ꓠꓴ ꓪ ꓠꓬ ꓟꓲ ꓠꓯ ꓞꓼ ꓐꓳ꓾ ꓟꓲ ꓠꓯ ꓠꓬꓲ ꓟꓳꓻ ꓓꓴ ꓥ ꓡꓳ

“ꓠꓴ ꓪ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓴ ꓐꓱ ꓶ ꓞꓼ ꓐꓳ ꓥ ꓡꓳ= ꓠꓴ ꓪ ꓠꓬ ꓟꓲ ꓠꓯ ꓞꓳ ꓤ ꓐꓱ ꓶ ꓠꓬꓲ ꓟꓳꓻ ꓓꓴ ꓥ ꓡꓳ= (ꓟ-ꓕꓲ 5ꓽ13ꓹ14)” ꓗꓪ ꓐꓯ ꓔ ꓡꓳ=

ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓠꓬ ꓣꓳ ꓥ ꓡꓳ ꓐꓰ ꓐꓯ ꓕꓯ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓠꓬ ꓮ ꓫꓵꓽ ꓔꓯ ꓐꓯ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲˍ ꓡ?

ꓣꓳ ꓕꓱ ꓡꓱ ꓓꓵꓽ ꓙꓽ ꓡꓯ= ꓣꓳ ꓠꓬ ꓮ ꓘꓶꓸ ꓜꓽ ꓙꓲꓻˍ ꓟ ꓜꓽ ꓟꓲˍ ꓟ ꓪꓳꓽ ꓒꓬꓽ ꓕꓲ ꓗꓶꓸ ꓚꓬꓸ ꓔꓬ ꓡꓳ꓾ ꓐꓰ ꓓꓵꓽ ꓙ ꓠꓬꓲ ꓡꓯ= ꓫꓵꓽ ꓫꓵ ꓮ ꓟꓬꓹ ꓙꓵꓹ ꓚꓬꓸ ꓗꓷ ꓗ ꓠꓯꓸ ꓜꓽ ꓠꓬꓲ ꓗꓷ ꓕꓯ ꓞꓼ ꓐꓳ ꓟꓽ ꓡꓳꓼ ꓕꓯ ꓠꓬ ꓪꓳꓽ ꓒꓬꓽ ꓖꓳ ꓟ ꓮ ꓘꓶꓸ ꓒꓵꓽˍ ꓟ ꓮ ꓫꓵꓽ ꓔꓯ ꓚꓬꓸ ꓔ ꓥˍ ꓟꓲ ꓜꓽ ꓟꓽ ꓙꓲꓻ ꓜꓽ ꓟꓽ ꓟꓲ= ꓖꓳ ꓡꓱ ꓥˍ ꓟꓲ ꓞꓼ ꓐꓳ ꓧꓳꓽ ꓡꓳꓼ ꓡꓰ ꓕꓯ ꓠꓽ ꓮ ꓘꓶꓸ ꓜꓽ ꓙꓲˍ ꓟ ꓜꓽ ꓟꓲꓽˍ ꓟ ꓪꓳꓽ ꓒꓬꓽ ꓕꓲ ꓗꓶꓸ ꓒꓬꓱꓼ ꓡꓺꓳ=

ꓟꓽ ꓥ ꓠꓬ꓾ ꓢꓲꓹ ꓠꓯ ꓗꓪ ꓙꓽ ꓖꓴ ꓫꓱꓽ ꓔꓬ ꓡꓳ ꓐꓰ ꓓꓵꓽ ꓙꓽ ꓠꓬꓲ ꓡꓯ= ꓢꓲꓹ ꓠꓯ ꓗꓪ ꓚꓳꓸ ꓓꓳ ꓙꓰ ꓔꓬ ꓕꓯ ꓟꓲꓽ ꓟꓲ ꓓꓵꓽꓡꓰ ꓠꓬ ꓮ ꓤ ꓤ ꓠꓯ ꓞꓲ ꓡꓺꓳ= ꓖꓳ ꓡꓱ ꓠꓬꓲ ꓙꓽ ꓖꓴ ꓥˍ ꓟꓲ ꓫꓵ ꓫꓵˍ ꓒꓲꓼ ꓡꓰ ꓔꓬꓳ= ꓟꓴ ꓗꓴꓸ ꓫꓴꓸ ꓔꓬ ꓟ ꓑꓶꓸ ꓓꓴ ꓦ ꓐ ꓛꓲ꓾ ꓗꓴ ꓤ ꓔꓯˍ ꓟꓲ ꓟꓽ ꓟꓳꓻꓳ= ꓟꓲꓽ ꓟꓲ ꓓꓵꓽ ꓡꓰ ꓗ ꓠꓯꓸ ꓫꓵꓽ ꓫꓵ ꓕꓲ ꓐꓶꓽ ꓛꓲ ꓕꓯ ꓦ ꓐ ꓛꓲ ꓡꓬꓸ ꓡ ꓠꓬꓲ꓾ ꓞꓼ ꓐꓰ ꓙꓰ ꓔꓬ ꓟ ꓙ ꓖꓴ ꓔꓯ ꓡꓬꓸ ꓖꓶ ꓡ ꓢꓲ꓾ ꓠꓯ ꓞꓲꓹˍ ꓟ ꓢꓲꓹ ꓠꓯ ꓗꓪ ꓟ ꓙ ꓖꓴ ꓔꓯ ꓫꓬꓽ ꓫꓬꓽ ꓡꓰ ꓟꓳꓻ ꓐ ꓡꓺꓳ=

ꓔꓯ ꓐꓬꓱꓽ ꓕꓱ ꓠꓬꓲꓽ ꓟ ꓠꓬ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓬꓲ ꓬꓳꓸ ꓚꓵˍ ꓟ ꓔꓯ ꓣꓳ ꓔꓯ ꓖꓴ ꓟꓳꓸ ꓖꓶ ꓡ ꓔꓬ ꓡꓳ= ꓞꓼ ꓐꓳ ꓮ ꓔꓲꓸ ꓤ꓾ ꓠꓬꓲ ꓟꓳꓻ ꓓꓴ ꓮ ꓔꓲꓸ ꓤ ꓥˍ ꓟꓲ ꓮ ꓙꓵꓽ ꓔꓯ ꓡꓶꓸ ꓗꓷ ꓐ ꓡˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓙꓵꓻ ꓠꓲꓹ ꓗꓪ ꓥˍ ꓟꓲ ꓖꓳ ꓟˍ ꓡꓰ ꓐꓰ ꓥꓳ= ꓣꓳ ꓞꓳ ꓙꓳ ꓔꓬ ꓟ ꓟꓲ ꓠꓯ ꓕꓱ ꓟ ꓠꓬ ꓮ ꓟꓬꓹ ꓚꓱꓹ ꓗꓪ ꓐꓰ ꓠꓯ ꓞꓲ ꓓꓹˍ ꓡꓳ= ꓟꓲ ꓠꓯ ꓠꓬ ꓥꓶˍ ꓟ ꓬꓲ ꓫꓵꓽ ꓬꓲ ꓙꓰꓽ ꓪꓴꓸ ꓠꓬꓲ ꓠꓯ ꓞꓲꓹ ꓠꓯ ꓕꓳꓹ ꓔꓬ ꓡꓳ= ꓠꓵꓻ ꓠꓲꓹ ꓐꓰ ꓫꓱꓸ ꓤ ꓠꓲꓹ ꓥˍ ꓟꓲ ꓟꓽ ꓡꓳꓼ= ꓪꓴ-ꓢ ꓠꓬ ꓣꓳ ꓐꓴ ꓔꓯ ꓠꓵꓻ ꓠꓲꓹ ꓐꓰ ꓫꓱꓸ ꓤ ꓠꓲꓹ ꓞꓼ ꓐꓳ ꓧꓳꓽ ꓖꓶ ꓠꓹ ꓟ ꓐꓰ ꓠꓯꓸ ꓐꓯ ꓢꓴ ꓬꓲ ꓪ ꓙ ꓖꓴ ꓚꓱꓹ ꓧꓪ ꓟꓳꓻ ꓐ ꓡ ꓠꓹ ꓟ ꓐꓱ ꓶ ꓠꓬꓲ ꓟꓳꓻ ꓓꓴ ꓤ ꓔꓯ ꓫꓬꓹ ꓠꓹ ꓟ ꓣꓳ ꓔꓯ ꓘꓴꓻ ꓔꓬ ꓡꓳ=

ꓦ ꓐ ꓛꓲ ꓠꓬ ꓬꓲ ꓚꓲꓸ ꓛꓬ ꓠꓬ ꓠꓬꓲ ꓟꓳꓻ ꓓꓴ ꓡꓬꓸ ꓖꓶ ꓟꓽ ꓐ ꓡ= ꓬꓲ ꓔꓯ ꓙꓳˍ ꓟ ꓠꓬꓲ ꓟꓳꓻ ꓓꓴ ꓠꓬ ꓟꓲꓽ ꓟꓲ ꓗꓪ ꓐꓰ ꓚꓵꓹ ꓣꓴ ꓔ ꓟ ꓥ ꓡꓳ= ꓖꓳ ꓟˍ ꓡꓰ ꓐꓰ ꓣꓳ ꓐꓴ ꓥˍ ꓟꓲ ꓠꓬꓲ ꓟꓳꓻ ꓓꓴ ꓬꓲ ꓚꓰꓺ ꓟꓽ ꓥ= ꓣꓳ ꓠꓬ ꓪꓴ-ꓢ ꓔꓯ ꓐꓰ ꓠꓬꓲ ꓟꓳꓻ ꓓꓴ ꓣꓴ ꓢꓲ ꓠꓯꓸ ꓐꓯ ꓢꓴ ꓔꓯ ꓡꓬꓸ ꓖꓶ ꓢꓴˍ ꓡꓰꓽ ꓥ ꓡꓳ= ꓪꓴ-ꓢ ꓠꓬ ꓬꓲ ꓠꓬꓲ ꓟꓳꓻ ꓓꓴ ꓔꓯ ꓣꓳ ꓗꓪ ꓐꓰ ꓡꓬꓸ ꓔꓬ ꓝꓲ ꓠꓲꓹ ꓫꓵˍ ꓠꓬꓲ ꓣꓳ ꓔꓯ ꓬꓲ ꓠꓬꓲ ꓟꓳꓻ ꓓꓴ ꓔꓯ ꓐꓱ ꓖꓶ ꓝꓲ ꓠꓲꓹ ꓫꓵ ꓔꓬ ꓡꓳ= ꓣꓳ ꓠꓬ ꓠꓬꓲ ꓟꓳꓻ ꓓꓴ ꓖꓳ ꓟ ꓔꓯ ꓒꓴ ꓗꓷˍ ꓕꓯ꓾ ꓬꓲ ꓠꓬ ꓣꓳ ꓔꓯ ꓬꓲ ꓡꓰ ꓢꓲ ꓔ ꓟ ꓚꓱꓹ ꓗꓪ ꓣꓱꓽ ꓠꓹ ꓟ ꓐꓱ ꓶ ꓬꓲ ꓙꓵꓹ ꓛꓲ ꓡˍ ꓕꓯ ꓟꓴ ꓗꓴꓸ ꓐꓴ ꓔꓯ ꓤꓸ ꓙꓰ ꓝꓲˍ ꓥꓳ= ꓣꓳ ꓠꓲꓹ ꓟ ꓔꓯ ꓒꓴ ꓔ ꓠꓹ ꓟ ꓠꓬ ꓣꓳ ꓶꓻ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓠꓹ ꓟ ꓠꓬ ꓣꓳ ꓠꓬ ꓮ ꓡꓲ ꓟꓬ ꓛꓲ ꓪꓴ-ꓢ ꓐꓱ ꓶ ꓙ ꓖꓴ ꓒꓴ ꓔ ꓖꓶˍ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓠ ꓗꓹ ꓡꓳ= ꓕꓲ ꓠꓬꓲˍ ꓡꓰ ꓪꓽ ꓘꓴ꓾ ꓖꓳ ꓡꓱ ꓠꓬ ꓪꓴ-ꓢ ꓬꓲ ꓠꓲꓹ ꓡꓶꓽ ꓙꓳˍ ꓟ ꓡꓰ ꓣꓳ ꓔꓯ ꓪꓴ-ꓢ ꓡꓰ ꓣꓱꓽ ꓡˍ ꓥꓳ= ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓣꓱꓽ ꓛꓰꓽ ꓟꓶ ꓠꓹ ꓟ ꓐꓱ ꓶ ꓣꓳ ꓚꓲꓸ ꓛꓬ ꓔꓯ ꓙꓽ ꓖꓶ ꓔ= ꓖꓳ ꓡꓱ ꓠꓬ ꓣꓳ ꓤꓶꓻ ꓠꓯꓸꓼ ꓗꓪ ꓬꓲ ꓣꓱꓽˍ ꓟ ꓚꓱꓹ ꓔꓯ ꓣꓳ ꓓꓵꓽ ꓙ ꓮ ꓡꓰˍ ꓥꓳ= ꓮ ꓘꓶꓸ ꓣꓳˍ ꓟ ꓣꓳꓽ ꓠꓬ ꓪꓴ-ꓢ ꓬꓲ ꓣꓱꓽ ꓛꓰꓽ ꓑꓶꓸ ꓓꓴ ꓣꓳꓽ ꓔꓯ ꓬꓲ ꓠꓲꓹ ꓡꓶꓽ ꓠꓯꓸꓼ ꓗꓪ ꓛꓳ ꓫꓱꓽ ꓐ ꓡ ꓝꓲˍ ꓟ ꓑꓶꓸ ꓓꓴ ꓖꓳ ꓟ ꓐꓱ ꓶ ꓣꓳ ꓠꓬ ꓓꓵꓽ ꓙ ꓮ ꓡꓰˍ ꓥꓳ= ꓣꓳ ꓟꓽ ꓐ ꓡꓺꓳ ꓐꓰ ꓓꓵꓽ ꓙ ꓔ ꓟ ꓔꓯˍ ꓟꓲ ꓬꓰ ꓐ ꓡˍ ꓥꓳ=

ꓠꓬꓲ ꓟꓳꓻ ꓓꓴ ꓢꓲꓺ ꓒꓽꓳ꓾ ꓥꓪ ꓔꓯ ꓠꓴ ꓣꓱꓽ ꓠꓹ ꓟ ꓐꓱ ꓶ ꓥꓪ ꓠꓲꓹ ꓫꓵˍ ꓡꓳ= ꓥꓪ ꓠꓬ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓒꓬꓱꓼ ꓠꓲꓹ ꓫꓵˍ ꓡꓳ= ꓥꓪ ꓠꓬ ꓟꓲ ꓠꓯ ꓕꓱ ꓟ ꓔꓯ ꓣꓱꓽ ꓙ ꓠꓲꓹ ꓫꓵˍ ꓡꓳ= ꓥꓪ ꓠꓬ ꓠꓴ ꓠꓲꓹ ꓡꓶꓽ ꓛꓳ ꓠꓹ ꓟ ꓐꓱ ꓶ ꓥꓪ ꓚꓲꓸ ꓛꓬ ꓡꓰ ꓠꓴ ꓔꓯ ꓖꓶˍ ꓡꓳ= ꓢꓲ ꓒ ꓬꓰ-ꓢꓴꓳ꓾ ꓥꓪ ꓠꓴꓻ ꓔꓯ ꓙꓵꓻˍ ꓡꓳ=