ꓟꓲ ꓠꓯ ꓞꓳ ꓤ ꓝꓴꓲꓸ ꓬꓰˍ ꓟ

ꓕꓱ ꓕꓲ ꓠꓽ ꓪꓴ-ꓢ ꓟꓸ ꓟꓲꓽ ꓟꓸ ꓖꓶˍ ꓟ ꓙꓵꓹ ꓗꓪ ꓠꓬ ꓟꓲ ꓠꓯ ꓞꓳ ꓤ ꓐꓴ ꓝꓴꓲꓸ ꓬꓰˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

ꓪꓴ-ꓢ ꓠꓬ ꓮ-ꓓꓯ ꓐꓰ ꓰ-ꓪ ꓔꓯ ꓚꓰꓼ ꓗꓷ ꓗ ꓠꓯꓸ ꓟꓲ ꓠꓯ ꓕꓱ ꓟ ꓔꓯ ꓡꓳꓸ ꓠꓹ ꓟ ꓐꓱ ꓶ ꓬꓲꓸ ꓠꓬ ꓙꓵꓽ ꓪ ꓖꓶˍ ꓡꓳ= ꓝꓮꓲ ꓪꓴ-ꓢ ꓠꓬ ꓞꓳ ꓤ ꓔꓯ ꓬꓲ ꓐꓰ ꓕꓲ ꓡꓰꓹ ꓔꓬ ꓠꓹ ꓟ ꓐꓱ ꓶ ꓬꓲ ꓚꓰꓼ ꓗꓷˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓠꓲꓽ ꓢ ꓓꓯ ꓤꓹ ꓠꓬꓲ ꓫꓵꓽ ꓠꓬꓲˍ ꓟ ꓗꓪ ꓐꓰ ꓮ-ꓓꓯ ꓐꓰ ꓰ-ꓪ ꓠꓬ ꓝꓴꓲꓸ ꓬꓰ ꓗꓷꓳ= ꓪꓴ-ꓢ ꓡꓰ ꓖꓶ ꓔ ꓟ ꓕꓵꓼ ꓪ ꓔꓯ ꓬꓲ ꓪ ꓠꓬꓲꓽ ꓣꓳ ꓠꓬ ꓒꓬꓹ ꓦ ꓗꓷꓳ= ꓖꓳ ꓡꓱ ꓬꓰˍ ꓟ ꓗꓪ ꓐꓰ ꓬꓲ ꓪ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓠ ꓡꓳꓸ= ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓢꓲꓺ꓾ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓢꓲˍ ꓡꓳ=

ꓖꓳ ꓗ ꓠꓯꓸ ꓝꓴꓲꓸ ꓠꓬ ꓟꓲ ꓠꓯ ꓕꓱ ꓟ ꓗꓪ ꓓꓵꓽ ꓙꓰꓳ= ꓝꓴꓲꓸ ꓠꓬ ꓮ-ꓓꓯ ꓰ-ꓪ ꓗꓪ ꓐꓰ ꓡ ꓢꓲ ꓠꓬꓲ ꓕꓲ ꓑꓶꓸ ꓗꓳꓸ ꓕꓲ ꓑꓶꓸ ꓞꓳ ꓤ ꓥ ꓕ ꓑꓳꓸꓼ ꓠꓯꓸꓼ ꓗꓪ ꓓꓵꓽ ꓙꓰꓳ= ꓖꓳ ꓡꓱ ꓠꓬꓲ ꓝꓴꓲꓸ ꓐꓯ ꓟ ꓬꓲ ꓒꓵꓽ ꓠꓬ ꓫꓵꓻ ꓓꓴꓽ ꓥ ꓡꓳ= ꓞꓳ ꓤ ꓠꓬ ꓫꓵꓻ ꓓꓴꓽ ꓟꓶ ꓡꓰˍ ꓟ ꓡꓰꓽ ꓟꓽ ꓞꓲꓺ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽˍ ꓟ ꓗꓪ꓾ ꓬꓲ ꓚꓰ ꓬꓲ ꓪꓴꓸ ꓝꓴꓲꓸ ꓗꓪ ꓐꓰ ꓬꓯꓼ ꓡˍ ꓟ ꓥꓶˍ ꓟ ꓙ ꓖꓴ ꓗꓪ ꓡꓰꓽ ꓫꓱꓽ ꓠꓲꓹ ꓫꓵˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓟꓳꓻ ꓪ ꓟ ꓐꓰ ꓕꓲ ꓡꓰꓹ ꓤ ꓠꓱ ꓤ ꓕꓲ ꓣꓳ ꓒꓬꓱꓽ ꓟꓳꓻ ꓡ ꓕꓯ ꓬꓲ ꓔꓯ ꓟꓽ ꓙꓲꓻ ꓟ ꓬꓰ ꓠꓹ ꓟ ꓐꓱ ꓶ ꓮꓽ ꓟˍ ꓟꓲ ꓟꓸ ꓖꓶ ꓟꓽ ꓛꓵ= ꓬꓲ ꓔꓯ ꓠꓲꓹ ꓟ ꓦꓶ ꓠꓹ ꓟ꓾ ꓠꓲꓹ ꓖꓳꓼ ꓠꓹ ꓟ꓾ ꓮꓽ ꓟ ꓥˍ ꓟꓲ ꓟꓸ ꓖꓶ ꓟꓽ ꓛꓵ꓾ ꓬꓲꓸ ꓚꓲꓸ ꓛꓬ ꓬꓲ ꓢꓳ ꓣꓴ ꓗꓴꓸˍ ꓡꓳ= ꓬꓲ ꓚꓲꓸ ꓛꓬ ꓬꓲ ꓗꓶꓸ ꓗꓴꓸˍ ꓡꓳ= ꓠꓲꓹ ꓟ ꓦꓶ ꓗꓴꓸˍ ꓡꓳ= ꓬꓲ ꓚꓲꓸ ꓛꓬ ꓬꓲ ꓟꓽ ꓙꓲꓻ ꓟ ꓬꓰ ꓗꓴꓸˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ꓾ ꓕꓱ ꓟ ꓠꓬ ꓝꓴꓲꓸ ꓗꓪ ꓐꓰ ꓥ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓞꓳ ꓤ ꓐꓰ ꓕꓲ ꓞꓲꓼ ꓕꓲ ꓑ ꓕꓲ ꓡꓰꓹ ꓐꓰ ꓔꓬ ꓠꓹ ꓟ ꓐꓱ ꓶ ꓙꓽ ꓖꓶ ꓔ ꓥˍ ꓟꓲ꓾ ꓞꓳ ꓤ ꓠꓬ ꓝꓴꓲꓸ ꓬꓰ ꓗꓷ ꓟ ꓑꓶꓸ ꓓꓴ ꓬꓲ ꓔꓯˍ ꓐꓰ ꓧꓹ ꓙꓰꓳ= ꓟꓴꓽ ꓗꓪ ꓗꓴꓷꓼ ꓗ ꓘꓶꓽ ꓠꓬ ꓚꓵꓸ ꓗꓷꓳ= ꓕꓱ ꓟ ꓔꓯ ꓣꓳ ꓡꓳꓸ ꓟꓳˍ ꓡꓳ= ꓞꓳ ꓤ ꓥ ꓕ ꓑꓳꓸꓼ ꓥ ꓟꓲ ꓬꓲ ꓚꓰ ꓬꓲ ꓪꓴꓸ ꓝꓴꓲꓸ ꓗꓪ ꓐꓰ ꓮ ꓙꓵꓽ ꓠꓬ ꓝꓴꓲꓸ ꓠꓯꓸꓼ ꓗꓪ ꓓꓵꓽ ꓙꓰꓳ= ꓠꓲꓽ ꓢ ꓓꓯ ꓠꓯꓸꓼ ꓗꓪ ꓓꓵꓽ ꓙꓰꓳ= ꓣꓳ ꓮ ꓡꓲ ꓘꓶ ꓛꓲ ꓢꓯꓼ ꓕꓵꓼˍ ꓥˍ ꓟꓲ ꓙꓲꓻˍ ꓟ ꓢꓯꓼ ꓕꓵꓼˍ ꓥ ꓟꓲ ꓪꓴ-ꓢ ꓟꓲꓽ ꓙꓬ ꓗꓪ ꓔꓱꓹ ꓚꓵˍ ꓟ ꓒꓬꓱꓼ ꓡ ꓟꓽ ꓓꓻꓳ= 

ꓖꓳ ꓡꓱ ꓐꓯ ꓥ ꓟꓲ ꓦꓬꓼ ꓠꓬꓲ ꓛꓲ ꓡ ꓕꓯ ꓢꓲ ꓒ ꓬꓰ-ꓢꓴ ꓛꓲ ꓡ ꓟ ꓔꓯ ꓣꓳ ꓢꓷꓸ ꓪ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲ ꓠꓽ ꓣꓳ ꓠ ꓠꓹ ꓓꓴ ꓗꓪ ꓠꓬ ꓬꓲ ꓚꓰ ꓬꓲ ꓪꓴꓸ ꓗꓪ ꓪꓴ-ꓢ ꓠꓬ ꓞꓳ ꓤ ꓔꓯ ꓮ ꓡꓲ ꓐꓰ ꓬꓲ ꓔꓶ ꓙꓱꓼ ꓗꓶ ꓔ ꓟ ꓐꓰ꓾ ꓞꓳ ꓤ ꓠꓬ ꓮ ꓡꓲ ꓬꓰ ꓗꓷ ꓗ ꓠꓯꓸ ꓠꓲꓽ ꓢ ꓓꓯ ꓡꓯꓽ ꓒꓯꓹ ꓛꓲ ꓗꓪ ꓓꓵꓽ ꓙꓰ ꓟ ꓐꓰ꓾ ꓞꓳ ꓤ ꓥ ꓕ ꓑꓳꓸꓼ ꓠꓬ ꓟꓽ ꓙꓲꓻ ꓟ ꓟꓽ ꓔꓱꓹ ꓟ ꓠꓯꓸꓼ ꓘꓴ ꓗꓪ ꓓꓵꓽ ꓙꓰ ꓢꓲ ꓠꓬꓲ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓚꓬꓴꓸ ꓟꓽ ꓐ ꓡ ꓟ ꓦꓬꓼ ꓠꓬꓲ ꓗꓪ ꓛꓲ ꓬꓰꓳ ꓐꓯ ꓟ ꓣꓳꓽ ꓡꓳꓸ ꓟꓳꓻˍ ꓡꓳ=