ꓘꓶꓽ ꓫꓵꓼ ꓡꓵ ꓗꓪ ꓟ ꓘꓴ ꓜꓲꓼ ꓞꓳ ꓐꓰ ꓙꓲ-ꓢꓴ ꓟꓸ ꓟꓲ

          ꓚꓬꓴ ꓢꓲ-ꓒ ꓡ ꓠꓹ ꓟ ꓟꓸ ꓟꓲ 1 ꓗꓪ ꓐꓰ ꓥꓪꓽ ꓗꓪ ꓛꓲ ꓢꓳ ꓡꓳꓹ ꓬꓰꓳ=ꓡ: ꓞꓳ ꓕꓲ: ꓣꓳ ꓗꓪ ꓐꓰ ꓞꓳ ꓫꓵ: ꓓ: ꓟ ꓒꓬꓱꓼ ꓡ ꓢꓲ꓾ ꓗꓴꓷꓼ ꓣꓴ ꓟ ꓟ. ꓟꓲ ꓢꓳ ꓡꓳꓹ ꓬꓰꓳ= ꓬꓲ. ꓪꓴ. ꓗꓪ ꓐꓰ ꓬꓲ. ꓟꓶ: ꓗꓪ ꓛꓲ ꓪꓴ-ꓢ ꓡꓰ ꓧꓳ: ꓣꓱ: ꓢꓲ ꓘꓴ ꓜꓲꓼ ꓞꓳ ꓕꓲ: ꓟ ꓔꓶ ꓓꓳ ꓡꓰ ꓟ ꓠꓬ꓾ ꓠꓬꓲ ꓠꓬꓲ ꓗꓪ ꓛꓲ ꓬꓲ. ꓢꓷ ꓡꓰ ꓗꓴꓷ ꓝꓮꓲ ꓬꓲ ꓪ ꓪ: ꓘꓴ ꓦꓲ ꓥ ꓟꓲ ꓐꓬꓱꓼ ꓡꓱꓼ ꓡꓱꓼ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓮ ꓠꓱ ꓒꓵ: ꓒ: ꓐꓴ ꓡꓰ ꓫꓬꓹ ꓔꓲ ꓟ ꓙꓳ ꓞꓹ ꓡꓳ= ꓘꓴ ꓜꓲꓼ ꓞꓳ ꓗꓪ ꓧꓳꓼ ꓣꓱ: ꓢꓴ ꓕꓲ: ꓝ ꓖꓳ ꓕꓲ: ꓝ ꓗꓪ ꓐꓲ ꓜꓲꓼ ꓞꓹ ꓡꓳ= ꓬꓲ ꓪ ꓠꓬ ꓮ-ꓐ-ꓡ-ꓦ ꓪꓴ-ꓢ ꓬ-ꓢ ꓬ-ꓗꓴ ꓬꓲ ꓪꓴ-ꓢ ꓒꓵ: ꓒ: ꓐꓴ ꓡꓰ ꓧꓳ: ꓣꓱ: ꓡꓹ ꓟ ꓪꓴ-ꓢ ꓦ ꓡꓱ ꓚꓱꓹ ꓗꓪ ꓕꓶ ꓕꓶ ꓐꓰ ꓙꓵ ꓔꓬ ꓡꓳ= ꓦꓬꓼ ꓠꓬꓲ ꓕꓱ ꓟ ꓗꓪ ꓢꓲ- ꓒ ꓬꓰ- ꓢꓴ ꓡꓰ ꓬꓲ ꓟꓲ ꓠꓯ ꓗꓪ ꓡ ꓟ ꓬꓲ ꓑꓶ. ꓔꓯ ꓔꓱꓹ ꓔꓱꓹ ꓐꓰ ꓥꓪ ꓠꓬ ꓬꓲ-ꓢꓷ-ꓡꓰ ꓔꓯ ꓚꓬꓴ ꓢꓲ ꓒ: ꓙꓲ-ꓢꓴ ꓪ ꓔꓲ ꓟꓲ-ꓢ-ꓬ ꓥ ꓡꓳ= ꓐꓰ ꓬꓴ- ꓔ ꓡ: ꓞꓳ ꓗꓳ ꓡꓳ ꓗꓪ ꓟ. ꓟꓲ ꓚ ꓢꓲ ꓶꓼ ꓓꓳ ꓫꓱꓹ ꓓꓳ ꓟꓬꓱ: ꓬꓰ ꓢꓲ꓾ ꓪꓴ-ꓢ ꓚꓲ ꓚꓲ ꓥ ꓟ ꓢꓷ ꓡꓰ ꓓꓴ ꓮ ꓟꓬꓹ ꓫꓵ: ꓬꓰ ꓟꓳ ꓖꓶ ꓡꓳ= ꓖꓳ ꓡꓱ ꓥ ꓟꓲ ꓬꓴ-ꓔ ꓡ: ꓞꓳ ꓐꓴ ꓒ-ꓡꓲ-ꓢꓷ ꓐꓴ꓾ ꓔꓲ ꓒ ꓐꓴ ꓠꓬ ꓬꓰ-ꓢꓴ ꓬꓰ ꓟ ꓢꓷ ꓡꓰ ꓓꓴ ꓔꓯ ꓡꓳ. ꓟꓳ ꓥ ꓟꓲ ꓬꓰ-ꓢꓴ ꓔꓯ ꓠꓬꓲ ꓣꓳ ꓢꓲ ꓠꓴ ꓠꓬ ꓬꓳ-ꓢꓷ ꓐꓰ ꓟ-ꓡꓲ-ꓬ ꓤ: ꓟ: ꓥ ꓡ? ꓮ ꓡꓰ ꓢꓲ ꓚꓬꓴ ꓢꓲ-ꓒ ꓒꓬꓱꓼ ꓡ ꓓ ꓐꓰ ꓬꓰ-ꓢꓴ ꓔꓯ ꓔꓳꓹ ꓟ ꓐꓰ ꓕꓲ: ꓤꓶ ꓖꓳ ꓕꓲ: ꓤꓶ: ꓗꓪ ꓙꓲ-ꓢꓴ ꓔꓯ ꓟꓳ ꓖꓴ ꓢꓲ ꓟꓷ ꓠꓷꓹ ꓝ. ꓘꓶ: ꓮ ꓙꓵ: ꓔꓯ ꓥ ꓟꓲ ꓟ: ꓘꓳꓹ ꓣꓴ= ꓬꓲ ꓪ ꓥꓳ ꓡꓳ ꓟ ꓠꓬ꓾ ꓚꓬꓴ ꓢꓲ-ꓒ ꓛꓲ ꓡ ꓠꓬ ꓐꓶ: ꓞꓳ ꓮ ꓙꓵ: ꓔꓯ ꓢꓰꓼ ꓧꓪ ꓡꓰ ꓢꓲ ꓬꓲ-ꓢꓷ-ꓡꓰ ꓗꓴꓷꓼ ꓔꓶ ꓡꓹ ꓥꓳ ꓐꓰ ꓥꓳ ꓡꓳ. ꓢꓲ ꓙꓵ ꓔꓬ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓟꓲ ꓠꓯ ꓕꓲ: ꓒꓳꓹ ꓗꓪ ꓟ ꓔꓯ ꓥꓳ ꓡꓳ ꓗꓷꓳ=

           ꓪꓴ-ꓢ ꓥꓳ ꓡꓳ. ꓟ ꓠꓬ ꓕꓲ: ꓟꓲ ꓠꓯ ꓡꓱꓼ ꓗꓪ ꓟ ꓡ: ꓞꓳ ꓔꓯ ꓚꓬꓴ ꓠꓹ ꓟ ꓬꓲ ꓤ ꓔꓲ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡꓹ ꓟ ꓠꓬ ꓪꓴ-ꓢ ꓬꓲ ꓔꓶ ꓙꓱ: ꓓ: ꓟ ꓥ ꓡꓳ= ꓕꓱ ꓟ ꓪꓴ. ꓠꓬꓲ ꓘꓶ: ꓫꓵꓼ ꓡꓵ ꓗꓪ ꓟ ꓘꓴ ꓜꓲꓼ ꓞꓳ ꓐꓰ ꓙꓲ-ꓢꓴ ꓔꓳꓹ ꓡꓯ ꓘꓳ ꓠ ꓗꓷ ꓡꓰ ꓟ ꓥ ꓡꓳ= ꓬꓰ-ꓢꓴ ꓡꓰ ꓝꓲ- ꓓꓴ ꓒꓲ-ꓕꓱ ꓔꓯ ꓐꓯ ꓟ ꓐꓯ ꓘꓶ: ꓠꓬ ꓬꓲ ꓪ ꓔꓯ ꓥ ꓟꓲ ꓐꓯ ꓜꓯꓼ ꓡꓰꓳ= ꓮ ꓡꓰꓳ ꓐꓯ ꓠꓬ ꓒꓲ-ꓕꓱ ꓔꓯ ꓢ-ꓓꓯ ꓠꓴ ꓥꓪ ꓔꓯ ꓐꓰ ꓧꓹ ꓙꓰ= ꓠꓴ ꓠ: ꓪꓴ-ꓢ ꓠꓲꓹ ꓡꓶ: ꓔꓯ ꓟ: ꓠꓲꓹ ꓥꓳ= ꓞꓳ ꓤ ꓠꓲꓹ ꓟ ꓔꓯ ꓡꓰ ꓠꓲꓹ ꓥꓳ ꓡꓳ= ꓐꓰ ꓐꓯ ꓟ ꓕꓲ: ꓡꓲꓹ ꓐꓰ ꓬꓴ-ꓔ ꓡ: ꓞꓳ ꓐꓴ ꓥ ꓟꓲ ꓡ: ꓞꓳ ꓠꓵ ꓟ ꓔꓯ ꓡꓰ ꓛꓳ ꓢꓲ ꓪꓴ-ꓢ ꓠꓵ ꓟ ꓔꓯ ꓒꓲꓹ ꓡꓳ ꓗꓷ ꓠꓬꓲ ꓬꓰ-ꓢꓴ ꓔꓯ ꓝꓴꓲ ꓓꓲ ꓡꓳ= ꓢꓯ. ꓬꓲꓼ ꓡ ꓟ ꓔꓯ ꓥ ꓟꓲ ꓢꓯ. ꓬꓲꓼ ꓡ-ꓳ꓾ ꓐꓰ ꓟ. ꓟꓲ ꓟ: ꓚ ꓟ. ꓠꓹ ꓟ ꓟꓯꓼ ꓒ: ꓐꓴ ꓔꓯ ꓒꓴ ꓖꓶ: ꓢꓲ ꓘꓶ: ꓬꓲ: ꓔꓬ ꓟ ꓫ. ꓪ ꓘꓶ: ꓠꓬ ꓠꓬꓲ ꓠꓬꓲ ꓗꓪ ꓛꓲ ꓬꓴ-ꓔ ꓡ: ꓞꓳ ꓐꓴ ꓗꓳꓹ ꓡꓳ ꓗꓪ ꓟ. ꓟꓲ ꓕꓱ ꓟ ꓓꓹ ꓡꓳ=