ꓠꓲꓹ ꓒꓴ ꓗꓹ ꓛꓲˍ ꓟ ꓔꓯ ꓕꓽ ꓟꓲ ꓡꓰ

ꓠꓽ ꓦꓬꓼ ꓠꓬꓲ Angelus ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ Francis ꓠꓬ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓟꓸ ꓟꓲꓽ ꓔꓯ ꓐꓯ ꓟꓳꓸ ꓖꓶˍ ꓕꓯ ꓾ꓬꓳ-ꓦ ꓠꓬ ꓬꓲꓸ ꓦꓬꓼ ꓠꓬꓲ ꓕꓯ ꓧꓳꓽ ꓪꓴꓸ ꓟꓴ ꓢꓴ ꓕꓲ ꓣꓳ ꓒꓬꓱꓼ ꓗꓷꓳ= ꓚꓲꓸ ꓛꓬ ꓐꓱ ꓶ ꓡꓰꓽ ꓟꓽ ꓡꓳꓸ ꓠꓬꓲ ꓠꓬꓲ ꓐꓰ ꓬꓰ-ꓢꓴ ꓙꓲ-ꓢꓴ ꓾ ꓠꓬꓲ ꓟꓳ ꓓꓴ ꓔꓯ ꓟꓳꓸ “ꓟꓲ-ꓢ-ꓬ” ꓓꓳ ꓡˍ ꓟ ꓦꓬꓼ ꓠꓬꓲ ꓔꓯ ꓥꓳ ꓡꓳꓸˍ ꓟ ꓐꓰ ꓠꓲꓹ ꓒꓵꓽ ꓠꓲꓹ ꓗꓪ ꓐꓰ ꓣꓱꓽ ꓬꓰ ꓗꓷꓳ=

ꓙꓵꓻ ꓢꓴ ꓐꓴ ꓐꓱ ꓶ Advent ꓦꓬꓼ ꓠꓬꓲ ꓠꓬ꓾ ꓮ ꓘꓶꓸ ꓠꓲꓹ ꓠꓵˍ ꓟ ꓞꓳ ꓡ ꓕꓲ ꓣꓳ ꓣꓳꓽ ꓔꓬ ꓗꓪ ꓛꓲ ꓡˍ ꓟ ꓔꓯ ꓗꓹ ꓛꓲꓽ ꓛꓲꓽ ꓡꓰ ꓥꓳ ꓡꓳꓸ ꓔꓬ ꓟ ꓬꓲꓸ ꓙꓵꓹ ꓔꓯ ꓫꓱˍ ꓡꓳ= ꓗꓹ ꓛꓲꓽ ꓠꓲꓹ ꓖꓳ ꓟ ꓠꓬ ꓾ ꓪꓴ-ꓢ ꓐꓰ ꓣꓳ ꓞꓳ ꓤ ꓐꓴ ꓧꓳꓹ ꓡꓯ ꓘꓳꓹ ꓟ ꓗꓪ ꓐꓰ ꓒꓬꓱꓼ ꓡˍ ꓟ ꓔꓯ꓾ ꓐꓯ ꓟꓸ ꓖꓶ ꓗꓷꓳ= “ꓪꓴ-ꓢ ꓠꓬ ꓣꓳ ꓐꓰ ꓮ ꓘꓶꓸ ꓠꓶꓽ ꓡ ꓠꓬ꓾ ꓣꓳ ꓥ ꓟꓲ ꓮ ꓘꓶꓸ ꓗꓹ ꓛꓲꓺ ꓡ꓾ ꓪꓴ-ꓢ ꓣꓳ ꓐꓰ ꓶꓽ ꓡꓰ ꓕꓯ ꓣꓳ ꓥˍ ꓟꓲ ꓮ ꓘꓶꓸ ꓠꓲꓹ ꓟ ꓫ ꓡ꓾ ꓗꓹ ꓥꓳ”꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯˍ ꓡꓳ=

ꓠꓽ ꓦꓬꓼ ꓠꓬꓲ ꓗꓪ ꓵˍ ꓟ ꓢꓲꓽ ꓫꓬ ꓕꓳꓽ ꓶ ꓝꓲ ꓔꓯ ꓟꓳꓸ ꓬꓲ ꓠꓬ꓾ ꓬꓳ-ꓦ ꓠꓬ ꓬꓳ-ꓢꓷ ꓐꓰ ꓟ-ꓡꓲ ꓐꓴ ꓗꓪ ꓐꓰ ꓗꓳꓸ ꓗꓷ ꓠꓬ ꓬꓰ-ꓢꓴ ꓔꓯ ꓓꓽ ꓪꓴꓸ(ꓬꓲꓸ ꓪꓴꓸ) ꓘꓳꓹ ꓣꓴ ꓢꓴ ꓥ ꓡꓳ=

ꓬꓳ-ꓦ ꓠꓬ ꓦꓬꓼ ꓠꓬꓲ ꓖꓳ ꓟ ꓕꓯ ꓧꓳꓽ ꓪꓴꓸ ꓟꓴ ꓢꓴ ꓕꓲ ꓣꓳ ꓥ ꓟꓲ꓾ ꓚꓲ ꓛꓬ ꓟꓬꓱꓽ ꓓꓳ ꓔꓯ ꓛꓵꓹ ꓔꓴˍ ꓟ ꓟꓽ ꓬꓰ ꓬꓰ꓾ ꓬꓲ ꓗꓸ ꓠꓯꓸ ꓛꓲꓺ ꓡˍ ꓟ ꓬꓰ-ꓢꓴ ꓔꓯ ꓡꓰꓽ ꓟꓬꓱꓽ ꓓꓳ ꓖꓶ ꓢꓴ ꓥ ꓡꓳ=

“ꓙꓲ-ꓢꓴ ꓢꓲ ꓤ ꓗꓹ ꓛꓲꓽˍ ꓟ”

ꓚꓲ ꓛꓬ ꓛꓳꓽ ꓚꓲ ꓛꓬ ꓓꓵꓽ ꓙˍ ꓟ ꓟꓽ ꓬꓰ ꓬꓰ꓾ ꓬꓰ-ꓢꓴ ꓐꓱ ꓶ ꓓꓵꓽ ꓙˍ ꓟ꓾ ꓬꓰˍ ꓟ ꓠꓬ ꓙꓲ-ꓢꓴ ꓢꓲ ꓤ ꓗꓹ ꓛꓲꓽˍ ꓟ ꓥ ꓡꓳ=ꓢꓲꓺ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡ ꓢꓲ꓾ ꓞꓳ ꓤ ꓮ ꓙꓵꓽ ꓔꓯ ꓐꓲꓺ ꓙꓲꓼˍ ꓟ ꓞꓳ ꓤ ꓤꓶꓻ ꓔꓯ ꓖꓶˍ ꓟ ꓠꓬꓲ ꓟꓳ ꓓꓴ ꓥ ꓡꓳ꓾ ꓐꓰ ꓐꓯ ꓗꓷꓳ=

ꓝ ꓢꓲ ꓔꓲꓺ ꓒ ꓪ ꓔꓲ ꓡꓰ꓾ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓠꓬ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓐꓱ ꓶ ꓮ ꓟꓬꓹ ꓢꓯꓼ ꓕꓵꓼ ꓗꓷꓳ= ꓗꓹ ꓛꓲꓽˍ ꓟ ꓓꓳꓽ ꓚˍ ꓟ ꓟꓬꓱꓽ ꓠꓽ ꓢꓲꓹ ꓪꓰ ꓟꓲꓺ ꓗꓪ ꓙꓻ ꓫꓱꓽ ꓔꓬ ꓟ ꓔꓯ ꓐꓯˍ ꓟ ꓟꓽ ꓥ= ꓬꓳ-ꓦ ꓠꓬ ꓬꓲ ꓞꓲꓼ ꓣꓳˍ ꓕꓯ ꓡꓰ ꓟꓲ ꓠꓯ ꓗꓹ ꓛꓲꓽ ꓓꓴ ꓮ ꓙꓵꓽ ꓡꓳ ꓦ ꓗꓷ ꓢꓲ꓾ ꓪꓴ-ꓢ ꓔꓯ ꓬꓲꓸ ꓪꓴꓸ ꓗꓶ ꓔ ꓢꓲ ꓠꓬꓲ꓾ ꓪꓴ-ꓢ ꓐꓯ ꓘꓶꓽ ꓔꓯ ꓬꓲꓸ ꓕꓲ ꓖꓳ ꓓꓱꓽ ꓕꓲ ꓶꓼ ꓟꓬ ꓡꓱꓸꓼ ꓠ ꓠꓹ ꓗꓷꓳ= ꓡꓲ ꓛꓲ ꓗꓪ ꓙꓰ ꓢꓲ ꓢꓲꓽ ꓫꓬ ꓟ ꓦ ꓬꓲ ꓘꓴˍ ꓟ ꓗꓪ ꓙꓰ ꓐ ꓡ ꓠꓹ ꓟ ꓐꓱ ꓶ ꓣꓱꓽ ꓟꓽ ꓬꓯꓼ ꓟ ꓮ ꓙꓵꓽ ꓔꓯ ꓡꓳ ꓩꓴ ꓗꓷꓳ꓾ ꓐꓰ ꓐꓯ ꓖꓶ ꓡ ꓗꓷꓳ=

“ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓘꓴ ꓔ ꓟ ꓟꓶ ꓢꓴ ꓐꓱ ꓶ ꓔꓯꓺ ꓢꓳ ꓓꓴ”

ꓔꓲꓺ ꓒ ꓪ ꓔꓲ ꓡꓰ ꓐꓯˍ ꓟ ꓠꓬ꓾ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓬꓲ ꓔꓯ ꓙꓳˍ ꓟ ꓣꓱꓽ ꓛꓰ ꓠꓬ ꓠꓱꓸ ꓐꓯꓼ ꓔꓯ ꓟꓽ ꓫꓱꓸ= ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓞꓳ ꓤ ꓤꓶ ꓒꓵꓽ ꓶ ꓔꓯ ꓧꓪꓺ ꓔꓬ ꓢꓴ ꓐꓴ ꓐꓰ꓾ ꓔꓱꓹ ꓚꓵˍ ꓟ ꓠꓲꓹ ꓒꓴ ꓗꓹ ꓛꓲ ꓠꓲꓹ ꓔꓯ ꓧꓪ ꓔꓬ ꓢꓴ ꓐꓴ ꓐꓱ ꓶ ꓔꓯꓺ ꓢꓳ ꓓꓴ ꓕꓲ ꓟ ꓥ ꓡꓳ= ꓟꓬꓽ ꓠꓬꓲ ꓾ ꓬꓳ-ꓦ ꓠꓬ ꓘꓴ-ꓜꓲ-ꓞꓳ ꓚꓱꓹ ꓢꓳˍ ꓟ ꓢꓳ ꓦꓲ ꓗꓪ꓾ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓘꓴ ꓟꓶ ꓢꓴ ꓐꓱ ꓶ ꓔꓯꓺ ꓢꓳ ꓓꓴ ꓥ ꓡꓳ= ꓕꓱ ꓡꓱ ꓐꓯˍ ꓟ ꓗꓪ ꓾ ꓬꓲ ꓪ ꓐꓴ ꓠꓬ ꓚꓲ ꓛꓬ ꓠꓲꓹ ꓫꓵˍ ꓟ ꓾ ꓟꓲ ꓠꓯ ꓠꓲꓹ ꓫꓵˍ ꓟ ꓗꓪ ꓐꓰ ꓬꓲ ꓪ ꓔꓬ ꓗꓪ ꓡ ꓠꓹ ꓟ ꓞꓳ ꓤ ꓔꓯ ꓘꓴˍ ꓟ ꓟꓽ ꓥ ꓥ꓾ ꓬꓰ-ꓢꓴ ꓙꓲ-ꓢꓴ ꓔꓬ ꓗꓪ ꓛꓲ ꓬꓰ ꓠ ꓧꓳꓽ ꓦ ꓖꓶ ꓐ ꓡˍ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯˍ ꓗꓷꓳ=

ꓡꓳꓹ ꓬꓰ ꓗꓪ ꓬꓲꓺ ꓒ ꓪ ꓔꓲ ꓡꓰ ꓾ ꓙꓵꓻ ꓢꓴ ꓐꓴ ꓔꓯ “ꓪꓴ-ꓢ ꓬꓲ ꓚꓬꓴ ꓙˍ ꓟ ꓙ ꓟꓳ ꓘꓶꓽ ꓔꓯ ꓢꓲꓺ ꓡꓲꓺ ꓐꓰ ꓡꓳꓸ ꓠꓬꓹ ꓢꓲ꓾ ꓪꓴ-ꓢ ꓐꓯ ꓘꓶ ꓔꓯ ꓠ ꓠꓹ ꓢꓲ ꓠꓬꓲ ꓾ ꓚꓲ ꓛꓬ ꓡꓯꓼ ꓖꓳꓼ ꓗꓪ ꓗꓶ ꓔ ꓟ ꓟꓹ ꓟ ꓟ-ꓡꓲ ꓡꓰ ꓕꓱ ꓟ ꓮ ꓙꓵꓽ ꓠꓬ ꓐꓲ ꓜꓲꓼ ꓡꓰ ꓟ ꓔꓯ ꓟꓳ ꓪ ꓠꓹ ꓟ ꓐꓱ ꓶ꓾ Angelus ꓪꓽ ꓘꓴˍ ꓟ ꓗꓪ ꓐ ꓠꓹ ꓟ ꓐꓯ ꓗꓷꓳ= ꓟ-ꓡꓲ ꓗꓪ ꓐꓰ ꓪꓴ-ꓢ ꓐꓰ ꓠꓶꓽ ꓡꓰˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓘꓴ-ꓜꓲ-ꓞꓳ ꓠꓬ ꓟ-ꓡꓲ ꓔꓯ “ꓣꓳ ꓐꓴ ꓗꓹ ꓛꓲꓽ ꓓꓴ ꓬꓲꓸ ꓚꓳ ꓟꓶ” ꓐꓰ ꓘꓴˍ ꓟ ꓔꓯˍ ꓟ ꓐꓯ ꓟꓳꓸ ꓖꓶ ꓗꓷ ꓢꓲ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚˍ ꓟ ꓔꓯ ꓠꓽ ꓗꓷꓳ=

https://bit.ly/37gePID