ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓬꓲ ꓫꓵ ꓠꓲꓹ ꓟ ꓑꓮꓲꓽ ꓦꓬꓼ ꓠꓬꓲ (The most sacred heart of Jesus )

#creditphoto #The most Sacred Heart of Jesus

Sunday, June 09, 2024

ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓬꓲ ꓫꓵ ꓠꓲꓹ ꓟ ꓑꓮꓲꓽ ꓦꓬꓼ ꓠꓬꓲ (The most sacred heart of Jesus )

ꓠꓬꓲꓸ ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓬꓲ ꓫꓵꓸ ꓠꓲꓹ ꓟ ꓑꓮꓲꓼ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲꓸ ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠꓹ ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ˗ꓦ ꓕꓳ ꓶ (19ꓽ 31˗37) ꓝꓲ ꓥ ꓛꓲ ꓥ ꓢꓲ ꓠꓬꓲ ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓔꓯ ꓣꓳ˗ꓟ ꓟꓯ ꓕꓲ ꓣꓳ ꓡꓰ ꓐꓽ ꓥꓷꓹ ꓡꓰ ꓬꓲ ꓙꓳꓽ ꓐꓬ ꓗꓪ ꓗ ꓸꓗꓷ ꓟ ꓢꓲꓽ ꓫꓬ ꓕꓳ ꓶ ꓝꓲꓸ ꓥ ꓡꓳ꓿

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ˗ꓢꓴ ꓡꓰ ꓠꓴ ꓠꓪ ꓔꓯ ꓮ ꓟꓬꓹ ꓗꓪ ꓛꓲ ꓠꓲꓹ ꓠꓵ ꓟ ꓔꓯ ꓟꓸ ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ˗ꓢꓴ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓮ ꓟꓬꓹ ꓛꓲ ꓠꓲꓹ ꓠꓵ ꓟ ꓬꓲ ꓫꓵꓻ ꓗꓪ ꓛꓲ ꓠꓲꓹ ꓠꓵ ꓟ ꓔꓯ ꓟꓸ ꓖꓶ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ˗ꓢꓴ ꓬꓲ ꓫꓵꓸ ꓠꓲꓹ ꓑꓮꓲꓽ ꓠꓬ ꓗꓳꓸ ꓗꓷ ꓟ (1647˗1690) ꓘꓳꓼ ꓕꓯ ꓙꓲꓻ ꓫꓬ ꓢꓴ ꓟꓮꓣꓖꓮꓣꓲꓔ ꓟꓮꓣꓲꓮ ꓟꓬꓱꓺ ꓔ ꓢꓴ ꓔꓯ ꓢꓲꓺ ꓒ ꓬꓰ˗ꓢꓴ ꓠꓬ ꓮ ꓟꓬꓹ ꓧꓪ ꓦꓻ ꓐꓬꓱ ꓗꓪ ꓐꓰ ꓡꓳꓸ ꓟꓳ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓮ ꓙꓵꓽ ꓬꓲ ꓫꓵꓸ ꓠꓲꓹ ꓟ ꓔꓯ ꓞꓳ ꓒꓵꓽ ꓠꓹ ꓟ ꓟꓸ ꓖꓶ ꓠꓹ ꓟ ꓐꓯ ꓟꓸ ꓖꓶ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ˗ꓢꓴ ꓡꓰ ꓢꓲꓽ ꓫꓬ ꓢꓴ ꓟꓮꓣꓲꓮ ꓔꓯ ꓬꓲ ꓠꓲꓹ ꓟ ꓔꓯ ꓟꓸ ꓖꓶ ꓟ ꓙꓵꓹ ꓕꓯ ꓬꓲ ꓠꓲꓹ ꓟ ꓠꓬ ꓮ ꓔꓳꓸ ꓗꓪ ꓐꓰ ꓛꓳꓽ ꓤ ꓟ ꓔꓯ ꓟꓸ ꓖꓶ ꓗꓷ ꓟ ꓥ ꓡꓳ꓿ 1856 ꓘꓳꓼ ꓕꓯ ꓢꓲꓺ ꓒ ꓪ ꓔꓲ ꓑꓲꓴꓢ (9) ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵ. ꓠꓲ, ꓟ ꓑꓮꓲꓽ ꓦꓬꓼ ꓠꓬꓲ ꓔꓯ ꓕꓲ ꓟꓲ ꓠꓯ ꓡꓱ ꓗꓪ ꓬꓰ ꓠ, ꓟ ꓐꓯ ꓑꓶ ꓗꓷ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ˗ꓢꓴ ꓠꓬ ꓮ ꓫꓵꓽ ꓑꓶꓸ ꓓꓴ ꓬꓲ ꓫꓵꓸ ꓠꓲꓹ ꓟ ꓔꓯ ꓞꓳ ꓒꓴ ꓠꓹ ꓟ ꓟꓸ ꓖꓶ ꓡ ꓠꓬ ꓐꓯ ꓠꓬ 1ꓸ ꓣꓳ ꓟꓲ ꓠꓯ ꓡ ꓞꓳ ꓐꓴ ꓛꓬꓹ ꓡꓰ ꓟ ꓥꓳꓽ ꓡꓰ ꓟ ꓝꓴꓲ ꓗꓪ ꓐꓰ ꓓꓴ ꓙ ꓒꓳꓹ ꓡꓶ ꓡ ꓢꓲ ꓠꓬꓲ ꓬꓲ ꓠꓯꓹ ꓗꓪ ꓡ ꓠꓹ ꓟ 2ꓸ ꓙꓲˍ ꓟ ꓟꓬꓱꓽ ꓔꓯ ꓢꓯꓼ ꓕꓵꓼ ꓢꓲ ꓠꓬꓲ ꓬꓰˍ ꓠꓹ ꓟ 3ꓸ ꓚꓬꓴ ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓠꓲꓹ ꓟ ꓐꓰ ꓣꓳ ꓚꓲꓸ ꓛꓬ ꓠꓲꓹ ꓟ ꓥ ꓟꓲ ꓢꓲꓺ ꓒ ꓠꓲꓹ ꓟ ꓫꓱꓹ ꓡꓯꓽ ꓘꓳꓹ ꓟ ꓙꓳˍ ꓠꓹ ꓟ ꓢꓯꓼ ꓕꓵꓼ ꓠꓹ ꓐꓱ ꓶ ꓥ ꓡꓳ꓿

ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓫꓵꓸ ꓠꓲꓹ ꓟ ꓠꓯˍ ꓗꓪ ꓐꓰ ꓣꓳ ꓟꓲ ꓠꓯ ꓡ ꓞꓳ ꓔꓯ ꓪꓴ˗ꓢ ꓮ ꓟꓬꓹ ꓛꓲ ꓠꓲꓹ ꓟ ꓚꓱꓹ ꓔꓯ ꓟꓸ ꓖꓶ ꓔ ꓡꓳ꓿ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓢꓲꓺ ꓒ ꓬꓰ˗ꓢꓴ ꓙꓲ˗ꓢꓴ ꓬꓲ ꓠꓵꓻ ꓠꓲꓹ ꓔꓯ ꓖꓶ ꓔꓬ ꓟ ꓔꓯ ꓣꓴ ꓠꓹ ꓟ ꓘꓴꓽ ꓔꓬ ꓟ ꓥ ꓡꓳ꓿ ꓬꓲ ꓠꓯꓹ ꓗꓪ ꓡ ꓢꓲ ꓠꓬꓲ ꓬꓲ ꓔꓯ ꓧꓪ ꓹꓠꓹ ꓟ ꓢꓲꓺ ꓒ ꓠꓬ ꓠꓴ ꓥꓪ ꓔꓯ ꓘꓴꓽ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ˗ꓢꓴ ꓠꓬ ꓬꓲ ꓠꓵꓻ ꓠꓲꓹ ꓔꓯ ꓣꓳ ꓔꓯ ꓧꓳꓽ ꓔ ꓢꓲ ꓠꓬꓲ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓬꓲ ꓐꓰ ꓕꓲ ꓪ ꓙ ꓫꓱꓹ ꓠꓹ ꓟ ꓝꓮꓲ ꓟꓲ ꓠꓯ ꓠꓲꓹ ꓫ ꓟꓬꓹ ꓫ ꓓꓴ ꓔꓳꓹ ꓜꓳ ꓡ ꓟ ꓙꓵꓹ ꓔꓯ ꓥ ꓟꓲ ꓠꓲꓹ ꓟ ꓟꓽ ꓐꓬ ꓡꓰ ꓠꓹ ꓟ ꓐꓯ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ˗ꓢꓴ ꓠꓵꓹ ꓠꓲꓹ ꓠꓬ ꓮꓸ ꓔꓳ ꓡꓰ ꓐꓰ ꓔ ꓟ ꓠꓵꓻ ꓠꓲꓹ ꓔꓯ ꓮ ꓫꓵꓽ ꓥ ꓟꓲ ꓗꓽ ꓕꓽ ꓟꓽ ꓐ ꓡ ꓿ ꓣꓳ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓔꓯ ꓬꓲ ꓠꓵꓻ ꓠꓲꓹ ꓔꓯ ꓘꓳꓹ ꓣꓴ ꓠꓹ ꓟ ꓐꓰ ꓬꓲ ꓠꓵꓻ ꓠꓲꓹ ꓔꓯ ꓧꓳꓽ ꓔ ꓠꓹ ꓟ ꓣꓳ ꓘꓴꓽ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓠꓵꓻ ꓠꓲꓹ ꓠꓬ ꓮ ꓟꓬ ꓛꓲ ꓪꓴꓽ ꓡꓳ ꓬꓰ ꓟ ꓔꓯ ꓣꓳ ꓚꓵ ꓚꓵ ꓢꓷꓸ ꓠꓲꓹ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓠꓬꓲꓸ ꓠꓬꓲ ꓗꓪ ꓐꓰ ꓣꓳ ꓠꓲꓹ ꓟ ꓔꓯ ꓥ ꓟꓲ ꓒꓵꓽ ꓡꓳ ꓬꓰ ꓟ ꓢꓲꓺ ꓒ ꓠꓲꓹ ꓟ ꓐꓰ ꓫꓱꓹ ꓡꓯ ꓘꓳꓹ ꓠꓹ ꓟ ꓐꓰ ꓪꓽ ꓡꓯ ꓘꓳꓹ ꓠꓹ ꓟ ꓢꓯꓼ ꓕꓵ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ (ꓖꓳ ꓡꓱ ꓥ ꓟꓲ ꓟꓯꓼ ꓒꓽ ꓕꓲ ꓣꓳ ꓠꓬ ꓡꓰ ꓐꓽ ꓥꓷ, ꓡꓰ ꓬꓲ ꓙꓳꓽ ꓐꓬ ꓗꓪ ꓗ. ꓗꓷ ꓠꓬ ꓫꓵꓽ ꓐꓰ ꓐꓰ ꓬꓲꓻ ꓙꓬ ꓓꓳ ꓡˍ ꓡꓳ꓿ Q1