ꓬꓰ-ꓢꓴ ꓫꓵꓻ ꓠꓹ ꓟ ꓐꓯ ꓟꓸ ꓖꓶˍ ꓟ (ꓶꓼ ꓓꓳꓽ ꓫꓱꓹ ꓓꓳꓽ)

ꓢꓲ ꓒ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓧꓪꓸ ꓧꓪꓸꓼ꓾

ꓣꓳ ꓟꓲ ꓠꓯ ꓞꓳ ꓤ ꓐꓯ ꓟ ꓠꓬ ꓫꓵꓻˍ ꓟ ꓔꓯ ꓮꓽ ꓟˍ ꓟꓲ ꓙꓳꓺˍ ꓡꓳ=ꓫꓵꓻ ꓟ ꓔꓯ ꓟꓽ ꓙꓳꓺ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓠꓲꓹ ꓟ ꓠꓯꓸꓼ ꓗꓪ ꓐ ꓡˍ ꓕ ꓑꓳꓸꓼ ꓢꓯꓸ ꓔꓬ ꓠꓲꓹ ꓫꓵˍ ꓟ꓾ ꓢꓯꓼ ꓟꓬ ꓝꓸ ꓠꓲꓹ ꓫꓵˍ ꓟ ꓠꓲꓹ ꓟ ꓠꓬ ꓡ ꓞꓳ ꓥ ꓕ ꓑꓳꓸꓼ ꓟ ꓠꓲꓹ ꓟ ꓮ ꓠꓯꓸ ꓠꓯꓸ ꓗꓪ ꓓꓵˍ ꓟ ꓠꓲꓹ ꓡꓶꓽ ꓕꓲ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ꓾ ꓢꓲ ꓒ ꓬꓰ-ꓢꓴ ꓔꓯ ꓟꓶ ꓢꓴ ꓠꓬ ꓫꓵꓻ ꓓꓴꓽ ꓔꓯ ꓮ ꓡꓲ ꓐꓰ ꓠꓲꓹ ꓟ ꓗꓷ ꓔ ꓠꓯꓹ ꓡ꓾ ꓐꓯ ꓟ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ=

ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ ꓠꓯ ꓠꓬ ꓜꓻ ꓚꓲꓸ ꓚꓲꓸ ꓧꓪꓽ ꓚꓲꓸ ꓚꓲꓸ ꓦꓬꓼ ꓠꓬꓲ ꓗꓪ ꓥꓪꓽ ꓠꓽ ꓕꓲ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ= ꓢꓯꓸ ꓬꓲꓼ ꓡ ꓑꓮꓲꓽ ꓛꓲ ꓡ ꓟ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓫꓸ ꓙꓵˍ ꓟ꓾ ꓬꓲ ꓠꓬ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓡꓯꓽ ꓒꓯꓹ ꓗꓪ ꓫꓵˍ ꓟ ꓔꓯ ꓬꓲ ꓠꓬ ꓟꓽ ꓠꓽ ꓠꓽ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓫꓵꓻˍ ꓟ ꓔꓯ ꓬꓲ ꓠꓬ ꓠꓲꓹ ꓟ ꓮ ꓡꓲ ꓗꓷ ꓔ ꓡ꓾ ꓐꓯ ꓟ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓬꓳ-ꓦ ꓶꓼ ꓓꓳꓽ ꓫꓱꓹ ꓓꓳꓽ ꓕꓳꓽ ꓶ 12ꓽ20-33 ꓗꓪ ꓣꓳ ꓑ ꓙꓽˍ ꓡꓳ=

ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ꓾ ꓬꓲ ꓠꓬ ꓫꓵꓻˍ ꓥꓳ= ꓥꓪ ꓠꓬ ꓙꓵꓽ ꓗ ꓟꓸ ꓒ ꓐꓰ ꓒ-ꓡꓲ-ꓢꓷ ꓐꓴ ꓡꓯꓽ ꓒꓯꓹ ꓗꓪ ꓫꓵꓻˍ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓥꓪ ꓠꓬ ꓕꓱ ꓟ ꓐꓱ ꓶ ꓛꓲ ꓡˍ ꓡꓳ ꓐꓰ ꓬꓲ ꓡꓰ ꓐꓯ ꓡꓳ= ꓐ ꓡ ꓥꓳ ꓐꓯ ꓠꓬ ꓡꓴꓻ ꓗꓶꓸ ꓕꓱ ꓟ ꓔꓯ ꓬꓲ ꓐꓹ ꓐ ꓗꓪ ꓐꓰ ꓡꓵꓸ ꓖꓶ ꓠꓹ ꓟ ꓐꓱ ꓶ ꓬꓲ ꓠꓲꓹ ꓡꓶꓽ ꓙꓳˍ ꓡꓳ ꓐꓰ ꓪꓽ ꓘꓴ ꓠꓯꓹ ꓡ ꓐꓯ ꓢꓲ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓠ ꓠꓬꓲˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓕꓱ ꓟ ꓐꓱ ꓶ ꓬꓯꓼ ꓡˍ ꓐꓰ ꓐꓯꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓥ ꓕꓯ ꓠꓬ꓾ ꓫꓵꓻ ꓓꓴꓽ ꓐꓯ ꓟ ꓔꓯ ꓪꓴ-ꓢ ꓔꓯ ꓟꓽ ꓙꓵꓻ ꓢꓴ ꓓꓵꓽ ꓙˍ ꓟ ꓡꓰ ꓐꓰ ꓫꓵꓻ ꓟꓲ ꓠꓯ ꓞꓳ ꓤ ꓙꓳꓺ ꓠꓯꓹ ꓟ ꓫꓵꓻ ꓓꓴꓽ ꓥ ꓐꓰ ꓟꓽ ꓓꓵꓽ ꓙꓽ ꓠꓹ ꓟ ꓬꓳꓸ ꓚꓵˍ ꓡꓳ= ꓮ ꓡꓲꓳ ꓐꓯ ꓠꓬ ꓙꓵꓻ ꓠꓲꓹ ꓟꓶ ꓢꓴ ꓐꓱ ꓶ꓾ ꓢꓲ ꓒ ꓬꓰ-ꓢꓴ ꓔꓯ ꓟꓶ ꓢꓴ ꓐꓱ ꓶ ꓠꓬ ꓫꓵꓻˍ ꓐꓰ ꓐꓯ ꓟ ꓠꓬ ꓕꓲ ꓞꓲꓼ ꓦꓻ ꓫꓵꓻˍ ꓟ ꓟꓽ ꓥ= ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓫꓵꓻˍ ꓟ ꓥ ꓡꓳ= ꓟꓽ ꓫꓵꓻ ꓠꓬ ꓢꓯꓼ ꓟꓬ ꓟꓶ ꓟꓽ ꓓꓻ= ꓕꓱ ꓟ ꓠꓬ ꓣꓳ ꓐꓱ ꓶ ꓗꓹ ꓛꓲꓽ ꓓꓴ ꓥ ꓡꓳ=

ꓢꓲ ꓒ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓡꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓫꓪ ꓢꓶꓽ ꓠꓬ ꓟꓽ ꓫꓵꓻ ꓕꓯ ꓠꓽ ꓬꓲ ꓜꓲ ꓣꓱꓻ ꓡ ꓟꓽ ꓓꓻ= ꓬꓲ ꓫꓵꓸ ꓖꓳ ꓟ ꓠꓬ ꓫꓵꓻ ꓠ ꓗꓹ ꓡꓳ= ꓟꓲ ꓛꓬ ꓠꓯꓸꓼ ꓗꓪ ꓟꓶꓽ ꓦ ꓜꓯꓼˍ ꓟ ꓗꓪ ꓐꓰ ꓟꓲ ꓠꓯ ꓗꓪ ꓫꓵꓻˍ ꓕꓯ ꓬꓲ ꓠꓬ ꓬꓲ ꓜꓲ ꓣꓱꓻ ꓡˍ ꓡꓳ꓾ ꓬꓲ ꓢꓶꓽ ꓓꓱꓼ ꓡˍ ꓡꓳ꓾ ꓐꓰ ꓐꓯ ꓡꓳ= ꓕꓱ ꓟˍ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓫꓵꓻˍ ꓟ ꓗꓪ ꓐꓰ ꓞꓳ ꓤ ꓠꓬ ꓢꓯꓼ ꓟꓬ ꓝꓸ ꓟꓶˍ ꓡꓳ꓾ ꓐꓰ ꓐꓯˍ ꓡꓳ=

ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓟ ꓠꓬ꓾ ꓫꓵꓻ ꓓꓴꓽ ꓐꓯ ꓟ ꓠꓬ ꓣꓳ ꓐꓱ ꓶ ꓓꓵꓽ ꓙ ꓮ' ꓓꓴ ꓟꓽ ꓥ= ꓮꓽ ꓟ ꓥˍ ꓟꓲ ꓔꓳꓹ ꓜꓳꓽ ꓠ ꓔ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓫꓵꓻ ꓓꓴꓽ ꓖꓳ ꓟ ꓟꓽ ꓐꓲ ꓜꓲꓼ ꓕꓯ ꓡꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓲꓹ ꓫꓵˍ ꓐꓯ ꓠꓬ ꓚꓲꓸ ꓛꓬ ꓚꓳ ꓚꓲꓸ ꓛꓬ ꓫꓵꓻ ꓠꓹ ꓟ ꓬꓳꓸ ꓚꓵˍ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= 

ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓮ ꓡꓲ ꓐꓰ ꓫꓵꓻˍ ꓡ= ꓣꓳ ꓠꓲꓹ ꓟ ꓮ ꓘꓶꓸ ꓦꓶ ꓗꓴꓸ ꓢꓴ ꓥ ꓠꓬ ꓣꓳ ꓠꓲꓹ ꓟ ꓦꓶˍ ꓟ ꓔꓯ ꓫꓵꓻ ꓡꓰ ꓝꓲ ꓠꓹ ꓟ꓾ ꓣꓳ ꓠꓬ ꓦꓯꓸ ꓠꓲꓹ ꓙꓵꓽ ꓢꓴ ꓥ ꓕꓯ ꓠꓽ ꓦꓯꓸ ꓠꓲꓹ ꓮ ꓘꓶꓸ ꓙꓵꓽˍ ꓟ ꓔꓯ ꓫꓵꓻ ꓝꓲ ꓠꓹ ꓟ꓾ ꓝꓮꓲ ꓮ ꓘꓶꓸ ꓐꓴ ꓢꓴ ꓕꓲ ꓣꓳ ꓥ ꓕꓯ ꓐꓴˍ ꓟ ꓖꓳ ꓟ ꓔꓯ ꓫꓵꓻ ꓝꓲ ꓠꓹ ꓟ꓾ ꓚꓲꓸ ꓛꓬ ꓚꓳ ꓚꓲꓸ ꓛꓬ ꓓꓻˍ ꓡꓳ ꓪꓽ ꓠꓬꓲˍ ꓡꓳ ꓐꓯ ꓟ ꓘꓶꓽ ꓘꓹ ꓠꓲꓹ ꓫꓵˍ ꓟ ꓠꓲꓹ ꓟ ꓕꓱ ꓟ ꓔꓯ ꓥ ꓟꓲ ꓫꓵꓻ ꓝꓲ ꓠꓹ ꓟ꓾ ꓕꓱ ꓡꓱ ꓣꓳ ꓢꓯꓸ ꓔꓬ ꓕꓯ ꓡꓰ ꓟꓽ ꓙꓲꓻ ꓟ ꓣꓳ ꓠꓲꓹ ꓟ ꓔꓯ ꓫꓵꓻ ꓝꓲ ꓠꓹ ꓟ ꓬꓰˍ ꓕꓯ ꓚꓵ ꓚꓵ ꓣꓳ ꓧꓪꓽ ꓖꓳ ꓓꓱꓽ ꓫꓵꓻˍ ꓕꓯ ꓣꓳ ꓐꓱ ꓶ ꓙꓳꓺ ꓓꓴ ꓟꓽ ꓥꓺꓳ= ꓣꓳ ꓐꓱ ꓶ ꓗꓹ ꓛꓲꓽ ꓓꓴ ꓥꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ ꓐꓯ ꓠꓬ ꓣꓳ ꓢꓯꓸ ꓔꓬ ꓟ ꓦꓬꓼ ꓠꓬꓲ ꓕꓯ ꓡꓰ ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓣꓳ ꓠꓲꓹ ꓟ ꓟꓽ ꓙꓲꓻ ꓟ ꓔꓯ ꓫꓵꓻ ꓝꓲ ꓐ ꓡˍ ꓟ ꓑꓶꓸ ꓓꓴ꓾ ꓣꓳ ꓫꓵꓻˍ ꓕꓯ ꓥˍ ꓟꓲ ꓗꓹ ꓛꓲꓽˍ ꓥꓳ=  

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓢꓴ꓾ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓛꓳˍ ꓙꓰ ꓢꓴ꓾ ꓢꓲ ꓒ ꓬꓰ-ꓢꓴ ꓔꓯ ꓙꓰ ꓢꓴ ꓠꓬ ꓣꓳ ꓟꓸ ꓒ꓾ ꓣꓳ ꓪꓴ-ꓢ꓾ ꓣꓳ ꓢꓲ ꓒ ꓥ ꓟ ꓢꓲ ꓒ ꓬꓰ-ꓢꓴ ꓬꓲ ꓛꓲ ꓓꓴ ꓚ ꓠꓹ ꓟ ꓬꓳꓸ ꓚꓵ ꓓꓰ ꓡꓰ ꓟ ꓥ ꓡꓳ= ꓬꓲ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓠꓬꓲ ꓗ-ꓡ-ꓪ-ꓣꓲ ꓪ ꓚꓲ ꓗꓪ ꓙꓰ ꓠꓹ ꓟ ꓥꓳ= ꓕꓱ ꓟ ꓐꓱ ꓶ ꓬꓲ ꓬꓯꓼ ꓡˍ ꓡꓳ ꓐꓯ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓮ ꓡꓲ ꓗꓪ ꓚꓳꓸ ꓡˍ ꓥ꓾ ꓮ ꓡꓲ ꓗꓪ ꓙꓰ ꓔꓬ ꓥ꓾ ꓔꓲ ꓔꓲ ꓢꓲꓽ ꓢꓲꓽ ꓡꓰꓽ ꓢꓷꓸˍ ꓡꓳ= ꓠꓬꓲꓸ ꓠꓬꓲ ꓠꓴ ꓥꓪ ꓮ ꓡꓲ ꓗꓪ ꓚꓳꓸ ꓡˍ꓾ ꓮ ꓡꓲ ꓗꓪ ꓙꓰ ꓠꓹ ꓟ ꓔꓯ ꓢꓷꓸ ꓠꓹ ꓟ ꓬꓳꓸ ꓚꓵˍ ꓡꓳ=

ꓣꓳ ꓠꓬ ꓪꓴ-ꓢ ꓔꓬ ꓗꓪ ꓐꓰ ꓡ ꓢꓲ꓾ ꓪꓴ-ꓢ ꓔꓬ ꓗꓪ ꓙꓰ ꓔꓬ ꓡꓳ꓾ ꓐꓯ ꓟ ꓔꓯ ꓓꓵꓽ ꓙ ꓢꓲ ꓠꓬꓲ꓾ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓫꓵꓻ ꓝꓲ ꓠꓹ ꓟ꓾ ꓚꓲꓸ ꓛꓬ ꓟꓽ ꓔꓱꓹ ꓟ ꓠꓲꓹ ꓟ꓾ ꓟꓽ ꓙꓲꓻ ꓟ ꓠꓲꓹ ꓟ꓾ ꓘꓶꓽ ꓘꓹ ꓟ ꓠꓲꓹ ꓟ꓾ ꓐꓴˍ ꓟ ꓠꓲꓹ ꓟ꓾ ꓦꓯꓸ ꓠꓲꓹ ꓙꓵꓽˍ ꓟ ꓠꓲꓹ ꓟ꓾ ꓟꓽ ꓔꓱꓹ ꓟꓽ ꓜꓳꓽ ꓟ ꓠꓲꓹ ꓟ꓾ ꓕꓱ ꓡꓱ ꓫꓵꓽ ꓠꓲꓹ ꓟ ꓫꓵꓻ ꓝꓲ ꓐ ꓡˍ ꓥꓳ꓾ ꓣꓳ ꓧꓪꓽ ꓖꓳ ꓓꓱꓽ ꓡꓳꓹ ꓬꓰˍ ꓟ ꓕꓲ ꓠꓬꓲ ꓗꓪ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓐꓲꓻ ꓐꓲꓻ ꓡꓰꓽ꓾ ꓗꓹ ꓛꓲꓽ ꓛꓲꓽ ꓡꓰꓽ ꓐꓽ ꓧꓷꓼ ꓐꓰ ꓙꓰ ꓐ ꓡ ꓠꓹ ꓟ ꓣꓱꓽ ꓛꓰꓽ ꓣꓳ ꓟꓶ ꓡˍ ꓥꓳ= ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓪꓴ-ꓢ ꓔꓯ ꓙꓵꓻ ꓢꓴ ꓠꓬ꓾ ꓢꓲ ꓒ ꓔꓯ ꓙꓵꓻ ꓢꓴ ꓠꓬ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓠꓯꓹ ꓡꓳ ꓐꓯ ꓟ ꓢꓲ ꓒ ꓬꓰ-ꓢꓴ ꓐꓯ ꓔ ꓟ ꓐꓯ ꓘꓶꓽ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓢꓲ ꓠꓬꓲ ꓛꓳ ꓫꓱꓽ ꓙꓰ ꓡꓯ=