ꓮꓓ 1576 ꓘꓳꓼ ꓔꓯ ꓙꓲꓻ ꓫꓬ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓬꓰ ꓙ ꓢꓴ ꓙꓲꓻ ꓫꓬ ꓢꓴ Charles Borromeo (St. Charles Borromeo)

#St.Borromeo #creditphoto

Monday, July 22, 2024

ꓮꓓ 1576 ꓘꓳꓼ ꓔꓯ ꓙꓲꓻ ꓫꓬ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓬꓰ ꓙ ꓢꓴ ꓙꓲꓻ ꓫꓬ ꓢꓴ Charles Borromeo (St. Charles Borromeo)

ꓘꓴ ꓜꓲꓼ ꓞꓳ ꓠꓯꓹ ꓗꓪ ꓮ ꓘꓶꓸ ꓛꓲ ꓣꓳ ꓚꓵꓹ ꓟ ꓖꓪꓽ ꓙꓱ ꓜꓲꓼ ꓓꓴ ꓥ ꓟ ꓔꓣꓰꓠꓔ ꓡꓳ ꓒꓱ ꓗꓪ ꓖꓪ ꓙꓱ ꓜꓲꓼ ꓓꓴ ꓬꓰ ꓗꓷ ꓟ ꓙꓵꓹ ꓕꓯ ꓓꓳ ꓡ ꓟ ꓙꓲꓻ ꓫꓬ ꓢꓴ ꓠꓬ Charles Borrowmeo ꓥ ꓡꓳ꓿ ꓬꓲ ꓠꓬ ꓲꓔꓮꓡꓬ ꓗꓴꓷꓼ ꓗꓪ ꓐꓰ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳˍ ꓟ ꓕꓲ ꓦꓲꓻ ꓗꓪ ꓐꓰ ꓬꓲ ꓔꓯ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓡꓰ ꓬꓲ ꓕꓲ ꓞꓶꓻ ꓡꓱ ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡꓯꓼ ꓙꓱ ꓔ ꓢꓴ ꓤ ꓠꓱ ꓤ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓞꓳ ꓡꓱ ꓞꓳ ꓡꓯ. ꓤ ꓕꓲ ꓣꓳ ꓐꓴ ꓗꓳ ꓡꓳ ꓗꓪ ꓮ ꓘꓶ. ꓛꓲ ꓔꓯꓺ ꓢꓳꓻ ꓓꓴ ꓙꓵꓻ ꓠꓲ, ꓙꓳˍ ꓟ ꓞꓳ ꓡꓯ. ꓤ ꓕꓲ ꓣꓳ ꓥ ꓡꓳ꓿

ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓔꓯ ꓮ ꓘꓶ. ꓛꓲ ꓣꓳ ꓢꓳꓻ ꓣꓴ ꓢꓲ ꓠꓬꓲ ꓪꓴ‐ꓢ ꓔꓯ ꓥ ꓟꓲ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓔꓲꓺ ꓒ ꓕꓲ ꓣꓳ ꓒꓬꓱꓼ ꓗ. ꓠꓯ ꓬꓲ ꓮ‐ꓪꓳ ꓥ ꓟꓲ ꓔꓲꓺ ꓒ ꓪ ꓔꓲ ꓑꓲꓴꓢ (4) ꓔꓯ ꓬꓰ ꓙ ꓠ, ꓟ ꓣꓳ‐ꓟ ꓡꓳ ꓒꓱ ꓔꓬ ꓗꓷꓳ꓿ ꓗ. ꓠꓯ ꓬꓲ ꓔꓯ ꓚꓮꓣꓓꓲꓠꓮꓡ ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓟꓲꓡꓮꓠ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓒꓬꓱꓼ ꓡ ꓪ꓿ ꓬꓲ ꓔꓯ ꓡ ꓞꓳ ꓮ ꓟꓬ, ꓠꓬ ꓬꓲ ꓢꓯ. ꓔꓬ ꓟ ꓙꓵ, ꓕꓯ ꓮ ꓘꓶ. ꓛꓲ ꓔꓱ ꓚꓵ ꓢꓴ ꓮ ꓘꓶ. ꓛꓲ ꓙ ꓣꓳ ꓠꓲ, ꓙꓳˍ ꓢꓴ ꓔꓲꓺ ꓒ ꓓꓽ ꓔꓲ ꓣꓳ ꓥ ꓟ ꓔꓯ ꓡ ꓞꓳ ꓮ ꓟꓬ, ꓢꓷ. ꓟ ꓥ ꓡꓳ꓿

ꓬꓲ ꓠꓬ ꓔꓲꓺ ꓒ ꓪ ꓔꓲ ꓫꓵꓽ ꓤ ꓪꓳꓽ ꓤ ꓕꓲ ꓣꓳ ꓥ ꓟꓲ ꓬꓲ ꓔꓯ ꓬꓰ ꓙ ꓟ ꓟꓽ ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓬꓲ ꓠꓯ ꓗꓪ ꓙꓳˍ ꓟ ꓢꓯꓼ ꓪ ꓮ ꓙꓵꓽ ꓔꓯ ꓘꓴ ꓜꓲꓼ ꓞꓳ ꓐꓱ ꓶ ꓪꓴ‐ꓢ ꓟꓬꓱꓽ ꓟꓯ ꓟ ꓗꓪ ꓣꓱ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓮ‐ꓣꓳ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓟ ꓗꓪ ꓮ ꓘꓶ. ꓓꓽ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲꓡꓮꓠ ꓡꓳ ꓒꓱ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓙꓲˍ ꓟ ꓕꓲ ꓒꓳ ꓗꓪ ꓧꓳꓽ ꓪꓴ. ꓟꓴ ꓗꓷꓳ꓿

ꓬꓲ ꓠꓬ ꓔꓲꓺ ꓒ ꓪ ꓔꓲ ꓔꓯ ꓢꓷ. ꓠꓲ, ꓚꓳ ꓬꓲ ꓖꓶ ꓟ ꓗꓪ ꓥ ꓟꓲ ꓮ ꓘꓶ. ꓛꓲ ꓓꓽ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥꓟ ꓪꓴ. ꓠꓬꓲ ꓬꓲ ꓑꓶ. ꓓꓴ ꓠꓲ ꓔꓣꓰꓠꓔ ꓡꓳ ꓒꓱ ꓗꓪ ꓖꓪ ꓙꓱ ꓜꓲꓼ ꓓꓴ ꓠꓬ ꓮ ꓘꓶ. ꓛꓲ ꓙꓲˍ ꓖꓴ ꓙꓳˍ ꓙꓳˍ ꓖꓪ ꓙꓱ ꓟꓶ ꓡꓰ ꓟ ꓥ ꓡꓳ꓿

ꓬꓲ ꓮ‐ꓪꓳ ꓥ ꓟꓲ ꓔꓲꓺ ꓒ ꓪ ꓔꓲ ꓑꓲꓴꓢ (4) ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰ ꓗ. ꓠꓬꓲ ꓬꓲ ꓠꓬ ꓣꓳ‐ꓟ ꓡꓳ ꓒꓱ ꓗꓪ ꓐꓰ ꓓꓳ ꓡ ꓢꓲ ꓠꓬꓲ ꓟꓲꓡꓮꓠ ꓡꓳ ꓒꓱ ꓗꓪ ꓫꓵꓻ ꓗꓪ ꓛꓲ ꓢꓯ. ꓔꓬ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓘꓴ ꓜꓲꓼ ꓞꓳ ꓔꓯ ꓙꓲˍ ꓟ ꓕꓲ ꓒꓳ, ꓗꓪ ꓫꓬ, ꓔꓱ ꓟ ꓗꓪ ꓮ ꓘꓶ. ꓛꓲ ꓬꓰ ꓙ ꓢꓴ ꓢꓷ. ꓠꓲ, ꓖꓶ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿

ꓝꓮꓲ (1576) ꓘꓳꓼ ꓕꓯ ꓟꓲꓡꓮꓠ ꓗꓪ ꓠꓻ ꓫꓵꓽ ꓓꓽ ꓟ ꓒꓬꓱꓼ ꓡ ꓟ ꓙꓵ, ꓕꓯ ꓥ ꓟꓲ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓬꓰ ꓙ ꓔꓳ, ꓙ ꓗꓷ ꓟ ꓪꓴ. ꓠꓬꓲ ꓬꓲ ꓠꓬ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ ꓔꓬ ꓟ ꓪꓽ ꓘꓴ ꓦꓲꓻ ꓗꓪ ꓠꓻ ꓫꓵꓽ ꓙꓳˍ ꓢꓴ ꓐꓴ ꓐꓱ ꓶ ꓠꓻ ꓫꓬ, ꓖꓶ ꓠ, ꓟ ꓔꓶ. ꓬꓰ ꓖꓶ ꓗꓷ ꓟ ꓥ ꓡꓳ꓿ ꓬꓲ ꓡꓯ ꓒꓯꓽ ꓗꓪ ꓐꓰ ꓠꓻ ꓫꓵꓽ ꓙꓳˍ ꓢꓴ ꓐꓴ ꓔꓯ ꓬꓰ ꓙ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓚꓧꓮꓣꓡꓰꓢ ꓠꓬ ꓬꓲ ꓞꓲꓼ (46) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓲ ꓟꓶ ꓡꓰꓳ꓿