ꓣꓳꓽ ꓦ ꓡꓱ ꓔꓬ ꓟ ꓠꓬ ꓢ-ꓣꓳ-ꓕꓲ-ꓖꓳ-ꓓꓱ ꓪꓴ-ꓢ ꓥ ꓡꓳ꓾

ꓕꓱ ꓕꓲ ꓠꓽ ꓪꓴ-ꓢ ꓟꓸ ꓟꓲꓽ ꓢꓳˍ ꓟ ꓗꓪ ꓠꓬ ꓣꓳ ꓦ ꓡꓱ ꓔꓬ ꓟ ꓪꓴ-ꓢ ꓠꓬ ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓥꓳ ꓐꓯ ꓟ ꓚꓱꓹ ꓔꓯ ꓣꓳ ꓠ ꓠꓹ ꓓꓴ ꓬꓰ ꓡꓯ= ꓣꓳ ꓦ ꓡꓱ ꓔꓬ ꓟ ꓪꓴ-ꓢ ꓠꓬ ꓐꓹ ꓐ꓾ ꓤ ꓔꓲꓸ꓾ ꓢꓲꓽ-ꓫꓬ-ꓟ-ꓦ ꓐꓯ ꓢꓲ ꓠꓬꓲ ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓥ ꓡꓳ= ꓪꓴ-ꓢ ꓢ ꓣꓳ ꓟꓽ ꓥ꓾ ꓪꓴ-ꓢ ꓕꓲ ꓣꓳˍ ꓡꓰꓽ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓑꓰꓣꓢꓳꓠ ꓐꓯ ꓟ ꓬꓲ ꓖꓳ ꓓꓱꓽ ꓠꓬ ꓢ ꓟ ꓙꓳˍ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓚꓵ ꓘꓶꓽ ꓥ ꓡꓳ= ꓔꓲ ꓔꓲ ꓢꓲꓽ ꓢꓲꓽ ꓡꓰꓽ ꓣꓳ ꓢꓷꓸ ꓟꓽ ꓐ ꓡ= ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓞꓳ ꓤ ꓓꓵꓽ ꓙꓽ ꓚꓱꓹ ꓪꓴꓸ ꓠꓷꓸ ꓚꓱꓹ ꓠꓬ ꓮ ꓘꓶꓸ ꓣꓳˍ ꓟ ꓑꓶꓸ ꓓꓴ ꓠꓯ ꓬꓲꓻ ꓓꓽ ꓟ ꓗꓪ ꓟꓶꓽ ꓦ ꓦˍ ꓟ ꓬꓲꓻ ꓙꓬ ꓕꓲꓽ ꓙꓬˍ ꓡꓰ ꓐꓰ ꓗꓷ ꓡꓰˍ ꓥꓳ=

ꓖꓳ ꓡꓱ ꓠꓬꓲ ꓐꓹ ꓐ꓾ ꓤ ꓔꓲꓸ꓾ ꓢꓲꓽ-ꓫꓬ-ꓟ-ꓦ ꓕꓱ ꓡꓱ ꓢ-ꓣꓳ-ꓕꓲ-ꓖꓳ-ꓓꓱꓽ ꓔꓯ ꓣꓳ ꓮ ꓡꓲ ꓗꓪ ꓟꓳꓻ ꓓꓻˍ ꓡ= ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓟꓳꓻ ꓓꓻˍ ꓡꓳ= ꓐꓹ ꓐ ꓪꓴ-ꓢ ꓔꓯ ꓠꓬ ꓤ ꓔꓲꓸ ꓬꓰ-ꓢꓴ ꓡꓰ ꓖꓴ ꓟꓳꓸ ꓖꓶˍ ꓡꓳ= ꓐꓹ ꓐ ꓠꓬ ꓚꓵ ꓚꓵ ꓙꓳ ꓢꓲ ꓠꓬꓲ ꓟꓵꓽ ꓚꓰꓼ ꓟꓲ ꓚꓰꓼ ꓢꓴ꓾ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓐꓯ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓖꓴ ꓟꓳꓸ ꓖꓶ ꓡˍ ꓡꓳ=

ꓕꓱ ꓟˍ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓮ ꓡꓲ ꓫꓵꓽ ꓪꓴ-ꓢ ꓥ ꓡ ꓐꓯ ꓟ ꓢꓲꓽ-ꓫꓬ-ꓟ-ꓦ ꓗꓪ ꓐꓰ ꓖꓴ ꓟꓳꓸ ꓖꓶ ꓡˍ ꓡꓳ= ꓢꓲꓽ-ꓫꓬ-ꓟ-ꓦ ꓠꓬ ꓮ ꓡꓲ ꓫꓵꓽ ꓪꓴ-ꓢ ꓥ ꓡ ꓐꓯ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓖꓴ ꓟꓳꓸ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓢ ꓣꓳ ꓙꓳˍ ꓟ ꓪꓴ-ꓢ ꓠꓬ ꓕꓲ ꓖꓳ ꓓꓱꓽˍ ꓥ ꓡꓳ= ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓐꓯ ꓟ ꓔꓯ ꓣꓳ ꓪꓴꓸ ꓠꓷꓸ ꓗꓪ ꓐꓰ ꓓꓵꓽ ꓙꓽ ꓟꓽ ꓐ ꓡ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓪꓴ-ꓢ ꓦ ꓡꓱ ꓢꓴ ꓐꓰ ꓐꓯ ꓕꓯ꓾ ꓪꓴ-ꓢ ꓠꓬ ꓮ ꓡꓲ ꓫꓵꓽ ꓪꓴ-ꓢ ꓥ ꓡ ꓐꓯ ꓟ ꓣꓳ ꓮ ꓙꓵꓽ ꓢꓷꓸ ꓟꓽ ꓖꓴ= ꓖꓳ ꓡꓱ ꓥ ꓟꓲ ꓣꓳ ꓢꓷꓸ ꓠ ꓔ ꓟ ꓠꓬ ꓪꓴ-ꓢ ꓠꓬ ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓥꓳ꓾ ꓐꓯ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓗꓪ ꓐꓰ ꓟꓽ ꓥ ꓠꓬ ꓣꓳ ꓠꓬ ꓐꓹ ꓐ ꓔꓬ ꓗꓪ ꓙꓰ ꓟꓽ ꓐ ꓡ꓾ ꓐꓰ ꓐꓯ ꓡꓳ= ꓕꓱ ꓟˍ ꓡꓰ ꓐꓰ ꓢꓲ-ꓫꓬ-ꓟ-ꓦ ꓙꓻ ꓖꓴ ꓧꓳꓽ ꓟꓸ ꓖꓶˍ ꓟ ꓟꓽ ꓙꓳ ꓠꓬ ꓬꓲ ꓔꓬ ꓗꓪ ꓮꓽ ꓟˍ ꓟꓲ ꓙꓰ ꓟꓽ ꓐ ꓡ꓾ ꓐꓰ ꓐꓯ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓬꓲ ꓪ ꓮꓽ ꓟ ꓟꓬꓱꓽ ꓮꓽ ꓟ ꓬꓰ ꓔꓬ ꓟ ꓔꓯ ꓣꓳ ꓡꓳꓸ ꓟꓳꓻˍ ꓡꓳ= ꓟꓵꓽ ꓚꓰꓼ ꓟꓲ ꓚꓰꓼˍ ꓟ ꓠꓬ ꓐꓹ ꓐ ꓪꓴ-ꓢ ꓬꓰˍ ꓟ ꓡꓰ ꓐꓰ꓾ ꓞꓳ ꓤ ꓔꓯ ꓚꓬꓴꓸˍ ꓟ ꓠꓬ ꓤ ꓔꓲꓸ ꓪꓴ-ꓢ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓠꓹ ꓟ ꓐꓱ ꓶ ꓠꓲꓹ ꓟ ꓒꓴ ꓖꓶˍ ꓟ ꓠꓬ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓥ ꓡꓳ= ꓕꓱ ꓡꓱ ꓐꓯ ꓕꓯ꓾ ꓬꓲ ꓪ ꓠꓬ ꓮꓽ ꓟ ꓟꓬꓱꓽ ꓮꓽ ꓟ ꓬꓰ ꓔꓬ ꓥ ꓟꓲ ꓬꓲ ꓪ ꓬꓰ ꓔꓬ ꓟ ꓠꓬ ꓕꓲ ꓫꓵꓽˍ ꓡꓰꓽ ꓥ ꓡꓳ=

ꓖꓳ ꓡꓱ ꓠꓬꓲ ꓕꓱ ꓟ ꓠꓬ ꓣꓳ ꓪꓴꓸ ꓠꓷꓸ ꓗꓪ ꓐꓰ ꓫꓬꓽ ꓫꓬꓽ ꓡꓰꓽ ꓢꓷꓸ ꓟꓽ ꓐ ꓡ= ꓮ ꓠꓱ ꓕꓯ ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓠꓬ꓾ ꓕꓲ ꓠꓬꓲ ꓙꓳˍ ꓠꓬ ꓬꓲ ꓠꓬ ꓠꓯ ꓬꓲꓻ ꓖꓳ ꓐꓽ ꓢꓲ ꓗꓪ ꓙꓻ ꓖꓴ ꓫꓱꓽ ꓔꓬ ꓡꓳ= ꓐꓹ ꓐ ꓤ ꓔꓲꓸ ꓢꓲ-ꓫꓬ-ꓟ-ꓦ ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ  ꓕꓱ ꓟ ꓠꓬ ꓮ ꓡꓲ ꓬꓰ ꓢꓲ ꓒꓬꓱꓼ ꓡ ꓓꓹ ꓢꓷꓸ ꓐꓰ ꓓꓵꓽ ꓙ ꓢꓲ ꓙꓰ ꓔꓬ ꓡꓳ= ꓕꓱ ꓡꓱ ꓙꓰ ꓔꓬ ꓕꓯ ꓤ ꓠꓱ ꓤ ꓕꓲ ꓣꓳ ꓠꓬ ꓠꓯ ꓬꓲꓻ ꓘꓴꓽ ꓗꓪ ꓟ ꓬꓲꓻ ꓙꓬ ꓔꓯ ꓱꓹ ꓢꓲ ꓗꓺ ꓢ ꓬꓲ ꓘꓴꓽ ꓗꓪ ꓘꓳꓸ ꓧꓳꓽ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ= ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓠꓬ ꓓꓵꓽ ꓙ ꓟꓶ ꓡꓰ ꓢꓲ꓾ ꓮ ꓐꓲ ꓤꓽꓳ꓾ ꓮ ꓫꓵꓽ ꓑꓶꓸ ꓓꓴ ꓪꓴꓸ ꓠꓷꓸ ꓟꓽ ꓙꓳ ꓟ ꓟꓬꓱꓽ ꓬꓰˍ ꓡ= ꓕꓱ ꓘꓶ ꓛꓲ ꓟꓬꓽˍ ꓟ ꓠꓯ ꓬꓲꓻ ꓬꓲꓻ ꓙꓬ ꓔꓯ ꓗꓺ ꓢ ꓘꓴꓽ ꓗꓪ ꓮ ꓫꓵꓽ ꓑꓶꓸ ꓓꓴ ꓘꓳꓼ ꓓꓳ ꓙꓰˍ ꓡ꓾ ꓐꓰ ꓐꓯ ꓡꓳ= ꓤ ꓠꓱ ꓤ ꓖꓳ ꓟ ꓠꓬ ꓠꓯ ꓬꓲꓻ ꓬꓲꓻ ꓙꓬ ꓔꓯ ꓕꓱ ꓗꓪ ꓱꓹ ꓧꓳꓽ ꓢꓲ꓾ ꓠꓯ ꓬꓲꓻ ꓗꓺ ꓡꓰ ꓠꓹ ꓟ ꓬꓰ ꓔꓬ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓕꓯ ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ ꓬꓲ ꓔꓯ꓾ ꓠꓴ ꓠꓬ ꓪꓴꓸ ꓠꓷꓸ ꓟꓽ ꓙꓳ ꓫꓵꓽ ꓟꓬꓱꓽ ꓕꓽ ꓬꓰ= ꓮ ꓡꓲ ꓒꓬꓱꓼ ꓡ ꓓꓻˍ ꓢꓰꓽ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓤ ꓠꓱ ꓤ ꓖꓳ ꓟ ꓠꓬ ꓟꓴꓽ ꓗꓪ ꓝꓲ ꓓꓴ ꓒꓬꓱꓼ ꓙꓰ ꓢꓲ ꓠꓴ ꓢꓲꓸ ꓟꓬꓽ ꓠꓬꓲ ꓪꓴꓸ ꓠꓷꓸ ꓟꓽ ꓙꓳ ꓢꓴ ꓥ= ꓮ ꓫꓵꓽ ꓑꓶꓸ ꓓꓴ ꓠꓴ ꓠꓬ ꓞꓳ ꓤ ꓕꓲ ꓣꓳ ꓥ ꓢꓲ꓾ ꓪꓴ-ꓢ ꓚꓱꓹ ꓮ ꓙꓵꓽ ꓢꓷꓸ ꓖꓴ ꓓꓹ ꓡ= ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓔꓯ ꓠꓴ ꓮ ꓘꓶꓸ ꓣꓳˍ ꓟ ꓪꓴꓸ ꓠꓷꓸ ꓗꓪ ꓐꓰ ꓮ ꓙꓵꓽ ꓮ ꓡꓲ ꓢꓷꓸ ꓖꓴ ꓓꓻˍ ꓡ꓾ ꓐꓰ ꓒꓳꓹ ꓖꓶˍ ꓡꓳ= ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓞꓳ ꓤ ꓓꓵꓽ ꓙꓽ ꓚꓱꓹ ꓠꓬ ꓮ ꓕꓯ ꓟꓲ ꓐꓲ ꓜꓲꓼ ꓟꓽ ꓓꓻ= ꓖꓳ ꓡꓱ ꓠꓬꓲ ꓣꓳ ꓔꓯ ꓐꓲ ꓜꓲꓼ ꓡꓰ ꓝꓲˍ ꓟ ꓠꓬ ꓙꓵꓻ ꓠꓲꓹ ꓡꓰꓽ ꓥ ꓡꓳ= ꓙꓲꓻ ꓫꓬ ꓢꓴ ꓕꓳ-ꓟ ꓐꓯ ꓔ ꓟ ꓡꓰ ꓐꓰ ꓣꓳ ꓟꓽ ꓐꓲ ꓟꓽ ꓜꓲꓼ ꓟ ꓗꓪ ꓙꓵꓻ ꓠꓲꓹ ꓡꓰ ꓣꓳꓽ ꓔꓯ ꓐꓲ ꓜꓲꓼ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓐꓹ ꓐ꓾ ꓤ ꓔꓲꓸ꓾ ꓢꓲꓽ-ꓫꓬ-ꓟ-ꓦ ꓔꓯ ꓣꓳꓽ ꓦ ꓡꓱ ꓔꓬ ꓟ ꓡꓰ ꓐꓰ ꓤ ꓔꓲꓸ ꓬꓰ-ꓢꓴ ꓪꓴ-ꓢ ꓗꓪ ꓐꓰ ꓐꓹ ꓐ ꓪꓴ-ꓢ ꓔꓬ ꓗꓪ ꓣꓳꓽ ꓛꓲ ꓬꓰ ꓟ ꓡꓰ ꓐꓰ꓾ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓗꓪ ꓐꓰ ꓬꓰ-ꓢꓴ ꓔꓯ ꓣꓳꓽ ꓬꓳꓸ ꓐ ꓡˍ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓠꓬ ꓢ-ꓣꓳ-ꓕꓲ-ꓖꓳ-ꓓꓱꓽ ꓪꓴ-ꓢ ꓔꓯ ꓦ ꓡꓱ ꓔꓬ ꓡꓳ꓾ ꓐꓯ ꓟ ꓣꓳꓽ ꓢꓷꓸ ꓡꓰꓳ= ꓕꓱ ꓟ ꓠꓬ ꓗ-ꓔꓳ-ꓡꓲ ꓙꓵꓻ ꓠꓲꓹ ꓬꓲ ꓪꓴꓸ ꓕꓲ ꓚꓱꓹ ꓗꓪ ꓓꓯꓹ ꓟ ꓥꓪ ꓙꓵꓻˍ ꓡꓳ ꓐꓯ ꓟ ꓗꓪ ꓐꓳ ꓔ ꓟ ꓥ ꓡꓳ=