ꓥꓪ ꓔꓯ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓘꓴ ꓢꓴ ꓮ ꓙꓵꓽ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓾

Thursday, June 27, 2024

ꓟ-ꓕꓲ 7ꓽ21-29

ꓥꓪ ꓔꓯ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓐꓰ ꓘꓴꓻ ꓢꓴ ꓮꓽ ꓙꓵ ꓠꓽ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓿ ꓟꓴꓽ ꓗꓪ ꓗꓪ ꓟ ꓥꓪ ꓐꓹ ꓐ ꓠꓲꓹ ꓡꓶꓽ ꓛꓳꓻ ꓢꓴˍ ꓡꓰꓽ ꓓꓵꓽ ꓡꓰˍ ꓥꓳ꓿ 

ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓬ ꓡꓽ ꓞꓳ ꓮꓽ ꓟꓬꓹ ꓥꓪ ꓔꓯ ꓡꓻ ꓢꓲ꓾ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓠꓴ ꓟꓬꓱꓺ ꓗꓪ ꓐꓰ ꓟꓸ ꓟꓲ ꓚ ꓠꓬꓲꓳ꓾ ꓠꓴ ꓟꓬꓱ ꓗꓪ ꓐꓰ ꓠꓲꓽ ꓖꓼ ꓓꓳ ꓠꓬꓲꓳ꓾ ꓠꓴ ꓟꓬꓱ ꓗꓪ ꓐꓰ ꓪꓽ ꓠꓬꓲˍ ꓟ ꓟꓬꓱꓽ ꓮꓽ ꓟꓬꓹ ꓬꓰ ꓠꓬꓲꓳ꓾ ꓐꓯ ꓡ ꓥꓳ꓿ ꓖꓳ ꓕꓯ ꓥꓪ ꓠꓬ ꓬꓲ ꓪꓽ ꓔꓯ꓾ ꓟꓽ ꓙꓲ ꓟ ꓬꓰ ꓢꓴ ꓐꓴꓳ꓾ ꓠꓴ ꓪꓽ ꓔꓯ ꓥꓪ ꓮ ꓕꓯꓽˍ ꓟꓲ ꓟꓽ ꓢꓷ ꓠꓬꓲ꓿ ꓥꓪ ꓔꓯˍ ꓐꓰ ꓧꓹ ꓙꓰ꓾ ꓐꓰ ꓐꓯ ꓖꓶˍ ꓥꓳ꓿ 

ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓑ ꓙꓽ ꓢꓲ꓾ ꓛꓳꓻˍ ꓟꓲ ꓛꓳ꓾ ꓬꓰˍ ꓟꓲ ꓬꓰ ꓢꓴ ꓠꓽ꓾ ꓡꓳ ꓓꓰ ꓑꓸ ꓕꓯꓽ ꓢꓲ ꓗꓪ ꓦꓲ ꓫꓬꓹˍ ꓟ ꓢꓷꓸ ꓠꓲꓹ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ ꓟꓶꓽ ꓦ ꓦ ꓡ꓾ ꓬꓲꓻ ꓙꓬ ꓙꓵꓽ ꓡ꓾ ꓟꓲꓽ ꓦꓲ ꓙꓱꓼ ꓡ ꓢꓲ ꓦꓲ ꓖꓳ ꓕꓲ ꓦꓲ ꓔꓯ ꓓꓶꓽ ꓬꓯꓼ ꓡ ꓥ ꓟꓲ꓾ ꓬꓲꓸ ꓦꓲ ꓚꓰ ꓠꓽ ꓡꓳ ꓓꓰ ꓑꓸ ꓕꓯꓽ ꓢꓲ ꓗꓪ ꓜꓶꓻ ꓔ ꓠꓬꓲ ꓟꓽ ꓐꓱꓽ ꓙꓰ꓿ ꓮꓽ ꓟ ꓥ ꓟꓲ ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓑ ꓙꓽ ꓢꓲ ꓟꓽ ꓛꓳ ꓬꓰ ꓢꓴ ꓠꓽ꓾ ꓧꓶꓽ ꓚꓲ ꓕꓯꓽ ꓢꓲ ꓗꓪ ꓦꓲ ꓫꓬꓹˍ ꓟ ꓞꓳ ꓙꓲꓽ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ ꓟꓶꓽ ꓦ ꓦ ꓡ꓾ ꓬꓲꓻ ꓙꓬ ꓙꓵꓽ ꓡ꓾ ꓟꓲꓽ ꓦꓲ ꓙꓱꓼ ꓡ ꓢꓲ ꓦꓲ ꓖꓳ ꓕꓲ ꓦꓲ ꓔꓯ ꓓꓶꓽ ꓬꓯꓼ ꓡ ꓠꓬ ꓐꓱꓽ ꓫꓬꓽ ꓡꓰˍ ꓥꓳ꓾ ꓐꓯˍ ꓡꓳ꓿ 

ꓬꓰ-ꓢꓴ ꓡꓰ ꓕꓱ ꓟꓬ ꓫꓵꓽ ꓟꓸ ꓖꓶˍ ꓟ ꓔꓯ ꓞꓳ ꓜꓴ ꓐꓴ ꓮꓽ ꓘꓶ ꓓꓵꓽ ꓙꓽ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓔꓯ ꓬꓲ ꓟꓸ ꓖꓶˍ ꓟ ꓠꓬ꓾ ꓙꓵꓽ ꓪ ꓙꓳ ꓙꓳˍ ꓡꓰ ꓟꓸ ꓖꓶˍ ꓟ ꓥ ꓢꓲ꓾ ꓙꓵꓽ ꓗ ꓟꓸ ꓒ ꓐꓴ ꓡꓰ ꓟꓸ ꓖꓶˍ ꓟ ꓡꓰ ꓐꓰ ꓟꓽ ꓗꓹ꓿

Add new comment

5 + 12 =

Quick Links