ꓬꓰ-ꓢꓴ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ (ꓬꓳ-ꓦ 6ꓽ30-35)

ꓬꓳ-ꓦ 6ꓽ30-35

ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓠꓴꓽ ꓟꓳꓻ ꓢꓲ ꓠꓴ ꓔꓯ ꓙꓵꓻ ꓠꓹ ꓟ꓾ ꓠꓴ ꓮꓸ ꓫꓵ ꓢꓷꓸ ꓡꓰ ꓓꓴ ꓬꓰˍ ꓐꓯˍ ꓡ? ꓠꓴ ꓮꓸ ꓫꓵ ꓟꓬꓱꓽ ꓬꓰˍ ꓥꓳ ꓪ? ꓕꓳ ꓶ ꓗꓪ꓾ ꓬꓲ ꓡꓰ ꓬꓲ ꓪꓽ ꓔꓯ ꓟꓴꓽ ꓗꓪ ꓗꓪ ꓐꓰ ꓜꓽ ꓓꓴ ꓖꓶ ꓜꓽˍ ꓗꓷꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ꓾ ꓥꓪ ꓠꓴ ꓒꓵꓽ ꓒ ꓐꓴ ꓠꓬ ꓡꓲ ꓛꓲ ꓗꓪ ꓟ-ꓠ ꓑ ꓑ ꓜꓽ ꓗꓷꓳ꓾ ꓐꓯˍ ꓡꓳ꓿ 

ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓔꓯ ꓟꓴꓽ ꓗꓪ ꓗꓪ ꓐꓰ ꓑ ꓑ ꓖꓶ ꓢꓴ ꓠꓬ ꓟꓳ-ꓫꓲ ꓟꓽ ꓥ꓿ ꓠꓴ ꓪꓽ ꓔꓯ ꓟꓴꓽ ꓗꓪ ꓗꓪ ꓐꓰ ꓜꓽ ꓓꓴ ꓚꓵꓺ ꓖꓶ ꓢꓴ ꓠꓽ ꓥꓪ ꓐꓹ ꓐ ꓥ ꓡꓳ꓿ 

ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓢꓲ꓾ ꓟꓲ ꓠꓯ ꓞꓳ ꓤ ꓔꓯ ꓢꓯꓼ ꓟꓬ ꓖꓶ ꓢꓴ ꓖꓳ ꓕꓲ ꓣꓳ ꓠꓬ ꓪꓴ-ꓢ ꓬꓲ ꓑ ꓑ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓢꓲ ꓒꓽꓳ꓾ ꓑ ꓑ ꓕꓱ ꓟ ꓥꓪ ꓠꓴꓽ ꓔꓯ ꓕꓲ ꓞꓲꓼ ꓖꓶ ꓜꓽ ꓡꓯ꓾ ꓐꓯˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓠꓬ ꓢꓯꓼ ꓟꓬ ꓑ ꓑ ꓥꓳ꓿ ꓥꓪ ꓔꓯ ꓡ ꓢꓴ ꓠꓬ ꓟꓽ ꓦꓰꓼ ꓟꓷꓼ ꓡ꓿ ꓥꓪ ꓔꓯ ꓙꓵꓻ ꓢꓴˍ ꓟꓲ ꓕꓲ ꓞꓲ ꓟꓽ ꓢꓲꓼ ꓡ꓾ ꓐꓯ ꓡꓳ=

*********

ꓠꓬꓲꓸ ꓠꓬꓲ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓢꓯꓼ ꓟꓬ ꓖꓶˍ ꓟ ꓑ ꓑ ꓐꓰ ꓗꓴꓸ ꓙꓲꓽ ꓙꓳ ꓢꓲ꓾ ꓐꓯ ꓔ ꓡꓳ= ꓟꓳ-ꓫꓲ ꓡꓰ ꓓꓰꓽˍ ꓟ ꓗꓪ ꓐꓰ ꓪꓴ-ꓢ ꓡꓰ ꓖꓶ ꓡˍ ꓟ ꓟ-ꓠ ꓑ ꓑ ꓠꓬ ꓦꓰꓼ ꓟ ꓙꓲꓻ ꓗꓷˍ ꓗꓪ ꓛꓲˍ ꓡꓰꓽ ꓦꓰꓽ ꓛꓲꓽ ꓗꓪ ꓓꓵˍ ꓡꓳ= ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓞꓳ ꓤ ꓐꓴ ꓔꓯ ꓢꓯꓼ ꓟꓬ ꓑ ꓑ ꓚꓵ ꓖꓶˍ ꓡꓳ= ꓢꓯꓼ ꓟꓬ ꓑ ꓑ ꓖꓳ ꓟ ꓜꓽ ꓗꓷ ꓠꓬ ꓮꓽ ꓟꓽˍ ꓟꓲ ꓟꓽ ꓢꓲꓼ ꓡꓻꓳ= ꓟꓽ ꓦꓰꓼ ꓟꓷꓼ ꓡꓻꓳ= ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓪꓴ-ꓢ ꓗꓪ ꓐꓰ ꓡˍ ꓟ ꓥ ꓢꓲ꓾ ꓕꓱ ꓟ ꓠꓬ ꓟꓲ ꓠꓯ ꓔꓯ ꓢꓯꓼ ꓟꓬ ꓖꓶˍ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓵꓻ ꓠꓲꓹ ꓢꓯꓼ ꓟꓬ ꓠꓬ ꓟꓲ ꓠꓯ ꓗꓪ ꓟ ꓢꓯꓼ ꓟꓬ ꓕꓯꓽ ꓢꓲ ꓪꓽ ꓠꓬꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓠꓬ꓾ ꓟꓲ ꓠꓯ ꓗꓪ ꓟ ꓢꓯꓼ ꓟꓬ ꓐꓱ ꓶ ꓦꓰꓼ ꓟꓷꓡˍ ꓟ ꓔꓯ ꓐꓳ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓪꓴꓽ ꓧꓶꓽˍ ꓟˍ ꓡꓰ ꓐꓰ ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶˍ ꓟ ꓢꓯꓼ ꓟꓬ ꓑ ꓑ ꓔꓯ ꓥˍ ꓟꓲ ꓧꓪ ꓠ ꓗꓹˍ ꓡꓳ= ꓪꓴ-ꓢ ꓕꓲ ꓣꓳˍ ꓡꓰꓽ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓐ ꓡˍ ꓡꓳ= ꓝꓮꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓳ ꓟ ꓟꓲ ꓠꓯ ꓞꓳ ꓤ ꓐꓴ ꓡꓰ ꓟꓶ ꓡꓰ ꓠꓹ ꓟ ꓐꓱ ꓶ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓔꓯ ꓟꓽ ꓗꓹ ꓐ ꓐ꓾ ꓟꓲ ꓠꓯ ꓔꓯ ꓖꓶꓽ ꓗꓷꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓢꓯꓼ ꓟꓬ ꓑ ꓑ ꓥ ꓡꓳ=

ꓕꓱ ꓟ ꓔꓯ ꓣꓳ ꓠꓲꓹ ꓟ ꓗꓪ ꓕꓶ ꓕꓶ ꓡꓰꓽ ꓙꓵꓻ ꓔ ꓠ ꓗꓹ ꓡꓳ= ꓟꓲ ꓠꓯ ꓕꓱ ꓟ ꓕꓯꓽ ꓢꓲ ꓗꓪ ꓪꓴ-ꓢ ꓡꓰ ꓚꓰꓼ ꓔ ꓟ ꓮ ꓡꓲ ꓕꓲ ꓫꓵꓽˍ ꓟꓲ꓾ ꓟꓲ ꓠꓯ ꓕꓱ ꓟ ꓗꓪ ꓣꓳ ꓣꓱꓽ ꓞꓹ ꓟ ꓐꓰ ꓝꓮꓲ ꓕꓲ ꓤꓶꓻ ꓗꓪ ꓣꓳ ꓣꓱꓽ ꓬꓯꓼ ꓣꓱꓽ ꓞꓹ ꓟ ꓔꓯ ꓮꓽ ꓟˍ ꓟꓲ ꓖꓶꓽ ꓟꓽ ꓐ ꓡ= ꓬꓰ ꓖꓶ ꓟꓽ ꓐ ꓡ= ꓣꓳ ꓙꓻ ꓖꓴ꓾ ꓔꓱꓹˍ ꓟ ꓐꓰ ꓢꓯꓼ ꓟꓬ ꓥ ꓟ ꓢꓲ ꓒ ꓬꓰ-ꓢꓴ ꓕꓲ ꓣꓳˍ ꓡꓰꓽ ꓕꓱ ꓟ ꓔꓯ ꓖꓶ ꓐ ꓡˍ ꓡꓳ= ꓢꓲ ꓒ ꓕꓲ ꓣꓳˍ ꓡꓰꓽ ꓣꓳ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓐ ꓡˍ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷꓸ ꓠꓹ ꓟ꓾ ꓬꓲ ꓔꓯ ꓠꓲꓹ ꓠꓵ ꓠꓹ ꓟ꓾ ꓬꓲ ꓔꓯ ꓣꓱꓽ ꓙ ꓠꓹ ꓟ ꓠꓬ ꓣꓳ ꓔꓶ ꓙꓱꓼ ꓥ ꓡꓳ=

ꓢꓲ ꓒ ꓔꓯ ꓢꓷꓸˍ ꓟ ꓠꓬ ꓬꓲ ꓔꓯ ꓢꓷꓸˍ ꓕꓲ ꓖꓼ ꓟꓽ ꓥ ꓥ꓾ ꓬꓲ ꓐꓰ ꓕꓲ ꓪ ꓙꓻ ꓫꓱꓽˍ ꓟ ꓥ ꓡꓳ= ꓢꓲ ꓒ ꓔꓯ ꓠꓲꓹ ꓠꓵˍ ꓟ ꓠꓬ ꓣꓳ ꓔꓯ ꓬꓲ ꓡꓰ ꓖꓶ ꓔ ꓟ ꓠꓵꓻ ꓠꓲꓹ ꓠꓯꓸꓼ ꓗꓪ ꓣꓳ ꓥˍ ꓟꓲ ꓢꓲ ꓒ ꓔꓯ ꓠꓲꓹ ꓠꓵꓻ ꓙꓰˍ ꓟ ꓥ ꓡꓳ= ꓝꓮꓲ ꓢꓲ ꓒ ꓔꓯ ꓣꓱꓽ ꓙˍ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓐꓰ ꓗꓴꓸ ꓙꓲꓽ ꓙꓳ ꓢꓲ꓾ ꓢꓲ ꓒ ꓠꓬ ꓣꓳ ꓠꓯꓸꓼ ꓗꓪ ꓮ ꓡꓲ ꓟꓬ ꓛꓲ ꓟꓬꓱꓽ ꓬꓰ ꓖꓶ ꓗꓷ ꓟ꓾ ꓢꓲ ꓒ ꓬꓲ ꓠꓵꓻ ꓠꓲꓹ ꓔꓯ ꓣꓳ ꓤꓶꓻ ꓗꓪ ꓮ ꓟꓬ ꓛꓲ ꓘꓳꓹ ꓣꓴ ꓪ ꓡꓰ ꓟ ꓐꓴ ꓔꓯ ꓠꓱꓸ ꓐꓯ ꓢꓴ ꓔꓯ ꓐꓯ ꓟꓸ ꓖꓶˍ ꓟ꓾ ꓚꓺ ꓟꓸ ꓖꓶˍ ꓟ ꓥ ꓡꓳ= ꓝꓮꓲ ꓕꓲ ꓚꓱꓹ ꓐꓯ ꓠꓬ꓾ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓠꓲꓹ ꓥꓳꓺ ꓢꓲ꓾ ꓠꓱꓸ ꓐꓯ ꓢꓴ ꓔꓯ ꓢꓲ ꓒ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓠꓲꓹ ꓫꓵˍ ꓟ ꓔꓯ ꓐꓯˍ ꓟ ꓥ ꓡꓳ= ꓕꓱ ꓟ ꓠꓬ ꓢꓲ ꓒ ꓔꓯ ꓣꓱꓽ ꓙꓻˍ ꓟ ꓥ ꓡꓳ=

ꓑ ꓑ ꓠꓬ ꓬꓴ-ꓔ ꓡ ꓞꓳ ꓐꓴ ꓐꓱ ꓶ ꓮ ꓘꓶꓸ ꓬꓳꓸ ꓚꓵˍ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ= ꓖꓳ ꓟˍ ꓡꓰ ꓐꓰ ꓢꓯꓼ ꓟꓬ ꓑ ꓑ ꓥ ꓟ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓥ ꓡꓳ= ꓣꓳ ꓠꓬ ꓬꓲ ꓔꓯ ꓣꓳ ꓔꓯ ꓙ ꓖꓴ ꓧꓳꓽ ꓟꓳꓸ ꓖꓶ ꓢꓴ꓾ ꓣꓳ ꓞꓳ ꓙꓳ ꓔꓬ ꓟ ꓬꓲ ꓔꓶ ꓙꓱꓼ ꓡꓰ ꓐꓰ꓾ ꓣꓳ ꓢꓯꓼ ꓟꓬˍ ꓡꓰ ꓐꓰ ꓟꓳꓻ ꓠꓯꓹ ꓡꓳ= ꓬꓲ ꓠꓬ꓾ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓟ ꓥ ꓡꓳ= ꓬꓲ ꓕꓲ ꓣꓳˍ ꓡꓰꓽ ꓙꓳˍ ꓠꓬ ꓣꓳ ꓤꓶꓻ ꓐꓱ ꓶ ꓡꓳꓼ ꓡꓰꓳ=