Iraq Muslim ꓐꓴ ꓡꓰ ꓐꓬ ꓡꓰ ꓟ ꓪꓽ ꓘꓴ ꓦꓲ ꓐꓴ ꓔꓯ ꓫꓬꓹ ꓖꓶˍ ꓟ

Iraq ꓗꓴꓷꓼ ꓗꓪ ꓟ No(2) ꓡꓳ ꓒꓱ ꓓꓽ ꓟ Mosul ꓗꓪ ꓙꓲ-ꓢꓴ ꓢꓲ ꓤ ꓐꓴ ꓔꓯ ISIS Islamist ꓛꓴꓽ ꓙꓳ ꓢꓴ ꓐꓴ ꓡꓰ ꓢꓰꓼˍ ꓟ ꓑꓶꓸ ꓓꓴ ꓛꓰꓹ ꓑꓬ ꓙꓰ ꓢꓲ ꓠꓬꓲꓸ ꓠꓬꓲ ꓗꓪ ꓛꓲꓺ ꓟꓽ ꓬꓲꓼ ꓡ ꓗꓷ ꓢꓰꓽ= ꓛꓴꓽ ꓙꓳ ꓢꓴ ꓜꓴ ꓡꓰ ꓙꓵꓽˍ ꓟ ꓠꓯꓸꓼ ꓗꓪ ꓐꓰ ꓡꓲꓹ ꓗꓷ ꓟꓶˍ ꓥˍ ꓟꓲ ꓢꓲꓺ ꓡꓲꓺ ꓟꓽ ꓗꓷ ꓡꓰ ꓢꓰꓽ ꓟ ꓪꓴꓸ ꓠꓬꓲ ꓬꓲꓼ ꓡ ꓟꓽ ꓑꓶꓸ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓟꓽ ꓟꓶ ꓫꓵ ꓢꓰꓽ ꓕꓯ ꓒꓬꓱꓼ ꓗꓳꓸ ꓗꓷ ꓟ ꓠꓬ ꓑ ꓫꓬ ꓐꓴ ꓠꓲꓹ ꓟ ꓔꓯ ꓢꓲꓺ ꓡꓲꓺ ꓟ ꓟꓶ ꓡꓰ ꓝꓲ ꓗꓷꓳ=

Sawaed el Muselya ꓐꓰ ꓟꓬꓱ ꓔ ꓟ Muslim ꓞꓳ ꓡꓯꓸ ꓣꓱꓽ ꓙ ꓜꓴꓻ ꓐꓴ ꓠꓬ ꓾ ꓛꓴꓽ ꓙꓳ ꓢꓴ ꓐꓴ ꓒꓬ ꓗꓷˍ ꓟ ꓗꓪ ꓐꓰ ꓐꓬ ꓡꓰ ꓟ ꓪꓽ ꓘꓴ ꓦꓲꓻ ꓐꓴ ꓔꓯ ꓫꓬꓹ ꓡꓲꓸ ꓗꓷ ꓟ ꓥꓳ=ꓖꓳ ꓞꓳ ꓡꓯꓸ ꓐꓴ ꓠꓬ ꓗꓴꓷꓼ ꓘꓴꓽ ꓗꓪ ꓙꓵꓻ ꓠꓲꓹ ꓧꓶꓸ ꓡꓰˍ ꓟ ꓠꓲꓸ ꓡꓰ ꓠꓹ ꓟ ꓐꓰ ꓓꓵꓽ ꓙ ꓥꓳꓽ ꓗꓷ ꓟ ꓮ ꓙꓵꓽ ꓒꓳꓹ ꓡꓰꓼ ꓡ ꓠꓹ ꓟ ꓐꓱ ꓶ ꓬꓰ ꓔꓬ ꓟ ꓥ ꓡꓳ=

“ꓠꓲ-ꓠꓲ-ꓪꓱ ꓓꓰ ꓟꓵꓽ ꓐꓰ Mosul ꓗꓪ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓘꓶ ꓙꓵꓹ ꓟ ꓦꓬꓼ ꓠꓬꓲ ꓐꓴ ꓠꓬ ꓡꓳꓹ ꓬꓰ ꓢꓲ꓾ ꓢꓲꓺ ꓡꓲꓺ ꓟ ꓟꓲꓽ ꓟꓲ ꓓꓳꓺ ꓡꓻ ꓳ” ꓐꓰ ꓔꓲꓺ ꓒ Mekko ꓡꓰ ꓐꓯ ꓗꓷꓳ=

Mosul ꓡꓳ ꓒꓱ ꓗꓪ ꓟ ꓙꓲꓻ ꓫꓬ ꓢꓴ ꓕꓳ-ꓟ Syria ꓗ-ꓔꓳ-ꓡꓲ ꓪꓽ ꓘꓴ ꓦꓲ ꓗꓪ Muslim ꓞꓳ ꓡꓯꓸ ꓐꓴ ꓠꓬ ꓐꓬ ꓡꓰ ꓟ ꓮ ꓙꓵꓽ ꓫꓬꓹ ꓡꓲꓸ ꓔꓬ ꓟ ꓥ ꓢꓲ ꓾ ꓘꓰꓹ ꓙꓰ ꓗꓷ ꓟ ꓙꓲ-ꓢꓴ ꓢꓲ ꓤ ꓐꓴ ꓬꓲꓼ ꓡ ꓠꓹ ꓟ ꓥꓳ ꓡꓳꓸ ꓔꓬ ꓡꓳ= “Mosul ꓠꓬ ꓥꓪ ꓠꓴꓽ ꓟꓵꓽ ꓥ ꓟ ꓡꓰꓽ ꓟ ꓞꓲ ꓠꓴ ꓪ ꓐꓴ ꓟꓵꓽˍ ꓟꓲ ꓥ ꓡꓳ= ꓠꓴ ꓪ ꓟꓽ ꓔꓬ ꓠꓽ ꓟꓽ ꓐꓲꓺ ꓜꓲꓼ” ꓐꓰ ꓓꓳꓽ ꓦ ꓖꓶ ꓗꓷꓳ=

ꓔꓲꓺ ꓒ Mekko ꓠꓬ ꓟꓵꓽ ꓖꓳ ꓟ ꓗꓪ ꓟ ꓙꓲ-ꓢꓴ ꓢꓲ ꓤ 200 ꓦꓲꓻ ꓟꓽ ꓞꓲ ꓔꓯ ꓖꓳ ꓗꓪ ꓐꓰ ꓓꓳ ꓙꓰ ꓐ ꓡ ꓠꓹ ꓟ ꓬꓰ ꓙ ꓗꓷ ꓟ ꓥꓳ= ꓖꓳ ꓕꓯ ꓙꓲ-ꓢꓴ ꓢꓲ ꓤ ꓠꓬ 45000 ꓛꓲꓺ ꓙꓳ ꓗꓷꓳ= ꓔꓲꓺ ꓒ ꓠꓬ “ꓞꓳ ꓡꓯꓸ ꓕꓱ ꓕꓶꓹ ꓠꓬ ꓮ ꓟꓬꓹ ꓣꓳ ꓟꓽ ꓙꓳ ꓥˍ ꓟꓲ ꓮ ꓘꓶꓸ ꓙꓲꓻ ꓢꓲ ꓥꓳ ꓡꓳꓸ ꓓꓴ ꓙꓳ ꓝꓲˍ ꓡꓳ” ꓐꓰ ꓐꓯ ꓖꓶ ꓗꓷꓳ=

Photo courtesy of : Aleteia

https://bit.ly/32s2TAC