ꓣꓳ ꓪꓴꓸ ꓠꓷꓸ ꓔꓯ ꓐꓬ ꓡꓰ ꓝꓲ ꓔꓬ ꓟ ꓜꓽ ꓫꓵꓽ (5) ꓙꓰꓽ

ꓣꓳ ꓪꓴꓸ ꓠꓷꓸ ꓠꓬ ꓠꓱꓸ ꓐꓯ ꓢꓴ ꓐꓰ ꓕꓲ ꓟꓴꓸ ꓓˍ ꓕꓯ ꓡꓰꓽ꓾ ꓧꓶꓸ ꓕꓯ ꓟ ꓡꓰ ꓓꓹ ꓕꓯ ꓡꓰꓽ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓞꓳ ꓙꓳ ꓢꓻˍ ꓟ ꓥ ꓡꓳ= ꓟꓽ ꓥ ꓠꓬ ꓣꓳ ꓪꓴꓸ ꓠꓷꓸ ꓟꓽ ꓙꓲꓻ ꓡ ꓕꓯ ꓟꓽ ꓧ ꓗꓷ ꓡꓰˍ ꓕꓯ ꓮ ꓫꓵꓽ ꓔꓯ ꓥˍ ꓟꓲ ꓢꓻ ꓢꓻ ꓡꓰꓽ ꓟꓲ ꓡꓰꓹ ꓗꓷ ꓕꓯ ꓚꓲꓸ ꓟꓶ ꓫꓸ ꓡˍ ꓕꓯ ꓠꓽ ꓣꓳ ꓬꓰ ꓔꓬ ꓟ ꓟꓬꓱꓽ ꓗꓪ ꓡꓯꓼ ꓕꓲꓺ ꓬꓰ ꓟꓽ ꓐ ꓡꓺꓳ= ꓠꓱꓸ ꓐꓯ ꓢꓴ ꓐꓰ ꓙꓻ ꓡꓯ ꓘꓳˍ ꓟ ꓗꓪˍ ꓟ ꓪ ꓜꓲ ꓫꓸ ꓡˍ ꓥꓳ=

ꓖꓳ ꓡꓱ ꓠꓬꓲ ꓪꓴꓸ ꓠꓷꓸ ꓔꓯ ꓐꓬ ꓡꓰ ꓝꓲˍ ꓟ ꓜꓽ ꓓꓴ (5) ꓙꓰꓽ ꓟ ꓠꓬ ꓮ ꓫꓵꓽ ꓥ ꓡ ꓐꓯ ꓟ ꓔꓯ ꓢꓷꓸ ꓔ ꓕꓯ ꓠꓽ꓾ ꓮ ꓡꓲ ꓫꓵꓽ ꓔꓯ ꓜꓽ ꓢꓲ ꓮ ꓡꓲ ꓫꓵꓽ ꓔꓯ ꓠꓬ ꓜꓽ ꓟꓽ ꓓꓻ ꓐꓯ ꓟ ꓔꓯ ꓢꓷꓸ ꓔ ꓕꓯ ꓠꓽ ꓣꓳ ꓞꓲꓼ ꓟꓳꓽ ꓡˍ ꓕꓯ ꓒꓬꓱꓼ ꓡˍ ꓟ Alzheimer ꓠꓻ ꓒꓬꓱꓼ ꓡˍ ꓟ ꓚꓱꓹ ꓔꓯ ꓥˍ ꓟꓲ ꓗꓽ ꓕꓸ ꓟꓶˍ ꓥꓳ= ꓖꓳ ꓡꓱ ꓠꓬꓲ ꓕꓱ ꓜꓽ ꓓꓴ (5) ꓙꓰꓽ ꓟ ꓠꓬ ꓮ ꓫꓵꓽ ꓥ ꓡ ꓐꓯ ꓟ ꓔꓯ ꓝꓸ ꓢꓲ ꓡꓳꓸ ꓠꓬꓲ ꓡꓯ=

1. Highly Processed Carbohydrates: ꓐꓰ ꓘꓴˍ ꓟ ꓜꓽ ꓓꓴ

ꓐꓯ ꓪˍ ꓠꓬ꓾ ꓮ ꓘꓶꓸ ꓒꓴ ꓡꓰ ꓠ ꓫꓬꓹ ꓔ ꓟ ꓜꓻ ꓒꓴ꓾ ꓑ ꓑ ꓬꓲ ꓒꓴ ꓒꓴ꓾ ꓚꓮꓗꓰ ꓕꓱ ꓡꓱ ꓫꓵꓽ ꓜꓽ ꓓꓴ ꓥ ꓡꓳ=

ꓮ ꓘꓶꓸ ꓒꓴ ꓡꓰ ꓠ ꓫꓬꓹ ꓔ ꓟ ꓜꓻ ꓒꓴ꓾ ꓟꓬꓽ ꓠꓬꓲ ꓣꓳ ꓑꓮꓪ-ꓢꓮꓠ-ꓟꓪꓰ꓾ ꓜꓻ ꓒꓴ ꓕꓱ ꓟ ꓔꓯ ꓠꓬ ꓒꓴ ꓡꓰ ꓠ ꓮ ꓟꓬꓹ ꓔꓱꓹ (ꓮ ꓟꓬꓹ ꓧꓪꓹ) ꓫꓬꓹ ꓔ ꓟ ꓑꓶꓸ ꓓꓴ ꓬꓲ ꓔꓯ ꓙꓳˍ ꓟ ꓢꓯꓼ ꓠꓬ ꓮ ꓘꓶꓸ ꓠꓲꓸ ꓡꓰꓳ= ꓜꓻ ꓒꓴ ꓖꓳ ꓟ ꓗꓪ ꓙꓳˍ ꓟ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓦꓲꓔꓮꓟꓲꓠ ꓐꓴ ꓠꓬ ꓮ ꓘꓶꓸ ꓠꓲꓸ ꓡꓰ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓮ ꓘꓶꓸ ꓒꓴˍ ꓟ ꓜꓻ ꓒꓴ꓾ ꓑ ꓑ ꓬꓲ ꓒꓴ ꓒꓴ꓾ ꓚꓮꓗꓰ ꓐꓴ꓾ ꓙ-ꓓꓳꓠꓴꓔ꓾ ꓕꓱ ꓡꓱ ꓫꓵꓽ ꓜꓽ ꓫꓵꓽ ꓐꓴ ꓠꓬ ꓜꓽ ꓙꓲꓻˍ ꓜꓽ ꓟꓲˍ ꓥ ꓟꓲ꓾ ꓖꓳ ꓟ ꓠꓯꓸꓼ ꓗꓪ ꓙꓳˍ ꓟ ꓓꓵˍ ꓟ ꓬꓲ ꓢꓯꓼ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓣꓱꓽ ꓞꓹ ꓟ ꓕꓯꓽ ꓢꓲ ꓮ ꓘꓶꓸ ꓟꓬꓽ ꓡꓰꓳ= ꓜꓽ ꓓꓴ ꓕꓱ ꓟ ꓐꓴ ꓠꓬ ꓜꓽ ꓗꓷˍ ꓕꓯ ꓮ ꓘꓶꓸ ꓛꓵˍ ꓟˍ ꓟꓲ ꓙꓳˍ ꓥꓳ꓾ ꓟꓽ ꓛꓵ ꓟˍ ꓟꓲ ꓙꓳˍ ꓥꓳ= ꓖꓳ ꓡꓱ ꓥˍ ꓟꓲ ꓕꓱ ꓟ ꓠꓯꓸꓼ ꓗꓪ ꓙꓳˍ ꓟ ꓞꓼ ꓛꓵꓻ(ꓞꓼ ꓐꓳ ꓐꓬꓽ) ꓢꓯꓼ ꓐꓴ ꓠꓬ ꓮ ꓘꓶꓸ ꓟꓬꓽˍ ꓟ ꓑꓶꓸ ꓓꓴ ꓟꓶ ꓫꓵ ꓡˍ ꓕꓯ ꓣꓳ ꓪꓴꓸ ꓠꓷꓸ ꓘꓴꓽ ꓗꓪ ꓙꓳˍ ꓟ ꓚꓰꓡꓡ ꓐꓴ ꓠꓬ ꓐꓬ ꓡꓰˍ ꓡꓳ= ꓖꓳ ꓗꓪ ꓐꓰ ꓕꓲ ꓝꓸ ꓓꓵꓽ ꓙ ꓫꓪꓸ ꓠꓬꓲˍ ꓟ꓾ ꓢꓳ ꓣꓴˍ ꓟ꓾ ꓓꓵꓽ ꓙ ꓞꓷꓹˍ ꓟ ꓗꓪ ꓟꓽ ꓐ ꓡ ꓗꓷ ꓡꓰˍ ꓡꓳ= ꓞꓲꓼ ꓟꓳꓽ ꓡˍ ꓕꓯ ꓥˍ ꓟꓲ Alzheimer ꓠꓻ ꓒꓬꓱꓼ ꓡ ꓗꓴꓸˍ ꓡꓳ=

ꓚꓵ ꓚꓵ ꓐꓯˍ ꓠꓬ ꓣꓳ ꓪꓴꓸ ꓠꓷꓸ ꓠꓬ ꓞꓼ ꓛꓵꓻ ꓢꓯꓼ (ꓞꓼ ꓐꓳ ꓐꓬꓽ) ꓢꓯꓼ ꓣꓱꓽ ꓞꓹ ꓟ ꓥ ꓡꓳ= ꓕꓲ ꓠꓬꓲ ꓟ ꓗꓪ 25g ꓣꓱꓽ ꓞꓹ ꓡꓳ= ꓖꓳ ꓡꓱ ꓥˍ ꓟꓲ ꓜꓽ ꓓꓴ ꓕꓱ ꓟ ꓜꓽˍ ꓟ ꓮ ꓟꓬꓹ ꓙꓳ ꓡˍ ꓕꓯ ꓠꓬ ꓣꓳ ꓣꓱꓽ ꓞꓹ ꓟ ꓞꓼ ꓛꓵꓻ (ꓞꓼ ꓐꓳ ꓐꓬꓽ) ꓢꓯꓼ ꓢꓶꓸ ꓟꓽ ꓞꓲꓺ 2 ꓝꓸ ꓗꓪ ꓐꓰ 10 ꓝꓸ ꓗꓪ ꓛꓲ ꓟꓬꓽ ꓡꓰ ꓢꓲ꓾ ꓪꓴꓸ ꓠꓷꓸ ꓔꓯ ꓐꓬ ꓡꓰ ꓝꓲˍ ꓡꓳ=

1. Ready-made Foods ꓐꓯˍ ꓟ ꓜꓽ ꓫꓵꓽ

ꓥꓪꓸ ꓕꓴꓽ꓾ ꓠꓳꓳꓓꓡꓰꓢ꓾ ꓙꓴꓟ(ꓬꓳ) ꓕꓱ ꓟꓬ ꓫꓵꓽ ꓐꓴ ꓗꓪ ꓓꓵˍ ꓟ ꓢꓯꓼ ꓐꓴ ꓠꓬ Trans fat ꓐꓰ ꓞꓼ ꓛꓵꓻ ꓢꓯꓼ ꓐꓴ ꓥ ꓡꓳ= Trans fat ꓐꓯˍ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓔꓬ ꓢꓻ ꓟ ꓔꓯ꓾ ꓔꓬꓹ ꓟꓽ ꓢꓻ ꓗꓷ ꓡꓰ ꓝꓲˍ ꓟ ꓬꓲ ꓞꓶꓻ ꓢꓯꓼ ꓐꓴ꓾ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓬꓲ ꓞꓶꓻ ꓢꓯꓼ ꓐꓴ꓾ ꓕꓱ ꓬꓲ ꓞꓶꓻ ꓢꓯꓼ ꓐꓴ ꓐꓰ ꓞꓼ ꓛꓵꓻ ꓢꓯꓼ ꓐꓴ ꓠꓬ ꓮ ꓘꓶꓸ ꓟꓬꓽˍ ꓟ ꓑꓶꓸ ꓓꓴ ꓣꓳ ꓪꓴꓸ ꓠꓷꓸ ꓚꓰꓡꓡ ꓐꓴ ꓔꓯ ꓳ’ ꓡꓰ ꓝꓲˍ ꓡꓳ= ꓝꓮꓲ Ready-made ꓜꓽ ꓓꓴ ꓕꓱ ꓟ ꓔꓯ ꓬꓲ ꓦꓬꓼ ꓠꓬꓲ ꓟꓶ ꓤ ꓗꓪ ꓛꓲ ꓟꓽ ꓐꓬ ꓟꓽ ꓛꓵꓽ ꓡꓰ ꓠꓹ ꓟ ꓫꓬꓹ ꓔ ꓡꓳ= ꓖꓳ ꓡꓱ ꓟꓶ ꓤ ꓗꓪ ꓛꓲ ꓟꓽ ꓐꓬ ꓟꓽ ꓛꓵꓽ ꓡꓰ ꓠꓹ ꓟ ꓐꓱ ꓶ ꓠꓬ ꓞꓼ ꓐꓳ ꓮ ꓟꓬꓹ ꓣꓱꓽ ꓪˍ ꓡꓳ= ꓖꓳ ꓗꓪ ꓐꓰ ꓕꓲ ꓝꓸ ꓣꓳ ꓐꓴ ꓠꓬ ꓫꓵꓽ ꓓꓯꓻ ꓡ ꓢꓲ꓾ ꓫꓵꓽ ꓓꓯꓻˍ ꓟ ꓗꓪ ꓐꓰ ꓪꓴꓸ ꓠꓷꓸ ꓔꓯ ꓬꓯꓼ ꓡꓰ ꓢꓲ ꓠꓬꓲ꓾ ꓪꓴꓸ ꓠꓷꓸ ꓔꓯ ꓬꓯꓼ ꓡꓰˍ ꓕꓯ ꓠꓬ ꓪꓴꓸ ꓠꓷꓸ ꓚꓰꓡꓡ ꓐꓴ ꓐꓬ ꓡꓰˍ ꓡꓳ= ꓖꓳ ꓗ ꓠꓯꓸ ꓠꓬ ꓓꓵꓽ ꓙ ꓫꓪꓸ ꓠꓬꓲˍ ꓟ꓾ ꓢꓳ ꓣꓴˍ ꓟ꓾ ꓓꓵꓽ ꓙ ꓞꓷꓹˍ ꓟ ꓗꓪ ꓟꓽ ꓐ ꓡ ꓗꓷ ꓡꓰˍ ꓡꓳ=

1. High-Sugar Drinks ꓐꓰ ꓘꓴˍ ꓟ ꓓꓳꓻ ꓓꓴ ꓬꓲ ꓫꓵꓽ ꓬꓲ ꓙꓰꓽ

ꓕꓱ ꓟ ꓗꓪ ꓓꓵˍ ꓟ ꓠꓬ ꓢꓳ-ꓓ ꓢꓯꓼ ꓐꓰ ꓞꓼ ꓛꓵꓻ ꓢꓯꓼ ꓐꓴ ꓥ ꓡꓳ=ꓕꓱ ꓟ ꓠꓬ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓣꓳ ꓪꓴꓸ ꓠꓷꓸ ꓚꓰꓡꓡ ꓐꓴ ꓳ’ꓡˍ ꓡꓳ= ꓟꓶ ꓫꓵ ꓡˍ ꓕꓯ ꓓꓵꓽ ꓙ ꓚꓱꓹ꓾ ꓢꓳ ꓣꓴ ꓚꓱꓹ꓾ ꓫꓪꓸ ꓞꓷꓹˍ ꓟ ꓗꓪ ꓟꓽ ꓪꓽ ꓠꓬꓲ꓾ ꓟꓽ ꓐ ꓡ ꓗꓷ ꓡꓰˍ ꓡꓳ= ꓓꓳꓻ ꓓꓴ ꓕꓱ ꓟ ꓗꓪ ꓡꓳꓸ ꓠꓬꓲˍ ꓕꓯ ꓞꓼ ꓛꓵꓼ ꓮ ꓡꓲ ꓟꓬ ꓛꓲ ꓓꓵˍ ꓟ ꓔꓯ ꓟꓳꓻ ꓪ ꓓꓹˍ ꓡꓳ= ꓣꓳ ꓐꓴ ꓮꓽ ꓟ ꓥˍ ꓟꓲ ꓞꓼ ꓛꓵꓻ ꓬꓲ ꓑꓰꓹ ꓖꓳ ꓟꓬ ꓜꓽ ꓟꓽ ꓘꓴꓻ= ꓖꓳ ꓡꓱ ꓥˍ ꓟꓲ ꓬꓲ ꓬꓲꓻ ꓔꓯ ꓠꓬ ꓣꓳ ꓢꓻ ꓢꓻ ꓡꓰ ꓓꓳꓻ ꓐ ꓡˍ ꓡꓳ=

ꓕꓱ ꓡꓱ ꓫꓵꓽ ꓓꓳꓻ ꓓꓴ ꓔꓯ ꓓꓳꓻ ꓢꓴ ꓠꓬ ꓞꓲꓼ ꓟꓳꓽ ꓡˍ ꓕꓯˍ ꓟꓲ Alzheimer ꓠꓻ ꓒꓬꓱꓼ ꓡˍ ꓡꓳ= Alzheimer ꓐꓯˍ ꓟ ꓠꓬ ꓪꓴꓸ ꓠꓷꓸ ꓠꓬ ꓫꓱ ꓡꓰ ꓣꓳꓺ ꓡꓰ ꓢꓲ ꓞꓲꓼ ꓣꓳˍ ꓕꓯ ꓒꓬꓱꓼ ꓗꓷ ꓟ ꓔꓯ ꓡꓰꓽ ꓚꓲꓸ ꓟꓶˍ ꓟ꓾ ꓮ ꓟꓶ ꓒꓬꓱꓼ ꓔꓬ ꓟ ꓞꓲꓼ ꓪꓴꓽ ꓡ ꓗ ꓠꓯꓸ ꓒꓬꓱꓼ ꓗꓷ ꓟ ꓞꓳ ꓙꓳ ꓗꓳꓸ ꓡ ꓗꓷ ꓟ ꓮ ꓡꓲ ꓫꓵꓽ ꓔꓯ ꓥˍ ꓟꓲ ꓚꓲꓸ ꓟꓽ ꓟꓶ ꓟ꓾ ꓡꓳ-ꓟꓲꓽ ꓥꓳꓽ ꓗꓪ ꓐꓰ ꓠꓬ ꓔ-ꓥꓯ-ꓑꓬꓯ ꓡꓰ ꓟ ꓔꓯ ꓐꓯˍ ꓟ ꓥ ꓡꓳ= ꓕꓱ ꓡꓱ ꓫꓵꓽ ꓓꓳꓻ ꓓꓴ ꓔꓯ ꓮ ꓟꓬꓹ ꓓꓳꓻˍ ꓕꓯ Alzheimer ꓠꓻ ꓒꓬꓱꓼ ꓡ ꓢꓻˍ ꓟ ꓥ ꓡꓳ=

1. ꓧꓪꓽ ꓞꓶꓻ ꓡꓰ ꓡꓱ ꓔ ꓟ ꓜꓽ ꓫꓵꓽ

ꓕꓱ ꓧꓶꓽ ꓞꓶꓻ ꓡꓰ ꓡꓱ ꓔ ꓟ ꓜꓽ ꓫꓵꓽ ꓘꓴꓽ ꓗꓪ Trans fat ꓮ ꓟꓬꓹ ꓙꓳˍ ꓟ ꓥ ꓡꓳ= Trans fat ꓕꓱ ꓟ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ= ꓕꓱ ꓟ ꓠꓬ ꓣꓳ ꓪꓴꓸ ꓠꓷꓸ ꓚꓰꓡꓡ ꓐꓴ ꓔꓯ ꓳ’ ꓡꓰ ꓝꓲˍ ꓡꓳ= ꓖꓳ ꓗꓪ ꓐꓰ ꓕꓲ ꓝꓸ ꓓꓵꓽ ꓙ ꓫꓪꓸ ꓞꓷꓹˍ ꓟ ꓗꓪ꓾ ꓢꓳ ꓣꓴˍ ꓟ ꓗꓪ ꓟꓽ ꓐ ꓡ ꓗꓷ ꓡꓰˍ ꓡꓳ= ꓖꓳ ꓡꓱ ꓠꓬꓲ ꓧꓪꓽ ꓞꓶꓻ ꓐꓰ ꓡꓱ ꓔ ꓟ ꓜꓽ ꓫꓵꓽ ꓐꓴ ꓔꓯ ꓤ ꓟꓳˍ ꓠꓬ ꓟꓬꓽ ꓠꓬꓲ ꓙꓲꓻˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓬꓽ ꓠꓬꓲ ꓮ ꓘꓶꓸ ꓟꓲꓺ ꓡꓰ ꓠ ꓡꓱ ꓔ ꓟ ꓜꓽ ꓫꓵꓽ ꓐꓴ ꓔꓯ ꓠꓬ ꓪ ꓜꓲ ꓤ ꓟꓳ ꓠ ꓔ ꓡꓳ꓾ ꓐꓰ ꓐꓯ ꓡꓳ=

1. ꓙꓲ ꓒꓶꓽ

ꓙꓲꓻ ꓒꓶꓽ ꓗꓪ ꓓꓵˍ ꓟ ꓰꓔꓧꓮꓠꓳꓡ ꓢꓯꓼ ꓠꓬ ꓪꓴꓸ ꓠꓷꓸ ꓔꓯ ꓐꓬ ꓡꓰ ꓝꓲˍ ꓡꓳ= ꓢꓯꓼ ꓕꓱ ꓟ ꓠꓬ ꓪꓴꓸ ꓠꓷꓸ ꓚꓰꓡꓡ ꓔꓯ ꓳ’ ꓡꓰ ꓝꓲ ꓢꓲ꓾ ꓪꓴꓸ ꓠꓷꓸ ꓚꓰꓡꓡ ꓐꓴ ꓔꓯˍ ꓟꓲ ꓐꓬ ꓡꓰ ꓝꓲˍ ꓡꓳ= ꓪꓴꓸ ꓠꓷꓸ ꓟꓬꓱꓽ ꓬꓰ ꓚꓱꓹ ꓔꓯ ꓥˍ ꓟꓲ ꓢꓯꓼ ꓐꓽ ꓡꓰ ꓝꓲˍ ꓡꓳ= ꓣꓳ ꓪꓴꓸ ꓠꓷꓸ ꓔꓯ ꓫꓱꓺ ꓡꓰ ꓣꓳꓺ ꓡꓰ ꓝꓲˍ ꓡꓳ= ꓣꓳ ꓪꓴꓸ ꓠꓷꓸ ꓫꓱꓺ ꓡꓰ ꓣꓳꓺ ꓡꓰˍ ꓕꓯ ꓠꓬ ꓓꓵꓽ ꓙ ꓫꓪꓸ ꓞꓷꓹˍ ꓟ ꓗꓪ꓾ ꓢꓳ ꓣꓴˍ ꓟ ꓗꓪ ꓟꓽ ꓐ ꓡ ꓗꓷ ꓡꓰˍ ꓡꓳ=

ꓖꓳ ꓡꓱ ꓠꓬꓲ ꓕꓱ ꓗꓪ ꓐꓯ ꓔ ꓟ ꓪꓴꓸ ꓠꓷꓸ ꓔꓯ ꓐꓬ ꓡꓰ ꓝꓲˍ ꓟ ꓜꓽ ꓓꓴ (5) ꓙꓰꓽ ꓔꓯ ꓮ ꓡꓲ ꓐ ꓡˍ ꓮ ꓡꓲ ꓤ ꓟꓳ ꓖꓶ ꓠꓯꓹ ꓡꓳ= ꓜꓽ ꓓꓴ ꓕꓱ (5) ꓙꓰꓽ ꓠꓬ꓾ ꓣꓳ ꓟꓷꓽ ꓠꓷꓹ ꓗꓪ ꓜꓽ ꓙꓲꓻˍ ꓥˍ ꓟꓲ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓪꓴꓸ ꓠꓷꓸ ꓐꓱ ꓶ ꓠꓬ ꓟꓽ ꓙꓲꓻ ꓟ ꓥ ꓡꓳ=

ꓧꓷꓹ ꓚ ꓢꓲ ꓐꓯˍ ꓠꓬ꓾ ꓣꓳ ꓪꓴꓸ ꓠꓷꓸ ꓐꓱ ꓶ ꓜꓽ ꓟꓽ ꓓꓻ ꓟ꓾ ꓟꓽ ꓜꓽ ꓠꓯꓹ ꓟ ꓜꓽ ꓫꓵꓽ ꓐꓴ ꓠꓬ꓾ ꓮ ꓘꓶꓸ ꓒꓴ ꓡꓰ ꓠ ꓫꓬꓹ ꓔ ꓟ ꓜꓻ ꓒꓴ (ꓑ ꓑ ꓬꓲ ꓒꓴ ꓒꓴ꓾ ꓚꓮꓗꓰ) ꓾ Ready-made ꓜꓽ ꓫꓵꓽ꓾ ꓞꓼ ꓛꓵꓻ (ꓞꓼ ꓐꓳ ꓐꓬꓽ) ꓮ ꓟꓬꓹ ꓓꓵˍ ꓟ ꓓꓳꓻ ꓓꓴ꓾ ꓧꓪꓽ ꓞꓶꓻ ꓡꓰ ꓡꓱ ꓔ ꓟ ꓜꓽ ꓫꓵꓽ ꓐꓰ ꓙꓲ ꓒꓶꓽ ꓐꓴ ꓥ ꓡꓳ=

ꓮ ꓟꓶ ꓐꓯ ꓟꓸ ꓖꓶ ꓗꓷ ꓟ ꓪꓴꓸ ꓠꓷꓸ ꓐꓬ ꓡꓰ ꓝꓲˍ ꓟ꓾ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓜꓻ ꓓꓴ (5) ꓙꓰꓽ ꓔꓯ ꓠꓬ ꓠꓯꓻ ꓞꓲꓼ ꓟꓸ ꓒ ꓓꓣꓸ ꓜꓲꓠ ꓟꓲꓠ ꓔꓴꓠ ꓡꓰ ꓬꓳꓴꓔꓴꓐꓰ ꓗꓪ ꓢꓷꓸ ꓙ ꓟꓳ ꓙ ꓔ ꓟ ꓔꓯ꓾ ꓣꓦꓮ ꓡꓲ-ꓢꓴ ꓢꓯꓼ ꓠ ꓠꓹ ꓔꓬ ꓢꓴ ꓐꓴ ꓐꓱ ꓶ ꓡꓲ-ꓢꓴ ꓥꓳꓽ ꓗꓪ ꓐꓰ ꓐꓯ ꓖꓶ ꓩꓴ ꓡˍ ꓟ ꓥ ꓡꓳ= ꓝꓮꓲ ꓕꓲ ꓠꓽ ꓗꓪ ꓠꓬ ꓪꓴꓸ ꓠꓷꓸ ꓚꓲꓸ ꓟꓶ ꓓꓴ ꓐꓱ ꓶ ꓙꓲꓻˍ ꓟ ꓜꓽ ꓓꓴ ꓔꓯ ꓡꓯꓼ ꓫꓵ ꓐꓯ ꓖꓶ ꓩꓴ ꓡˍ ꓥꓳ=