꓗꓪ ꓬꓲ ꓡꓰ ꓔ ꓙ ꓡˍ ꓟ ꓔꓯ ꓡꓳꓸ ꓢꓲ ꓠꓬꓲ ꓞꓳ ꓙꓳˍ  ꓠꓬ ꓣꓳ ꓬꓰ ꓗꓷ ꓟ ꓝꓴꓲꓸ ꓥˍ ꓟꓲ ꓣꓳ ꓔꓯ ꓟꓽ ꓝꓳꓹ ꓝꓲꓹ ꓡꓺꓳ= ꓪꓴ-ꓢ ꓔꓯ ꓡꓳꓸ ꓠꓬꓲ ꓢꓲ ꓡꓰꓽ ꓞꓳ ꓙꓳ= ꓖꓳ ꓡꓱ ꓠꓬ ꓪꓴ-ꓢ ꓠꓵꓻ ꓠꓲꓹ ꓣꓳ ꓟꓶ ꓡˍ ꓥꓳ=