ꓕꓳꓽ ꓥꓳꓽ ꓐꓰ ꓬꓲꓻ ꓡꓯꓼ ꓟꓰꓼ ꓠꓽ ꓡꓰˍ ꓟ (Sunday reflection)

#rvalisu #creditphoto #Jesus #Trusting in God with storm

Sunday, June 23, 2024

ꓕꓳꓽ ꓥꓳꓽ ꓐꓰ ꓬꓲꓻ ꓡꓯꓼ ꓟꓰꓼ ꓠꓽ ꓡꓰˍ ꓟ (Sunday reflection)

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ ꓗꓪ ꓐꓰ (12) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ 4ꓽ35‐40 ꓝꓲ ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓐꓰ ꓕꓲ ꓪ ꓡꓲ ꓤꓶ ꓢꓲ ꓠꓬꓲ ꓖꓳ ꓐ ꓢꓲ ꓗꓪ ꓙꓰ ꓟ ꓙꓵ, ꓕꓯ ꓬꓲꓻ ꓡꓴ ꓐꓱ ꓗꓪ ꓕꓳꓽ ꓥꓳꓽ ꓙꓱ ꓡ ꓢꓴ ꓠꓬꓲ ꓡꓲ ꓗꓪ ꓬꓲꓻ ꓙꓬ ꓓꓵ ꓡ ꓢꓲ ꓠꓬꓲ ꓬꓲ ꓛꓳ ꓒꓯ, ꓐꓴ ꓠꓬ ꓮ ꓘꓶ. ꓛꓲ ꓙꓳꓺ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓚꓬꓴ ꓙ ꓠ, ꓟ ꓐꓯ ꓗꓷ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟꓲꓽ ꓦꓲ ꓔꓯ ꓢꓲ ꓡꓰ ꓐꓰ ꓠꓽ ꓡꓰ ꓐꓰ ꓐꓯ ꓗꓷ ꓟ ꓢꓲꓺ ꓒ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿

ꓝꓲ ꓓꓴ ꓐꓴ ꓠꓬ ꓬꓲꓻ ꓡꓴ ꓐꓱ ꓗꓪ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓕꓽ ꓙꓱꓼ ꓐꓰ ꓢꓲ ꓡꓲ ꓐꓰ ꓠꓽ ꓡꓰ ꓐꓰ ꓐꓯ ꓗꓷ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠ ꓠ, ꓡꓰ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓡꓰꓳ ꓫꓵꓽ ꓡ ꓞꓳ ꓥ ꓟ ꓔꓯ ꓮ ꓘꓶ. ꓛꓲ ꓓꓵ ꓙ ꓟꓶ ꓡꓰ ꓟ ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓕꓲ ꓣꓳ ꓛꓳ ꓕꓲ ꓤꓳ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓥ ꓟꓲ ꓟꓲ ꓠꓯ ꓕꓳꓽ ꓥꓳꓽ ꓮ ꓟꓬ, ꓙꓱ ꓡ ꓝꓮꓲ ꓓꓵ ꓙ ꓫ. ꓓꓴ ꓮ ꓟꓬ, ꓙꓳˍ ꓟ ꓪꓴ. ꓠꓬꓲ ꓢꓲ ꓡꓲ ꓐꓰ ꓟꓽ ꓔꓬ ꓪ ꓟ ꓬꓲ ꓙꓵ, ꓮ ꓟꓬ, ꓙꓳˍ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓣꓳ ꓠꓬ ꓫ ꓓꓴ ꓟꓷ ꓓꓴ ꓝꓮꓲ ꓤ ꓠꓬꓲ ꓫꓵꓽ ꓠꓬꓲ ꓓꓴ ꓮ ꓟꓬ, ꓣꓳ ꓤꓶꓻ ꓠꓯ ꓗꓪ ꓔꓳ ꓜꓳ, ꓡ ꓟ ꓥ ꓡꓳ꓿

ꓣꓳ ꓢꓯ. ꓔꓬ ꓟ ꓙꓵ, ꓗꓪ ꓓꓴ ꓙ ꓫ. ꓓꓴ ꓮ ꓟꓬ, ꓙꓳˍ ꓟ ꓡ ꓟ ꓙꓵ, ꓕꓯ ꓣꓳ ꓐ ꓕꓲ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓣꓳ ꓐꓰ ꓕꓲ ꓪ ꓔꓬ ꓡꓳ ꓐꓰ ꓣꓳ ꓓꓴ ꓙ ꓢꓲ ꓠꓬꓲ ꓬꓲ ꓔꓯ ꓪꓽ ꓘꓴ ꓠ, ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓐꓰ ꓝꓲ ꓓꓴ ꓐꓰ ꓕꓲ ꓪ ꓡꓲ ꓤꓶꓽ ꓔꓬ ꓟ ꓙꓵ, ꓕꓯ ꓟꓲꓽ ꓦꓲ ꓕꓳꓽ ꓙꓱꓼ ꓡ ꓟ ꓙꓵ,ꓕꓯ ꓝꓲ ꓓꓴ ꓐꓴ ꓠꓬ ꓮ ꓘꓶ. ꓓꓴ ꓙ ꓫ. ꓡꓰ ꓢꓲ ꓠꓬꓲ ꓮ ꓘꓶ. ꓛꓲ ꓙꓳˍ ꓟ ꓡꓰ ꓟ ꓥ ꓡꓳ꓿ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓠꓴ ꓪ ꓙꓵ, ꓠꓲ ꓟꓽ ꓙꓳˍ ꓡ ꓐꓰ ꓠ ꓠꓬꓲ ꓗꓷ ꓟ ꓥ ꓡꓳ꓿

ꓣꓳ ꓤꓶꓻ ꓗꓪ ꓥ ꓟꓲ ꓫ. ꓓꓴ ꓟꓷ ꓓꓴ ꓠꓲ, ꓫ ꓟꓬ ꓫ ꓓꓴ ꓙꓳˍ ꓡ ꓟ ꓙꓵ, ꓕꓯ ꓟꓽ ꓙꓳꓺ ꓙꓳꓺ ꓢꓲꓺ ꓒ ꓬꓰ‐ꓢꓴ ꓔꓯ ꓪꓽ ꓘꓴ ꓠ ꓟ ꓝꓮꓲ ꓬꓲ ꓔꓯ ꓘꓴˍ ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓒ ꓗꓪ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓙꓵ, ꓠꓲ ꓔꓯ ꓔꓱ ꓚꓵ ꓟ ꓙꓵ, ꓠꓲ ꓔꓯ ꓙꓵ, ꓔꓬ ꓡ? ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓙꓵ, ꓔꓬ ꓡ? ꓢꓲꓺ ꓒ ꓬꓰ‐ꓢꓴ ꓡꓰ ꓠ ꓠꓬꓲˍ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓮ ꓫꓵꓽ ꓪꓴ. ꓠꓬꓲ ꓙꓳꓺ ꓡ? ꓠꓴ ꓪ ꓙꓵꓻ ꓠꓲ, ꓟꓽ ꓙꓳ ꓡ? ꓐꓰ ꓣꓳ ꓔꓯ ꓠ ꓠꓬꓲˍ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓬ ꓗꓪ ꓡ ꓓꓴ ꓬꓰ ꓡꓯ꓿