ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓢꓯ. ꓬꓲꓼ ꓡˍ ꓟ ꓑꓮꓲꓽ (Easter Sunday reflection)

ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓢꓯ. ꓬꓲꓼ ꓡˍ ꓟ ꓑꓮꓲꓽ (Easter Sunday reflection)

ꓠꓬ. ꓠꓬꓲ ꓢꓲꓺ ꓒ ꓦꓬꓼ ꓠꓬ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓫꓵꓻ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓣꓳ  ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓮ ꓘꓶ. ꓗ, ꓛꓲ ꓟ ꓦꓬꓼ ꓠꓬꓲ ꓕꓲ ꓠꓬꓲ ꓟꓲ ꓥ ꓡꓳ꓿ ꓣꓳ ꓚꓬꓴ ꓢꓲꓺ ꓤ ꓬꓰ‐ꓢꓴ ꓙꓲ‐ꓢꓴ ꓠꓬ ꓫꓵꓻ ꓟ ꓗꓪ ꓐꓰ ꓟꓽ ꓢꓯ. ꓬꓲꓼ ꓡ ꓐꓶ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓥꓳꓽ ꓡꓳ ꓓꓴ ꓟꓽ ꓙꓳ ꓗꓷ ꓡꓰ ꓟ ꓥ ꓡꓳ꓿ ꓟꓲ ꓠꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓱ. ꓐꓯ ꓪꓴ‐ꓢ ꓐꓴ ꓠꓬ ꓫꓵꓻ ꓗꓪ ꓐꓰ ꓟꓽ ꓢꓯ. ꓬꓲꓼ ꓡ꓿

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓢꓯ. ꓬꓲꓼ ꓡ ꓟ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓣꓳ ꓐꓱ ꓶ ꓮ ꓘꓶ. ꓛꓲ ꓫ. ꓓꓴ ꓟꓷꓽ ꓓꓴ ꓔꓳ, ꓜꓳ ꓗꓷ ꓢꓲ ꓡꓯꓽ ꓐꓳ ꓔꓶ ꓓꓴ ꓗꓪ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓑꓮꓲꓽ ꓦꓬꓼ ꓠꓬꓲ ꓗꓪ ꓣꓳ ꓗ, ꓛꓲ ꓓꓴ ꓬꓰ ꓡꓯ꓿

ꓠꓬꓲ. ꓠꓬꓲ ꓣꓳ ꓔꓬ ꓟ ꓗꓴꓷꓼ ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓰꓼ ꓡꓯꓽ ꓘꓳꓽ ꓓꓴ ꓠꓲ, ꓟ ꓫ. ꓓꓴ ꓡꓰ ꓔꓳ, ꓜꓳ ꓔꓬ ꓟ  ꓦꓬꓼ ꓠꓬꓲ ꓟꓲ ꓥ ꓡꓳ꓿ ꓕꓱ ꓡꓰ ꓫꓵꓽ ꓠꓲ, ꓟ ꓟꓬ, ꓫ. ꓓꓴ ꓦꓬꓼ ꓠꓬꓲ ꓗꓪ ꓢꓯ. ꓬꓲꓼ ꓡ ꓟ ꓑꓮꓲꓽ ꓔꓯ ꓬꓰ ꓟ ꓬꓲ ꓔꓶ ꓙꓱ ꓬꓲ (ꓐꓬꓱ) ꓠꓬ ꓮ ꓫꓵꓽ ꓥ ꓡ ꓣꓳ ꓓꓵ ꓙ ꓠ, ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓠꓲ, ꓫ. ꓟꓬ, ꓫ ꓓꓴ ꓔꓯ ꓡꓯꓽ ꓐꓳ ꓔꓶ ꓓꓴ ꓔꓯ ꓙꓱ ꓗꓷ ꓟ ꓢꓲ ꓠꓬꓲ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓗ, ꓛꓲ ꓟ ꓓꓳꓽ ꓠꓬ ꓣꓳ ꓐꓱ ꓶ ꓚꓬꓴ ꓢꓲꓺ ꓒ ꓡꓰ ꓟꓲ ꓠꓯ ꓗꓪ ꓓꓯ ꓡ ꓗꓷꓳ꓿

ꓣꓳ ꓐꓱ ꓶ ꓥꓳꓽ ꓡꓳ ꓓꓴ ꓙꓳ ꓡꓰꓳ꓿ ꓣꓳ ꓐꓱ ꓶ ꓗ, ꓛꓲ ꓓꓴ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓫꓵꓻ ꓡꓰ ꓗ. ꓠꓯ ꓠꓲ, ꓟ ꓫ. ꓓꓴ ꓙꓳ ꓡꓰ ꓥ ꓟꓲ ꓬꓲ ꓝꓮꓲ ꓢꓯ. ꓬꓲꓼ ꓡ ꓟ ꓪꓴ. ꓠꓬꓲ ꓥꓳꓽ ꓡꓳ ꓓꓴ ꓐꓰ ꓗ, ꓛꓲ ꓓꓴ ꓙꓳ ꓡꓰ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓔꓳ, ꓜꓳ ꓔꓬ ꓟ ꓠꓲ, ꓫ ꓟꓬ ꓫ ꓓꓴ ꓮ ꓙꓵꓽ ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓐꓯ ꓖꓶ ꓓꓴ ꓬꓰ ꓡꓯ꓿ ꓢꓲꓺ ꓒ ꓫꓵꓻ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓦꓬꓼ ꓠꓬꓲ ꓗ, ꓛꓲ ꓓꓴ ꓬꓰ ꓡꓯ꓿

ꓣꓳ ꓐꓱ ꓶ ꓥꓳꓽ ꓡꓳ ꓓꓴ ꓟꓽ ꓙꓳ ꓗ. ꓡꓰ ꓟ ꓙꓵ, ꓕꓯ ꓢꓲꓺ ꓒ ꓡꓰ ꓖꓶ ꓡ ꓟ ꓢꓯꓽ ꓪ ꓗꓪ ꓐꓰ ꓣꓳ ꓠꓯ, ꓗꓪ ꓢꓯꓽ ꓪ ꓙꓳ ꓡ ꓓꓴ ꓥꓳ꓿ ꓣꓳ ꓢꓯ. ꓔꓬ ꓟ ꓙꓵ, ꓗꓪ ꓗ, ꓛꓲ ꓛꓲ ꓡꓰ ꓢꓯ. ꓔꓬ ꓓꓴ ꓬꓰ ꓡꓯ꓿  ꓚꓬꓴ ꓢꓲꓺ ꓒ ꓔꓯ ꓧ‐ꓡꓯ‐ꓡꓴ‐ꓪ ꓫꓱ ꓖꓶ ꓓꓳ ꓟꓴ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿