ꓞꓳ ꓤꓽ ꓟꓬꓱ ꓓꓳꓽ ꓐꓯˍ ꓟ ꓢꓷꓸ ꓡꓰ ꓓꓴ

Tuesday, September 15, 2020

ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓚꓰꓼ ꓔ ꓕꓯ ꓬꓲꓸ ꓜꓴ ꓬꓲꓸ ꓟꓯꓼ ꓔꓬ ꓗꓴꓸ ꓠˍ ꓟ ꓚꓰꓼ ꓔ ꓐꓶ= ꓟꓲ ꓠꓯ ꓞꓳ ꓤ ꓔꓯ ꓛꓳ ꓠꓬꓲ ꓠꓬ꓾ ꓬꓲꓸ ꓜꓴ ꓬꓲ ꓠꓯꓼ ꓐꓰ ꓔꓬ ꓗꓴꓸ ꓔ ꓟ ꓕꓲꓽ ꓫꓵꓽ ꓥ ꓐꓶ= ꓖꓴ ꓟ ꓑꓶꓸ ꓓꓴ ꓠꓲ ꓞꓳ ꓤꓽ ꓟꓬꓱ ꓓꓳꓽ ꓐꓯꓸ ꓕꓯꓽ ꓠꓬ ꓞꓳ ꓤꓽ ꓬꓲꓸ ꓜꓴ ꓬꓲꓸ ꓟꓯꓼ ꓐꓰ ꓔꓬ ꓕꓯꓽ ꓮ ꓡꓰ ꓐꓰ ꓔꓬ ꓥ ꓡ? ꓐꓯ ꓟ ꓔꓯ ꓛꓳꓽ ꓕꓯꓽ ꓢꓷꓸ ꓔ ꓐꓶ= ꓖꓴ ꓟ ꓑꓶꓸ ꓓꓴ ꓠꓲ ꓞꓳ ꓤ ꓕꓲꓽ ꓣꓳ ꓡꓰꓸ ꓕꓲꓽ ꓣꓳ ꓠꓬ꓾ ꓞꓳ ꓤꓽ ꓬꓲꓸ ꓜꓴ ꓬꓲꓸ ꓟꓯꓽ ꓠꓯꓸꓼ ꓗꓪ ꓢꓯꓸ ꓔꓬ ꓠꓹ ꓟ ꓬꓳꓸ ꓚꓲꓸ ꓐꓶ= ꓖꓳ ꓡꓰ ꓔꓬꓹ ꓕꓯꓽ ꓢꓲꓸ ꓞꓳ ꓤꓽ ꓕꓲꓽ ꓣꓳ ꓟꓬꓱ ꓓꓳꓽ ꓔꓯ ꓗꓽ ꓕꓸ ꓐ ꓡ- ꓟ ꓢꓲ ꓡꓲꓹ ꓐꓰ ꓔꓬ ꓐ ꓡ-ꓟ ꓡꓰ ꓟꓽ ꓞꓲ꓾ ꓞꓳ ꓤꓽ ꓬꓲꓸ ꓜꓴ ꓬꓲꓸ ꓟꓯꓼ ꓗꓪ ꓟꓬꓱ ꓓꓳꓽ ꓙꓳ- ꓟ ꓬꓲꓸ ꓒꓵꓽ ꓒꓵ- ꓟ ꓞꓳ ꓤꓽ ꓜꓶ ꓔꓯ ꓔꓶ ꓐ ꓡ ꓡꓳ= ꓞꓳ ꓤꓽ ꓟꓬꓱ ꓓꓳꓽ ꓐꓯ- ꓟ ꓢꓶꓸ ꓠ- ꓟ ꓢ ꓫꓵꓽ ꓠꓬ꓾

1ꓸ ꓪꓴ-ꓢ ꓐꓰ ꓝꓸ ꓡꓯꓽ ꓘꓳ-ꓟ

2ꓸ ꓞꓳ ꓤꓽ ꓐꓰ ꓝꓸ ꓡꓯꓽ ꓘꓳ-ꓟ

3ꓸ ꓪꓴ-ꓢ ꓡꓰ ꓚꓰꓼ ꓔꓸ ꓟ ꓢꓯꓸ ꓫꓵꓽ ꓢꓯꓸ ꓙꓵꓽ ꓢꓲꓹ ꓜꓲ ꓡꓳ ꓜꓲ ꓟꓶꓽ ꓘꓳꓼ ꓐꓰ ꓝꓸ ꓡꓯꓽ ꓘꓳ-ꓟ ꓕꓱ ꓡꓰ ꓫꓵꓽ ꓥ ꓭꓶ=

Wꓴ-ꓢ ꓐꓰ ꓝꓸ ꓡꓯꓽ ꓘꓳ- ꓟ ꓔꓯ ꓛꓳ ꓠꓬꓲ ꓠꓬ꓾

ꓞꓳ ꓤꓽ ꓕꓲꓽ ꓤꓳ ꓡꓰꓸ ꓕꓲ ꓣꓳ ꓠꓬ ꓪꓴ-ꓢ ꓐꓰ ꓒꓬꓱ ꓪꓽ ꓡꓯꓽ ꓘꓳ ꓠ ꓚꓰꓼ ꓔ ꓟ ꓪꓴꓸ ꓠꓬꓲ ꓠꓲ ꓣꓳ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓬ ꓪꓴ-ꓢ ꓗꓪ ꓟ ꓥ ꓢꓲ ꓛꓲ ꓡꓹ ꓟ ꓙꓵꓹ ꓗꓪ ꓟ ꓣꓳꓽ ꓔꓶ ꓒꓬꓱ ꓠꓬ ꓪꓴ-ꓢ ꓠꓯꓸꓼ ꓗꓪ ꓗꓶ ꓡꓰ ꓠꓬꓲ ꓔ ꓥ= ꓞꓳ ꓤꓽ ꓕꓲꓽ ꓤꓳ ꓡꓰ ꓕꓲ ꓣꓳ ꓪꓴ-ꓢ ꓐꓰ ꓕꓲꓽ ꓪꓼ ꓗꓶ ꓡꓰ ꓠꓹ ꓟ ꓥꓹ ꓠꓬ ꓪꓴ-ꓢ ꓐꓰ ꓝꓸ ꓡꓯꓽ ꓘꓳ- ꓟ ꓪꓴ-ꓢ ꓐꓰ ꓕꓲꓽ ꓛꓳꓻ ꓙ ꓫꓱꓽ ꓢꓴ ꓒꓬꓱꓼ ꓬꓰ ꓠꓬꓲ ꓔ ꓥ= ꓠꓬꓲ ꓧꓪꓹ ꓕꓲꓽ ꓧꓪꓹ ꓟ ꓦꓮꓔꓲꓚꓮꓠ ꓖꓪ ꓙꓱ ꓜꓲꓼ ꓓꓴ ꓖꓮꓴꓓꓲꓴꓟ ꓰꓔ ꓢꓑꓰꓢ ꓗꓪ ꓠꓬ꓾ ꓞꓳ ꓤꓽ ꓟꓬꓱ ꓓꓳꓽ ꓐꓯ- ꓟ ꓠꓬ ꓪꓴ-ꓢ ꓠꓬ ꓟꓲ ꓠꓯ ꓗꓪ ꓚꓰꓼ ꓔ ꓟ ꓮꓽ ꓙꓵꓽ ꓔ ꓙꓵꓽ ꓠꓹ ꓟ ꓙꓵꓽ ꓪꓽ ꓖꓶ ꓔ ꓟ ꓥ ꓢꓲ ꓠꓬꓲ ꓟꓽ ꓓ ꓟꓴ ꓖꓴ ꓡꓰ ꓟ ꓙꓵꓽ ꓪꓽ ꓔꓯ ꓑꓯꓹ ꓟꓶ ꓢꓴ ꓟꓬꓱꓽ ꓔꓯ ꓘꓳꓹ ꓣꓴ ꓟꓶ ꓢꓴ ꓥ- ꓟ ꓪꓴꓸ ꓠꓬꓲ ꓠꓲ ꓪꓴ-ꓢ ꓕꓲꓽ ꓪꓼ ꓙ ꓡꓯꓽ ꓘꓳ ꓟꓶ ꓠꓹ ꓟ ꓪꓴ-ꓢ ꓡꓰ ꓘꓴ ꓔ ꓟ ꓔꓯ ꓐꓯꓹ ꓟꓶ ꓢꓴ ꓥ ꓡꓳ=

ꓪꓴ-ꓢ ꓡꓰ ꓘꓴ ꓔ ꓟ ꓔꓯ ꓛꓳꓽ ꓢꓲꓸ ꓠꓬꓲ ꓞꓳ ꓤꓽ ꓟꓬꓱ ꓓꓳꓽ ꓐꓯ ꓟ ꓠꓬ ꓬꓲꓸ ꓒꓵꓽ ꓐꓯˍ ꓟ ꓙꓳ ꓡꓳ= ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓚꓰꓼ ꓔ ꓟ ꓡꓰ ꓟꓽ ꓞꓲꓻ ꓬꓲˍ ꓐꓰ ꓮ ꓕꓯꓽ ꓥˍ ꓟꓲ ꓝꓸ ꓡꓯꓽ ꓘꓳ ꓕꓲꓽ ꓪꓼ ꓙ ꓫꓱꓽ ꓠ ꓟ ꓐꓱ ꓶꓽ ꓥ ꓡꓳ= ꓞꓳ ꓤꓽ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓬ ꓟꓬꓱ ꓓꓳꓽ ꓙꓳ ꓟ ꓞꓳ ꓤꓽ ꓞꓲꓼ ꓕꓯ ꓐꓯꓹ ꓟꓶ ꓠꓹ ꓟ ꓠꓬ ꓪꓴ-ꓢ ꓐꓰ ꓕꓲꓽ ꓪꓼ ꓙ ꓫꓱˍ ꓟ ꓪꓴ-ꓢ ꓐꓰ ꓝꓸ ꓡꓯꓽ ꓘꓳꓹ ꓟ ꓙꓳ ꓠꓬ ꓔ ꓥ=