ꓬꓰ‐ꓢꓴ ꓟꓲ ꓠꓯ ꓗꓪ ꓡ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓟꓶ ꓡꓰ ꓠ, ꓟ ꓥ ꓡꓳ꓿ 4th Sunday of Lent

ꓬꓰ‐ꓢꓴ  ꓟꓲ ꓠꓯ ꓗꓪ ꓡ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓟꓶ ꓡꓰ ꓠ, ꓟ  ꓥ ꓡꓳ꓿ (4th Sunday of Lent reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓼ ꓘꓳꓼ ꓠꓯ, ꓗꓪ ꓐꓰ ꓡꓲꓽ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ (3ꓽ14‐21) ꓝꓲ ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓗꓪ ꓬꓲ ꓡ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓟꓴ ꓘꓶꓽ ꓠ,ꓟ ꓟꓽ ꓥ ꓐꓰ ꓬꓲ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵ ꓔꓯ ꓚꓬꓴ ꓠ, ꓟ ꓡ ꓟ ꓥ ꓟ ꓔꓯ ꓐꓯ ꓔ ꓟ ꓥ ꓡꓳ꓿

ꓡꓯ ꓐꓳ ꓔꓶ ꓓꓴ ꓢꓲꓺ ꓒ ꓬꓰ‐ꓢꓴ ꓣꓳ ꓝꓴꓲ ꓐꓱ ꓶ ꓫꓵꓻ ꓙ ꓗꓷ ꓟ ꓠꓬ ꓣꓳ ꓮ ꓙꓵꓽ ꓢꓴ ꓔꓯ ꓪꓴ‐ꓢ ꓠꓬ ꓮ ꓘꓶ. ꓛꓲ ꓠꓲ, ꓠꓵ ꓟ ꓚꓱ, ꓔꓯ ꓟ. ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ ꓠꓬꓲ ꓠꓵ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓣꓳ ꓐꓱ ꓶ ꓡꓯ ꓐꓳ ꓔꓶ ꓓꓴ ꓗꓪ ꓫꓵꓻ ꓙ ꓗꓷ ꓟ ꓠꓵꓻ ꓠꓲ, ꓠꓯ ꓗꓪ ꓣꓳ ꓔꓯ ꓢꓯ. ꓔꓬ ꓟ ꓠ, ꓟ ꓟ. ꓖꓶ ꓔꓬ ꓟ ꓥ ꓡꓳ꓿ ꓬꓲ ꓠꓬ ꓣꓳ ꓔꓯ ꓐꓯ ꓟꓵꓽ ꓟꓽ ꓘꓶꓽ꓿ ꓣꓳ ꓚꓲ. ꓛꓬ ꓡꓰ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓡꓰ ꓐꓯ ꓟꓴ ꓘꓶꓽ ꓔꓬ ꓟ ꓥ ꓡꓳ꓿ ꓣꓳ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓔꓯ ꓓꓴ ꓙ ꓫ. ꓔꓬ ꓟ ꓥ ꓡꓳ꓿ 

ꓜ ꓚꓲ. ꓚꓲ. ꓟ ꓙꓵ, ꓗꓪ ꓣꓳ ꓠꓯ, ꓗꓪ ꓟꓽ ꓙꓲ ꓟ ꓫꓶꓽ ꓐꓰ ꓟꓽ ꓙꓲ ꓟ ꓟꓬꓱꓽ ꓮ ꓙꓵꓽ ꓔꓯ ꓡꓳ ꓗꓷ ꓐ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓪꓴ‐ꓢ ꓐꓰ ꓮ ꓕꓯ ꓥ ꓟꓲ ꓙ ꓡꓯꓽ ꓘꓳ ꓠ, ꓟ ꓬꓲ ꓙꓵ, ꓖꓶ ꓓꓴ ꓬꓰ ꓡꓯ꓿ ꓟꓽ ꓙꓲ ꓟ ꓮ ꓙꓵꓽ ꓔꓯ ꓡꓳ ꓗꓷ ꓒꓬ ꓩꓴ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓮ ꓟꓬ, ꓛꓲ ꓫ. ꓓꓴ ꓟꓶ ꓓꓴ ꓔꓳ, ꓜꓳ ꓢꓲ ꓠꓬꓲ ꓡꓯ ꓐꓳ ꓔꓶ ꓓꓴ ꓗꓪ ꓫꓵꓻ ꓙ ꓗꓷ ꓟ ꓔꓯ ꓓꓵ ꓙ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓵꓻ ꓠꓲ, ꓔꓯ ꓣꓱ ꓢꓲ ꓠꓬꓲ ꓙꓲ ꓟ ꓮ ꓟꓬ, ꓬꓰ ꓓꓴ ꓬꓰ ꓡꓯ꓿ ꓝꓴꓲ ꓠꓯ, ꓗꓪ ꓓꓵ ꓡꓰ ꓗꓴ ꓟ ꓙ ꓖꓴ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓣꓳ ꓟꓬ, ꓢꓶꓽ ꓔꓯ ꓮ ꓕꓯ ꓥ ꓟꓲ ꓪꓴ‐ꓢ ꓔꓯ ꓚꓳ ꓠ, ꓟ ꓡꓳ. ꓠ, ꓟ ꓢꓯꓼ ꓕꓵꓼ ꓬꓰ ꓡꓯ꓿ ꓫ. ꓟꓳ ꓪ꓿