ꓐꓯ ꓘꓶꓽ ꓠꓬ ꓧꓪꓽ ꓖꓳ ꓓꓱꓽ ꓒꓬꓱꓼ ꓡ ꓟ ꓚꓱꓹ

ꓐꓯ ꓘꓶꓽ ꓥ ꓟ ꓢꓲ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓒꓬꓱꓼ ꓡˍ ꓡ ꓐꓯ ꓟ ꓔꓯ ꓣꓳ ꓠ ꓠꓹ ꓓꓴ ꓬꓰ ꓡꓯ= ꓬꓳ-ꓦ 1ꓽ1 ꓗꓪ ꓐꓯ ꓘꓶꓽ ꓠꓬ ꓧꓪꓽ ꓖꓳ ꓓꓱꓽ ꓒꓬꓱꓼ ꓡˍ ꓡꓳ꓾ ꓐꓰ ꓐꓳ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓐꓯ ꓘꓶꓽ ꓥ ꓡꓳ= ꓪꓴ-ꓢ ꓐꓯ ꓘꓶꓽ꓾ ꓬꓲ ꓚꓲꓸ ꓛꓬ ꓡꓰ ꓐꓯ ꓘꓶꓽ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓟꓲ ꓠꓯ ꓞꓳ ꓤ ꓕꓲ ꓣꓳ ꓒꓬꓱꓼ ꓡꓺꓳ= ꓧꓪꓽ ꓖꓳ ꓓꓱꓽ ꓒꓬꓱꓼ ꓡꓺꓳ= ꓮ ꓫꓵꓽ ꓑꓶꓸ ꓓꓴ ꓟꓲ ꓠꓯ ꓧꓪꓽ ꓖꓳ ꓓꓱꓽ ꓒꓬꓱꓼ ꓡˍ ꓡ꓾ ꓐꓯ ꓟ ꓣꓳ ꓡꓳꓸ ꓠꓬꓲ ꓡꓯ=

ꓣꓳ ꓙꓵꓻ ꓠꓲꓹ꓾ ꓣꓳ ꓣꓷꓠꓸˍ ꓟ ꓙꓵꓻ ꓠꓲꓹ ꓘꓴꓽ ꓗꓪ ꓝꓳꓣ ꓴꓢ ꓟꓮꓠ ꓮꓠꓓ ꓝꓳꓣ ꓳꓴꓣ ꓢꓮꓡꓦꓮꓔꓲꓳꓠ ꓐꓰ ꓐꓯ ꓟ꓾ ꓞꓳ ꓤ ꓐꓱ ꓶ ꓐꓰ ꓣꓳ ꓚꓬꓴꓸ ꓟꓶ ꓠꓹ ꓟ ꓐꓱ ꓶ ꓐꓯ ꓢꓲ ꓠꓬꓲ ꓕꓲ ꓠꓽ ꓡꓰ ꓕꓲ ꓠꓽ ꓠꓽ-ꓦꓬꓼ-ꓠꓬꓲ ꓗꓪ ꓣꓳ ꓣꓷꓠꓸ ꓔꓬ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓐꓰ ꓣꓳ ꓚꓬꓴꓸ ꓟꓶ ꓠꓹ ꓟ ꓐꓱ ꓶ ꓬꓲ ꓬꓯꓼ ꓡ ꓟ ꓥ ꓡꓳ= ꓬꓲ ꓠꓬ ꓮ ꓡꓲ ꓬꓰ ꓢꓲ ꓣꓳ ꓔꓯ ꓚꓬꓴꓸ ꓙ ꓡˍ ꓡ= ꓮ ꓠꓱ ꓮ-ꓓꓯ ꓰ-ꓪ ꓬꓰ ꓗꓷ ꓟ ꓝꓴꓲꓸ ꓗꓪ ꓐꓰ ꓣꓳ ꓠꓲꓹ ꓟ ꓘꓴꓽ ꓠꓯꓸꓼ ꓗꓪ ꓓꓵˍ ꓟ ꓝꓴꓲꓸ ꓔꓯ ꓬꓲ ꓡꓰ ꓣꓴ ꓦ ꓖꓶ ꓠꓹ ꓟ ꓐꓱ ꓶ ꓬꓯꓼ ꓡˍ ꓡꓳ= ꓖꓳ ꓟ ꓔꓯ ꓣꓳ ꓐꓱ ꓶ ꓬꓲ ꓠꓬ ꓫꓸ ꓙꓵꓻ ꓜꓶꓽ ꓢꓲ ꓠꓬꓲ꓾ ꓣꓳ ꓐꓱ ꓶ ꓫꓵꓻ ꓙ ꓢꓲ ꓠꓬꓲ꓾ ꓣꓳ ꓠꓬ ꓪꓴ-ꓢ ꓐꓰ ꓙꓻ ꓡꓯ ꓘꓳˍ ꓟ ꓟꓶ ꓠꓹ ꓟ ꓬꓲ ꓬꓯꓼ ꓡˍ ꓡꓳ=

ꓮ ꓠꓱ ꓬꓲ ꓚꓰꓺ ꓬꓲ ꓪꓴꓸ ꓪꓴ-ꓢ ꓐꓰ ꓞꓳ ꓤ ꓠꓬ ꓙꓻ ꓡꓯ ꓘꓳˍ ꓟ ꓟꓽ ꓙꓳ= ꓖꓳ ꓡꓯ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓬꓯꓼ ꓡˍ ꓟ ꓗꓪ ꓐꓰ ꓪꓴ-ꓢ ꓐꓰ ꓞꓳ ꓤ ꓠꓬ ꓙꓻ ꓡꓯ ꓘꓳ ꓟꓶ ꓡꓰꓳ=ꓣꓰꓚꓳꓠꓚꓲꓡꓰ ꓐꓰ ꓐꓯˍ ꓟ ꓮ ꓠꓱ ꓕꓯ ꓝꓴꓲꓸ ꓪꓴꓸ ꓠꓬꓲ ꓪꓴ-ꓢ ꓐꓰ ꓞꓳ ꓤ ꓗꓶꓹ ꓶꓽ ꓓꓹ ꓟ꓾ ꓠꓬꓲꓸ ꓠꓬꓲ ꓠꓬ ꓢꓲ ꓒ ꓬꓰ-ꓢꓴ ꓗꓪ ꓐꓰ ꓝꓮꓲ ꓕꓲ ꓧꓪꓹ ꓠꓶꓽ ꓡꓯ ꓘꓳ ꓡꓱꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓚꓬꓴꓸ ꓟꓶˍ ꓟ ꓟꓶ ꓡꓰꓳ= ꓝꓮꓲ ꓐꓯ ꓘꓶꓽ ꓕꓯ ꓟ ꓞꓳ ꓤ ꓒꓬꓱꓼ ꓡˍ ꓟ ꓠꓬ ꓣꓳ ꓠꓬ ꓪꓴ-ꓢ ꓠꓵ ꓠꓲꓹ ꓔꓯ ꓢꓷꓸ ꓠꓹ ꓟ ꓥ ꓡꓳ= ꓐꓹ ꓐ ꓪꓴ-ꓢ ꓠꓬ ꓞꓳ ꓤ ꓔꓯ ꓮ ꓡꓲ ꓘꓶ ꓛꓲ ꓠꓲꓹ ꓠꓵˍ ꓟ꓾ ꓞꓳ ꓤ ꓔꓯ ꓮ ꓡꓲ ꓘꓶ ꓛꓲ ꓠꓲꓹ ꓟ ꓠꓻˍ ꓟ ꓬꓲ ꓤ ꓤ-ꓔꓲꓸ ꓔꓯ ꓝꓲ ꓩꓴ ꓡˍ ꓟ ꓗꓪ ꓐꓰ ꓣꓳ ꓡꓳꓸ ꓟꓳˍ ꓡꓳ= ꓬꓳ-ꓦ 3ꓽ16 ꓗꓪ “ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓢꓷꓸ ꓡꓰ ꓓꓴ ꓕꓲ ꓣꓳˍ ꓟ ꓬꓲ ꓤ ꓔꓲꓸ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓗꓷˍ ꓗꓪ ꓛꓲˍ ꓟꓲ ꓠꓯ ꓞꓳ ꓤ ꓔꓯ ꓠꓲ ꓠꓵˍ ꓡꓳ꓾” ꓐꓰ ꓐꓳ ꓔ ꓡꓳ=

ꓐꓹ ꓐ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓕꓲ ꓣꓳˍ ꓟ ꓬꓲ ꓤ ꓔꓲꓸ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡˍ ꓡꓳ= ꓬꓲ ꓤ ꓔꓲꓸ ꓠꓬ ꓟꓲ ꓠꓯ ꓧꓪꓽ ꓖꓳ ꓓꓱꓽ ꓒꓬꓱꓼ ꓡˍ ꓟ ꓗꓪ ꓐꓰ ꓪꓴ-ꓢ ꓠꓵꓻ ꓠꓲꓹ ꓔꓯ ꓣꓳ ꓢꓷꓸ ꓪ ꓡꓰꓳ=

ꓝꓮꓲ ꓢꓲ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓬꓯꓼ ꓡˍ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯꓺ ꓢꓳ ꓓꓴ ꓙꓲꓻ ꓫꓬ ꓟ ꓔꓯꓺ ꓐꓬꓱꓽ ꓕꓲ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓥꓪ ꓶꓻ ꓔꓯ ꓠꓴ ꓑꓱꓸ꓾ ꓥꓪ ꓶꓻ ꓠꓬ ꓡꓳꓻˍ ꓡꓳ ꓐꓰ ꓐꓯ ꓔ ꓟ ꓡꓰ ꓐꓰ꓾ ꓝꓮꓲ ꓢꓲ ꓒ ꓬꓰ-ꓢꓴ ꓠꓬ “ꓥꓪ ꓠꓬ ꓙꓻ ꓖꓴ ꓥ ꓡꓳ= ꓥꓪ ꓠꓬ ꓔꓱꓹ ꓜꓳꓽˍ ꓟ ꓥ ꓡꓳ= ꓥꓪ ꓠꓬ ꓢꓯꓼ ꓟꓬ ꓥ ꓡꓳ= ꓥꓪ ꓔꓯ ꓐꓰ ꓟꓽ ꓥ ꓠꓬ ꓮꓽ ꓟ ꓥˍ ꓟꓲ ꓐꓹ ꓐ ꓔꓬ ꓗꓪ ꓛꓲ ꓬꓰ ꓟꓽ ꓐ ꓡ꓾” ꓐꓰ ꓬꓲ ꓡꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓞꓳ ꓤ ꓥ ꓕ ꓑꓳꓸꓼ ꓔꓯ ꓢꓳ ꓓꓴ ꓥ ꓟ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓔꓯ ꓢꓳ ꓠ ꓗꓹ ꓡꓳ= ꓬꓲ ꓗꓪ ꓐꓰ ꓡꓰꓽ ꓣꓳ ꓠꓬ ꓢꓲꓽ ꓫꓬ ꓟ ꓟꓶˍ ꓡꓳ= ꓣꓳ ꓢꓯꓼ ꓪ ꓗꓪ ꓐꓰ ꓢꓲꓽ ꓫꓬˍ ꓟ ꓟꓶ ꓟꓽ ꓓꓻ= ꓬꓲ ꓗꓪ ꓐꓰ ꓡꓰꓽ ꓣꓳ ꓠꓬ ꓪꓴ-ꓢ ꓟꓬ ꓢꓶꓽ ꓗꓪ ꓐꓰ ꓒꓵꓽˍ ꓟ ꓚꓬꓹ ꓟꓶˍ ꓟ ꓥ ꓡꓳ=

ꓝꓮꓲ ꓢꓲ ꓒ ꓬꓰ-ꓢꓴ ꓬꓲ ꓟꓲ ꓠꓯ ꓧꓪꓽ ꓖꓳ ꓓꓱꓽ ꓒꓬꓱꓼ ꓡˍ ꓟ ꓗꓪ ꓐꓰ ꓣꓳ ꓥˍ ꓟꓲ ꓪꓴ-ꓢ ꓬꓲ ꓡꓯꓼ ꓪ ꓔꓯ ꓘꓳꓹ ꓣꓴ ꓟꓶ ꓢꓴ꓾ ꓑꓯꓹ ꓟꓶ ꓢꓴ ꓒꓬꓱꓼ ꓡˍ ꓡꓳ= ꓣꓳ ꓠꓬ ꓪꓴ-ꓢ ꓬꓲ ꓠꓯꓸꓼ ꓗꓪ ꓓꓵꓽ ꓙꓰ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓗꓪ ꓐꓰ ꓪꓴ-ꓢ ꓬꓲꓸ ꓡꓯꓼ ꓪ ꓣꓳ ꓠꓯꓸꓼ ꓗꓪ ꓓꓵꓽ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ꓾ ꓢꓲ ꓒ ꓬꓰ-ꓢꓴ ꓔꓯ ꓥꓳ ꓡꓳꓸ ꓢꓴ ꓠꓬ꓾ ꓚꓵ ꓚꓵ ꓬꓲ ꓠꓬ ꓣꓳ ꓐꓰ ꓔꓬ ꓡꓳ ꓐꓯ ꓟ ꓔꓯ ꓙꓵꓻ ꓠ ꓗꓹ ꓡꓳ=

ꓮ ꓡꓲꓳ ꓐꓯ ꓠꓬ꓾ ꓬꓲ ꓗꓪ ꓐꓰ ꓡꓰꓽ ꓣꓳ ꓠꓬ ꓢꓲꓽ ꓫꓬ ꓟ ꓟꓶ ꓢꓲ ꓠꓬꓲ꓾ ꓬꓲ ꓗꓪ ꓐꓰ ꓡꓰꓽ ꓣꓳ ꓠꓬ ꓢꓯꓼ ꓟꓬ ꓟꓶˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓚꓵ ꓚꓵ ꓠꓴꓻ ꓐꓰ ꓥꓪ ꓟꓲꓽ ꓙꓬ ꓗꓪ ꓔꓬ ꓡꓳ= ꓐꓯ ꓘꓶꓽ ꓠꓬ ꓧꓪꓽ ꓖꓳ ꓓꓱꓽ ꓒꓬꓱꓼ ꓡ ꓟ ꓪꓴ-ꓢ ꓠꓬ ꓠꓬꓲꓸ ꓠꓬꓲ ꓠꓴꓻ ꓐꓰ ꓥꓪ ꓐꓱ ꓶ ꓮ ꓕꓯ ꓥˍ ꓟꓲ ꓣꓳ ꓒ ꓕꓲꓺ ꓗꓪ ꓔꓬ ꓡꓳ ꓐꓯ ꓟ ꓔꓯ ꓙꓵꓻ ꓢꓲ ꓠꓬꓲ꓾ ꓢꓲ ꓒ ꓬꓰ-ꓢꓴ ꓔꓯ ꓪ ꓙꓲ ꓙꓵꓻ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=