“ꓬꓲ ꓮ ꓘꓶ. ꓠꓲ, ꓠꓵˍ ꓠꓬꓲ ꓬꓲ ꓝꓴꓲ. ꓮꓽ ꓟꓬ, ꓖꓽ ꓖꓶˍ ꓟ ꓟꓶˍ ꓡꓳ꓿”

ꓡꓴ-ꓘ 7ꓽ47 ꓬꓲ ꓝꓴꓲꓸ ꓮ ꓟꓬꓹ ꓠꓬ ꓖꓼ ꓖꓶˍ ꓟ ꓟꓶˍ ꓡꓳ= ꓮ ꓡꓲꓳ ꓐꓯˍ ꓠꓬ ꓬꓲ ꓠꓬ ꓮ ꓘꓶꓸ ꓠꓲꓹ ꓠꓵˍ ꓟ ꓑꓶꓸ ꓓꓴ ꓥ ꓡꓳ=

ꓢꓲ ꓫꓬ ꓕꓳꓽ ꓶ ꓝꓲꓸ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 7ꓽ36-50 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓝꓲꓸ ꓥ ꓡꓳ= ꓝꓴꓲꓸ ꓙꓳˍ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓙꓽ ꓣꓳ ꓠꓲꓹ ꓡꓰ ꓓꓵꓽ ꓡ ꓢꓲ ꓢꓲ ꓒ ꓬꓲ ꓛꓲ ꓒꓯꓹ ꓔꓯ ꓬꓲ ꓟꓬ ꓐꓲꓻ ꓡꓰ ꓞꓲꓽ ꓖꓶ ꓗꓷ ꓢꓲ꓾ ꓬꓲ ꓪꓴꓸ ꓞꓱꓻ ꓡꓰ ꓫꓵꓹ ꓖꓶ ꓗꓷ ꓢꓲ ꓠꓬꓲ꓾ ꓬꓰ-ꓢꓴ ꓬꓲ ꓛꓲ ꓒꓯꓹ ꓗꓪ ꓐꓳꓼ ꓖꓶ꓾ ꓫꓳ ꓠꓱ ꓞꓶ ꓟꓰ ꓖꓶ ꓐꓰ ꓬꓰˍ ꓡꓳ= ꓢꓲ ꓒ ꓔꓯ ꓖꓳ ꓡꓱ ꓬꓰ ꓖꓶ ꓢꓴ ꓟꓽ ꓙꓳ= ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓽ ꓢꓲ ꓒ ꓬꓰ-ꓢꓴ ꓔꓯ ꓠꓲꓹ ꓠꓵˍ ꓟ ꓠꓲꓹ ꓟ ꓡꓰ꓾ ꓙꓲꓻˍ ꓟ ꓠꓲꓹ ꓟ ꓡꓰ ꓙꓽ ꓣꓳ ꓠꓲꓹ ꓡꓰ ꓬꓰ ꓖꓶˍ ꓡꓳ= ꓕꓲ ꓚꓱꓹ ꓐꓯ ꓪˍ ꓠꓬ ꓬꓲ ꓠꓬ ꓬꓲ ꓝꓴꓲꓸ ꓪꓽ ꓒꓵꓽ ꓔꓯ ꓚꓱꓹ ꓗꓷ ꓟ ꓥ ꓡꓳ=

ꓣꓳ ꓐꓴ ꓥˍ ꓟꓲ ꓣꓳ ꓬꓰ ꓛꓬꓻ ꓬꓰ ꓥꓳꓽ ꓡꓰ ꓟ ꓝꓴꓲꓸ ꓐꓱ ꓶ ꓠꓲꓹ ꓥꓴꓻ ꓠꓲꓹ ꓡꓰ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓠꓹ ꓟ ꓬꓳꓸ ꓚꓰꓽˍ ꓡꓳ= ꓝꓴꓲꓸ ꓪꓽ ꓒꓵꓽ ꓚꓱꓹ ꓠꓹ ꓟ ꓐꓱ ꓶ ꓠꓲꓹ ꓟ ꓡꓶꓸ ꓠꓹ ꓟ ꓬꓳꓸ ꓚꓰꓽˍ ꓡꓳ=

ꓠꓲꓹ ꓟ ꓡꓶꓸˍ ꓟ ꓠꓲꓹ ꓟ ꓡꓰ ꓙꓽ ꓣꓳˍ ꓟ ꓠꓲꓹ ꓟ ꓡꓰ꓾ ꓚꓲꓸ ꓛꓬ ꓝꓴꓲꓸ ꓐꓱ ꓶ ꓠꓲꓹ ꓥꓴꓻ ꓠꓲꓹ ꓡꓰ ꓝꓴꓲꓸ ꓛꓬ ꓬꓳꓸˍ ꓕꓯ ꓡꓰꓽ ꓣꓳ ꓝꓴꓲꓸ ꓠꓬ ꓖꓼ ꓖꓶˍ ꓟ ꓟꓶˍ ꓥꓳ= ꓮ ꓟꓬꓹ ꓔꓶ ꓔ ꓠꓬ ꓮ ꓟꓬꓹ ꓶꓼ ꓫ ꓟꓶˍ ꓥꓳ= ꓖꓳ ꓟˍ ꓡꓰ ꓐꓰ꓾ ꓪꓴ-ꓢ ꓔꓯ ꓣꓳ ꓠꓬ ꓐꓯ ꓘꓶ ꓗꓪ ꓐꓰ ꓡꓰꓽ ꓠꓲꓹ ꓠꓵˍ ꓟ ꓟꓽ ꓥ ꓥ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓚꓱꓹ꓾ ꓛꓳ ꓫꓱꓽ ꓔꓬ ꓟ ꓚꓱꓹ ꓗꓪ ꓐꓰ ꓠꓲꓹ ꓠꓵ ꓠꓹ ꓟ ꓬꓳꓸ ꓚꓵˍ ꓡꓳ=

ꓟꓷꓽ ꓠꓷꓹ ꓘꓶ ꓗꓪ ꓐꓰ ꓠꓬ ꓪꓴ-ꓢ ꓪꓴ-ꓢ ꓐꓰ ꓐꓯ ꓔꓬ ꓢꓲ꓾ ꓚꓵ ꓚꓵ ꓣꓱꓽ ꓬꓰˍ ꓟ ꓠꓬ ꓟꓽ ꓙꓲꓻ ꓟ ꓬꓰ= ꓖꓳ ꓡꓱ ꓬꓰ ꓟꓽ ꓓꓻ= ꓣꓳ ꓠꓬ ꓕꓲ ꓞꓲꓼ ꓕꓲ ꓑ ꓚꓬꓴꓸ ꓟꓶ ꓠꓹ ꓟ ꓐꓱ ꓶ꓾ ꓝꓴꓲꓸ ꓮ ꓟꓬꓹ ꓖꓼ ꓖꓶ ꓟꓶ ꓠ ꓔ ꓡꓳ= ꓝꓴꓲꓸ ꓮ ꓟꓬꓹ ꓖꓼ ꓖꓶ ꓟꓶ ꓠꓹ ꓟ ꓐꓱ ꓶ ꓠꓬ ꓪꓴ-ꓢ ꓔꓯ ꓟꓬꓽ ꓠꓬꓲ ꓠꓲꓹ ꓠꓵꓻ ꓠ ꓗꓹ ꓟ ꓥ ꓡꓳ=