ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ

ꓟꓬꓱ ꓓꓳꓽ ꓙꓳꓹ ꓟ ꓞꓳ ꓤꓽ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓐꓱ ꓶꓽ ꓚꓵꓸ ꓚꓬ ꓟꓬꓱ ꓓꓳꓽ ꓕꓲꓽ ꓡꓰꓹ ꓢꓯ ꓔꓬ ꓟꓶ ꓠꓹ ꓟ ꓐꓱ ꓶ ꓬꓲ ꓙ ꓔ ꓙ ꓠꓬꓲ ꓔ ꓥ= ꓖꓳ ꓡꓱ ꓟꓬꓱ ꓓꓳꓽ ꓙꓳ ꓙꓳ ꓢꓯ ꓔꓬ ꓠꓹ ꓟ ꓐꓱ ꓶꓽ ꓞꓳ ꓤꓽ ꓐꓱ ꓶ ꓟꓽ ꓓ ꓬꓳꓸ ꓚꓲꓹ ꓟ ꓠꓬ꓾ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓔꓯ ꓗꓽ ꓕꓸ ꓙꓹ ꓟ ꓡꓳꓸ ꓙ ꓑꓳꓽ ꓙꓹ ꓟ ꓥˍ ꓡꓳ= ꓞꓳ ꓤꓽ ꓕꓲꓽ ꓤꓳ ꓪ ꓙꓵꓽ ꓪꓽ ꓐꓯꓹ ꓟ ꓠꓬ ꓞꓳ ꓫꓵꓽ꓾ ꓫꓸ ꓪ꓾ ꓙꓵ ꓠꓲꓹ꓾ ꓤꓽ ꓑꓸ ꓤꓼ ꓤꓽ ꓟꓶꓼ ꓤꓼ ꓐꓯꓹ ꓟ ꓕꓱ ꓡꓰ ꓫꓵꓽ ꓟꓽ ꓘꓶꓽ ꓮ ꓙꓵꓻ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓯꓸꓼ ꓗꓪ ꓪꓴ-ꓢ ꓡꓰ ꓚꓰꓼ ꓔ ꓟ ꓕꓲꓽ ꓠꓬꓲ ꓗꓪ ꓚꓳꓹ ꓡꓰ ꓙꓳꓹ ꓟ ꓥˍ ꓡꓳ= ꓕꓱ ꓡꓱ ꓪ ꓙꓵꓼ ꓪꓽ ꓙꓳꓹ ꓟ ꓔꓯ ꓗꓴꓷ  ꓗꓪ ꓚꓳ ꓖꓶꓽ ꓔ ꓟ ꓪ ꓙꓵꓽ ꓪꓒꓽ ꓟꓽ ꓥ= ꓙꓵꓽ ꓢꓴ ꓢꓲꓽ ꓒꓽ ꓐꓴ ꓡꓰ ꓖꓶꓽ ꓔ ꓟ ꓙꓵꓽ ꓪꓽ ꓥˍ ꓟꓲ ꓟꓽ ꓥ= ꓞꓳ ꓤꓽ ꓪ ꓙꓵꓽ ꓪꓽ ꓠꓬ ꓞꓳ ꓤꓽ ꓕꓲꓽ ꓣꓳ ꓒꓬꓱꓼ ꓡꓹ ꓟ ꓕꓲꓽ ꓠꓬꓲ ꓗꓪ ꓚꓳꓹ ꓡꓰ ꓙꓳ ꓡꓹ ꓟ ꓥ ꓡꓳ= ꓖꓳ ꓟ ꓡꓰꓽ ꓐꓰ ꓕꓲꓽ ꓡꓰꓻ ꓟꓴꓽ ꓗꓳꓸ ꓓꓵ ꓓꓵ ꓟꓲ ꓠꓯ ꓕꓲꓽ ꓚꓳ ꓡꓳ ꓗꓪ ꓟ ꓞꓳ ꓤꓽ ꓮꓽ ꓙꓵꓽ ꓢꓴ ꓐꓱ ꓶꓽ ꓐꓳ ꓔ ꓟ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓐꓯꓹ ꓟ ꓗꓪ ꓮ ꓡꓰ ꓐꓳ ꓔ ꓡ? ꓐꓯꓹ ꓠꓬ ꓞꓳ ꓤꓽ ꓮꓽ ꓙꓵꓽ ꓠꓬ ꓛꓱꓽ ꓟꓳ ꓕꓲꓽ ꓠꓬꓲ ꓗꓪ ꓚꓳꓹ ꓡꓰ ꓞꓳꓹ ꓕꓲ ꓔ ꓟ ꓟꓽ ꓙꓳ ꓒꓴ ꓒꓴ ꓡꓯꓽ ꓡꓯꓽ ꓬꓲ ꓐ ꓡ ꓟ ꓐꓰ ꓞꓳ ꓤꓽ ꓟꓬꓱ ꓓꓳꓽ ꓐꓯꓹ ꓟ ꓬꓲꓸ ꓐ ꓡꓹ ꓟ ꓥ ꓢꓲ ꓞꓳ ꓤꓽ ꓟꓬꓱ ꓓꓳꓽ ꓐꓰ ꓞꓳ ꓤꓽ ꓕꓲ ꓣꓳ ꓪ ꓙꓵꓽ ꓪꓽ ꓠꓬ ꓮꓽ ꓙꓵꓽ ꓕꓲꓽ ꓣꓳ ꓡꓰ ꓕꓲ ꓣꓳ ꓕꓲꓽ ꓫꓵꓽ ꓕꓲꓽ ꓡꓰꓸꓼ ꓪ ꓙꓵꓽ ꓪꓽ ꓙꓳˍ ꓡꓳ= ꓬꓲ ꓪꓽ ꓠꓬ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓓꓵꓽ ꓙꓽ ꓗꓴ ꓔ ꓟ ꓠꓲꓹ ꓟ ꓡꓰ ꓮꓸ ꓬꓲꓼ ꓠꓬꓲ ꓤꓽ ꓮꓸ ꓝꓲ ꓠꓬꓲ ꓟ ꓡꓰ ꓐꓰ ꓕꓲꓽ ꓡꓰ ꓬꓲ ꓙ ꓔ ꓙ ꓡꓯꓽ ꓘꓳ ꓙꓵꓽ ꓙꓳˍ ꓥ ꓐꓰ ꓕꓱ ꓡꓱ ꓐꓳ ꓔ ꓡꓳ=

ꓞꓳ ꓤꓽ ꓕꓲꓽ ꓣꓳ ꓪ ꓙꓵꓼ ꓪꓽ ꓙꓳ ꓟ ꓪ ꓕꓯ ꓢꓲ ꓐꓲ ꓜꓲꓹ ꓟ ꓞꓳ ꓤꓽ ꓕꓲ ꓣꓳ ꓢꓯꓸ ꓔꓬ ꓟ ꓗꓷ ꓡꓰ ꓢꓲ ꓠꓬꓲ ꓚꓵꓸ ꓛꓬ ꓞꓲꓼ ꓔꓯ ꓪꓴꓽ ꓡ ꓟꓴ ꓡ ꓠ ꓢꓯꓼ ꓕꓵꓼ ꓠꓹ ꓟ ꓐꓰ ꓚꓵꓸ ꓛꓬ ꓠꓯꓸꓼ ꓗꓪ ꓬꓲ ꓐ ꓡꓹ ꓟ ꓐꓰ ꓬꓲ ꓗꓴ ꓔ ꓟ ꓮꓽ ꓙꓲꓽ ꓔꓯ ꓣꓱ ꓐ ꓡꓹ ꓟ ꓕꓱ ꓡꓰ ꓫꓵꓽ ꓬꓰ ꓐ ꓡ ꓓꓴ ꓥ= ꓖꓳ ꓡꓰ ꓟ ꓥꓻ ꓞꓳ ꓤꓽ ꓕꓲ ꓣꓳ ꓪ ꓙꓵꓽ ꓪꓽ ꓔꓯ ꓒ ꓐꓲ ꓒ ꓜꓲꓼ ꓟꓽ ꓪꓹ ꓠꓬ ꓐꓲ ꓜꓲꓹ ꓟ ꓞꓳ ꓤꓽ ꓕꓲꓽ ꓣꓳ ꓐꓰ ꓢꓯꓸ ꓔꓬ ꓟꓽ ꓐ ꓡ= ꓖꓳ ꓟ ꓐꓶꓸ ꓓꓴ ꓠꓲ ꓞꓳ ꓤꓽ ꓕꓲ ꓣꓳ ꓬꓲ ꓒꓵ ꓔꓯ ꓗꓽ ꓕꓸ ꓙ ꓠꓹ ꓟ ꓐꓱ ꓶꓽ ꓠꓬ ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓔꓯ ꓘꓽ ꓕꓸ ꓙꓹ ꓟ ꓡꓳ ꓙ ꓑꓳꓽ ꓙ ꓔ ꓙ ꓟ ꓬꓰ ꓠ ꓡꓳꓼ ꓥ= ꓞꓳ ꓤꓽ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓚꓵꓸ ꓛꓬꓽ ꓞꓳ ꓤꓽ ꓐꓯꓹ ꓟ ꓪ ꓙꓵꓽ ꓪꓽ ꓕꓱ ꓟ ꓔꓯ ꓮꓽ ꓙꓵꓽ ꓪ ꓠꓹ ꓟ ꓐꓱ ꓶꓽ ꓒ ꓐꓲ ꓒ ꓜꓲꓼ ꓪ ꓠꓹ ꓟ ꓐꓱ ꓶꓽ ꓢꓯꓼ ꓕꓵꓼ ꓠ ꓡꓳ ꓥ=

ꓞꓳ ꓤꓽ ꓕꓲꓽ ꓣꓳ ꓪ ꓙꓵꓼ ꓪꓽ ꓔꓯ ꓗꓽ ꓕꓸ ꓟ ꓓꓽ ꓔꓳꓹ ꓔ ꓟ ꓞꓳ ꓤꓽ ꓟꓬꓱ ꓓꓳꓽ ꓔꓯ ꓐꓬ ꓡꓰ ꓝꓲꓹ ꓟ ꓕꓱ ꓡꓱ ꓫꓵꓽ ꓮꓽ ꓙꓵꓽ ꓔꓯ ꓟꓽ ꓙꓳ ꓡꓰ ꓠ ꓣꓳ ꓠꓬ ꓬꓰ ꓠ ꓡꓳꓼ ꓥ= ꓖꓳ ꓕꓯ ꓢꓲ ꓞꓳ ꓤ ꓕꓲꓽ ꓣꓳ ꓪ ꓙꓵꓽ ꓪꓽ ꓔꓯ ꓪ ꓡ ꓓꓴ ꓥꓳ= ꓞꓳ ꓤꓽ ꓕꓲꓽ ꓣꓳ ꓪ ꓙꓵꓽ ꓪꓽ ꓟꓽ ꓪ ꓠꓹ ꓟ ꓬꓰꓹ ꓟ ꓠꓬ ꓞꓳ ꓤꓽ ꓕꓲꓽ ꓣꓳ ꓬꓲ ꓒꓵꓽ ꓞꓳ ꓤꓽ ꓕꓲꓽ ꓣꓳ ꓢꓯꓸ ꓔꓬ ꓠꓹ ꓟ ꓚꓱꓹ ꓔꓯ ꓟꓽ ꓒꓵꓽ ꓖꓶꓽ ꓡꓹ ꓟ ꓟꓽ ꓘꓳꓹ ꓣꓴ ꓖꓶꓽ ꓡꓹ ꓟ ꓡꓰ ꓐꓰ ꓕꓲꓽ ꓡꓰꓸꓼ ꓥ ꓡꓳ= ꓞꓳ ꓤꓽ ꓬꓲ ꓜꓴ ꓬꓲ ꓟꓯꓼ ꓘꓴꓽ ꓗꓪ ꓞꓳ ꓤꓽ ꓢꓯꓼ ꓟꓬ ꓞꓳ ꓤꓽ ꓕꓲ ꓞꓲꓼ ꓡꓰꓸꓼ ꓔꓯ ꓗꓽ ꓔꓸ ꓙ ꓥꓺ ꓐꓮ ꓟ ꓠꓬ ꓬꓲ ꓪꓽ ꓟꓬꓱ ꓓꓳꓽ ꓐꓰ ꓬꓲ ꓪꓽ ꓪ ꓙꓵꓼ ꓪꓽ ꓔꓯ ꓗꓽ ꓕꓸ ꓙ ꓟ ꓥ ꓡꓳ= ꓞꓳ ꓤꓽ ꓕꓲ ꓣꓳ ꓠꓬ ꓮ ꓡꓰꓹ ꓫꓵꓽ ꓟꓬꓱꓽ ꓬꓰ ꓟ ꓗꓪ ꓥˍ ꓟꓲ ꓐ ꓪ ꓠꓬꓲ ꓔ ꓥ= ꓬꓲ ꓔꓯ ꓒꓵꓽ ꓗꓹ ꓬꓰ ꓢꓲ ꓘꓳꓹ ꓣꓴ ꓖꓶꓽ ꓠꓬꓲ ꓔ ꓥ= ꓖꓳ ꓟ ꓠꓬ ꓬꓲ ꓟꓬꓱ ꓓꓳꓽ ꓔꓯ ꓒꓵꓽ ꓗꓹ ꓬꓰꓹ ꓟ ꓥ ꓢꓲ ꓬꓲ ꓪ ꓙꓵꓼ ꓪꓽ ꓔꓯ ꓪ ꓒꓵꓹ ꓥ ꓐꓰ ꓢꓪꓼ ꓖꓶꓹ ꓟ ꓥˍ ꓡꓳ=