ꓡ ꓞꓳ ꓥꓪꓽ ꓔꓴ ꓣꓯ ꓖꓶ ꓜꓽˍ ꓟ

 (ꓟ-ꓘꓳ = 6ꓽ34-44)

ꓬꓰ-ꓢꓴ ꓠꓬ ꓡꓲꓺ ꓗꓪ ꓐꓰ ꓓꓳ ꓡ_ ꓕꓯ ꓡ ꓞꓳ ꓬꓲ ꓜꓴ ꓓꓽ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓪ ꓠꓽ ꓡꓳꓸ ꓢꓴ ꓟꓽ ꓙꓳ ꓟ ꓮ ꓣꓳ_ ꓡꓰ ꓐꓰ ꓗꓹ ꓠꓬꓲ꓾ ꓬꓲ ꓬꓲ ꓪ ꓔꓯ ꓫꓱꓸ ꓤ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓘꓶꓽ ꓒꓴ ꓢꓲ꓾ ꓬꓲ ꓪ ꓔꓯ ꓟꓸ ꓟꓲ ꓮ ꓟꓬꓹ ꓟꓸ ꓖꓶ_ ꓡꓳ꓿

ꓟꓰꓻ ꓡ ꓠꓬ꓾ ꓬꓲ ꓛꓳ ꓒꓯ ꓐꓴ ꓬꓲ ꓔꓯ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓟꓵꓽ ꓕꓱ ꓟ ꓠꓽ ꓡꓲ ꓛꓲ ꓥ ꓡꓳ꓾ ꓟꓰꓻ_ ꓟꓲ ꓟꓰꓻ ꓬꓰꓳ꓿

ꓚꓳ ꓡꓳ ꓡꓳ ꓟ ꓟꓵꓽ_ ꓐꓰ ꓕꓲ ꓘꓹ ꓕꓲ ꓘꓹ ꓗꓪ ꓬꓲ ꓪ ꓚꓲ ꓛꓬ ꓜꓽ ꓓꓴ ꓪꓴꓻ ꓬꓰ ꓠꓹ ꓟ ꓬꓲ ꓪ ꓔꓯ ꓙꓰ ꓝꓲ꓾ ꓐꓯ_ ꓡꓳ꓿

ꓬꓲ ꓠꓽ ꓬꓲ ꓪ ꓔꓯ ꓒꓳꓹ ꓖꓶ ꓢꓲ꓾ ꓬꓲ ꓪ ꓔꓯ ꓠꓴ ꓪ ꓖꓶ ꓜꓽ ꓨ꓾ ꓐꓯ_ ꓡꓳ꓿ ꓬꓲ ꓪ ꓠꓬ ꓬꓲ ꓔꓯ꓾ ꓒꓴ ꓠꓬꓲꓽ ꓦꓬ ꓒꓵꓽ ꓜ ꓓꓴ ꓪꓴꓻ ꓢꓲ ꓬꓲ ꓪ ꓔꓯ ꓖꓶ ꓜꓽ ꓠꓹ ꓟ ꓥꓪ ꓠꓴꓽ ꓙꓰ ꓠꓯ_ ꓡꓺꓽ꓾ ꓐꓯ_ ꓡꓳ꓿

ꓬꓲ ꓬꓲ ꓪ ꓔꓯ꓾ ꓠꓴ ꓪ ꓒꓵꓼ ꓮ ꓟꓬꓺ ꓑꓬ ꓙꓳ_ ꓡꓳꓺꓽ꓿ ꓡꓳꓸ ꓠꓬꓲ ꓬꓰ꓾ ꓐꓯ_ ꓡꓳ꓿ ꓬꓲ ꓪ ꓢꓷ ꓡꓰ ꓕꓯ꓾ ꓤꓴ ꓒꓵꓼ ꓥꓪꓽ ꓑꓬ꓾ ꓥꓪꓸ ꓠꓬꓲꓽ ꓟ ꓙꓳ_ ꓡꓳ꓾ ꓐꓯ_ ꓡꓳ꓿

ꓮ ꓙꓵ ꓢꓴ ꓔꓯ ꓟꓳꓼ ꓠꓲꓹ ꓛꓵꓼ ꓗꓪ ꓕꓲ ꓧꓳꓽ ꓕꓲ ꓧꓳꓽ ꓐꓰ ꓠꓬꓲꓸ ꓠꓸ ꓝꓲ ꓠꓹ ꓟ꓾ ꓬꓲ ꓛꓳ ꓒꓯꓹ ꓐꓴ ꓔꓯ ꓕꓵꓼ ꓪ ꓖꓶ_ ꓡꓳ꓿

ꓖꓳ ꓡꓱ ꓠꓬ ꓬꓲ ꓪ ꓕꓲ ꓚꓱꓹ ꓕꓲ ꓚꓱꓹ ꓐꓰ ꓠꓬꓲꓸ ꓠꓸ_ ꓡꓳ꓿ ꓕꓲ ꓧꓳꓽ ꓕꓲ ꓦꓬꓻ ꓣꓳ_ ꓟꓲ ꓙꓳ_ ꓡꓳ꓾ ꓥꓪꓽ ꓞꓲ ꓣꓳ_ ꓟꓲ ꓙꓳ_ ꓡꓳ꓿

ꓬꓰ-ꓢꓴ ꓠꓬ ꓤꓴ ꓒꓵꓼ ꓕꓱ ꓥꓪꓽ ꓑꓬ_ ꓐꓰ ꓥꓪꓸ ꓠꓬꓲꓽ ꓟ ꓣꓴ ꓔ ꓢꓲ ꓠꓬꓲ꓾ ꓟꓴ ꓗꓪ ꓗꓪ ꓔꓺ ꓥ ꓐꓰ ꓡꓳꓸ ꓢꓲ꓾ ꓶꓼ ꓥꓳ ꓙꓱ ꓢꓲ ꓠꓬꓲ꓾ ꓤꓴ ꓒꓵꓼ ꓦꓶꓹ ꓢꓲ ꓮ ꓙꓵ ꓢꓴ ꓟꓲ ꓙꓬ ꓗꓪ ꓔꓸ ꓖꓶ ꓠꓹ ꓟ꓾ ꓬꓲ ꓠꓬ ꓛꓳ ꓒꓯꓹ ꓐꓴ ꓔꓯ ꓖꓶ_ ꓡꓳ꓿ ꓥꓪꓸ ꓖꓳ ꓠꓬꓲꓽ ꓟ_ ꓟꓲ ꓮ ꓙꓵ ꓢꓴ ꓔꓯ ꓐꓱꓻ ꓖꓶ_ ꓡꓳ꓿

ꓖꓳ ꓡꓱ ꓠꓬ ꓬꓲ ꓪ ꓮ ꓙꓵ ꓢꓴ ꓜꓽ ꓢꓲ ꓐꓳ ꓡꓰ_ ꓡꓳ꓿

ꓬꓲ ꓪ ꓠꓬ ꓤꓴ ꓒꓵꓼ_ ꓐꓰ ꓥꓪꓸ ꓧꓪꓽ ꓬꓲ ꓧꓶꓽ ꓬꓲ ꓟꓲ ꓞꓲꓻ ꓠꓬꓲꓽ ꓠꓳꓸ ꓘꓴꓽ ꓖꓳꓺ ꓫꓺ ꓟꓶ_ ꓡꓳ꓿

ꓤꓴ ꓒꓵꓼ ꓜꓽ ꓢꓴ ꓞꓳ ꓑ ꓤ ꓠꓬ ꓥꓪꓽ ꓔꓴ ꓣꓳ ꓙꓳ_ ꓡꓳ꓿