ꓙꓵꓻ ꓠꓲꓹ

ꓠꓬꓲꓸ ꓠꓬꓲ ꓗꓪ ꓠꓬ ꓙꓵꓸꓹ ꓠꓲꓹ ꓐꓯˍ ꓟ ꓮ ꓫꓵꓽ ꓥ ꓡ? ꓐꓯ ꓟ ꓣꓳ ꓓꓵ ꓙ ꓠꓬꓲ ꓡꓯ= ꓦꓲ-ꓐꓱ-ꓣꓴ ꓕꓳꓽ ꓶ 11ꓽ1 ꓗꓪ ꓙꓵꓸꓹ ꓠꓲꓹ ꓐꓯˍ ꓟ ꓠꓬ ꓣꓳ ꓥꓳ ꓡꓳꓸˍ ꓔ ꓟ ꓚꓵ ꓚꓵ ꓒꓬꓱꓼ ꓡ ꓥꓳ ꓐꓯˍ ꓟ ꓔꓯ ꓙꓵˍ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓙꓵꓸꓹ ꓠꓲꓹ ꓕꓱ ꓟ ꓠꓬ ꓣꓳ ꓥꓳ ꓡꓳꓸˍ ꓔ ꓟ ꓚꓵ ꓚꓵ ꓒꓬꓱꓼ ꓡ ꓥꓳ ꓐꓯ ꓟ ꓙꓵˍ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓠꓴꓻ ꓥꓪ ꓙꓵꓻˍ ꓟ ꓠꓬ ꓮ ꓫꓵꓽ ꓥ ꓡ? ꓖꓳ ꓟ ꓠꓬ ꓚꓵ ꓚꓵ ꓒꓬꓱꓼ ꓡˍ ꓥꓳ ꓐꓰ ꓐꓯ ꓟ ꓓꓵꓽ ꓙ ꓠꓬꓲ ꓡꓯ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓓꓵꓽ ꓙ ꓟꓶ ꓓꓴ ꓬꓰˍ ꓕꓯ ꓬꓲ ꓡꓰ ꓢꓷꓸ ꓡꓰ ꓓꓴ ꓟꓸ ꓖꓶˍ ꓕꓯ ꓮ ꓕꓯ ꓟꓲ ꓠ ꓠꓬꓲ ꓔꓬ ꓟ ꓠꓬ ꓠꓴ ꓙꓲˍ ꓡ ꓐꓰ ꓠ ꓠꓬꓲ ꓡꓳ= ꓠꓴ ꓙꓵꓸꓹ ꓠꓲꓹ ꓠꓬ ꓠꓴ ꓔꓯ ꓓ ꓡꓰ ꓝꓲꓳ= ꓠꓴ ꓥꓪ ꓬꓰ ꓘꓴ ꓟ ꓙꓲˍ ꓡ ꓐꓰ ꓢꓲꓽ ꓒ ꓬꓰ-ꓢꓴ ꓠꓬ ꓕꓲ ꓑꓹ ꓕꓲ ꓑꓹ ꓠ ꓠꓬꓲˍ ꓡꓳ=

ꓖꓳ ꓟ ꓑꓶꓸ ꓓꓴ ꓙꓵꓸꓹ ꓠꓲꓹ ꓠꓬ ꓢꓷꓸ ꓡꓰ ꓓꓴ ꓓꓵꓽ ꓙ ꓟꓶ ꓓꓴ ꓒꓬꓱꓼ ꓡ ꓟ ꓕꓲ ꓚꓱꓹ ꓟ ꓙ ꓖꓴ ꓥ ꓡꓳ= ꓙꓵꓸꓹ ꓠꓲꓹ ꓟꓽ ꓙꓳ ꓕꓯ ꓪꓴ-ꓢ ꓔꓯ ꓟꓽ ꓙꓵꓸꓹ ꓕꓯ ꓪꓴ-ꓢ ꓬꓰ ꓐ ꓡˍ ꓡꓳ ꓐꓯ ꓟ ꓔꓯ ꓟꓽ ꓙꓵꓸꓹ ꓕꓯ ꓮ ꓫꓵꓽ ꓟꓲ ꓟꓽ ꓒꓬꓱꓼ ꓡ= ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴˍ ꓟ ꓗꓪ ꓐꓰ ꓥ ꓟꓲ ꓮ ꓫꓵꓽ ꓬꓰˍ ꓟ ꓗꓪ ꓐꓰ ꓥ ꓟꓲ ꓪꓴ-ꓢ ꓠꓬ ꓬꓰ ꓐ ꓡˍ ꓡꓳ ꓐꓯ ꓟ ꓟꓽ ꓙꓵꓸꓹ ꓕꓯ ꓣꓳ ꓪꓽ ꓘꓴꓽ ꓥˍ ꓟꓲ ꓬꓲ ꓖꓳꓽ ꓥꓳ= ꓖꓳ ꓡꓱ ꓠꓬꓲ ꓚꓲꓸ ꓛꓬ ꓙꓵꓸꓹ ꓠꓲꓹ ꓔꓯ ꓣꓳ ꓝꓮꓲ ꓕꓲ ꓧꓪꓹ ꓓꓵꓽ ꓙ ꓠꓬꓲ ꓡꓯ= ꓚꓵ ꓚꓵ ꓙꓵꓸꓹ ꓔꓬ ꓡ? ꓪꓽ ꓘꓴꓽ ꓠꓹ ꓟ ꓪꓴꓸ ꓠꓬꓲ ꓪꓽ ꓘꓴꓽ ꓔꓬ ꓡ? ꓟꓽ ꓥ ꓠꓬ ꓚꓵ ꓚꓵ ꓙꓲ ꓢꓲ꓾ ꓪꓽ ꓘꓴꓽ ꓔꓬ ꓡ? ꓐꓯ ꓟ ꓔꓯ ꓣꓳ ꓓꓵ ꓙ ꓠꓬꓲ ꓡꓯ=

ꓪꓴ-ꓢ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓟ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓢꓲ ꓠꓬꓲ ꓢꓯꓼ ꓪ ꓣꓴ ꓓꓴ ꓬꓰ ꓡ=꓾ ꓮ ꓡꓲꓳ ꓐꓯ ꓠꓬ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓕꓱ ꓡꓱ ꓐꓰ ꓞꓳ ꓙꓳ ꓔꓬ ꓟ ꓟꓲ ꓠꓯ ꓕꓱ ꓟ ꓗꓪ ꓪꓴ-ꓢ ꓔꓯ ꓙꓵꓸꓹˍ ꓟ꓾ ꓪꓴ-ꓢ ꓣꓳ ꓔꓯ ꓠꓲꓹ ꓠꓵ ꓟ ꓪꓴ-ꓢ ꓬꓰ ꓐ ꓡ ꓟ ꓔꓯ ꓟꓽ ꓙꓵꓸꓹ ꓕꓯ ꓟꓲꓽ ꓦꓲꓸꓹ ꓮ ꓡꓰ ꓗꓪ ꓙꓱꓼ ꓮ ꓡꓰ ꓗꓪ ꓙꓰ ꓔꓬ ꓟ꓾ ꓢꓲꓹ ꓒꓬ ꓕꓲ ꓒꓬ ꓡꓰ ꓐꓰ ꓗꓷ ꓡꓰˍ ꓥꓳ= ꓬꓲ. ꓚꓱꓸꓹ ꓙꓴꓽ ꓟꓽ ꓙꓳ ꓓꓲˍ ꓟ ꓢꓲ ꓜꓲꓼ ꓡꓰ ꓐꓰ ꓗꓷ ꓡꓰ ꓥꓳ= ꓟꓲꓽ ꓦꓲꓸꓹ ꓮ ꓔꓲꓸ ꓤ ꓙꓱꓼ ꓡ ꓠꓬ ꓐꓬꓱꓽ ꓬꓰ ꓡ ꓥꓳ=

ꓖꓳ ꓡꓰ ꓠꓬꓲ ꓕꓱ ꓡꓱ ꓟꓽ ꓗꓷ ꓡꓰ ꓠꓹ ꓟ ꓙꓵꓸꓹ ꓠꓲꓹ ꓔꓯ ꓪꓳ ꓔ ꓠ ꓗꓹ ꓡꓳ= ꓙꓵꓸꓹ ꓠꓲꓹ ꓐꓯ ꓟ ꓠꓬ ꓪꓴ-ꓢ ꓠꓲꓹ ꓟ ꓔꓯ ꓕꓲꓸꓹ ꓡꓰ ꓝꓲˍ ꓟ ꓪꓴ-ꓢ ꓠꓲꓹ ꓟ ꓗꓪ ꓗꓹ ꓛꓲ ꓡꓰ ꓝꓲˍ ꓟ ꓙ ꓖꓴ ꓕꓲ ꓚꓱꓹ ꓥ ꓡꓳ= ꓣꓳ ꓒꓵꓽ ꓒ ꓮ-ꓐ-ꓡ-ꓦ ꓥˍ ꓟꓲ ꓬꓲ ꓙꓵꓸꓹ ꓠꓲꓹ ꓗꓪ ꓐꓰ ꓙꓲ ꓫꓬ ꓢꓴ ꓕꓲ ꓣꓳ ꓒꓬꓱꓼ ꓡ ꓡꓳ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓙꓵꓸꓹ ꓠꓲꓹ ꓐꓯ ꓟ ꓮ ꓘꓶꓸ ꓣꓳꓸ ꓚꓵ ꓡꓳ꓾ ꓣꓳ ꓤꓶꓸꓹ ꓗꓪ ꓙꓵꓸꓹ ꓠꓲꓹ ꓐꓯ ꓟ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓲꓽ ꓦꓲꓸꓹ ꓣꓱꓽ ꓞꓸ ꓟ ꓡꓰ ꓐꓰ ꓗꓹ ꓡꓳ= ꓖꓳ ꓡꓰ ꓠꓬꓲ ꓙꓵꓸꓹ ꓠꓲꓹ ꓕꓱ ꓟ ꓔꓯ ꓮ ꓕꓯ ꓟꓲ ꓕꓲꓸꓹ ꓞ ꓠ ꓟ ꓐꓱ ꓶ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓼ ꓕꓵꓼ ꓙꓰ ꓡꓯ꓾ ꓪꓴ-ꓢ ꓔꓯ ꓡꓯ ꓫꓵ ꓶꓸꓹ ꓓꓰ ꓡꓯ= ꓬꓲ ꓡꓰ ꓖꓶ ꓡ ꓥꓳ ꓐꓰ ꓐꓯ ꓢꓲ꓾ ꓙꓵꓸꓹ ꓥꓳ ꓐꓯ ꓠꓬ ꓣꓳ ꓤꓶꓸꓹ ꓗꓪ ꓬꓲ ꓬꓰ ꓢꓲ ꓙꓳ ꓙꓳ ꓡꓰꓽ ꓞꓳ ꓙꓳ ꓐ ꓡˍ ꓥꓳ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓪ ꓖꓶ ꓠꓲꓹ ꓫꓵˍ ꓡꓳ=