ꓪꓽ ꓤ ꓧꓪˍ ꓟ ꓔꓯ ꓥꓳꓽ (ꓟ-ꓕꓲ 20ꓽ1-16)

ꓟꓬꓱꓽ ꓬꓰ ꓢꓴ ꓠꓬ ꓬꓲ ꓟꓬꓱꓽ ꓬꓰˍ ꓟ ꓡꓰ ꓬꓲ ꓒꓵꓽ ꓟꓶˍ ꓡꓳ= ꓟꓬꓱꓽ ꓢꓲ ꓒ ꓕꓲ ꓐꓱ ꓠꓬ ꓟꓬꓱꓽ ꓬꓰ ꓙꓵꓹ ꓔꓯ ꓵꓻ ꓢꓲ ꓪꓽ ꓒꓵꓽ ꓖꓶˍ ꓡꓳ= ꓕꓲ ꓐꓱ ꓠꓬ ꓬꓲ ꓠꓬꓲ ꓔꓯ ꓵꓻ ꓢꓲ꓾ ꓕꓲ ꓐꓱ ꓠꓬ ꓬꓲ ꓦ ꓐ ꓔꓯ ꓵꓻ ꓢꓲ ꓪꓽ ꓒꓵꓽ ꓖꓶˍ ꓡꓳ= ꓮ ꓡꓲ ꓕꓲ ꓙꓵꓹ ꓔꓯ ꓵꓻ ꓢꓲ ꓖꓶˍ ꓥ ꓟꓲ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓬꓲ ꓪ ꓬꓰˍ ꓟ ꓡꓰ ꓪꓽ ꓒꓵꓽ ꓟꓶˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰˍ ꓟ ꓪꓽ ꓤ ꓐꓴ ꓔꓯ ꓥꓳꓽ ꓔꓯ ꓐꓯ ꓟꓸ ꓖꓶ ꓔ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓖꓶ ꓔ ꓟ ꓔꓯ ꓥꓳꓽ ꓗꓪ ꓓꓵˍ ꓟ ꓪꓽ ꓤ ꓐꓴ ꓔꓯ ꓪꓽ ꓒꓵꓽ ꓖꓶˍ ꓟ ꓚꓱꓹ ꓠꓬ ꓓꓵꓽ ꓙ ꓟꓶ ꓓꓴ ꓥ ꓡꓳ= ꓐꓱ ꓢꓲ ꓒ ꓠꓬ ꓪꓽ ꓤ ꓐꓴ ꓔꓯ ꓟꓽ ꓫꓱꓸ ꓡꓯ ꓘꓳ ꓟ ꓬꓲ ꓙꓵꓹ ꓗꓪ ꓧꓪˍ ꓡꓳ= ꓕꓲ ꓐꓱ ꓔꓯ ꓠꓬ ꓠꓯꓼ ꓠꓯꓼ ꓙꓵꓹ ꓗꓪ꓾ ꓕꓲ ꓐꓱ ꓔꓯ ꓠꓬ ꓗꓴ ꓙꓵꓹ ꓗꓪ꓾ ꓝꓮꓲ ꓕꓲ ꓐꓱ ꓔꓯ ꓠꓬ 12 ꓙꓵꓹ ꓗꓪ꓾ ꓥꓪꓽ ꓙꓵꓹ ꓗꓪ ꓟꓬꓱꓽ ꓬꓰ ꓡ ꓠꓹ ꓟ ꓘꓴꓻˍ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓮ ꓡꓲ ꓕꓲ ꓙꓵꓹ ꓗꓪ ꓘꓴꓻ ꓔ ꓥˍ ꓟꓲ ꓬꓲ ꓪ ꓪꓽ ꓒꓵꓽ ꓠꓬ ꓖꓳ ꓕꓲ ꓠꓬꓲ ꓐꓱ ꓶ ꓓꓲ-ꓠ-ꓣꓲ ꓕꓲ ꓒꓯꓼ ꓡꓰꓽ ꓥ ꓡꓳ= ꓟꓶꓽ ꓘꓶꓼ ꓙꓵꓹ ꓪꓽ ꓒꓵꓽ ꓖꓶ ꓝꓲꓸ ꓛꓲ ꓡ ꓕꓯ ꓐꓱ ꓢꓲ ꓒ ꓠꓬ ꓗ ꓠꓯꓸ ꓡ ꓢꓴ ꓐꓴ ꓔꓯ ꓓꓲ-ꓠ-ꓣꓲ ꓕꓲ ꓒꓯꓼ ꓖꓶ ꓗꓷ ꓠꓬ꓾ ꓠꓯꓼ ꓠꓯꓼ ꓡ ꓢꓴ ꓐꓴ ꓠꓬ ꓬꓲ ꓪ ꓟꓬꓽ ꓠꓬꓲ ꓟꓶ ꓡˍ ꓥꓳ ꓐꓰ ꓓꓵꓽ ꓙ ꓔꓬ ꓥˍ ꓟꓲ꓾ ꓬꓲ ꓪ ꓥˍ ꓟꓲ ꓓꓲ-ꓠ-ꓣꓲ ꓕꓲ ꓒꓯꓼ ꓤ ꓡꓰꓽ ꓟꓶˍ ꓟ ꓑꓶꓸ ꓓꓴ ꓐꓱ ꓢꓲ ꓒ ꓔꓯ ꓱꓽ ꓠꓱꓽˍ ꓡꓳ= ꓐꓱ ꓢꓲ ꓒ ꓠꓬ ꓬꓲ ꓧꓶꓸ ꓕꓯ ꓐꓯ ꓞꓷꓹ ꓔ ꓟ ꓡꓰ ꓐꓰ ꓖꓶˍ ꓟ ꓥ ꓡꓳ=

ꓣꓳ ꓠꓬ ꓣꓳ ꓟꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓐꓱ ꓶ ꓣꓳꓽ ꓟꓬꓽ ꓠꓬꓲ ꓢꓯꓼ ꓕꓵꓼ ꓠꓹ ꓟ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ= ꓣꓱꓽ ꓛꓰꓽ ꓡꓯꓼ ꓫꓴ ꓟꓬꓽ ꓠꓬꓲ ꓟꓶ ꓔ ꓠꓬ ꓖꓳ ꓟ ꓔꓯ ꓟꓬꓽ ꓠꓬꓲ ꓣꓱꓽ ꓠꓹ ꓟ ꓐꓯ ꓖꓶ ꓡ ꓔꓬ ꓟ ꓥ ꓡꓳ= ꓪꓴ-ꓢ ꓠꓬ ꓣꓳ ꓮ ꓙꓵꓽ ꓔꓯ ꓬꓲ ꓣꓱꓽ ꓛꓰꓽ ꓔꓯ ꓠꓲꓹ ꓒꓴ ꓒꓴ ꓡꓰꓽ ꓖꓶ ꓔ ꓡꓳ= ꓬꓲ ꓠꓬ ꓣꓳ ꓔꓯ ꓬꓲ ꓙꓵꓹ ꓐꓰ ꓣꓱꓽ ꓬꓰ ꓐ ꓡˍ ꓟ ꓢꓷꓸ ꓠꓲꓹ ꓚꓴꓽ ꓬꓲꓹ ꓖꓶ ꓔ ꓡꓳ= ꓝꓮꓲ ꓪꓴ-ꓢ ꓠꓬ ꓣꓳꓽ ꓔꓯ ꓠꓴ ꓠꓬ ꓬꓲ ꓟꓬ ꓛꓲ ꓬꓰ ꓠ ꓔ ꓡꓳ= ꓠꓴ ꓠꓬ ꓬꓲ ꓟꓬ ꓛꓲ ꓟꓽ ꓓꓻ ꓐꓷ ꓐꓯ ꓢꓲ ꓣꓳ ꓔꓯ ꓢꓴ ꓐꓰ ꓟꓽ ꓔꓯ= ꓖꓳ ꓟ ꓑꓶꓸ ꓓꓴ ꓣꓳ ꓥˍ ꓟꓲ ꓠꓱꓸ ꓐꓯ ꓢꓴ ꓔꓯ ꓟꓽ ꓔꓯ ꓪ ꓡꓰ ꓠꓹ ꓟ ꓬꓳꓸ ꓚꓵˍ ꓡꓳ= ꓝꓮꓲ ꓪꓴ-ꓢ ꓠꓬ ꓣꓳ ꓬꓰ ꓐ ꓡˍ ꓟ ꓕꓯꓽ ꓢꓲ ꓣꓱꓽ ꓬꓰ ꓠꓹ ꓟ ꓣꓳ ꓔꓯ ꓬꓲ ꓟꓽ ꓓꓰꓽ= ꓣꓳ ꓐ ꓡˍ ꓗꓪ ꓛꓲˍ ꓡꓰ ꓬꓰ ꓠꓹ ꓟ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=

ꓔꓯꓺˍ ꓟ ꓠꓬ ꓮ ꓕꓯ ꓟꓲ ꓣꓳ ꓔꓯ ꓘꓶꓻ ꓡꓶ ꓓꓴ ꓒꓬꓱꓼ ꓡ ꓝꓲˍ ꓡꓳ= ꓣꓳ ꓐꓴ ꓠꓬ ꓮ ꓕꓯ ꓟꓲ ꓣꓳ ꓢꓶꓸ ꓟꓽ ꓞꓲ ꓓꓻ ꓢꓴ ꓪꓽ ꓠꓬꓲ ꓢꓴ ꓐꓰ ꓣꓳ ꓟꓬ ꓛꓲ ꓟꓽ ꓓꓻ ꓢꓴ ꓟꓽ ꓪꓽ ꓠꓬꓲ ꓢꓴ ꓐꓴ ꓔꓯ ꓟꓳꓻˍ ꓥꓳ= ꓪꓴ-ꓢ ꓠꓬ ꓕꓱ ꓟ ꓔꓯ ꓤ ꓟꓳ ꓝꓲ ꓠꓲꓹ ꓫꓵˍ ꓡꓳ= ꓪꓴ-ꓢ ꓠꓬ ꓣꓳ ꓔꓯ ꓖꓶꓽ ꓔ ꓟ ꓣꓱꓽ ꓛꓰꓽ ꓐꓴ ꓔꓯ ꓡꓳꓸ ꓠꓬꓲ ꓢꓲ ꓣꓳ ꓮ ꓙꓵꓽ ꓔꓯ ꓕꓲ ꓡꓰꓹ ꓐꓰ ꓟꓳꓻˍ ꓟ ꓥ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓟꓽ ꓫꓱꓸ ꓡꓯ ꓘꓳ ꓟ ꓣꓱꓽ ꓛꓰꓽ ꓡꓯ ꓫꓴ ꓖꓶ ꓔ ꓡꓳ= ꓣꓱꓽ ꓛꓰꓽ ꓟꓽ ꓫꓱꓸ ꓡꓯ ꓘꓳ ꓥˍ ꓟꓲ ꓕꓲ ꓡꓰꓹˍ ꓡꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓟꓽ ꓫꓱꓸ ꓡꓯ ꓘꓳ ꓟ ꓣꓱꓽ ꓛꓰꓽ ꓔꓯ ꓣꓳ ꓠꓬ ꓕꓲ ꓣꓳ ꓕꓲ ꓙꓰꓽ ꓘꓳ ꓣꓴ ꓟꓶ ꓔ ꓟ ꓑꓶꓸ ꓓꓴ ꓣꓳ ꓟꓶ ꓔ ꓟ ꓐꓰ ꓠꓱꓸ ꓐꓯ ꓢꓴ ꓔꓯ ꓙꓳˍ ꓟ ꓣꓱꓽ ꓛꓰꓽ ꓐꓴ ꓔꓯ ꓔꓯꓺ ꓟꓽ ꓓꓻ=

ꓣꓳ ꓚꓲꓸ ꓛꓬ ꓣꓳ ꓡꓰꓽ ꓔꓯꓺ ꓠꓹ ꓟ ꓡꓳꓸ ꓠꓹ ꓟ ꓬꓳꓸ ꓚꓵˍ ꓡꓳ= ꓣꓳ ꓛꓬꓻ ꓗꓷ ꓟ ꓝꓴꓲꓸ ꓐꓱ ꓶ ꓠꓲꓹ ꓟ ꓡꓶꓸ ꓢꓲ ꓣꓳ ꓟꓶ ꓔ ꓟ ꓣꓱꓽ ꓛꓰꓽ ꓔꓯ ꓓꓵꓽ ꓙ ꓠꓬꓲ ꓡꓯ= ꓣꓱꓽ ꓛꓰꓽ ꓡꓯꓼ ꓫꓴ ꓖꓳ ꓟ ꓔꓯ ꓪꓴ-ꓢ ꓠꓲꓹ ꓡꓶꓽ ꓐꓰ ꓕꓲ ꓡꓰꓹˍ ꓣꓱꓽ= ꓠꓱꓸ ꓐꓯ ꓢꓴ ꓔꓯ ꓥˍ ꓟꓲ ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓬꓰ ꓠꓹ ꓟ ꓐꓯ ꓖꓶ= ꓕꓱ ꓟ ꓠꓬ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ=