ꓢꓲꓺ ꓒ ꓬꓰ‐ꓢꓴ ꓙꓱ‐ꓣꓴ‐ꓢ‐ꓡꓱ ꓗꓪ ꓡ ꓟ ꓙꓵ, ꓕꓯ ꓑ ꓫꓬ ꓐꓴ ꓬꓲ ꓔꓯ ꓢꓲ ꓐꓴ ꓓꓯ ꓢꓲ ꓘꓳ, ꓣꓴ ꓟ ꓑꓮꓲꓽ (Palm Sunday)

ꓢꓲꓺ ꓒ ꓬꓰ‐ꓢꓴ ꓙꓱ‐ꓣꓴ‐ꓢ‐ꓡꓱ ꓗꓪ ꓡ ꓟ ꓙꓵ, ꓕꓯ ꓑ ꓫꓬ ꓐꓴ ꓬꓲ ꓔꓯ ꓢꓲ ꓐꓴ ꓓꓯ ꓢꓲ ꓘꓳ, ꓣꓴ ꓟ ꓑꓮꓲꓽ (Palm Sunday Reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓙꓱ‐ꓣꓴ‐ꓢ‐ꓡꓱ ꓗꓪ ꓡ ꓟ ꓙꓵ, ꓕꓯ ꓑ ꓫꓬ ꓐꓴ ꓬꓲ ꓔꓯ ꓢꓲ ꓐꓴ ꓓꓯ ꓢꓲ ꓘꓳ, ꓣꓴ ꓟ ꓑꓮꓲꓽ (ꓑꓮꓡꓟ ꓢꓴꓠꓓꓮꓬ) ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ (ꓟ‐ꓘꓳ14ꓽ1‐15ꓽ 47) ꓝꓲ ꓥ ꓛꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓡ ꓟ ꓙꓵ, ꓕꓯ ꓪ ꓔꓲ ꓕꓲ ꓣꓳ ꓡꓰ ꓐꓰ ꓬꓲ ꓔꓯ ꓘꓳ, ꓣꓴ ꓗꓷ ꓟ ꓥ ꓡꓳ꓿ ꓪ ꓔꓲ ꓐꓯ ꓟ ꓠꓬ ꓬꓲ ꓝꓲ ꓓꓴ ꓐꓴ ꓮ ꓟꓬ, ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓔꓳꓼ ꓡ ꓮ ꓟꓳ ꓔꓯ ꓓꓰꓽ ꓝꓲ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ ꓡꓰ ꓐꓰ ꓬꓲ ꓝꓲ ꓓꓴ ꓐꓴ ꓥ ꓟꓲ ꓬꓰ ꓟ ꓥ ꓡꓳ꓿ ꓠꓴ ꓥꓪ ꓥ  ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓪ ꓔꓲ ꓕꓲ ꓣꓳ ꓡꓰ ꓐꓰ ꓘꓳ, ꓣꓴ ꓙꓵꓻ ꓗꓷ ꓡ? ꓝꓮꓲ ꓪ ꓔꓲ ꓕꓲ ꓣꓳ ꓡꓰ ꓐꓰ ꓘꓳ, ꓣꓴ ꓗꓷ ꓡ ꓣꓳ ꓓꓵ ꓙ ꓠ, ꓟ ꓥ ꓡꓳ꓿ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓪ ꓔꓲ ꓕꓲ ꓣꓳ ꓡꓰ ꓐꓰ ꓘꓳ, ꓣꓴ ꓗꓷ ꓠꓬ ꓬꓲ ꓡꓰ ꓣꓳ ꓔꓯ ꓬꓰ ꓙ ꓟ ꓮ ꓙꓵꓽ ꓔꓯ ꓬꓰ ꓠ, ꓟ ꓥ ꓡꓳ꓿ 

ꓙꓲ‐ꓢꓴ ꓢꓲꓺ ꓤ ꓐꓯ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓗ. ꓠꓯ, ꓢꓲ ꓗꓪ ꓛꓳꓽ ꓢꓴ ꓐꓴ ꓔꓯ ꓖꓶ ꓟ ꓟꓬꓱꓺ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓔꓯꓺ ꓢꓳ ꓢꓲ ꓠꓬꓲ ꓞꓳ ꓫꓱ, ꓢꓴ ꓐꓴ꓾ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓟ. ꓟꓲ ꓔꓯ ꓛꓳ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓣꓳ ꓚꓵ. ꓟ ꓥ ꓡꓳ꓿ ꓣꓳ ꓢꓯ. ꓔꓬ ꓟ ꓤꓶꓻ ꓗꓪ ꓞꓳ ꓙꓳ ꓢꓯ. ꓔꓬ ꓠ, ꓟ ꓢꓲꓺ ꓒ ꓬꓰ‐ꓢꓴ ꓔꓯ ꓪ ꓔꓲ ꓕꓲ ꓣꓳ ꓡꓰ ꓐꓰ ꓝꓮꓲ ꓢꓲꓺ ꓒ ꓕꓲ ꓣꓳ ꓡꓰ ꓐꓰ ꓘꓳ, ꓣꓴ ꓢꓲ ꓠꓬꓲ ꓢꓯ. ꓔꓬ ꓕꓯ ꓢꓲ ꓠꓬꓲ ꓠꓬ ꓮ ꓫꓵꓽ ꓫ. ꓓꓴ ꓔꓳ, ꓜꓳ ꓡ ꓥ ꓟꓲ ꓧꓪ, ꓡꓰ ꓓ ꓢꓴ ꓒꓬꓱꓼ ꓡ ꓟ ꓥ ꓡꓳ꓿

ꓣꓳ ꓠꓬ ꓙꓲ‐ꓢꓴ ꓢꓲꓺ ꓤ ꓟꓬꓱꓽ ꓔꓯ ꓘꓳ, ꓣꓴ ꓔ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓡꓰ ꓐꓰ ꓟꓽ ꓢꓯ. ꓔꓬ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓓꓵ ꓙ ꓗꓷ ꓟ ꓦ ꓦ ꓟꓴ ꓟꓴ ꓡꓰ ꓢꓯ. ꓔꓬ ꓗꓷ ꓙꓵ, ꓮ ꓟꓬ, ꓙꓳ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓠꓬ ꓝꓴꓲ ꓠꓯ, ꓗꓪ ꓦꓵꓻ ꓗꓷ ꓟ ꓟꓲ ꓠꓯ ꓡ ꓞꓳ ꓥ ꓟ ꓑꓶ. ꓓꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓪ ꓔꓲ ꓕꓲ ꓣꓳ ꓡꓰ ꓘꓳ, ꓣꓴ ꓠ, ꓟ ꓟꓽ ꓓꓵ ꓙ ꓬꓲ ꓔꓯ ꓟꓽ ꓙꓵꓻ ꓢꓴ ꓐꓴ ꓥ ꓟꓲ ꓙꓳ ꓟ ꓥ ꓡꓳ꓿ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓥ ꓟꓲ ꓝꓲ ꓓꓴ ꓒꓲ‐ꓕꓱ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓢꓷ ꓐꓰ ꓐꓯ ꓗꓷ ꓟ ꓡꓳ ꓗꓷ ꓟ ꓙꓵ, ꓙꓳ ꓟ ꓥ ꓡ ꓳ꓿ ꓢꓲꓺ ꓒ ꓬꓰ‐ꓢꓴ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ ꓓꓴ ꓥꓳ ꓐꓰ ꓐꓯ ꓟ ꓝꓲ ꓓꓴ ꓒꓲ‐ꓕꓱ ꓠꓬ ꓣꓳ‐ꓟ ꓟꓯ ꓐꓴ ꓡꓰ ꓬꓲ ꓔꓯ ꓣꓴ ꓔꓯ ꓙꓰ ꓟ ꓔꓯ ꓙꓳꓺ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓢꓽ ꓧꓪ ꓟꓽ ꓢꓷ. ꓐꓰ ꓐꓯ ꓗꓷ ꓟ ꓥ ꓡꓳ꓿

ꓠꓴ ꓥꓪ ꓥ ꓟꓲ ꓝꓲ ꓓꓴ ꓒꓲ‐ꓕꓱ ꓬꓲ ꓚꓵ ꓕꓲ ꓒ ꓤ ꓓꓵ ꓙ ꓠꓬꓲ ꓡꓯ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓠ, ꓟ ꓜ ꓓꓴ ꓓꓳꓻ ꓓꓴ ꓖꓪꓽ ꓓꓵ ꓐꓱ ꓶ ꓡꓰ ꓟꓬꓱꓽ ꓬꓰ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓟꓲ ꓗꓷ ꓟ ꓬꓲ ꓙꓵ, ꓮ ꓟꓬ, ꓙꓳ ꓟ ꓥ ꓡꓳ꓿ꓬꓲ ꓔ    ꓐꓠꓯ ꓟꓽ ꓢꓷ. ꓐꓰ ꓐꓯ ꓗꓷ ꓟ ꓙꓵ, ꓮ ꓟꓬ, ꓙꓳ ꓟ ꓥ ꓡꓳ꓿ ꓣꓳ ꓠꓬ ꓣꓳ ꓢꓷ. ꓢꓴ ꓐꓴ ꓔꓯ ꓬꓰ ꓙ ꓥ ꓟꓲ ꓪꓴ‐ꓢ ꓠꓲ, ꓒꓴ ꓟ ꓪꓴ‐ꓢ ꓟꓬꓱꓽ ꓗꓪ ꓬꓰ ꓙ ꓔꓳ, ꓙ ꓟ ꓟꓬꓱꓽ ꓟꓽ ꓬꓰ ꓗꓷ ꓟ ꓮ ꓟꓬ, ꓙꓳ ꓗꓷ ꓡ ꓣꓳ ꓓꓵ ꓙ ꓠ, ꓟ ꓥ ꓡꓳ꓿  ꓣꓳ ꓠꓬ ꓟꓲ ꓠꓯ ꓡ ꓞꓳ ꓥ ꓟ ꓪꓴ. ꓠꓬꓲ ꓣꓳ ꓔꓯ ꓬꓲ ꓔꓶ. ꓖꓶ ꓡ ꓠ, ꓟ ꓪꓴ‐ꓢ ꓔꓯ ꓟꓲ ꓗꓷ ꓟ ꓙꓵ, ꓪꓴ‐ꓢ ꓔꓯ ꓟꓽ ꓓꓴ ꓙ ꓗꓷ ꓟ ꓙꓵ, ꓮ ꓟꓬ, ꓙꓳ ꓗꓷ ꓟ ꓥ ꓡꓳ꓿

ꓣꓳ ꓥꓳꓽ ꓡꓰ ꓛꓬ ꓡꓰ ꓟ ꓔꓯ ꓓꓵ ꓙ  ꓠ, ꓟ ꓬꓲ ꓙꓵ, ꓥ ꓡꓳ꓿ꓠꓬꓲ. ꓠꓬꓲ ꓗꓪ ꓐꓰ ꓪꓴ. ꓓꓵ ꓢꓲ ꓠꓬꓲ ꓝꓴꓲ ꓠꓯ, ꓗꓪ ꓓꓵ ꓡꓰ ꓟ ꓚꓱ, ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓣꓳ ꓝꓴꓲ ꓐꓱ ꓶ ꓮ ꓟꓬ, ꓛꓲ ꓫ. ꓓꓴ ꓔꓳ, ꓜꓳ ꓢꓲ ꓠꓬꓲ ꓫꓵꓻ ꓙ ꓗꓷ ꓢꓲ ꓠꓬꓲ ꓢꓯ. ꓬꓯꓼ ꓡ ꓟ ꓙꓵ, ꓗꓪ ꓑꓮꓲꓽ ꓬꓰ ꓠ, ꓟ ꓬꓲ ꓙꓵ, ꓠꓶꓽ ꓡ ꓟ ꓙꓵ, ꓝꓴꓲ ꓔꓯ ꓤ ꓟꓳ ꓓꓴ ꓬꓰ ꓡꓯ꓿

ꓢꓲꓽ ꓫꓬ ꓟ ꓦꓬꓼ ꓠꓬꓲ ꓙꓵ, ꓗꓪ ꓟꓽ ꓙꓲ ꓫꓵꓽ ꓮ ꓙꓵꓽ ꓔꓯ ꓡꓳ ꓗꓷ ꓓꓴ ꓬꓰ ꓡꓯ꓿ ꓣꓳ ꓝꓴꓲ ꓔꓯ ꓓꓵ ꓙ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓪ ꓔꓲ ꓕꓲ ꓣꓳ ꓡꓰ ꓐꓰ ꓘꓳ, ꓣꓴ ꓓꓴ ꓬꓰ ꓡꓯ꓿ ꓙꓲ ꓟ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓠꓵꓻ ꓠꓲ, ꓙꓳ ꓟ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿